Ngonyan Na an Panahon na Hanapon si Jehova
“Kun manongod ki Jehova, dinungaw nia hale sa langit mismo an mga aki nin mga tawo, tanganing helingon kun baga igwa nin siisay man na may pagmansay, siisay man na naghahanap ki Jehova.”—SALMO 14:2.
1, 2. (a) Ano an pagheling nin dakol sa tunay na Dios, si Jehova? (b) Paano niato naaaraman na aram ni Jehova an pagkaindiperente nin katawohan?
NGONYAN, an tunay na Dios, si Jehova, isinisikwal nin mga ateista, agnostiko, mga parasamba sa falsong mga dios, asin minilyon na naghihingakong nagtutubod sa Dios alagad nagdedehar sa saiya huli sa saindang mga gibo. (Tito 1:16) An dakol naniniwala arog kan pilosopong Aleman kan ika-19 siglo na si Nietzsche na “an Dios gadan.” Si Jehova daw dai nagmamangno sa labi-labing pagkaindiperenteng ini? Dai, ta pinasabngan nia si David na sumurat: “An mangmang nagsabi sa saiyang puso: ‘Mayong Jehova.’ Nangagkarasala sinda, naggiribo sinda nin makababaldeng mga gibo. Mayo nin siisay man na naggigibo nin marahay.”—Salmo 14:1.
2 Si David nagpadagos: “Kun manongod ki Jehova, dinungaw nia hale sa langit mismo an mga aki nin mga tawo, tanganing helingon kun baga igwa nin siisay man na may pagmansay, siisay man na naghahanap ki Jehova.” Iyo, an Soberanong Kagurangnan aram an mga naghihingoang mamidbid asin paglingkodan sia. Kaya, an odok niatong paghanap sa saiya ngonyan napakahalaga. Iyan an magdedeterminar sa pag-oltanan nin daing katapusan na buhay asin daing katapusan na pagkapara.—Salmo 14:2; Mateo 25:41, 46; Hebreo 11:6.
3. Ano an potensial para sa ngapit?
3 Kun siring, masasabotan niato kun taano ta napakahalaga na tabangan niato an iba na hanapon si Jehova ngonyan. Minilyon pa an noarin man dai pa nakaolay nin mga Saksi ni Jehova o nakadangog kan “maogmang bareta kan kahadean.” Asin kun pira pa an makadudugang sa bilang kan “dakulang kadaklan” bago an “dakulang kahorasaan,” dai niato aram. Alagad tunay na yaon an potensial para sa dakol pa na hanapon asin manompongan si Jehova Dios sa haraning ngapit bago mahuri an gabos. An hapot ngonyan iyo ini, Ano an magigibo niato tanganing matabangan an kadakol pa na makanompong sa Dios?—Mateo 24:14; Kapahayagan 7:9, 14.
4, 5. Sa paghanap ninda nin sarong dios, ano an mas gusto nin dakol?
4 An dakol na tawo sa kinaban ngonyan naghahanap, alagad ta ano an hinahanap? Pipira sana an talagang naghahanap sa sarong tunay na Dios, si Jehova. Kadakol kan mas gusto an dios na nakatatama sa saindang sadiring personal na mga kamawotan asin daing binabasaran na pagkaanggot. Arog kan sabi kan parasurbey sa E.U. na si George Gallup, Jr.: “An totoo mayo ka nin maheheling na dakulang pagkakalaen sa pag-oltanan nin mga nagsisimba asin dai nagsisimba kun dapit sa pandadaya, pagdulag sa buhis, asin pag-ikit, sa kadaklan huli ta kadakol nin relihiyon sosyal.” Idinugang nia na “an dakol nagkokompuwesto sana nin relihiyon na komportable para sa sainda asin nakaaaling sa sainda . . . May nag-apod kaiyan na relihiyon sono sa gusto mo.”
5 An iba masabi, “Areglado na sako an relihiyon ko.” Siyempre, an maninigong magin hapot, “Areglado na daw sa Dios an sakong relihiyon?” Totoo, an mayoriya sa Kakristianohan asin Hinduismo kontento nang sambahon an saindang mga imahen asin idolo. An kadaklan na Kristiano daa naninigoan na sa daing ngaran na Trinitaryong dios. Asin an labing 900 milyones na Muslim nagtutubod ki Allah. Sa ibong na lado, minilyon na ateista an nagsasabi na mayo nin Dios.
An mga Nagkakaipo nin Tabang
6. Ano an nadiskobre nin dakol na parabasa sa An Torrengbantayan?
6 Alagad kumusta man kita na regular na nagbabasa kan magasin na ini? Hinanap niato an tunay na Dios asin nanompongan niato sia. Napatunayan niato an mga tataramon kan Santiago 4:8: “Rumani kamo sa Dios, asin sia marani sa saindo.” Paagi sa aktibong pakikiasosyar sa Kristianong kongregasyon, kita orog na ruminani sa Dios, asin naeksperyensiahan niato mismo kun paano si Jehova orog na ruminani sa sato.—Juan 6:44, 65.
7. Paano niato naaaraman na dakol an interesado pang magin aktibo sa katotoohan?
7 Minsan siring, aram niato na kadakol pa kan naoogmang makiasosyar paminsanminsan sa banwaan ni Jehova pero sagkod ngonyan dai minagibo nin positibong aksion na rumani ki Jehova paagi sa pagdusay asin bautismo. Paano niato naaraman ini? Kan 1990 haros sampulong milyon an nag-atender sa Memorial kan kagadanan ni Jesus. Alagad pira an aktibong nagbabalangibog kan maogmang bareta kan Kahadean? Sobra sana nin kadikit sa apat na milyon. Iyan nangangahulogan na igwa nin mga anom na milyon na may interes sa katotoohan asin kun beses naoogmang makiasosyar sa sato pero dai pa nagpoon na irekomendar an malinig na tataramon kan katotoohan paagi sa paghuhulit kan maogmang bareta kan Kahadean. Daing duwa-duwa, sa insidental na mga okasyon dakol an nagtataram para ki Jehova asin sa saiyang Kahadean. Minsan siring, dai pa ninda ipinamimidbid nin malinaw an saindang sadiri bilang mga Saksi ni Jehova. An mga ini man boot niatong tabangan.—Sofonias 3:9; Marcos 13:10.
8, 9. (a) Ano an isinasadol ni Jehova na gibohon niato? (b) Taano ta bakong madonong na pabayaan an hatol ni Jehova?
8 Boot niato na dagkahon sinda na magin maogma, aktibong mga Saksi ni Jehova sa ultimong kabtang kan dakulang gibohon na ngonyan ginigibo sa bilog na kinaban. Tabi mangnoha an mamomoton na pangagda ni Jehova sa Talinhaga 1:23: “Magbalik kamo sa sakuyang pagsagwe. Dangan sa saindo papasulwakon ko an sakong espiritu; asin ipaaaram ko sa saindo an sakong mga tataramon.” (Ikomparar an Juan 4:14.) Nakapakokosog na maaraman na si Jehova masimbag sa satong paggibo nin positibong mga tangga tanganing ipamidbid an satong sadiri sa lado kan saiyang ngaran asin pagsamba! Tunay na habo niatong ikabilang sa mga sinasabi sa Talinhaga 1:24, 25: “Ako nag-apod alagad ta kamo nagsasayuma, inunat ko an sakong kamot alagad ta mayo nin naghihinanyog, asin pinababayaan nindo an gabos kong hatol, asin an sakong pagsagwe dai nindo inako.”
9 An mga nagpapabaya sa hatol ni Jehova na hanapon sia mantang sia makukua pa asin idinidigson an saindang desisyon sagkod na aktuwal nindang maheling na nagpopoon na an dakulang kahorasaan makadidiskobre na sobra an saindang pag-atraso. An siring na gawe magpaparisa nin kakulangan nin pagtubod asin kadonongan patin magigin pagmenus sa dai na kutana maninigong kabootan ni Jehova.—2 Corinto 6:1, 2.
10. Taano ta peligroso an dai pag-intindi asin pagkaindiperente?
10 Tanganing ikailustrar an pangangaipo nin tolos-tolos na paghiro, makuyog sana daw kamo sa marahay na hatol kan doktor kun kamo igwa na nin dobleng pulmoniya? O, imbes, pagkarisa nindo sa enot na mga sintomas nin helang? Kun siring taano ta mag-aatraso pa na isiblag an saindong sadiri sa marigsok na kinaban ni Satanas asin makikampi ki Jehova asin sa saiyang mga Saksi? An mga resulta nin dai pag-intindi, pagkaindiperente, asin kapabayaan liniwanag sa Talinhaga 1:26-29: “Ako man, sa sakong kabtang, magngingisi sa saindong kapahamakan, asin ako magtutuya kun kamo abotan kan saindong natatakotan . . . Sa panahon na iyan sinda maarapod sa sako, alagad ta dai ako masimbag; hahanapon ninda ako, alagad ta dai ninda ako makukua, huli ta ikinaongis ninda an kaaraman, asin dai ninda pinili an pagkatakot ki Jehova.” Dai logod kita manompongan na ‘naghahanap ki Jehova’ kun huri na!
11. Anong tabang an yaon para sa mga naghihingoang maglingkod sa Dios?
11 An iba na nagbabasa sa magasin na ini tibaad naghahanap pa sa tunay na Dios. Ikinaoogma mi na nagpapadagos kamo sa paghanap. Ipinamimibi mi na logod an kaaraman nindo sa Biblia magmotibar sa saindo na gumibo nin positibo pang aksion na manindogan nin marigon sa katotoohan. Laoman nindo na an lambang kongregasyon kan mga Saksi ni Jehova andam na tumabang sa saindo sa saindong paghanap.—Filipos 2:1-4.
Panahon Para sa Kaigotan Asin Paghiro
12, 13. Taano ta kaipuhan kitang humiro mapadapit sa tunay na pagsamba?
12 Taano ta kaipuhan na kita gabos humiro na ipamidbid an satong sadiri sa lado ni Jehova Dios asin kan saiyang tunay na pagsamba? Huli ta an mga pangyayari sa kinaban pasiring sa kulminasyon. An mga pahina nin kasaysayan mas marikas an pagbuklad kisa kayang basahon nin tawo. Bako ini an panahon na tumukaw sa ibabaw kan kudal o magin gabinhod. Isinabi ni Jesus nin malinawon: “An dai sa kampi ko tumang sako, asin an dai nakikitipon sa sako nakakawarak.” Sinabi man nia: “An siisay man na ikasopog ako asin an sakong mga tataramon, ikakasopog man kan Aki nin tawo an sarong iyan kun mag-abot na sia sa kamurawayan nia asin kan Ama patin kan banal na mga anghel.”—Mateo 12:30; Lucas 9:26.
13 Ngonyan na an panahon para sa kaigotan asin paghiro! Aram niato kun pasaen an mga pangyayari sa kinaban, asin an Armagedon natatanaw na. Kaya, an pag-apod hanapon ngonyan si Jehova bago an ‘aldaw kan saiyang kaanggotan,’ mantang sia manonompongan pa. Sa dakulang kahorasaan, magigin huri na.—Sofonias 2:2, 3; Roma 13:11, 12; Kapahayagan 16:14, 16.
14. Ano an mga dahelan niato na hanapon an Dios?
14 An totoo, an bilog na katawohan maninigong hanapon na ngonyan an pag-oyon nin Dios. Tamang-tama an pagkasabi dian ni apostol Pablo sa Gibo 17:26-28: “Ginibo [nin Dios] hale sa sarong tawo an gabos na nasyon kan mga tawo, tanganing mag-erok sa bilog na daga, asin saiyang ibinugtak an itinalaan na mga panahon asin an mga kasagkodan kan erokan nin mga tawo, tanganing hanapon ninda an Dios, ta tibaad pa kapkapon sia ninda asin talagang makua sia ninda, minsan ngani, sa katunayan, sia bakong harayo sa lambang saro sa sato. Huli ta paagi sa saiya kita igwa nin buhay asin naghihiro asin nagdadanay.” An huring mga tataramon na iyan, “huli ta paagi sa saiya kita igwa nin buhay asin naghihiro asin nagdadanay,” nagtatao sato nin bastanteng dahelan na hanapon an Dios. Salamat sa dai na kutana maninigong kabootan ni Jehova, kita nabubuhay sa hayakpit pero kaipuhan na nabubuhayan na lugar sa sadit na dagang ini. Dai daw kita maninigong magpasalamat sa Soberanong Kagurangnan kan uniberso? Asin dai daw niato maninigong ipaheling an satong pasasalamat sa saiya sa praktikal na mga paagi?—Gibo 4:24.
15. (a) Ano sa paghona kan historyador na si Arnold Toynbee an katuyohan nin mas halangkaw na relihiyon? (b) Ano an kaipuhan niatong gibohon tanganing makapamuraway sa Dios?
15 An historyador na si Arnold Toynbee sarong beses nagsurat: “An tunay na katuyohan nin mas halangkaw na relihiyon ipaabot an espirituwal na mga hatol asin katotoohan na iyo an pinakaubod kaiyan sa pinakadakol na kalag na maaabot kaiyan, tangani na an kada saro sa mga kalag na ini paagi kaiyan mapangyari na otobon an tunay na katuyohan nin Tawo. An tunay na katuyohan nin tawo pamurawayon an Dios asin ikaogma Sia sagkod lamang.” (An Historian’s Approach to Religion, pahina 268-9) Tanganing mapamuraway an Dios, kaipuhan na enot hanapon niato sia asin magkaigwa nin tamang kaaraman sa saiya asin sa saiyang mga katuyohan. Kaya, an pag-apod ni Isaias angay na marhay: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa. An maraot magbaya na sa saiyang dalan, asin an maliwag na tawo sa saiyang mga kaisipan; asin magbalik sia ki Jehova, na maheherak sa saiya, asin sa satong Dios, huli ta sia bulaos na magpapatawad.”—Isaias 55:6, 7.
Anong Praktikal na Tabang an Satong Ikatatao?
16. (a) Anong angat an nasa atubangan kan Kristianong kongregasyon? (b) Sa anong praktikal na paagi niato matatabangan an iba na maglingkod ki Jehova?
16 An minilyon na interesado na bako pang aktibong mga parahayag angat sa sato gabos. Ano an ginigibo niato sa praktikal na paagi bilang kamagurangan, ministeryal na mga lingkod, payunir, asin parahayag tanganing matabangan an mga interesado sa katotoohan na magin aktibong mga partisipante sa tunay na pagsamba kaiba niato? An sarong paagi na makatao nin praktikal na tabang kun saen kaipuhan songkoon sinda sa harong asin ipag-iba sinda sa mga pagtiripon sa Kingdom Hall tanganing kamtan man ninda nin regular an mga pakinabang na itinatao kan espiritu ni Jehova. An hatol ni Pablo sa mga Hebreo, sa kapitulo 10, bersikulo 24 asin 25, apretado ngonyan arog kaidto: “Magpasaradolsadol kita sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.” Dinadagka mi an gabos na boot na makaeksperyensia sa karahayan nin boot ni Jehova na regular na makiasosyar sa mga Saksi ni Jehova sa saindang lokal na Kingdom Hall.
17. Tanganing matabangan niato an mga inaadalan sa Biblia na umoswag sa saindang paghanap ki Jehova, anong mga hapot an kaipuhan na masimbag?
17 Kun kita nakikipag-adal kan Biblia sa saro na regular na nag-aatender sa mga pagtiripon, matatabangan daw niato an sarong iyan na makuwalipikar bilang parahayag kan maogmang bareta? (Helingon an Organized to Accomplish Our Ministry, pahina 97-9.) Asin oras na sia magin nang dai pa bautisadong parahayag, iniimbitaran daw niato sia na umiba sato nin regular sa paghuhulit sa publiko asin sa pira niatong pag-adal asin pagdalaw liwat? (Helingon an Disyembre 1, 1989, na luwas kan The Watchtower, pahina 31.) Sa ibang pagtaram, oras na makuwalipikar an mga bagohan na iyan, dinadagka daw niato sinda paagi sa pagpaheling mismo sa sainda kan pira sa positibong mga bunga kan satong paghuhulit?—Mateo 28:19, 20.
Si Jehova Maninigong Hanapon
18. Paano ipinaheling ni Jehova an saiyang pagkaherak sa katawohan?
18 Huli sa pantubos na atang ni Cristo Jesus, dai binibilang ni Jehova tumang sa sato an satong nakaaging mga kasalan asin kapabayaan kun kita magsosolsol asin matubod. Helinga an mga tataramon ni David: “Dai nia ginibo sa sato an sono sa satong mga kasalan; dai man nia itinao sa sato an maninigo sa sato sono sa satong mga pagkakasala. Huli ta kun paanong an kalangitan mas halangkaw sa daga, an saiyang pagkaherak dakulaon para sa mga natatakot sa saiya. Kun gurano kaharayo kan subangan sa solnopan, siring man kaiyan kaharayo na saiyang irinayo sa sato an satong mga kasumbikalan. Kun paano an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya. Huli ta aram niang gayo an satong kamugtakan, na ginigirumdom na kita kabokabo.”—Salmo 103:10-14; Hebreo 10:10, 12-14.
19. Ano an pampakosog sa mga tibaad napasuway sa katotoohan?
19 Si Jehova an tunay na matinao asin maheherakon na Dios. Kun kita madolok sa saiya sa kapakumbabaan asin pagsolsol, sia nagpapatawad asin linilingawan iyan. Sia dai nagtatanom nin daing sagkod na maraot na boot na an resulta daing katapusan na pagpasakit sa impiernong may kalayo. Bako, an nangyayari arog kan sinasabi ni Jehova: “Ako—ako an Saro na nagpapara kan saimong mga paglapas huli sa sakuya, asin an saimong mga kasalan dai ko gigirumdomon.” Kanigoan na pampakosog iyan sa siisay man na tibaad napasuway sa katotoohan asin napabayaan an saindang relasyon ki Jehova! Sinda man dinadagka na hanapon na ngonyan si Jehova asin bumuwelta sa aktibong pakikiasosyar sa banwaan na nagdadara kan saiyang ngaran.—Isaias 43:25.
20, 21. (a) Anong nakapakokosog na halimbawa an makukua niato sa suanoy na Juda? (b) Ano an kinaipuhan na gibohon kan mga taga-Juda tanganing kamtan an bendisyon ni Jehova?
20 Sa bagay na ini igwa kita nin nakapakokosog na halimbawa ki Hadeng Asa sa suanoy na Juda. Hinale nia an falsong pagsamba sa saiyang kahadean, pero may natada pang kadikit na paganong pagsamba. An tala sa 2 Cronica 15, bersikulo 2 sagkod 4, nagsasabi sato kun ano an isinabi ni propeta Azarias ki Asa bilang pagirumdom: “Si Jehova yaon sa saindo sagkod na kamo nasa saiya; asin kun sia hahanapon nindo, itotogot nia na sia makua nindo, alagad kun bayaan sia nindo babayaan man nia kamo. Asin kadakol kan aldaw na an Israel mayo nin tunay na Dios . . . Alagad kun sa saindang kasakitan sinda minabuwelta ki Jehova na Dios nin Israel asin hinahanap sia, kun siring itinotogot nia na sia makua ninda.”
21 Si Jehova dai nakipagtaguan ki Hadeng Asa kundi “itinogot nia na sia makua.” Ano an reaksion kan hade sa mensaheng ini? Sa iyo man sanang kapitulo, an bersikulo 8 asin 12 minasimbag: “Tolos man kan madangog ni Asa an mga tataramon na ini . . . , sia nagin mapuso asin pinara an makababaldeng mga bagay sa bilog na daga . . . asin hinirahay nia an altar ni Jehova na yaon sa atubangan kan portiko ni Jehova. Dugang pa, [an Juda] nakipagtipan na hanapon si Jehova na Dios kan saindang mga apoon sa bilog nindang puso asin sa bilog nindang kalag.” Iyo, sinda odok na naghanap ki Jehova “sa bilog nindang puso asin sa bilog nindang kalag.” Ano an resulta sa nasyon? Sinasabi sato kan bersikulo 15: “Asin an bilog na Juda naggayagaya huli sa sinumpaan; huli ta sa bilog nindang puso na sinda suminumpa asin sa bilog nindang kawilihan na sinda naghanap sa saiya, kaya itinogot nia na sia makua ninda; asin tinawan sinda ni Jehova nin kapahingaloan sa gabos na lugar.”
22. Ano an nakapakokosog sato na magin aktibo ngonyan sa paglilingkod ki Jehova?
22 Ngonyan, bako daw na iyan pampakosog sa sato gabos na gumibo nin positibong paghiro manongod sa malinig na pagsamba ki Jehova? Aram niato na yaon an potensial na minilyon pa an mag-omaw ki Jehova. Daing duwa-duwa dakol sa mga ini an nagbabakle kan saindang buhay tanganing maabot an Makakasuratan na mga kahagadan para sa paglilingkod ki Jehova. An iba nagtatalubo sa pagmansay asin pagtubod, naghahanap ki Jehova, asin sa dai mahahaloy mapahihirong ihiras sa iba an malinig na tataramon paagi sa pagpaabot sainda nin hararom na pakasabot sa katotoohan manongod ki Jehova asin sa Kahadean nia. Asin taano ta napakahalaga na hanapon niato gabos si Jehova ngonyan na sia makukua pa? Huli ta haranihon na an saiyang ipinanugang bagong kinaban!—Isaias 65:17-25; Lucas 21:29-33; Roma 10:13-15.
Nagigirumdoman daw Nindo?
◻ Siisay an nagpapaheling nin pagkaindiperente sa tunay na Dios, si Jehova?
◻ Gurano an parateng nagigin epekto nin relihiyon sa gawe?
◻ Ano an potensial para sa pagdakol nin aktibong mga Saksi?
◻ Taano ta panahon ngonyan para sa kaigotan asin paghiro?
◻ Taano si Jehova ta maninigong hanapon?
[Retrato para sa pahina 16]
An dakol na katood kan mga Saksi ni Jehova na nag-aatender sa Memorial potensial na mga lingkod nin Dios
Nag-atender sa Memorial kan 1990: 9,950,058
Pinakahalangkaw na bilang nin parahayag kan 1990: 4,017,213
[Retrato para sa pahina 18]
Kan kaaldawan ni Hadeng Asa, an nasyon duminolok ki Jehova