Mga Hapot Hale sa mga Parabasa
◼ An mga anghel espiritu, na daing materyal na mga hawak, kaya taano ta ilinaladawan nindo sinda sa mga ilustrasyon na may mga pakpak? Ini daw relihiyosong tradisyon sana?
Parate ming ilinaladawan an mga anghel na may mga pakpak huli sa simbolikong mga paglaladawan na manonompongan sa Biblia.
Tama kamo sa pagsabing an espiritung mga linalang dai nin materyal na mga hawak na may literal na mga pakpak—ni mga lalauogon, kamot, bitis, o iba pang kabtang nin lawas. Pero, may okasyon, na kan magpaheling an mga anghel sa mga lingkod nin Dios, siertong sinda kaagid nin normal na mga tawo kun helingon, huli ta namaluan sinda nin siring.—Genesis 18:2, 22; 19:1; Hokom 6:11-22.
Alagad, may panahon na an mga tawo nagkaigwa nin mga bisyon nin mga anghel asin ilinadawan sinda. Si propeta Ezequiel nakaheling nin “apat na nabubuhay na linalang,” asin sa saro pang bisyon, ipinamidbid nia an mga ini bilang mga anghel na may ranggong inaapod na mga kerubin. (Ezequiel 1:5; 9:3; 10:3) An kada saro sa mga anghel na ini may apat na pakpak, na nagpapaheling kan saindang abilidad na maghimate nin marikas sa mga pagboot nin Dios sa ano man na direksion. “Dai sinda minabirik kun sinda nagraralakaw; an kada saro minalakaw nin diretso . . . Kun saen boot na magduman an espiritu, duman sinda maduman. Dai sinda minabirik kun sinda minalakaw.”—Ezequiel 1:6, 9, 12.
Alagad an mga anghel na naheling sa bisyon bako perming parareho an hitsura. An anghelikong mga linalang na inapod na mga serapin na naheling ni Isaias may anom na pakpak. (Isaias 6:1, 2) May pagkakalaen pa ngani sa pag-oltanan kan mga bisyon ni Ezequiel. Sa enot, an mga anghel may mga bitis, mga kamot sa irarom kan kada saro kan apat na pakpak, asin apat na lalauogon (siring sa lalauogon nin tawo, leon, baka, asin agila). Sa saiyang masunod na bisyon, an saro sa mga lalauogon siring sa kerubin imbes na sa baka, na tibaad nagpaparisa sa dakulang kapangyarihan kan mga kerubin. Sa saro pang bisyon nin mga adorno kan simbolikong templo, nakaheling si Ezequiel nin mga kerubin na may duwa sanang lalauogon, an saro nin sa tawo asin an saro pa sa leon. (Ezequiel 1:5-11; 10:7-17; 41:18, 19) Sa Kabanalbanale kan tabernakulo, siring man sa templo na ipinatindog ni Salomon sa Jerusalem, may mga kerubin na may duwang pakpak. Ini yaon sa bulawan na takop kan kaban na inaapod na kaban nin tipan. An duwang bulawan na kerubin magkaatubang, asin kapwa may duwang pakpak na nakatatahob sa Kaban. (Exodo 25:10-22; 37:6-9) Sa ibabaw kan Kaban (asin sa takop kaiyan) sa templo ni Salomon may duwang mas darakulang napapatos nin bulawan na mga kerubin, na an kada saro may duwang nakaunat na pakpak.—1 Hade 8:6-8; 1 Cronica 28:18; 2 Cronica 5:7, 8.
Isinurat ni Josephus: “Kun para sa mga kerubin mismo, mayong makasasabi o makaiimahinar kun ano an hitsura ninda.” Kaya, ibinabase kan ibang iskolar asin mga parapinta an saindang pagladawan sa mga anghel (partikularmente sa mga kerubin) sa inaapod na suanoy na Near Eastern na mga tipo nin mga dios sa pormang may pakpak na mga hayop. Pero an mas mapananarigan na giya iyo an komento ni Ezequiel na an mga naheling nia “kaagid nin tawo.” (Ezequiel 1:5) Kaya kun an langitnon na mga anghel iiniilustrar sa samong publikasyon, sa pankagabsan ilinaladawan mi sinda bilang pangenot nang nasa pormang tawo. Ilinaladawan mi sindang may mga pakpak huli sa kadakol na Biblikal na paglaladawan sa manlaenlaen na anghel na may mga pakpak asin huli sa mga komento manongod sa mga anghel na “naglalayog.”—Kapahayagan 14:6; Salmo 18:10.
Ultimo, an pahina 288 kan Revelation—Its Grand Climax At Hand! nagladawan sa may pakpak na langitnon na linalang, na may korona sa saiyang payo asin liyabe sa saiyang kamot. Ini an malinaw na representasyon kan Kapahayagan 20:1: “Naheling ko an sarong anghel na naghihilig hale sa langit na igwa kan liyabe kan bungaw asin sarong dakulang kadena sa saiyang kamot.” Sinasabot ta na an anghel na ini na may liyabe iyo an pinamuraway na si Jesu-Cristo. An ilustrasyon nagpapaheling saiya na may mga pakpak tanganing makaoyon sa katotoohan na an mga anghel na naheling sa bisyon parateng may mga pakpak.