Paogmahon si Jehova Paagi sa Pagpaheling nin Kabootan
“Anong balos an hinahagad saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”—MIQUEAS 6:8.
1. Taano ta dai niato maninigong ipagngalas na linalaoman ni Jehova an saiyang banwaan na magpaheling nin kabootan?
SI Jehova linalaoman an saiyang banwaan na magpaheling nin kabootan. Dai niato ini maninigong ipagngalas. An Dios mismo maboot sa gabos, pati sa daing utang na boot na mga maraot. Sa bagay na ini sinabihan ni Jesu-Cristo an saiyang mga disipulo: “Padagos na mamotan an saindong mga kaiwal asin maggibo nin marahay patin magpautang na mayo nin interes, na dai naglalaom sa ano man na balos; asin an saindong balos magigin dakula, asin kamo magigin mga aki kan Kaharohalangkawe, huli ta sia maboot sa mga daing utang na boot asin maraot. Padagos kamong magin maheherakon, kun paanong an saindong Ama maheherakon.”—Lucas 6:35, 36.
2. Anong mga hapot manongod sa kabootan an maninigo niatong horophoropon?
2 Arog kan sabi kan Miqueas 6:8, an mga naglalakaw sa kaibahan nin Dios kaipuhan na aktuwal na “mamoot sa kabootan.” Malinaw na naoogma si Jehova kun an saiyang mga lingkod namomoot sa kabootan asin ipinaheheling iyan sa odok sa pusong paagi. Alagad ta ano an kabootan? Anong mga pakinabang an ibinubunga kan pagpaheling kaiyan? Asin paano ikapaheheling an kuwalidad na ini?
Kun Ano an Kabootan
3. Paano nindo tatawan nin kahulogan an kabootan?
3 An kabootan iyo an kuwalidad nin pagpaheling nin aktibong interes sa iba. Iyan ipinaheheling nin matinabang na mga akto asin makonsiderasyon na mga tataramon. An pagigin maboot nangangahulogan nin paggibo nin marahay imbes na nin ano man na nakararaot. An tawong maboot makikatood, malomoy an boot, madinamayon, asin maugayon. Sia may matinao, makonsiderasyon na kaisipan manongod sa iba. Asin an kabootan kabtang kan tela kan piguratibong gubing nin lambang tunay na Kristiano, ta isinadol ni Pablo: “Isolog nindo an mamomoton na mga pagmate nin pagkaherak, kabootan, kababaan nin boot, kahoyoan, asin pakatios.”—Colosas 3:12.
4. Paano nangenot si Jehova sa pagpaheling nin kabootan sa katawohan?
4 Si Jehova an nangengenot sa pagpaheling nin kabootan. Arog kan sabi ni apostol Pablo, “kan an kabootan asin pagkamoot sa tawo kan satong Paraligtas, an Dios, mahayag” na “sono sa saiyang pagkaherak iliniligtas nia kita paagi sa paghugas na nagdara sa sato sa buhay asin paagi sa paggibo sa satong bago huli sa banal na espiritu.” (Tito 3:4, 5) Linilinigan, o ‘hinuhugasan,’ nin Dios an linahidan na mga Kristiano sa dugo ni Jesus, na iinaaplikar an merito kan pantubos na atang ni Cristo para sa sainda. Ginigibo man sindang bago paagi sa banal na espiritu, na nagigin “bagong linalang” bilang pinaniaki nin espiritung mga aki nin Dios. (2 Corinto 5:17) Siyempre, an kabootan asin pagkamoot nin Dios para sa tawo nakaaabot man sa internasyonal na “dakulang kadaklan,” na ‘naghugas kan saindang mga gubing asin pinaputi iyan sa dugo kan Kordero.’ (Kapahayagan 7:9, 14; 1 Juan 2:1, 2) Dugang pa, an mga linahidan asin an dakulang kadaklan, na may daganon na paglaom, gabos nasa irarom kan “maboot” na sakal ni Jesus.—Mateo 11:30.
5. Taano ta maninigo niatong laoman an mga ginigiyahan kan espiritu nin Dios na magpaheling nin kabootan sa iba?
5 An kabootan kabilang man sa mga bunga kan banal na espiritu nin Dios, o puwersa aktiba. Sabi ni Pablo: “An bunga kan espiritu iyo an pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri. Tumang sa mga siring dai nin pagboot.” (Galacia 5:22, 23) Kaya, ano an maninigo niatong laoman sa mga ginigiyahan kan espiritu nin Dios? Segurado na mapaheling sinda nin kabootan sa iba.
6. An kabootan maninigong magpangyari sa kamagurangan asin sa iba pang Kristiano na gumawe sa anong paagi?
6 An kabootan ikapaheheling sa dakol na paagi. Kita nagpapaheling nin kabootan kun kita maheherakon. Halimbawa, an kamagurangan na Kristiano maboot kun sinda nagpapaheling nin pagkaherak sa nagsosolsol na nagkasala asin hinihingoang tabangan sia sa espirituwal. An itinao nin Dios na kuwalidad nin kabootan ginigibo an mga paraataman na mapasensia, makonsiderasyon, maheherakon, asin malomoy an boot. Pinahihiro sinda kaiyan na ‘magin maboot sa aripompon.’ (Gibo 20:28, 29) An totoo, an bunga kan espiritu na kabootan maninigong gibohon an gabos na Kristiano na maheherakon, mapasensia, makonsiderasyon, maugayon, makikatood, asin mapag-istimar.
Likayan an Napasalang Kabootan
7. Taano ta masasabi nindo na an napasalang kabootan kaluyahan?
7 An iba ibinibilang na kaluyahan an kabootan. An paghona ninda an saro dapat na magin matagas an boot, kun beses maisog pa ngani, tanganing hangaan nin iba an saiyang kosog. Pero tama an sabi na “an kaisogan pagsagin makosog nin tawong maluya.” An totoo, kaipuhan an tunay na kosog kapwa sa pagigin tunay na maboot asin sa paglikay sa napasalang kabootan. An kabootan na bunga kan espiritu nin Dios bakong maluya, nakikikompromisong kaisipan manongod sa salang gibo. Imbes, an napasalang kabootan sarong kaluyahan na nagpapangyari sa saro na konsintihon an salang gibo.
8. (a) Mapadapit sa saiyang mga aki, paano nagin pabaya si Eli? (b) Taano ta dapat na magmaan an kamagurangan na dai madara nin napasalang kabootan?
8 An halangkaw na saserdote nin Israel na si Eli pabaya sa pagdisiplina sa saiyang mga aki, si Ofni asin Fineas, na naglingkod bilang mga saserdote sa tabernakulo. Dai nanigoan sa kabtang nin sarong atang na itinao sa sainda kan Pagboot nin Dios, isinugo ninda an sarong katabang na humagad nin dai pa lutong karne sa sarong nagdodolot bago mapaaso sa altar an taba kan dolot. An mga aki ni Eli nagkaigwa man nin inmoral na pakikidorog sa mga babae na naglilingkod sa tata kan tabernakulo. Alagad imbes na haleon sa katongdan si Ofni asin Fineas, sinaway sana sinda nin maluway ni Eli, na tinatawan nin onra an saiyang mga aki nin labi sa Dios. (1 Samuel 2:12-29) Bakong makangangalas na “an tataramon hale ki Jehova nagin bihira kan mga aldaw na idto”! (1 Samuel 3:1) Kaya an Kristianong kamagurangan dai dapat na padara sa putik na mga pangangatanosan o sa pagpaheling nin napasalang kabootan na puwedeng magsapeligro kan espirituwalidad nin sarong kongregasyon. An tunay na kabootan bakong buta sa maraot na mga tataramon asin gibo na minalapas sa mga pamantayan nin Dios.
9. (a) Anong kaisipan an makatatabang sato na malikayan na madara nin napasalang kabootan? (b) Paano nagpaheling nin kosog si Jesus sa pag-atubang sa apostatang mga relihiyonista?
9 Tanganing malikayan niato an pagpaheling nin napasalang kabootan, kaipuhan na arangon niato an tabang nin Dios na magkaigwa nin kosog na arog kan maririsa sa mga tataramon kan salmista: “Humarayo kamo sa sakuya, kamong mga paragibo nin maraot, tanganing maotob ko an mga katogonan kan sakong Dios.” (Salmo 119:115) Kaipuhan na arogon man niato an halimbawa ni Jesu-Cristo, na nungka na nagkasala sa pagpaheling nin napasalang kabootan. An totoo, si Jesus an mismong personipikasyon nin tunay na kabootan. Halimbawa, ‘naherak sia sa banwaan huli ta sinda maniwang asin nagkakaralagalag siring sa mga karnero na mayong pastor.’ Kun siring, an mga may sadiosan na puso dai nag-alangan na dumolok ki Jesus, na dinadara pa ngani sa saiya an saindang saradit na aki. Asin isip-isipa an kabootan asin pagkaherak na ipinaheling nia kan “kinugos nia an mga aki asin binendisyonan sinda”! (Mateo 9:36; Marcos 10:13-16) Minsan ngani maboot si Jesus, sia marigon man para sa tama sa pagheling kan saiyang langitnon na Ama. Nungka na kinonsinte ni Jesus an maraot; igwa sia nin itinao nin Dios na kosog sa pagdenunsiar sa parasaginsagin na mga namomoon sa relihiyon. Sa Mateo 23:13-26, makapira niang inotro an mga tataramon na: “Herak man sa saindo, mga eskribas asin Fariseo, mga parasaginsagin!” Sa kada saro, si Jesus nagtao nin dahelan para sa banal na paghokom.
An Kabootan Konektado sa Pagkamoot
10. Paano an mga disipulo ni Jesus nagpapaheling nin kabootan asin pagkamoot sa mga kapagtubod?
10 Manongod sa saiyang mga parasunod, sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Asin ano an sarong kabtang kan pagkamoot na nagpapamidbid sa tunay na mga disipulo ni Jesus? Sinabi ni Pablo: “An pagkamoot matinios asin maboot.” (1 Corinto 13:4) An pagigin matinios asin maboot nangangahulogan na pinagpapasensiahan niato an mga pagkabakong sangkap asin pagkukulang nin iba, kun paanong iyan maboot na ginigibo ni Jehova. (Salmo 103:10-14; Roma 2:4; 2 Pedro 3:9, 15) An Kristianong pagkamoot asin kabootan nahahayag man kun an mga kasakitan minaabot sa mga kapagtubod sa ibang parte kan daga. Sa paggibo nin labi pa sa “kabootan sa tawo,” an mga Kristiano sa ibang lugar nagpapaheling nin pagkamoot sa tugang paagi sa pagdonar nin materyal na mga bagay sa pagtabang sa mga parasambang iyan ki Jehova.—Gibo 28:2.
11. Sono sa Kasuratan, ano an mamomoton na kabootan?
11 An kabootan konektado sa pagkamoot sa terminong “mamomoton na kabootan,” na parateng ginagamit sa Kasuratan. Ini kabootan na gikan sa maimbod na pagkamoot. An nombreng Hebreo na trinadusir na “mamomoton na kabootan” (cheʹsedh) bako sanang may pagmamahal na pagmakolog an kaiba. Iyan kabootan na mamomoton na minadukot sa sarong pinanonongdan kaiyan sagkod na maotob an katuyohan kaiyan mapadapit sa tawong iyan. An mamomoton na kabootan, o maimbod na pagkamoot, ni Jehova ipinaheheling sa laen-laen na paagi. Halimbawa, iyan ipinaheheling sa saiyang mga akto nin pagliligtas asin pagprotehir.—Salmo 6:4; 40:11; 143:12.
12. Kun an mga lingkod ni Jehova nag-aarang nin tabang o pagliligtas, sa ano sinda makaseseguro?
12 Bakong makangangalas na an mamomoton na kabootan ni Jehova nakadadagka sa mga tawo na rumani sa saiya! (Jeremias 31:3) Kun an maimbod na mga lingkod nin Dios nagkakaipo nin pagliligtas o tabang, aram ninda na an saiyang mamomoton na kabootan talagang maimbod na pagkamoot, na dai nanggad sinda pababayaan. Kaya, puwede sindang mamibi na may pagtubod, arog kan salmista na nagsabi: “Kun para sa sako, ako nanarig sa saimong mamomoton na kabootan; maggayagaya logod an sakuyang puso sa saimong pagliligtas.” (Salmo 13:5) Mantang maimbod an pagkamoot nin Dios, an saiyang mga lingkod dai nananarig nin basang sana sa saiyang mamomoton na kabootan. Kun sinda nag-aarang nin tabang o pagliligtas, igwa sinda kan garantiyang ini: “Dai pababayaan ni Jehova an saiyang banwaan, ni tatalikdan an saiyang rogaring.”—Salmo 94:14.
Mga Balos sa Kabootan
13, 14. Taano ta may maimbod an mga katood an tawong maboot?
13 Bilang pag-arog ki Jehova, an saiyang mga lingkod ‘naggigibo sa lambang saro nin mamomoton na kabootan asin pagkaherak.’ (Zacarias 7:9; Efeso 5:1) “An makaoogma sa daganon na tawo iyo an saiyang mamomoton na kabootan,” asin an tawong nagpapaheling kan kuwalidad na ini nag-aani nin nagsosopay na mga balos. (Talinhaga 19:22) Ano an nagkapira kaini?
14 An kabootan ginigibo kitang mataktika asin kun siring tinatabangan kitang mapagdanay an marahay na relasyon sa iba. An tawong mataktika itinataram asin ginigibo an mga bagay o inaatubang an masakit na mga kamugtakan sa mga paaging makonsiderasyon asin dai nakaaanggot. Mantang “an tawong maringis” nagtitios nin pagkondenar kan kadaklan, “an tawong may mamomoton na kabootan minagibo nin karahayan sa saiyang kalag.” (Talinhaga 11:17) An mga tawo rinarayoan an tawong maringis pero napaparani sa saro na nagpapaheling sainda nin mamomoton na kabootan. Kaya, an tawong maboot may maimbod na mga katood.—Talinhaga 18:24.
15. Ano an tibaad magin epekto nin kabootan sa pamilyang nababanga sa relihiyon?
15 An agom na Kristiana na an agom daing pagtubod tibaad madagka an lalaki sa katotoohan nin Dios paagi sa kuwalidad na arog kan kabootan. Bago nia nanodan an katotoohan asin isinolog an “bagong pagkatawo na linalang oyon sa kabotan nin Dios sa tunay na katanosan asin kaimbodan,” tibaad sia maisog, tibaad pakiiwalon pa ngani. (Efeso 4:24) Kun aram kan saiyang agom an pirang talinhaga, tibaad umoyon sia na “an mga pakikiiwal nin agom na babae siring sa nagtuturong atop na minapahale sa saro” asin “mas marahay pang mag-erok sa kapatagan kisa kaibanan nin parabasol na agom na babae kaiba an kaanggotan.” (Talinhaga 19:13; 21:19) Alagad ngonyan an mabining gawe asin hararom na paggalang kan agom na Kristiana, kaiba an mga kuwalidad na arog kan kabootan, tibaad makatabang na madara an saiyang agom sa tunay na pagtubod. (1 Pedro 3:1, 2) Iyo, tibaad ini magin sarong balos sa saiyang kabootan.
16. Paano kita puwedeng makinabang sa kabootan na ipinaheling sa sato?
16 An kabootan na ipinaheheling sa sato tibaad pakinabangan paagi sa paggibo satong mas maheherakon asin mapagpatawad. Halimbawa, kun kita nagkakaipo nin espirituwal na tabang asin trinato kita sa maboot asin mahoyong paagi, bako daw na gigibohon kita kaiyan na mas may inklinasyon na tratohon an iba sa siring man na paagi? Bueno, an maboot asin mahoyong tratamiento malalaoman sa mga lalaking may espirituwal na kuwalipikasyon, ta si Pablo nagsurat: “Mga tugang, minsan kun an sarong tawo may nagibong kasalan bago nia iyan maaraman, kamo na igwang espirituwal na mga kuwalipikasyon pagmaigotan nindo na ibangon an tawong iyan sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man.” (Galacia 6:1) An nombradong kamagurangan nagtataram nin mahoyo asin maboot kun saindang hinihingoang tabangan an nagkasalang mga kapagtubod. Minsan siring, baga man personal kitang nag-ako nin siring na maboot na tabang o dai, ano an linalaoman nin Dios sa gabos na naglilingkod sa saiya? An gabos na Kristiano kaipuhan na magpaheling nin kabootan sa iba asin maninigong kumuyog sa hatol ni Pablo: ““Magin maboot sa lambang saro, na may maboot na pagkaherak, na lubos na nagpapatarawadtawad siring na an Dios man lubos na nagpatawad saindo paagi ki Cristo.” (Efeso 4:32) Siyempre, kun kita pinatawad o tinabangan kita sa sarong espirituwal na kasakitan sa maboot na paagi, maninigong dugangan kaini an sato mismong kakayahan sa pagpapatawad, pagkaherak, asin kabootan.
Apresyaron an Dai Na Kutana Maninigong Kabootan nin Dios
17. Mantang kita mga parakasala poon sa pagkamundag, anong kabootan an maninigong espesyalmente niatong pasalamatan?
17 Mantang kita gabos namundag na mga parakasala na kinondenar na magadan, may kabootan na kaipuhan na espesyalmente niatong pasalamatan. Iyan an dai na kutana maninigong kabootan ni Jehova Dios. An pagkalda sa mga parakasala sa pagkakondenar sa kagadanan asin pagpahayag na matanos kabootan na biyong dai na kutana maninigo. Si Pablo, na nasambitan nin 90 beses an dai na kutana maninigong kabootan nin Dios sa saiyang 14 ipinasabong na surat, nagsabi sa mga Kristiano sa suanoy na Roma: “An gabos nagkasala asin nagkulang sa kamurawayan nin Dios, asin iyan bilang daing bayad na regalo na sinda ipinahahayag na matanos paagi sa saiyang dai na kutana maninigong kabootan huli sa pagkabutas paagi sa pantubos na binayadan ni Cristo Jesus.” (Roma 3:23, 24) Dapat nanggad na apresyaron niato an dai na kutana maninigong kabootan na ipinaheling ni Jehova Dios!
18, 19. Paano niato malilikayan an pagbasangbasang sa katuyohan kan dai na kutana maninigong kabootan nin Dios?
18 Sa dai pag-apresyar, puwedeng basangbasangon niato an katuyohan kan dai na kutana maninigong kabootan nin Dios. Sa bagay na ini, si Pablo nagsabi: “Kaya kami mga embahador na karibay ni Cristo, na garo baga an Dios nakikimaherak paagi sa samo. Bilang mga karibay ni Cristo kami nakikimaherak: ‘Makipag-uli kamo sa Dios.’ An saro na dai nakakamidbid nin kasalan ginibo niang magin kasalan para sa sato, tangani kitang magin an katanosan nin Dios paagi sa saiya. Sa paggibo sa kaibanan nia, nakikimaherak man kami sa saindo na dai nindo akoon an dai na kutana maninigong kabootan nin Dios pakatapos basangbasangon sana iyan. Huli ta sia nagsasabi [sa Isaias 49:8, Septuagint]: ‘Sa panahon nin pag-ako dinangog taka, asin sa aldaw nin kaligtasan tinabangan taka.’ Uya! Ngonyan na an panahon nin pag-ako. Uya! Ngonyan na an aldaw nin kaligtasan. Dai kami sa ano man na paagi nagbubugtak nin masisingkogan, tanganing an samong ministeryo dai makuanan nin kabasolan; kundi sa gabos na paagi pinatutunayan niamo an samong sadiri na mga ministro nin Dios.” (2 Corinto 5:20–6:4) Ano an boot sabihon ni Pablo?
19 An linahidan na mga Kristiano mga embahador na karibay ni Cristo, asin an dakulang kadaklan iyo an saiyang mga sugo. Iriba nindang sinasadol an mga tawo na makipag-uli sa Dios tanganing magkamit nin kaligtasan. Habo ni Pablo na an siisay man umako kan dai na kutana maninigong kabootan ni Jehova Dios paagi ki Jesu-Cristo dangan basangbasangon sana iyan. Iyan puwedeng mangyari sato kun dai niato mahaman an gibohon na para dian ginibo kitang maninigo kan dai na kutana maninigong kabootan na iyan. Mantang may marahay na relasyon sa Dios bilang mga nakipag-uli sa saiya, dai niato aakoon nin basang sana an saiyang dai na kutana maninigong kabootan kun satong ootobon “an ministeryo nin pakipag-uli, arin na baga, na an Dios paagi ki Cristo nagpangyari na an sarong kinaban makipag-uli sa saiya.” (2 Corinto 5:18, 19) Gigibohon man niato sa iba an pinakadakulang kabootan paagi sa pagtabang sainda na makipag-uli sa Dios.
20. Ano an sumunod niatong sisiyasaton?
20 An mga lingkod ni Jehova ginagamit an saindang oras asin kayamanan sa mga akto nin kabootan kun sinda naghihingoang tabangan sa espirituwal an mga tawo paagi sa Kristianong ministeryo. Alagad ano an manonodan niato sa mga halimbawa sa Kasuratan nin kabootan na ginigibo? Sumunod niatong siyasaton an nagkapira sa mga ini asin pag-olayan an iba pang paagi na mapaogma si Jehova paagi sa pagpaheling nin kabootan.
Ano an Isisimbag Nindo?
◻ Ano an kabootan?
◻ Paano niato malilikayan na padara sa napasalang kabootan?
◻ Taano an banwaan ni Jehova ta makasasarig sa saiyang mamomoton na kabootan?
◻ Ano an pirang balos sa kabootan?
◻ Paagi sa paggibo nin ano na dai niato mababasangbasang an katuyohan kan dai na kutana maninigong kabootan nin Dios?
[Retrato para sa pahina 25]
An kabootan nin sarong agom na Kristiana tibaad makatabang na madara an saiyang agom sa tunay na pagtubod