An Semana na Luminiwat sa Kinaban

“Omawon sia na minadatong sa ngaran ni Jehova!”​—MATEO 21:9.

1. Anong duwang magkalaen na grupo an apektado kan mga pangyayari kan nakaaging Agosto?

“TOLONG LABI-LABI KASAKIT NA ALDAW NA TUMINANYOG SA KINABAN.” Kan Agosto 1991, an pangenot na mga bareta na arog kaini nagdoon kan bagay na sa laog sana nin pirang aldaw an kinaban puwedeng ribarawon nin makuri. Totoo nanggad, an huring mga aldaw nin Agosto pano nin mga pangyayari bako sanang para sa kinaban kundi para man sa sarong grupo na manongod sa sainda si Jesus nagsabi: “Sinda bakong kabtang kan kinaban.” An grupong ini midbid ngonyan bilang an mga Saksi ni Jehova.​—Juan 17:14.

2, 3. (a) Paano natampok an katalingkasan sa Zagreb sa ibong kan peligrong magkaguerra? (b) Paano binalosan an marigon na pagtubod sa Odessa?

² An pinakaenot na internasyonal na kombension nin mga Saksi ni Jehova na plinano para sa Yugoslavia iniskedyul kan Agosto 16 sagkod 18. Arog kan nangyari, idto man an magigin enot na dakulang kombension kan banwaan ni Jehova sa sarong nasyon na namemeligrong magkaigwa nin guerra sibil. An lokal na mga Saksi, kaiba an mga boluntaryo hale sa pagtaraed na nasyon, duwang bulan na nagpapagal sa biyong paghirahay sa HAŠK Gradanski na istadyum sa putbol sa Zagreb. Idto malinigon na, angay na marhay na lugar para sa “Mga Mamomoton sa Diosnon na Katalingkasan” na Kombension. Rinibong internasyonal na delegado an nagpaplanong umatender, kabale an 600 hale sa Estados Unidos. Mantang namemeligrong magkaigwa nin guerra sibil, may naglakop na huringhuding: “Dai na maabot an mga Amerikano.” Alagad ta nag-arabot sinda, kaiba an mga delegado hale sa dakol pang ibang nasyon. 10,000 an linalaoman na umatender, pero 14,684 an yaon sa istadyum kan ultimong aldaw! An gabos nagkamit nin nagsosopay na bendisyon huli ta dai ninda ‘pinabayaan an pagtorotiripon.’​—Hebreo 10:25.

³ Kaidtong tolong aldaw pakalihis kan kombension sa Zagreb, may ginibong kudeta sa Unyon Sobyet na dai nagin mapanggana. Kaidto, an mga mamomoton sa diosnon na katalingkasan ginigibo an ultimong mga preparasyon para sa saindang kombension sa Odessa duman sa Ukraine. Magigibo daw an kombension? Marigon an pagtubod, ginibo kan mga tugang an ultimo sa kompletong paghirahay sa istadyum, asin nag-arabot an mga delegado. Garo milagro, natapos an kudeta. Ginibo an makawiwiling kombension kan Agosto 24, 25, na may 12,115 na nag-atender asin 1,943​—16 porsiento kan pinakahalangkaw na bilang nin nag-atender—​an nabautismohan! An bagong mga Saksing ini, kaiba an haloy nang mga nagdadanay sa integridad, naggayagaya na sinda nag-atender sa kombension na idto na may bilog na pagsarig ki Jehova.​—Talinhaga 3:​5, 6.

4. An mga Saksi sa Sirangan na Europa inaarog an anong halimbawang itinao ni Jesus?

⁴ An maimbod na mga Saksing ini nag-aarog sa halimbawang itinao kan satong Arogan, si Jesu-Cristo. Nungka na napabayaan nia an pag-atender sa mga kapiyestahan na ipinagboot ni Jehova, dawa kan hinihingoa kan mga Judio na gadanon sia. Kan sia patukad sa Jerusalem para sa ultimo niang Paskua, an mga ini nagtitirotindog sa templo, na naghahapot: “Ano an paghona nindo? Na dai na sia madigdi sa kapiyestahan?” (Juan 11:56) Alagad ta sia nagduman! Ini an nag-andam kan dalan para sa sarong semana na natapos sa pagkabaliktad kan dalagan kan kasaysayan nin tawo. Ano kun repasohon niato ngonyan an pira sa tampok na mga kabtang kan semanang ini​—Nisan 8 sagkod 14 sa Judiong kalendaryo?

Nisan 8

5. Ano an aram ni Jesus mantang sia pasiring sa Betania kan Nisan 8, 33 C.E.?

⁵ Sa aldaw na ini si Jesus asin an saiyang mga disipulo nag-arabot hale sa Betania. Digdi, si Jesus maanom na banggi sa harong kan namomotan niang katood na si Lazaro, na bago pa sana niang buhayon hale sa mga gadan. An Betania harani sa Jerusalem. Sa pribado, sinabihan na ni Jesus an saiyang mga disipulo: “Uya! Maturukad kita sa Jerusalem, asin an Aki nin tawo itatao sa poon na mga saserdote asin sa mga eskriba, asin sisilotan sia ninda na gadanon, asin itatao sia sa mga tawo kan mga nasyon tanganing olog-ologon asin hampakon patin ipako, asin sa ikatolong aldaw sia bubuhayon liwat.” (Mateo 20:​18, 19) Biyong aram ni Jesus na kaipuhan nia ngonyan na atubangon an makologon na mga pagbalo. Minsan siring, mantang nagdadangadang an panahon na iyan nin pinakamasakit na pagbalo, ginigibo nia an gabos na paghihingoa sa mamomoton na paglilingkod sa saiyang mga tugang. Logod kita danay man na magkaigwa kan “kaisipan na ini na yaon man ki Cristo Jesus.”​—Filipos 2:​1-5; 1 Juan 3:16.

Nisan 9

6. Kan banggi nin Nisan 9, ano an ginibo ni Maria, asin ano an isinabi ni Jesus ki Judas?

⁶ Pagkasolnop kan aldaw, sa pagpopoon kan Nisan 9, nagkakan si Jesus sa harong kan dating leproso na si Simon. Digdi binubuan kan tugang ni Lazarong si Maria nin mamahalon na ungguento an payo asin bitis ni Jesus asin mapakumbabang pinahidan an bitis ni Jesus kan saiyang buhok. Kan magreklamo si Judas, nagsabi si Jesus: “Pabayae sia nindo, tanganing maotob nia ini para sa aldaw kan paglobong sa sako.” Sa pakabareta na an dakol na Judio nagduduman sa Betania asin nagtutubod ki Jesus, an poon na mga saserdote nagpakanang gadanon sia asin si Lazaro.​—Juan 12:​1-7.

7. Kan aga nin Nisan 9, paano natawan nin onra an ngaran ni Jehova, asin ano an ihinula ni Jesus?

⁷ Amay pa pagkaaga, naghale na si Jesus pa-Jerusalem. Sinabat sia nin mga kadaklan, na nagwawasiwas nin mga sanga nin palma asin nagkukururahaw: “Ligtasan man kami, nakikimaherak kami sa saimo! Omawon an minadatong sa ngaran ni Jehova, an hade nin Israel!” Dangan inotob ni Jesus an hula sa Zacarias 9:9 paagi sa pagkabayo sa sarong asno patukad sa siudad. Kan harani na sia sa Jerusalem, hinibian nia iyan, na ihinuhula na iyan kukudalan kan mga Romano nin matatarom na palo asin lubos na lalaglagon​—hula na magkakaigwa nin pambihirang kaotoban pakalihis nin 37 taon. (Ini nagpaparisa man nin maraot na mangyayari sa Kakristianohan, na nag-apostata arog kan suanoy na Jerusalem.) An Judiong mga namomoon habo ki Jesus bilang saindang hade. Anggot sindang nagsarabi: “Helinga! An kinaban nagsusunod na sa saiya.”​—Juan 12:​13, 19.

Nisan 10

8. Kan Nisan 10, paano nagpaheling si Jesus nin hararom na paggalang sa harong nin pamibi ki Jehova, asin ano an sumunod na nangyari?

⁸ Sinongko giraray ni Jesus an templo. Sa ikaduwang pangyayari, pinalayas nia an paslong mga negosyante asin pararibay nin kuwarta. An komersialismo​—“an pagkamoot sa pirak”—​dai maninigong mangibabaw sa harong nin pamibi ki Jehova! (1 Timoteo 6:​9, 10) Si Jesus madali nang magadan. Sia nagtaram manongod sa pagtanom nin banhi tanganing ikailustrar ini. Nagagadan an orihinal na banhi, pero iyan minatubo tanganing magkaigwa nin poon na namumunga nin abunda. Kabaing kaiyan, an kagadanan ni Jesus magbubunga nin buhay na daing katapusan para sa mga kadaklan na minatubod sa saiya. Nariribok an isip huli sa saiyang nagdadangadang na kagadanan, si Jesus namibi na mapamuraway logod an ngaran kan saiyang Ama. Bilang simbag, an tingog nin Dios duminagoldol hale sa langit tanganing madangog kan gabos na yaon: “Iyan pinamuraway ko na asin papamurawayon ko liwat iyan.”​—Juan 12:​27, 28.

Nisan 11​—Aldaw na Pano nin Aktibidad

9. (a) Amay pa kan Nisan 11, paano ginamit ni Jesus an mga ilustrasyon sa pagkondenar sa apostatang mga Judio? (b) Kaoyon sa parabola ni Jesus, siisay an nawaran nin mamuraway na oportunidad?

⁹ Si Jesus asin an saiyang mga disipulo naghale giraray sa Betania para sa sarong aldaw na pano nin aktibidad. Ginamit ni Jesus an tolong ilustrasyon tanganing ipaheling kun taano ta kinokondenar an apostatang Kajudiohan. Isinumpa nia an sarong poon nin higos, asin an luyos nang kamugtakan kaiyan ipinagladawan an daing pagtubod, daing bungang nasyon na Judio. Sa paglaog sa templo, isinaysay nia kun paanong an daing kamanungdanan na mga paralate sa ubasan nin sarong kagurangnan sa katapustapusi ginadan pati an aki asin eridero kan kagurangnan​—na naglaladawan kan pagtraydor kan mga Judio sa ipinaniwala sainda ni Jehova, na an magigin kulminasyon an paggadan ninda ki Jesus. Isinaysay nia an punsion sa kasal na inandam nin sarong hade​—si Jehova—​na an imbitadong mga bisita (an mga Judio) may kapasloan na nanarahotan sa dai pag-atender. Kaya, an imbitasyon itinao sa mga tagaluwas​—an mga Hentil—​na an iba nag-ako. Pero an sarong tawo na naheling na daing sulot na gubing sa kasal iinapon sa luwas. Irinirepresentar nia an palsipikadong mga Kristiano sa Kakristianohan. Dakol na Judio kan aldaw ni Jesus an inimbitaran “alagad ta pipira an pinili” na makabilang sa 144,000 na mga tinatakan na magmamana kan langitnon na Kahadean.​—Mateo 22:14; Kapahayagan 7:4.

10-12. (a) Taano ta sinagwe ni Jesus an Judiong klero, asin anong malanit na mga pagdenunsiar an itinambak nia sa mga parasaginsagin na idto? (b) Paano hinokoman sa katapustapusi an apostatang Kajudiohan?

¹⁰ An parasaginsagin na Judiong klero naghanap nin oportunidad na dakopon si Jesus, alagad ta sinimbag nia an dakol nindang hapot na pandakop asin sinopog sinda sa atubangan kan banwaan. A, an mapasaloib na relihiyosong mga Judiong idto! Prangka nanggad sindang sinagwe ni Jesus! Gustong-gusto ninda nin kabantugan, napapalaen na sulot, asin haralangkawon na titulo, arog baga kan “Rabbi” asin “Padre,” kaagid kan dakol na klerigo sa satong kaaldawan. Isinabi ni Jesus an reglamento: “An siisay man na nagpapalangkaw kan saiya man sana ibababa, asin an siisay man na magpakumbaba sa saiya man sana ilalangkaw.”​—Mateo 23:12.

¹¹ Malanit an pagdenunsiar ni Jesus sa relihiyosong mga namomoon na idto. Makapito siang nagsabi: “Herak man sa saindo!” na inaapod sindang butang mga parakabit asin parasaginsagin. Asin sa kada okasyon itinatao nia an klarong dahelan kan pagkondenar. Inoolang ninda an paglaog sa Kahadean kan kalangitan. Kun nasisiod ninda an sarong proselito, sia nagigin dobleng kondenado sa Gehenna, na posibleng dati nang nalilinyang malaglag huli sa nakaaging magabat na kasalan o panatisismo. “Mga lolong asin buta!” an sabi ni Jesus, ta an atension kan mga Fariseo nasisentro sa bulawan sa templo imbes na sa pagpapadanay kan malinig na pagsamba duman. Dai ninda iniintindi an hustisya, pagkaherak, asin kaimbodan mantang itinatao ninda an tinagba kan pinakamamawot na yerbabuena, anis, asin komino, pero dai iniintindi an magagabat na bagay kan Pagboot. An rituwal na paghugas nungka na makalilinig kan saindang panlaog na ati​—solamente sarong puso na lininigan paagi sa pagtubod sa nagdadangadang na atang ni Jesus an makagigibo kaiyan. An saindang panlaog na pagsaginsagin asin katampalasanan nagpapahimutik sa ano man na “pinaputing” panluwas.​—Mateo 23:​13-29.

¹² Iyo, talagang herak man kan mga Fariseo, na tunay na “mga aki kan mga guminadan sa mga propeta” kan suanoy! Sinda mga halas, aki nin mga rimoranon, na nakondenar sa Gehenna, ta gagadanon ninda bako sanang si Jesus kundi pati an saiyang mga isusugo. Ini paghokom na gigibohon “sa kapag-arakian na ini.” Bilang kaotoban, an Jerusalem biyong linaglag pakalihis nin 37 taon.​—Mateo 23:​30-36.

13. An komento ni Jesus manongod sa mga kontribusyon sa templo maririsa sa anong mga situwasyon ngonyan?

¹³ Bago naghale sa templo, inomaw ni Jesus an sarong dukhang balo na nagholog nin duwang sadit na sinsilyo​—“kan gabos niang pagbuhay.” Kabaliktaran nanggad kan paslong mayayaman, na an ihinoholog sana paramas sanang makadonar! Kapareho kan dukhang balo, an mga Saksi ni Jehova ngonyan gikan sa boot na isinasakripisyo an panahon, kosog, asin kuwarta sa pagsuportar asin pagpahiwas kan lakop sa kinaban na gibong pan-Kahadean. Laen nanggad ini sa inmoral na mga ebanghelista sa TV na kinukuwartahan an saindang mga aripompon asin nagtotogdok nin mga imperyo nin personal na kayamanan!​—Lucas 20:45–21:4.

Sa Paghinanapos kan Nisan 11

14. Anong kamondoan an ipinahayag ni Jesus, asin paano nia sinimbag an dugang pang hapot kan saiyang mga disipulo?

¹⁴ Pinanangisan ni Jesus an Jerusalem asin an mga tagaduman patin sinabi: “Magpoon ngonyan dai na kamo sa ano man na paagi makakaheling sa sako sagkod na kamo magsabi, ‘Omawon an minadatong sa ngaran ni Jehova!’” (Mateo 23:​37-39) Paghaloyhaloy, kan sinda nagtutukaw na sa Bukid nin mga Olibo, naghapot an kadayupot na mga disipulo ni Jesus manongod kaini, asin bilang simbag isinaysay ni Jesus an tanda sa saiyang presensia na may kapangyarihan sa Kahadean asin sa pagtatapos kan maraot na palakaw nin mga bagay ni Satanas.​—Mateo 24:1–25:46; Marcos 13:​1-37; Lucas 21:​5-36.

15. Anong tanda an itinao ni Jesus mapadapit sa saiyang presensia sa paghokom, asin poon kasuarin iyan naootob?

¹⁵ Sa pagtaram manongod sa paghokom ni Jehova na madali nang umabot sa templo, ipinarisa ni Jesus na ini arogan nin maabot na kapahapahamak na mga pangyayari sa pagtatapos kan bilog na palakaw nin mga bagay. An panahon na iyan kan saiyang presensia tatandaan kan pagputok nin guerra sa hiwas na dai pang kaagid, saka nin mga gutom, linog, asin peste, kadungan nin kadaihan nin pagkamoot asin nin katampalasanan. Totoo nanggad ini sa satong kinaban sa ika-20 siglo poon kan 1914!

16, 17. Anong mga pangyayari sa kinaban an ilinadawan ni Jesus, asin ano an maninigong magin reaksion nin mga Kristiano sa hulang iyan?

¹⁶ Masagkod iyan sa sarong “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” Mantang ini magigin mapanlaglag na arog kan Baha kan aldaw ni Noe, si Jesus nagpatanid tumang sa pagkabangkag sa kinabanon na mga gibo. “Kaya magpuka kamo, huli ta dai nindo aram kun sa anong aldaw madatong an saindong Kagurangnan.” Kanigoan an kaogmahan niato na ninombrahan kan Kagurangnan an linahidan na “maimbod asin madonong na oripon” na magtatao kan patanid asin magtatagama nin abundang espirituwal na kakanon para sa aldaw na ini kan saiyang presensia!​—Mateo 24:​21, 42, 45-47.

¹⁷ Sa satong ika-20 siglo, naheling niato “sa daga [an] kahandalan nin mga nasyon, na dai naaaraman an gigibohon . . . mantang an mga tawo nalulunosan huli sa takot asin paghalat sa mga bagay na maabot sa ineerokan na daga.” Alagad ta sinasabi sato ni Jesus: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na.” Asin pinatatanidan nia kita: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod.” Solamente paagi sa pagdadanay na puka na kita makatitindog na aprobado sa atubangan ni Jesus, “an Aki nin tawo,” sa saiyang presensia.​—Lucas 21:​25-28, 34-36.

18. Anong pagpakosog an makukua niato sa mga ilustrasyon ni Jesus manongod sa sampulong daraga asin sa mga talento?

¹⁸ Sa pagtatapos sa saiyang ekspertong pagpatanaw sa mga mangyayari sa modernong aldaw, itinao ni Jesus an tolong ilustrasyon. Enot, sa parabola kan sampulong daraga, idinoon nia liwat an pangangaipo na “magpuka.” Dangan, sa ilustrasyon kan mga oripon asin talento, ipinaheling nia kun paano an kahigosan binabalosan nin pag-agda na ‘lumaog sa kaogmahan kan Kagurangnan.’ An linahidan na mga Kristiano, na ipinanganino sa mga parabolang ini, saka an ibang karnero mapakokosog na gayo kan buhay na mga paglaladawan na ini.​—Mateo 25:​1-30.

19, 20. Anong makawiwiling relasyon sa modernong aldaw an itinatampok sa ilustrasyon ni Jesus manongod sa karnero asin kanding?

¹⁹ An ikatolong ilustrasyon mapadapit sa presensia ni Jesus na may kapangyarihan sa Kahadean pag-abot nia tanganing tumukaw sa saiyang mamuraway na langitnon na trono. Iyan panahon nin paghokom sa mga nasyon asin sa pagbulagbulag kan mga tawo digdi sa daga sa duwang grupo, an saro kompuwesto nin mahoyong arog-karnerong mga tawo asin an saro naman, nin matatagas an payong mga arog-kanding. An mga karnero naghihingoang marhay na patunayan na sinda nagtatabang sa mga tugang kan Hade​—an natatada pang mga linahidan digdi sa daga sa panahon na ini kan katapusan kan kinaban. An mga karnerong ini babalosan nin buhay, mantang an daing pag-apresyar na mga kanding mapasiring sa daing katapusan na kalaglagan.​—Mateo 25:​31-46.

²⁰ Makangangalas nanggad na relasyon an naheheling niato sa pag-oltanan kan ibang karnero asin kan mga tugang kan Hade sa pagtatapos na ini kan palakaw nin mga bagay! Minsan ngani an linahidan na natatada iyo an nagpasan kan paninimbagan sa gibohon kan pagpopoon kan presensia kan Hade, an minilyon na mahigos na ibang karnero ngonyan iyo na an minakompuwesto sa 99.8 porsiento kan mga lingkod nin Dios digdi sa daga. (Juan 10:16) Asin pinatunayan man ninda na sinda andam na magtagal nin ‘gutom, paha, kahubaan, helang, asin pagkabilanggo’ bilang kairiba kan nagdadanay sa integridad na mga linahidan.a

Nisan 12

21. Ano an nagkosog kan Nisan 12, asin paano?

²¹ Nagkosog an pakana na gadanon si Jesus. Dinumanan ni Judas an poon na mga saserdote sa templo, na nag-oyon na pasaloiban si Jesus sa halagang 30 pidasong pirak. Pati ini ihinula man.​—Zacarias 11:12.

Nisan 13

22. Ano an ginibong pag-andam kan Nisan 13?

²² Si Jesus, na nagdanay sa Betania, posibleng para sa pamimibi asin paghorophorop, isinugo an saiyang mga disipulo sa Jerusalem tanganing hanapon si “Polano.” Sa harong kan tawong ini, sa sarong mahiwas na kuwarto sa itaas, inandam ninda an Paskua. (Mateo 26:​17-19) Sa pagsolnop kan aldaw kan Nisan 13, si Jesus nakiiba sa sainda duman para sa pinakamahalagang selebrasyon sa bilog na kasaysayan. Ano an mangyayari ngonyan sa Nisan 14? An masunod na luwas an magsasaysay kaiyan.

[Nota sa Ibaba]

Paano Nindo Susumaryohon?

◻ Anong pag-istimar asin pagsabat an itinao nin nagkapira ki Jesus kan Nisan 8 sagkod 10?

◻ Paano ibinuyagyag ni Jesus an parasaginsagin na klero kan Nisan 11?

◻ Anong dakulang hula an itinao ni Jesus, asin paano iyan naootob ngonyan?

◻ Paano nagpadagos an mga pangyayari pasiring sa kulminasyon kan Nisan 12 asin 13?

[Ritrato sa pahina 12]

Inomaw ni Jesus an dukhang balo na nagdonar nin duwang sadit na sinsilyo​—an gabos niang pagbuhay