Mga Hapot Hale sa mga Parabasa

Sa Hebreo 11:​26, si Moises daw an sinasambit bilang ‘an Cristo,’ o imbes sia daw tipo ni Jesu-Cristo?

Kan ipinaliliwanag an pagtubod ni Moises, isinurat ni apostol Pablo na “ibinilang [ni Moises na] orog pang kayamanan an pag-olog-olog kan Cristo kisa natipon na mga kayamanan kan Egipto; huli ta sia nakatorohok na gayo sa pagtao kan balos.” (Hebreo 11:26) Garo baga pinanonongdan ni Pablo si Moises bilang ‘an Cristo,’ o linahidan na saro, sa ibang sentido.

Totoo na sa dakol na bagay si Moises nagtao nin arogan para sa maabot na Mesiyas. Minsan ngani si Moises mismo sarong propeta, ihinula nia an maabot na orog na dakulang propeta na ‘arog sa saiya.’ An dakol na Judio nakasabot na si Jesus iyo “An Propeta,” na pinatotoohan kan saiyang mga parasunod. (Deuteronomio 18:​15-19; Juan 1:​21; 5:​46; 6:​14; 7:​40; Gibo 3:​22, 23; 7:37) Si Moises iyo man an parapangoltanan kan tipan nin Pagboot, pero si Jesus nag-ako nin “orog karahay na paglilingkod sa publiko” bilang an “parapangoltanan sa orog karahay na tipan,” an mamuraway na bagong tipan. (Hebreo 8:​6; 9:​15; 12:​24; Galacia 3:​19; 1 Timoteo 2:5) Kaya sa nagkapirang paagi si Moises masasabi na tipo kan maabot na Mesiyas.

Alagad, bako iyan an minalataw na pangenot na kahulogan kan Hebreo 11:26. Mayong nagpaparisa na may pakaaram si Moises sa mga detalye manongod sa Mesiyas, na talagang ibinibilang nia na an inagihan nia sa Egipto para sa mangyayari sa Mesiyas o sa representante Nia.

An iba nagsuherir na an mga tataramon ni Pablo sa Hebreo 11:​26 igwang kahulogan kapareho kan sinabi nia na an mga Kristiano nag-agi nin “mga kasakitan para ki Cristo.” (2 Corinto 1:5) Aram kan linahidan na mga Kristiano na si Jesu-Cristo nagsakit asin kun sinda ‘iribang nagtios sinda iribang mapapamuraway’ sa langit. Pero dai aram ni Moises kun ano an titioson kan maabot na Mesiyas, ni na si Moises igwang langitnon na paglaom.​—Roma 8:17; Colosas 1:24.

Igwa nin mas simpleng pagsabot kun paano “ibinilang [ni Moises na] orog pang kayamanan an pag-olog-olog kan Cristo.”

Kan isurat ni Pablo ‘an Cristo’ sa Hebreo 11:​26, ginamit nia an terminong Griego na Khri·stouʹ, na iyo an katimbang kan Hebreong Ma·shiʹach, o Mesiyas. An “Mesiyas” asin “Cristo” pareho nangangahulogan na “linahidan na saro.” Kaya si Pablo nagsurat dapit sa ‘pagbilang ni Moises kan pag-olog-olog kan linahidan na saro.’ Si Moises daw mismo puwedeng apodon na “linahidan na saro”?

Iyo. Kan mga panahon kan Biblia an saro puwedeng nombrahan sa sarong espesyal na katongdan paagi sa pag-ula nin lana sa saiyang payo. ‘Dangan kinua ni Samuel an lalagan nin lana asin iinula iyan sa payo [ni Saul].’ “Kinua ni Samuel an sungay kan lana asin linahidan nia [si David] sa tahaw kan saiyang mga tugang na lalaki. Asin an espiritu ni Jehova nagpoon na humiro ki David.” (1 Samuel 10:​1; 16:​13; ikomparar an Exodo 30:​25, 30; Levitico 8:​12; 2 Samuel 22:​51; Salmo 133:2.) Alagad, an iba, arog kan propetang si Eliseo asin an hade nin Siria na si Hazael, sinasabing mga “linahidan” minsan ngani mayong ebidensia na igwang literal na lana na inula sa sainda. (1 Hade 19:​15, 16; Salmo 105:​14, 15; Isaias 45:1) Kun siring, an sarong tawo puwedeng magin “linahidan na saro” paagi sa pagkapili o espesyal na pagnombra.

Sa sentidong ini si Moises mismo linahidan na saro nin Dios, asin minsan an ibang Biblia nagtatao nin mga traduksion na arog baga kan “Linahidan nin Dios” o “an Linahidan na Saro” sa Hebreo 11:26. Si Moises ninombrahan bilang representante ni Jehova asin an saro na mangengenot sa Israel paluwas sa Egipto. (Exodo 3:​2-12, 15-17) Minsan ngani si Moises pinadakula sa tahaw nin kayamanan asin kamurawayan kan Egipto, orog na pinahalagahan nia an saiyang nombramiento, na saiyang inako asin inotob. Kun siring, si Pablo puwedeng sumurat na “ibinilang [ni Moises na] orog pang kayamanan an pag-olog-olog kan Cristo kisa natipon na mga kayamanan kan Egipto.”