Mga Hapot Hale sa mga Parabasa
Ano an magigibo nin sarong Kristiano kun sia dai nakanonompong nin tamang maaagom?
Minsan debotadong mga Kristiano, puwede pa man giraray magsakit an boot kun kita odok na naglalaom sa sarong bagay na dai nangyayari. Marahay an pagkapahayag kan saboot niato sa Talinhaga 13:12, na nagsasabi: “An paghalat na naglalawig kasakitan sa puso.” Ini an namatean nin ibang Kristiano kan sinda nagmawot na mag-agom pero dai nakanonompong nin tamang kapadis. Ini partikularmenteng totoo manongod sa mga sinasabi ni apostol Pablo na ‘naglalaad sa horot.’—1 Corinto 7:9.
Ibinugtak ni Jehova sa mga tawo an kamawotan na makanompong nin tunay na komplemento sa sarong bakong kasekso. Kaya, bakong makangangalas na an siring na mga pagmate makosogon na namamatean nin dakol na Kristianong daing agom. (Genesis 2:18) An normal na mga pagmateng ini tibaad madugangan sa mga kultura na nagdodoon na marhay sa pag-agom (o pag-agom pag-abot sa sarong edad) o kun an mga Kristianong daing agom napalilibotan nin maogmang mga mag-agom sa kongregasyon. Minsan siring, bakong marahay na togotan na lumawig na marhay an kahaditan. Kaya paano daw maaatubang nin sinserong mga Kristiano an situwasyon na dai nahahadit nin sobra?
Iyan bakong pasil, asin dai maninigong ibilang nin iba an kahaditan na ini na garo baga pagpasobra sana o daing halagang kadepisilan. Alagad sa kadaklan, an kakayahan na makaya o maresolberan an situwasyon depende sa mga paaging magigibo kan daing agom.
May nakukua kitang liyabe sa praktikal na prinsipyong ini sa Biblia: “Igwang orog na kaogmahan sa pagtao kisa sa pag-ako.” (Gibo 20:35) Iyan isinabi kan solterong si Jesu-Cristo, asin aram nia an sinasabi nia. An paggibo nin mga bagay para sa iba na may motibong bakong paslo marahay na pormula na makatatabang sa siisay man sa sato na mahale an mga pakamate na bunga nin paghalat na naglalawig. Ano an boot sabihon kaini kun dapit sa Kristianong daing agom?
Maghingoa na gumibo nin mga kabootan sa saindong pamilya asin sa iba pa sa kongregasyon, asin dugangan an saindong aktibidad sa ministeryo. An hatol na ini bako sanang sarong paagi nin pagsabing, ‘Magin kang sibot, asin malilingawan mo an pagmawot na mag-agom.’ Bako. Mantang sibot sa mabungang mga gibong ini nin Kristiano, tibaad madiskobre nindo na kamo ‘natrangkilo sa saindong puso, na may kapangyarihan sa sadiri nindong boot’ asin magagamit an presente nindong kamugtakan sa kapakipakinabang na paagi.—1 Corinto 7:37.
An iba na nagmawot na gayong mag-agom tinogotan na magin nakababangkag na preokupasyon an kamawotan na ini. Nagpaanunsio pa ngani sinda sa mga diaryo para sa agom. Alagad ta mas marahay nanggad na tawan nin orog na halaga an pag-apresyar sa mga pakinabang na makukua sa panahon nin pagigin daing agom.—Tabi helingon an mga artikulong “Daing Agom Alagad Kompleto Para sa Paglilingkod sa Dios” sa An Torrengbantayan na Disyembre 1, 1987 (sa Ingles, Nobyembre 15, 1987) asin “Singleness—A Rewarding Way of Life” sa The Watchtower na Nobyembre 15, 1987, saka “An Pag-agom Sana daw an Liyabe sa Kaogmahan?” sa An Torrengbantayan na Hunyo 1, 1992.
Arangon an tabang ni Jehova na magmaigot mantang daing agom. (Filipos 4:6, 7, 13) Nadiskobre nin dakol na Kristianong daing agom na sa paggamit kan saindang panahon sa pag-adal asin paghorophorop sa Tataramon nin Dios saka sa pag-atender asin pakikakabtang sa Kristianong mga pagtiripon, nagkamit sinda nin dugang na ‘kaginhawahan para sa saindang kalag,’ siring sa ipinanuga ni Jesus sa mga nagsusunod sa saiya. (Mateo 11:28-30) Nakatabang ini sainda na makultibar an espirituwalidad, tangani na sinda magin mas marahay na agom na lalaki o babae kun pag-abot nin panahon makanompong sinda nin tamang agom.
Nungkang paglingawan na nasasabotan ni Jehova an situwasyon nin gabos na daing agom na naglilingkod sa saiya. Aram nia na tibaad dai kamo naghohona na an presente nindong kamugtakan iyo an gusto nindo. Aram man kan satong mamomoton na langitnon na Ama kun ano an magtatao nin nagdadanay na pakinabang sa saindo, sa espirituwal asin emosyonal. Ini man masisierto nindo: Paagi sa mapasensiang paghalat ki Jehova asin pag-aplikar kan mga prinsipyo kan saiyang Tataramon sa pan-aroaldaw na buhay, makasisierto kamo na paninigoan nia an pinakamahahalaga nindong pangangaipo sa paagi na para sa saindong daing katapusan na ikararahay.—Ikomparar an Salmo 145:16.