An Biblia—Iyan daw Talagang Banal?
GURANO kadakol na tawo ngonyan an ibinibilang an Biblia na banal, an Tataramon nin Dios? Sa panahon na ini nin pagkamapagduda, kadakol an kinokonsiderar iyan na lipas na sa panahon asin daing halaga, nagdududa kun iyan talagang banal. Maski an ibang relihiyosong lider sa Kakristianohan nagtotokdo na an Biblia nasasagom nin leyenda asin osipon. Saindang kinukustion ‘kun baga an biblikal na interpretasyon sa kasaysayan saro na puwedeng oyonan nin intelihenteng tawo.’—The Interpreter’s Dictionary of the Bible, Tomo 2, pahina 611.
An prominenteng mga iskolar nagsasabwag nin banhi nin pagdududa manongod sa pagigin angay kan pag-apod sa Biblia bilang an Tataramon nin Dios. An saro nagsabi na “kun an saro boot na gamiton an Tataramon-nin-Dios na klase nin lenguahe, an tamang termino para sa Biblia iyo an Tataramon nin Israel, an Tataramon nin nagkapirang pangenot na suanoy na mga Kristiano.” (The Bible in the Modern World, ni James Barr) Ano an paghona nindo? An Biblia daw Tataramon nin Dios? Iyan daw talagang banal?
Sairisay an Nagsurat kan Biblia?
An libro nin Genesis, an enot na libro kan Biblia, sono sa tradisyon iinaatribuwir ki Moises, sarong Hebreo na nabuhay mga 3,500 na taon na an nakaagi. Sono sa Biblia mismo, mga 40 lalaki hale sa manlaenlaen na klase nin pamumuhay an nakikabtang sa pagsurat sa iba pang kabtang kan Kasuratan, na nagresulta sa koleksion nin 66 na libro, o pagkabarangabanga kan Biblia. Minsan siring, an mga lalaking ini dai ibinilang an saindang sadiri na tunay na mga autor kan Biblia. Sarong parasurat an nagsabi: “An gabos na Kasuratan ipinasabong nin Dios.” (2 Timoteo 3:16) An saro pa nagsurat manongod sa mga parasurat kan Biblia: “An mga tawo nagtaram hale sa Dios huling pinahiro sinda kan banal na espiritu.”—2 Pedro 1:21.
Ini nagbubugtak sa mga parasurat sa kategoriya nin mga kagsurat, o mga sekretaryo, na kontrolado, o giniyahan, nin Dios. Sono sa Biblia, an parasurat parateng tinogotan na pilion an saiyang sadiring mga tataramon sa pagpahayag kan itinaong banal na impormasyon. (Habakuk 2:2) Iyan an dahelan kun taano ta may dakol na estilo nin pagsurat sa bilog na Biblia. Alagad an pagsurat perming giniyahan nin Dios.
Totoo, an mga paghihingako kan mga parasurat na ini sa banal na pagpasabong bakong iyo na mismo an patotoo na an Biblia iyo an banal na mensahe kan Kaglalang sa katawohan. Minsan siring, baga man an Kaharohalangkawe an Autor kan Biblia o bako maninigong malinaw na maheheling sa maingat asin daing kinakampihan na pagsiyasat sa Biblia mismo. An Biblia daw nagpapatotoo sa pagkakaigwa nin banal na autor? Tunay, masasabi daw niato na may kompiansa na banal an Biblia?