An Aldaw nin Pamalos nin Dios

AROG kan nasabotan niato sa sinusundan na artikulo, may nagkapirang dahelan kun taano ta sala na kita maghingoang bumalos. Iyan sala ta sa katapustapusi, iyan dai nakareresolber sa ano man. Iyan sala ta pinaparil na kaiyan an mga iriwal imbes na gumibo nin mga tulay nin pagkakatood. Asin iyan sala ta iyan nakararaot sa saro na nagtatanom nin benggatibong mga kaisipan.

Pero, an pinakamahalagang dahelan kun taano ta sala an pagbalos nin tawo maheheling sa mga tataramon ni Moises sa Israel: “Si Jehova na saimong Dios sarong maheherakon na Dios.” (Deuteronomio 4:31) Mantang an Dios maheherakon, maninigo na kita man magin maheherakon arog nia. Sinabihan ni Jesus an saiyang mga parasunod: “Padagos kamong magin maheherakon, kun paanong an saindong Ama maheherakon.”—Lucas 6:36.

Pero, sinasabi man kan Biblia na si Jehova “Dios nin mga pamalos.” (Salmo 94:1) Si propeta Isaias nagtataram manongod sa “taon nin marahay na boot ni Jehova” asin siring man sa “aldaw nin pamalos kan satong Dios.” (Isaias 61:2) Paano an Dios kapwa magigin maheherakon asin benggatibo? Asin kun dapat niatong arogon an pagkaherak nin Dios, taano ta dai niato sia puwedeng arogon sa pagbalos?

Bilang simbag sa enot na hapot, an Dios maheherakon ta namomotan nia an katawohan, asin nagpapatawad sia sagkod sa mapupuwede tanganing matawan nin oportunidad an mga tawo na magbakle. An dakol, kapareho ni apostol Pablo, inaprobetsaran an pagkaherak na ini. Pero an Dios benggatibo man—sa sentido nin pagpaotob sa hustisya—huli ta an pagkaherak na iyan may ilalawig sana. Kun ikinapaheling na nin iba na nungka pa sindang magbabakle, maghohokom na an Dios sa inaapod na aldaw nin saiyang pamalos.

Bilang simbag sa ikaduwang hapot, dai, dai kitang katanosan na magin benggatibo huli ta an Dios namamalos. Si Jehova sangkap sa hustisya. An mga tawo bako. An Dios naheheling an gabos na kabtang nin sarong bagay asin perming tama an desisyon. Dai kita masasarigan na iyo man an gibohon. Iyan an dahelan na si Pablo nagsadol: “Dai kamo magbalos, mga namomotan, kundi magtao nin lugar sa karatan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:19) Para sa satuyang ikararahay, iwalat na niato an pagbalos sa kamot ni Jehova.

Taano ta May Aldaw nin Pamalos?

Minsan siring, sa dakol na lugar minimidbid kan Biblia an pangangaipo na singilon an mga parakasalang daing pagsolsol. Halimbawa, ihinula ni apostol Pablo na an Dios, paagi ki Jesus, ‘mamamalos sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:8) May marahay kitang mga dahelan na isaboot an mga tataramon na ini. Taano?

Primero, huling an mayoriya ngonyan nagpapadagos na labanan an soberaniya kan Kaglalang, dai ninda iniintindi an saiyang matanos na mga pagboot. Baga man sinasabi ninda na sinda nagtutubod sa Dios o dai, malinaw na ipinaheheling kan saindang gawe na dai sinda nakamamate nin paninimbagan sa Dios. An mga tataramon kan salmista aplikado sa gabos na siring: “Taano an maraot ta naglanghad sa Dios? Sia nagsabi sa saiyang puso: ‘Dai ka maniningil.’” (Salmo 10:13) Segurado na dai itotogot ni Jehova na sia sagkod lamang na tuyaon sa paaging ini. Minsan sia Dios nin pagkamoot, sia Dios man nin hustisya. Dadangogon nia an mga agrangay kan mga tunay na nagmamakolog sa hustisya: “Tumindog ka, O Jehova. O Dios, itaasan an saimong kamot. Dai mo paglingawan an mga nagsasakit.”—Salmo 10:12.

Dugang pa, an mga tawong nagtutumang sa pagboot linalaglag an mismong daga na iniistaran niato. Inaatian ninda an aire, an daga, asin an tubig; pinapano ninda nin inhustisya asin karingisan an daga. Asin nagtatambak sinda nin kemikal, nuklear, asin iba pang nakagagadan na mga armas na igo tanganing ibugtak sa peligro an kaligtasan nin katawohan. An banal na pakikilabot kaipuhan tanganing maseguro an tiwasay na ngapit para sa makinuyog na katawohan. (Kapahayagan 11:18) An pakikilabot na ini iyo an inaapod ni Isaias na aldaw nin pamalos.

Ano an Magigibo kan Aldaw nin Pamalos nin Dios?

Sono sa Vine’s Expository Dictionary of Old and New Testament Words, sa Griegong Kasuratan, an termino para sa pamalos, kun ginagamit mapadapit sa Dios, sa literal nangangahulogan “‘an minaluwas huli sa hustisya,’ bakong, arog kan parateng nangyayari sa pamalos nin tawo, huli sa pagkakolog o huli sana sa pakamate nin kaanggotan.” Kaya, an pamalos nin Dios tumang sa saiyang mga kaiwal dai magigin panahon nin daing kontrol na pagpabolos nin dugo, na garo personal na iriwal. “Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon,” an sabi sato kan Biblia.—2 Pedro 2:9.

An mga lingkod nin Dios naghahalat sa aldaw nin pamalos nin Dios bilang panahon na mabibindikar an tamang gawe asin makakalda an mga matanos sa pan-aapi kan mga maraot. Ini dai nangangahulogan na sinda may maraot na intension o benggatibo. “An ikinaoogma an kapahamakan nin iba dai malilibre sa padusa,” an patanid kan Biblia. (Talinhaga 17:5) Al kontraryo, pinatutubo ninda an pagkaherak asin pakikidamay, na iwinawalat sa Dios an ano man na desisyon manongod sa pamalos.

Totoo, bakong pasil para sa mga anggot na gumawe sa paaging ini. Pero iyan puwede, asin dakol an guminibo kaiyan. Halimbawa, si Pedro mamondo an pagkaaki asin parateng pinapakol kan matua niang tugang. Kaya nagdakula siang madahas, na perming may problema sa pulis asin sa agom nia saka mga aki dinidiskita an kaanggotan nia sa saiyang tugang. Sa katapustapusi, naghinanyog sia sa saro sa mga Saksi ni Jehova asin dai nahaloy nagpoon na mag-adal sa Biblia. “Sa tabang ni Jehova,” an estorya nia, “nagbakle ako, asin ngonyan, imbes na makipag-iwal sa mga tawo, tinatabangan ko sinda bilang Kristianong magurang sa kongregasyon.” Sa tabang kan Biblia asin kan banal na espiritu, an dai mabilang na iba pa nagbakle man hale sa pagigin maraot an intension o benggatibo pasiring sa pagpaheling nin pagkamoot asin pagpapasensia sa iba.

Ano an Gigibohon Nindo?

An paggirumdom sa pagdatong kan aldaw nin pamalos nin Dios makatatabang sato na aprobetsaran an pagpapasensia ni Jehova. Pero bakong daing sagkod an oportunidad na gibohon iyan. Sa dai na mahahaloy maabot an aldaw na iyan. Ipinaliwanag ni apostol Pedro kun taano ta dai pa iyan naabot: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta habo nia na an siisay man malaglag kundi boot nia na an gabos makapagsolsol.”—2 Pedro 3:9.

Kun siring, kaipuhan na marhay na mag-andam na ngonyan para sa aldaw nin paniningil nin Dios paagi sa pag-adal sa Kasuratan asin pag-aplikar kan hatol kaiyan. Ini makatatabang sato na masunod an mga tataramon kan salmista: “Pabayaan an kaanggotan asin rumayo sa kabangisan; dai ka magpaheling nin kaanggotan tangani sanang makagibo nin maraot. Huli ta an mga maraot gagadanon, alagad idtong mga naglalaom ki Jehova iyo an magmamana kan daga.”—Salmo 37:8, 9.

[Ritrato sa pahina 7]

Pakalihis kan aldaw nin pamalos nin Dios, ‘idtong mga naglalaom ki Jehova magmamana kan daga’