An Satuyang Dakulang Kaglalang Asin an Saiyang mga Gibo

KANIGOAN kadakula asin kagayon! An makosogon na mga busay sa Iguaçú o Niagara, an harararom na ampas sa Arizona o Hawaii, an magagayon na fjord (pagbolos kan dagat palaog sa kabukidan) sa Norway o New Zealand​—mapakakagsing ka sa paghanga sa mga ngangalasan na ini sa naturalesa! Pero an mga iyan daw nagkanorongod sanang bunga kan inaapod na Naturalesa? Bako, an mga iyan orog pa dian! An mga iyan makangangalas na mga gibo nin sarong Dakulang Kaglalang, mamomoton na langitnon na Ama na manongod sa saiya an madonong na si Hadeng Salomon nagsurat: “An gabos saiyang ginibong magayon sa kapanahonan kaiyan. Minsan an panahon na daing sagkod ibinugtak nia sa saindang puso, tanganing an katawohan dai noarin man makarorop sa ginibo kan tunay na Dios poon sa kapinonan sagkod sa katapusan.” (Eclesiastes 3:11) Tunay na kaipuhan an panahon na daing sagkod tanganing masiyasat nin mga tawo an gabos na mamuraway na gibo na ipinano kan satong Kaglalang sa uniberso.

Kanigoan kamakangangalas kan satong Dakulang Kaglalang! Asin ogmahon kita na an pinakamakapangyarihan na Dios na ini “sa katapusan kan mga aldaw na ini nagtaram sa sato paagi sa sarong Aki, na ninombrahan niang paramana kan gabos na bagay, asin paagi sa saiya ginibo nia an mga palakaw nin mga bagay.” (Hebreo 1:2) An Aking ini, si Jesu-Cristo, nag-apresyar sa magagayon na bagay na linalang kan saiyang Ama. Parate niang nanambitan an mga iyan sa pag-ilustrar kan mga katuyohan kan saiyang Ama asin sa pagtaram nin mga pampakosog sa mga naghihinanyog sa saiya. (Mateo 6:​28-30; Juan 4:​35, 36) “Huli sa pagtubod” dakol an nakasabot na an mga ngangalasan sa mga linalang “nahaman paagi sa tataramon nin Dios.” (Hebreo 11:3) An pan-aroaldaw niatong buhay maninigong magparisa kan siring na pagtubod.​—Santiago 2:​14, 26.

Dakula nanggad an mga lalang kan satong Dios. An mga iyan makangangalas na nagpaparisa kan saiyang kadonongan, kan saiyang kapangyarihan, kan saiyang katanosan, asin kan saiyang pagkamoot. Halimbawa, saiyang itinagilid an satong daga asin pinalibot iyan sa aldaw tanganing an saiyang lalalangon sa ngapit, an tawo, makaheling sa magayonon na pagkasunodsunod nin mga panahon. An Dios nagsabi: “Sa gabos na aldaw na an daga nagdadanay, an pagtanom asin pag-ani, saka an lipot asin init, saka an tig-init asin tiglipot, saka an aldaw asin banggi, dai noarin man maontok.” (Genesis 8:22) Dugang pa, binugtakan nin Dios nin abundang mahahalagang mineral an satong daga. Nangorogna, nagtagama sia nin abundang tubig, na sa huri magigin kaipuhan na kabtang asin pansuportar sa gabos na nabubuhay sa daga.

Sa husay na pagkasunodsunod nin anom na ‘aldaw nin paglalang,’ na an kada saro rinibong taon an lawig, an daga inandam kan “puwersa aktiba nin Dios” para sa pag-istar nin tawo. An liwanag na paagi kaiyan kita nakaheheling, an aire na hinahangos niato, an marang daga na iniistaran niato, an mga pananom, an pagkasunod nin aldaw asin banggi, an mga sira, gamgam, hayop​—gabos sunod-sunod na pinaluwas kan satong Dakulang Kaglalang para sa paglilingkod sa asin ikaoogma nin tawo. (Genesis 1:​2-25) Tunay na makaiiba kita sa salmista sa pagkagsing: “Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.”​—Salmo 104:24.

An Obra Maestra kan Paglalang nin Dios

Kan naghihinanapos na an ikaanom na “aldaw” nin paglalang, ginibo nin Dios an lalaki dangan an katabang nia, an babae. Kanigoan karahay na kulminasyon sa daganon na paglalang, mas makangangalas nanggad sa gabos na naenot na pisikal na mga linalang! Sinasabi sato kan Salmo 115:16: “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo.” Kaya, kitang mga kalag na tawo dinisenyo ni Jehova tangani na kita maogma asin makagamit sa naenot niang mga linalang digdi sa daga. Maninigo kitang magpasalamat na marhay huli sa satong mga mata​—na mas komplikado kisa pinakamatibay na kamera—​na nakaheheling sa makolor na kinaban sa palibot niato! Yaon an satong talinga​—na mas marahay kisa arin man na gibong-tawong sound system—​tanganing tumabang sato na maogma sa orolay, musika, asin magayon an tonong huni kan mga gamgam. Igwa kita nin natatakod nang mekanismo sa pagtaram, kaiba an maabilidad na dila. An pangnamit kan dila, kapadis kan satong pagparong, nakatatabang man sa pagkawili sa pagnamit sa daing sagkod na pagkalaenlaen nin mga kakanon. Asin inaapresyar nanggad niato an pagduot nin sarong mamomoton na kamot! Tunay na mapasasalamatan niato an satong Kaglalang, arog kan salmistang nagsabi: “Ika oomawon ko huli ta sa makangingirhat na paagi ako makangangalas na ginibo. Makangangalas an saimong mga gibo, na aram na gayo kan sakuyang kalag.”​—Salmo 139:14.

An Mamomoton na Kabootan kan Satong Kaglalang

An salmista nagsurat: “Magpasalamat kamo ki Jehova, O kamo banwaan, huli ta sia marahay . . . ; sa Paragibo nin makangangalas, darakulang bagay na sia sana; huli ta an saiyang mamomoton na kabootan sagkod sa panahon na daing katapusan.” (Salmo 136:​1-4) An mamomoton na kabootan na iyan nagpapahiro saiya ngonyan na gumibo nin makangangalas na mga bagay na orog na dakula kisa gabos na linalang na ilinadawan pa sana niato. Iyo, minsan nagpapahingalo sa paglalang nin materyal na mga bagay, sia naglalalang sa espirituwal. Ini ginigibo nia bilang simbag sa maraot na angat na prangkahan na ipinanongod sa saiya. Paano?

An enot na lalaki asin babae ibinugtak sa sarong mamuraway na paraiso, an Eden. Minsan siring, an sarong mapasaloib na anghel, si Satanas, nagpakangdios asin dinara an mag-agom na tawong idto sa pagrebelde tumang ki Jehova. Makatanosan sana, sinentensiahan sinda nin Dios na magadan, na an resulta an saindang mga aki, an bilog na rasa nin tawo, dinara sa makasalan, magagadanon na kamugtakan. (Salmo 51:5) Ipinaririsa kan tala sa Biblia manongod ki Job na an Dios inangat ni Satanas, na nagsasabing mayo nin tawong makapagdadanay sa integridad sa Saiya kun binabalo. Alagad ta pinatunayan ni Job na si Satanas putikon na marhay, siring man nin dakol pang ibang maimbod na lingkod nin Dios kaidtong mga panahon kan Biblia asin sagkod sa satong kaaldawan. (Job 1:​7-12; 2:​2-5, 9, 10; 27:5) Si Jesus, bilang sangkap na tawo, nagpaheling kan daing kaagid na pagdadanay sa integridad.​—1 Pedro 2:​21-23.

Kaya, nakasabi si Jesus, ‘An poon kan kinaban [si Satanas] mayo nin kapangyarihan sa sako.’ (Juan 14:30) Pero, sagkod ngonyan “an bilog na kinaban namumugtak sa kapangyarihan kan maraot.” (1 Juan 5:19) Huling inangat an pagigin makatanosan kan soberaniya ni Jehova, si Satanas tinawan nin mga 6,000 na taon tanganing patunayan kun baga magigin mapanggana an saiyang paghade sa katawohan. Sia nasudya sa miserable nanggad na paagi, siring sa padagos na pinatutunayan nin nagraraot na mga kamugtakan sa kinaban! Sa dai na mahahaloy hahaleon kan satong mamomoton na Dios, si Jehova, an maraot na sosyedad na ini sa kinaban, na ipinaootob an saiyang may diretsong soberaniya sa daga. Kanigoan kaogmang kaginhawahan an itatao kaiyan sa mga tawong nagmamawot nin matoninong, matanos na pamamahala!​—Salmo 37:​9-11; 83:​17, 18.

Minsan siring, bako sana iyan! An mamomoton na kabootan nin Dios orog pang ipaheheling basado sa mga tataramon ni Jesus sa Juan 3:16: “An Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” An pagbalik na ini sa katawohan kan paglaom na buhay na daing katapusan digdi sa daga may kalabot na paglalang nin bagong mga bagay. Ano an mga ini? Paano iyan nagtatao nin pakinabang sa nag-aagrangay na katawohan? An minasunod niatong artikulo an magsasaysay.