Ipinasabong na Arogan nin Kristianong Pagmimisyonero
“Magin kamong mga paraarog sa sako, siring na ako paraarog ki Cristo.”—1 CORINTO 11:1.
1. Ano an nagkapirang paagi na si Jesus nagtao nin pambihirang halimbawa tanganing arogon kan saiyang mga parasunod? (Filipos 2:5-9)
PAMBIHIRA nanggad an halimbawang itinao ni Jesus sa saiyang mga disipulo! Maogma niang binayaan an saiyang langitnon na kamurawayan tanganing humilig digdi sa daga asin mamuhay sa tahaw nin makasalan na mga tawo. Nagusto siang umagi sa makuring kasakitan para sa ikaliligtas kan katawohan asin, mas mahalaga, para sa pagpakangbanal sa ngaran kan saiyang langitnon na Ama. (Juan 3:16; 17:4) Kan binibista para sa saiyang buhay, si Jesus mapusong nagpahayag: “Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan.”—Juan 18:37.
2. Taano ta napagbotan kan binuhay liwat na si Jesus an saiyang mga disipulo na ipagpadagos an gibohon na pinonan nia?
2 Bago sia nagadan, tinawan ni Jesus nin marahayon na pagtotokdo an saiyang mga disipulo tanganing ikapagpadagos ninda an gibong pagpatotoo sa katotoohan kan Kahadean. (Mateo 10:5-23; Lucas 10:1-16) Kaya, pagkabuhay nia liwat, nakapagboot si Jesus: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”—Mateo 28:19, 20.
3. Paano huminiwas an paggibo nin mga disipulo, alagad sa anong mga lugar na iyan nakonsentrar?
3 Sa suminunod na tolo may kabangang taon, kinuyog kan mga disipulo ni Jesus an pagboot na ini pero linimitaran sana an saindang paggibo nin mga disipulo sa mga Judio, Judiong proselito, asin tinuring mga Samaritano. Dangan, kan 36 C.E., ipinagboot nin Dios na ihulit an maogmang bareta sa sarong tawong dai tinuri, si Cornelio, asin sa saiyang pamilya. Kan suminunod na dekada, ilinaog sa kongregasyon an iba pang Hentil. Minsan siring, minalataw na an kadaklan na paghuhulit ginibo sana sa sirangan na Mediterraneo.—Gibo 10:24, 44-48; 11:19-21.
4. Ano an makahulogan na nangyari kaidtong mga 47-48 C.E.?
4 Kaipuhan an sarong bagay na magmomotibar o magpapangyari sa mga Kristiano na gumibo nin mga disipulo sa mga Judio asin Hentil sa mas hararayong lugar. Kaya, kaidtong mga 47-48 C.E., an kamagurangan sa kongregasyon nin Antioquia sa Siria nag-ako kan banal na mensaheng ini: “Sa gabos na tawo laena nindo para sa sako si Bernabe asin si Saulo para sa gibo na inapodan ko sa sainda.” (Gibo 13:2) Mangnoha na midbid kaidto si Pablo sa orihinal niang ngaran, Saulo. Mangnoha man na inenot na ngaranan nin Dios si Bernabe kisa ki Pablo, tibaad huli ta kaidto si Bernabe an ibinibilang na matua sa duwa.
5. Taano an rekord kan biyahe sa pagmimisyonero ni Pablo asin Bernabe ta may dakulang halaga sa mga Kristiano ngonyan?
5 An detalyadong rekord kan biyahe sa pagmimisyonero ni Pablo asin Bernabe nakapakokosog na gayo sa mga Saksi ni Jehova, nangorogna sa mga misyonero asin payunir na naghale sa saindang sadiring banwaan tanganing maglingkod sa Dios sa sarong komunidad sa ibang nasyon. Saro pa, an pagrepaso sa Gibo kapitulo 13 asin 14 seguradong mapahiro sa iba pa na arogon si Pablo asin Bernabe asin dugangan an saindang kabtang sa pinakamahalagang gibohon na paggibo nin mga disipulo.
An Isla nin Chipre
6. Anong halimbawa an itinao kan mga misyonero sa Chipre?
6 Daing pag-atraso an mga misyonero nagbiyahe hale sa puwerto nin Siria sa Seleucia pasiring sa isla nin Chipre. Pakaduong sa Salamina, dai sinda nalingling kundi “nagpoon sindang magbalangibog kan tataramon nin Dios sa mga sinagoga kan mga Judio.” Sa pag-arog ki Cristo, dai sinda nakontento na umistar sa siudad na idto asin halaton na dumolok sa sainda an mga tagaisla. Imbes, linibot ninda “an bilog na isla.” Sierto na kalabot digdi an hararayong pagbaklay asin pabarobalyong dadagusan, ta dakulang isla an Chipre, asin dinara sinda kan saindang pagbiyahe sa kalabaan kan pinakadakulang kabtang kaiyan.—Gibo 13:5, 6.
7. (a) Ano an pambihirang nangyari sa Pafos? (b) An talang ini nagpapakosog sato na magkaigwa nin anong kaisipan?
7 Sa katapusan kan saindang pagdanay duman, an duwang lalaki binalosan nin magayonon na eksperyensia sa siudad nin Pafos. An namomoon sa isla, si Sergio Paulo, naghinanyog sa saindang mensahe asin “tuminubod.” (Gibo 13:7, 12) Kan huri nagsurat si Pablo: “Naheling nindo an saiyang pagkaapod saindo, mga tugang, na bakong dakol na madonong sa laman an inapod, bakong dakol na makapangyarihan, bakong dakol na mga mahal na tawo.” (1 Corinto 1:26) Minsan siring, kabilang sa mga makapangyarihan na nag-ako si Sergio Paulo. An eksperyensiang ini maninigong magpakosog sa gabos, nangorogna sa mga misyonero, na magkaigwa nin positibong kaisipan manongod sa pagpatotoo sa mga opisyales kan gobyerno, arog kan isinasadol sa sato sa 1 Timoteo 2:1-4. An mga may autoridad kun beses nakatao nin dakulang tabang sa mga lingkod nin Dios.—Nehemias 2:4-8.
8. (a) Anong naliwat na relasyon sa pag-oltanan ni Bernabe asin Pablo an minalataw poon sa panahon na ini? (b) Sa anong paagi na sarong marahay na halimbawa si Bernabe?
8 Sa impluwensia kan espiritu ni Jehova, si Pablo nagkaigwa nin dakulang kabtang sa pagkombertir ki Sergio Paulo. (Gibo 13:8-12) Siring man, poon sa panahon na ini, minalataw na si Pablo na an nangenot. (Ikomparar an Gibo 13:7 sa Gibo 13:15, 16, 43.) Ini kaoyon sa banal na sugo na inako ni Pablo kan panahon na sia makombertir. (Gibo 9:15) Tibaad nabalo kan siring na pangyayari an kapakumbabaan ni Bernabe. Minsan siring, imbes na ibilang na insulto personal an pagkaliwat na ini, si Bernabe posibleng inotob an kahulogan kan saiyang ngaran, “Aki nin Karangahan,” asin maimbod na sinuportaran si Pablo sa bilog na biyahe sa pagmimisyonero asin pakalihis kaiyan kan angaton nin pirang Judiong Kristiano an saindang ministeryo sa mga Hentil na dai turi. (Gibo 15:1, 2) Kanigoan karahay na halimbawa kaini sa sato gabos, pati sa mga nag-iistar sa mga erokan nin misyonero asin Bethel! Maninigo na permi kitang andam na akoon an teokratikong mga pagliliwat asin itao an bilog niatong pagsuportar sa mga ninonombrahan na mangenot sa sato.—Hebreo 13:17.
An Kapatagan nin Asia Minor
9. Ano an manonodan niato sa pagigin andam ni Pablo asin Bernabe na magduman sa Antioquia sa Pisidia?
9 Hale sa Chipre, si Pablo asin Bernabe suminakay sa barko paamihanan sa kontinente nin Asia. Sa dai sinasabing dahelan, an mga misyonero dai nagdanay sa lugar na harani sa dagat kundi nagbaklay nin halawig asin peligroso sa rayong mga 180 kilometros pasiring sa Antioquia sa Pisidia, na yaon sa sentral na kapatagan nin Asia Minor. Kinaipuhan kaini an pagtukad sa bukid asin paglugsot sa sarong kaplanodohan na mga 1,100 metros an langkaw sa dagat. An iskolar sa Biblia na si J. S. Howson nagsasabi: “An pagigin madahas asin tulisan kan populasyon sa kabukidan na idto na nagseseparar kan kapatagan . . . sa kaplanodohan na yaon sa baybayon sa timog, bantog sa gabos na kabtang kan suanoy na kasaysayan.” Dugang pa, an mga misyonero napaatubang sa mga peligro gikan sa natural na mga elemento. “Mayo nin distrito sa Asia Minor,” an idinugang pa ni Howson, “na mas midbid huli sa ‘mga pagbaha’ kaiyan kisa mabukid na daga nin Pisidia, na duman an mga salog nagbuburakbusak sa ibaba nin darakulang kantil, o makosogon an sulog sa hayakpit na mga ampas.” An mga detalyeng ini nakatatabang sato na maimahinar an klase nin mga biyahe na andam na gibohon kan mga misyonero para sa pagpalakop kan maogmang bareta. (2 Corinto 11:26) Siring man ngonyan, an dakol na lingkod ni Jehova inaatubang an gabos na klase nin kaolangan tanganing maabot an mga tawo asin ikahiras sa sainda an maogmang bareta.
10, 11. (a) Paano si Pablo nagdanay sa puntong maooyonan kan mga nagdadangog sa saiya? (b) Taano ta posibleng nabigla an dakol na Judio na madangog an mga pagsakit kan Mesiyas? (c) Anong klaseng kaligtasan an iinatubang ni Pablo sa mga nagdadangog sa saiya?
10 Mantang may Judiong sinagoga sa Antioquia sa Pisidia, iyan an enot na dinumanan kan mga misyonero tanganing matawan nin oportunidad na mag-ako kan maogmang bareta an mga pinakapamilyar sa Tataramon nin Dios. Kan imbitaran na magpahayag, si Pablo tuminindog asin nagtao nin matibayon na diskurso. Sa bilog na pahayag, nagdanay sia sa puntong maooyonan kan mga Judio asin proselito sa mga presente. (Gibo 13:13-16, 26) Pakatapos kan saiyang introduksion, rinepaso ni Pablo an bantog na kasaysayan kan mga Judio, na ipinagirumdom sainda na pinili ni Jehova an saindang mga apoon dangan ilinigtas sinda sa Egipto, saka kun paano nia sinda tinabangan na masakop an mga taga-Dagang Panuga. Dangan itinampok ni Pablo an mga ginibo ni Jehova ki David. An siring na impormasyon harani sa puso nin mga Judio kan enot na siglo ta sinda naglalaom na an Dios mapatindog nin sarong gikan ni David bilang paraligtas asin daing sagkod na hade. Sa puntong ini, si Pablo mapusong nagpaisi: “Sa banhi kan lalaking ini [si David] sono sa saiyang panuga dinara nin Dios sa Israel an sarong paraligtas, si Jesus.”—Gibo 13:17-23.
11 Minsan siring, an klase nin paraligtas na hinahalat nin dakol na Judio militar na eroe na makalda sa sainda sa pagdominar nin Roma asin ilalangkaw an Judiong nasyon sa gabos pang iba. Kaya, seguradong nabigla sinda na madangog si Pablo na magsabi na an Mesiyas ipinagadan kan sadiri nindang mga namomoon sa relihiyon. “Alagad sia binuhay liwat nin Dios sa mga gadan,” an mapusong ipinahayag ni Pablo. Sa paghinanapos kan saiyang pahayag, ipinaliwanag nia sa mga nagdadangog na sinda puwedeng magkamit nin makangangalas na kaligtasan. “Aramon nindo,” sabi nia, “na paagi sa Sarong ini ibinabalangibog sa saindo an kapatawadan nin mga kasalan; asin na sa gabos na bagay na dian kamo dai ikapahahayag na daing kasalan paagi kan pagboot ni Moises, an gabos na nagtutubod ipinahahayag na daing kasalan paagi sa Sarong ini.” Tinapos ni Pablo an saiyang pahayag paagi sa pagsadol sa mga nagdadangog saiya na dai umiba sa dakol na ihinula nin Dios na magpapabaya sa makangangalas na probisyon na ini nin kaligtasan.—Gibo 13:30-41.
12. Ano an ibinunga kan diskurso ni Pablo, asin paano kita maninigong mapakosog kaini?
12 Kanigoan karahay na diskurso na basado sa Kasuratan! Ano an reaksion kan mga nagdadangog? “An dakol sa mga Judio asin sa mga proselito na nagsasamba sa Dios nagsurunod ki Pablo asin ki Bernabe.” (Gibo 13:43) Nakapakokosog nanggad ini sa sato ngonyan! Gibohon man logod niato an pinakamakakaya niato na ikaatubang nin epektibo an katotoohan, baga man sa satong ministeryo sa publiko o sa mga komento asin pahayag sa mga pagtiripon kan satong kongregasyon.—1 Timoteo 4:13-16.
13. Taano ta kinaipuhan na bayaan kan mga misyonero an Antioquia sa Pisidia, asin anong mga hapot an minalataw manongod sa bagong mga disipulo?
13 An bagong mga interesado sa Antioquia sa Pisidia dai puwedeng sadirihon na sana an maogmang baretang ini. Bilang resulta, “kan suminunod na sabbath haros an bilog na siudad nagkatiripon sa pagdangog kan tataramon ni Jehova.” Asin dai nahaloy nakaabot sa luwas kan siudad an mensahe. An totoo, “an tataramon ni Jehova padagos na dinara sa bilog na dagang idto.” (Gibo 13:44, 49) Imbes na maogma sa bagay na ini, nahimo kan nag-iimon na mga Judio na palayason sa siudad an mga misyonero. (Gibo 13:45, 50) Ano an epekto kaini sa bagong mga disipulo? Nanluya na daw an saindang boot asin nagpondo?
14. Taano ta dai mapapopondo nin mga tumang an gibohon na pinonan kan mga misyonero, asin ano an manonodan niato digdi?
14 Dai, ta ini gibohon nin Dios. Siring man, an mga misyonero nagbugtak nin marigon na pasisikadan nin pagtubod sa binuhay liwat na Kagurangnan na Jesu-Cristo. Kaya malinaw na an ibinilang kan bagong mga disipulo na Poon ninda si Cristo, asin bakong an mga misyonero. Kaya, mababasa niato na sinda “padagos na napano nin kagayagayahan asin nin banal na espiritu.” (Gibo 13:52) Ini nakapakokosog nanggad sa mga misyonero asin iba pang paragibo nin disipulo ngonyan! Kun mapakumbaba asin mahigos niatong gigibohon an satong kabtang, bibendisyonan ni Jehova Dios asin ni Jesu-Cristo an satong ministeryo.—1 Corinto 3:9.
Iconio, Listra, asin Derbe
15. Anong paagi an ginibo kan mga misyonero sa Iconio, na may anong mga resulta?
15 Ngonyan nagbiyahe si Pablo asin Bernabe nin mga 140 kilometros patimog-sirangan pasiring sa sumunod na siudad, an Iconio. An takot sa paglamag dai nakaolang sa sainda sa paggibo kan arog sa ginibo ninda sa Antioquia. Bilang resulta, sinasabi kan Biblia: “An dakulang kadaklan kapwa nin mga Judio asin Griego nagturubod.” (Gibo 14:1) Liwat, nagpundar nin pagtumang an mga Judio na habo sa maogmang bareta. Alagad ta nagtagal an mga misyonero asin dakol na panahon an ginamit sa Iconio sa pagtabang sa bagong mga disipulo. Dangan, kan maaraman na gagapoon sinda kan mga Judiong tumang sa sainda, si Pablo asin Bernabe madonong na nagdulag pasiring sa sumunod na teritoryo, “sa Listra asin Derbe patin sa palibot.”—Gibo 14:2-6.
16, 17. (a) Ano an nangyari ki Pablo sa Listra? (b) Ano an epekto kan mga ginibo nin Dios sa apostol sa sarong barobata sa Listra?
16 Mapuso na “sinda nagpahayag kan maogmang bareta” sa bago, ngonyan pa sana nahulitan na teritoryong ini. (Gibo 14:7) Kan ini mabaretaan kan mga Judio sa Antioquia sa Pisidia asin sa Iconio, nagduman sinda sa Listra asin kinombensir an mga kadaklan na gapoon si Pablo. Daing panahon na makadulag, si Pablo ginapo, kaya naniwala an mga nagtutumang saiya na sia gadan na. Ginuyod sia ninda paluwas sa siudad.—Gibo 14:19.
17 Maiimahinar daw nindo an kakologan nin boot na itinao kaini sa bagong mga disipulo? Alagad ta makangangalas nanggad, kan palibotan ninda si Pablo, sia tuminindog! Dai sinasabi kan Biblia kun baga saro sa bagong mga disipulong ini an sarong barobata na an ngaran Timoteo. Tunay na uminabot an panahon na naaraman nia an mga ginibo nin Dios ki Pablo asin natanom na marhay sa hoben niang isip. Si Pablo nagsurat sa ikaduwa niang surat ki Timoteo: “Ika maingat na nagsunod sa sakong katokdoan, sa sakong gawe, . . . sa mga bagay na nangyari sa sako sa Antioquia, sa Iconio, sa Listra, sa mga paglamag na tinios ko; alagad ta sa gabos na iyan ilinigtas ako kan Kagurangnan.” (2 Timoteo 3:10, 11) Mga saro o duwang taon pakalihis kan paggapo ki Pablo, sia nagbuwelta sa Listra asin naheling na an hoben na si Timoteo arogan na Kristiano, “marahay an patotoo sa saiya kan mga tugang sa Listra asin Iconio.” (Gibo 16:1, 2) Kaya pinili sia ni Pablo bilang kaibaiba sa biyahe. Ini nakatabang ki Timoteo na tumalubo sa espirituwal, asin pag-abot nin panahon sia nakuwalipikar na isugo ni Pablo na sumongko sa laen-laen na kongregasyon. (Filipos 2:19, 20; 1 Timoteo 1:3) Siring man ngonyan, an mahigos na mga lingkod nin Dios marahayon na impluwensia sa mga hobenes, na an dakol minadakula na magin mahahalagang lingkod nin Dios, arog ni Timoteo.
18. (a) Ano an nangyari sa mga misyonero sa Derbe? (b) Anong oportunidad an bukas ngonyan para sa sainda, alagad ta ano an pinili ninda?
18 Pagkaaga kaidtong makaligtas sia sa kagadanan sa Listra, naghale si Pablo kaiba si Bernabe pa-Derbe. Kaidto daing suminunod na mga nagtutumang, asin sinasabi kan Biblia na ‘sinda nakagibo nin dakol-dakol na disipulo.’ (Gibo 14:20, 21) Kan makaestablisar na nin kongregasyon sa Derbe, si Pablo asin Bernabe kinaipuhan na magdesisyon. May dakol an nagbibiyaheng tinampong gibo kan mga Romano na diretso haleng Derbe pa-Tarso. Hale duman harani na an biyahe pa-Antioquia sa Siria. Posible na idto an pinakakombenyenteng dalan papuli, asin puwedeng isipon kan mga misyonerong idto na puwede naman sindang magpahingalo. Alagad sa pag-arog sa saindang Kagurangnan, namatean ni Pablo asin Bernabe an mas dakulang pangangaipo.—Marcos 6:31-34.
Lubos na Pag-otob sa Gibohon nin Dios
19, 20. (a) Paano binendisyonan ni Jehova an mga misyonero huli sa pagbuwelta sa Listra, Iconio, asin Antioquia? (b) Anong leksion an itinatao kaini sa banwaan ni Jehova ngonyan?
19 Imbes na umagi sa haraning ruta papuli, an mga misyonero mapusong nagbuwelta asin sinongko liwat an mismong mga siudad na duman nameligro an saindang buhay. Binendisyonan daw sinda ni Jehova para sa daing kapasloan na pagmakolog na ini para sa bagong mga karnero? Iyo nanggad, ta sinasabi kan tala na saindang ‘napakosog an kalag kan mga disipulo, na sinasadol sinda na magdanay sa pagtubod.’ Tamang-tama, sinabihan ninda an bagong mga disipulong idto: “Kita kaipuhan na lumaog sa kahadean nin Dios paagi sa dakol na kasakitan.” (Gibo 14:21, 22) Ipinagirumdom man sainda ni Pablo asin Bernabe an pagkaapod sa sainda bilang kairibang paramana sa nagdadangadang na Kahadean nin Dios. Ngonyan, maninigo kitang tumao nin kaparehong pagpakosog sa bagong mga disipulo. Mapakokosog niato sinda na tagalan an mga pagbalo paagi sa pagpagirumdom sainda kan paglaom sa buhay na daing katapusan digdi sa daga sakop kan Kahadean na iyan nin Dios na ihinulit ni Pablo asin Bernabe.
20 Bago bayaan an kada siudad, tinabangan ni Pablo asin Bernabe an lokal na kongregasyon na maorganisar nin orog. Malinaw na tinokdoan ninda an kuwalipikadong mga lalaki asin ninombrahan sindang mangenot. (Gibo 14:23) Daing duwa-duwa na ini nakakontribuwir sa orog na pagdakol. Siring man ngonyan, an mga misyonero asin iba pa, pakatabangi kan mga bagohan na umoswag sagkod na kaya na nindang magsaabaga nin paninimbagan, kun beses minahale asin ipinagpapadagos an marahay nindang trabaho sa ibang lugar na mas dakula an pangangaipo.
21, 22. (a) Ano an nangyari kan matapos ni Pablo asin Bernabe an saindang biyahe sa pagmimisyonero? (b) Anong mga hapot an pinalalataw kaini?
21 Kan sa katapustapusi magpuli an mga misyonero sa Antioquia sa Siria, kontento sindang marhay. An totoo, sinasabi kan tala sa Biblia na “lubos nindang nahaman” an gibohon na ipinaniwala sa sainda nin Dios. (Gibo 14:26) Siyempre, an pagsaysay kan saindang mga eksperyensia “nakatao nin dakulang kaogmahan sa gabos na tugang.” (Gibo 15:3) Alagad kumusta man sa umaaboton? Matukaw na sana daw sinda asin makokontento na sana sa nakaagi nindang kapangganahan? Dai nanggad. Pakasongkoa sa namamahalang grupo sa Jerusalem tanganing makua an desisyon sa isyu manongod sa pagturi, an duwa naghale na naman sa mga biyahe sa pagmimisyonero. Ngonyan magkalaen na an saindang direksion. Ipinag-iba ni Bernabe si Juan Marcos asin nagduman sa Chipre, mantang si Pablo nakakua nin bagong kaiba, si Silas, asin nagbiyahe sa Siria asin Cilicia. (Gibo 15:39-41) Sa biyaheng ini na pinili nia an hoben na si Timoteo asin iiniba sia.
22 Dai sinasabi kan Biblia an resulta kan ikaduwang biyahe ni Bernabe. Kun manongod ki Pablo, nagdagos sia sa bagong teritoryo asin nakapatindog nin mga kongregasyon sa kisuerra limang siudad—Filipos, Berea, Tesalonica, Corinto, asin Efeso. Ano an sekreto kan pambihirang kapangganahan ni Pablo? Epektibo daw an kaparehong mga prinsipyo para sa Kristianong mga paragibo nin disipulo ngonyan?
Nagigirumdoman daw Nindo?
◻ Taano ta si Jesus an pambihirang halimbawa na dapat arogon?
◻ Sa anong paagi na sarong halimbawa si Bernabe?
◻ Ano an manonodan niato sa diskurso ni Pablo sa Antioquia sa Pisidia?
◻ Paano lubos na hinaman ni Pablo asin Bernabe an asignasyon sa sainda?
[Ritrato sa pahina 15]
An pagtagal ni apostol Pablo sa paglamag nagkaigwa nin dai nahahaleng impresyon sa barobatang si Timoteo