Maninigo daw Kamong Pabautismo?

HAROS sarong milyon katawo an binautismohan kan mga Saksi ni Jehova sa nakaaging tolong taon. Nakaabot ini sa promedyo na 824 kada aldaw, o 4 katawong binautismohan kada 7 minutos. Ini daw saro sanang pag-arog sa relihiyosong kainitan kan ika-15 asin ika-16 na siglo?

Dai, an mga indibiduwal na ini dai binautismohan paagi sa puwersa, bilang kabtang nin lagduan na pagkombertir, o bilang resulta nin emosyonal na pan-aakit nin relihiyosong orador. Sinda binautismohan huli ta ipinagboot ni Jesu-Cristo, an Kagurangnan asin Poon nin mga Kristiano, na gibohon ini. Sinunod ninda an mga tangga asin pamamaagi na itinao ni Jesus asin na ginibo kan mga apostol na saiya mismong pinili asin sinanay.

Pakabuhaya liwat ki Jesus asin bago kan saiyang pagsakat sa langit, itinao nia sa saiyang mga parasunod an ultimong pagboot na ini: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:​19, 20) Poon kan panahon na iyan, iyo sana ini an bautismo sa tubig na igwa kan pag-oyon nin Dios.

Kaya, sinasabi sato kan Biblia na idtong enot na mga parasunod ni Cristo nagin “mga saksi [ni Jesus] sa Jerusalem asin sa bilog na Judea asin Samaria patin sagkod sa kaporoporohi nin daga.” (Gibo 1:8) Arog kan ihinula ni Jesus, an saindang paghuhulit asin pagtotokdo magbubunga nin pagbautismo sa mga paratubod na magigin man mga parasunod ni Cristo.

An enot na isinurat na halimbawa kaini nangyari sa Jerusalem kan aldaw nin Pentecostes 33 C.E. Kan panahon na iyan si apostol Pedro “nagtindog kaiba an kagsaro” asin nagtaram sa nagkakatiripon na kadaklan manongod ki Jesus na Mesiyas. Nagsasabi sato an kasaysayan na an saiyang pahayag ‘sinaksak sinda sa puso,’ asin naghapot sinda kun ano an saindang kaipuhan na gibohon. “Magsorolsol kamo, asin an lambang saro logod saindo mabautismohan sa ngaran ni Jesu-Cristo para sa kapatawadan kan saindong mga kasalan,” an sabi ni Pedro. An resulta iyo na “idtong mga maogmang nag-ako kan saiyang tataramon binautismohan, asin sa aldaw na idto mga tolong ribong kalag an nakadugang.” (Gibo 2:​14-41) An suminunod na mga kasaysayan nagpapatunay na an bautismo nin mga disipulo suminunod sa saindang pakadangog sa Kristianong mensahe, pagtubod sa marahay na bareta, asin pagsolsol.​—Gibo 8:​12, 13, 34-38; 10:​34-48; 16:​30-34; 18:​5, 8; 19:​1-5.

Sa Anong Paagi?

Pero paano daw an bagong mga disipulong ini babautismohan sa tubig? Iyan daw paagi sa aspersion (pagwirik), affusion (pagbubo sa payo), o immersion (biyong paglubog)? Ano an ipinaheheling kan rekord sa Biblia? Mantang winalatan kita nin padara ni Jesus tanganing satong “sunodon . . . nin estrikto an saiyang mga lakad,” sa anong paagi sia binautismohan?​—1 Pedro 2:21.

Ipinaheheling kan Biblia na binautismohan si Jesus sa Jordan, sarong dakulang salog. Pakabautismohi, sia ‘naghawas sa tubig.’ (Marcos 1:10; Mateo 3:​13, 16) Kaya totoong ilinubog si Jesus sa Salog nin Jordan. Binautismohan sia ni Juan, na, sa paghanap nin sarong angay na lugar tanganing gibohon an bautismo, pinili an sarong lugar sa Kababan nin Jordan harani sa Salim “huli ta matubig duman.” (Juan 3:23) An bagay na an biyong paglubog sa tubig iyo an pinagkatodan na pagbautismo sa tahaw kan mga parasunod ni Jesus maheheling sa mga tataramon kan kapon na Etiope. Sa pagsimbag sa tokdo ni Felipe, sia nagkagsing: “Uya! May tubig; ano an nakaoolang sako na mabautismohan?” Dangan maririsa niato na “sindang duwa naglugsad sa tubig” asin pakatapos ‘naghawas sa tubig.’​—Gibo 8:​36-39.

An sekular na kasaysayan daw nagtotokdo man sa bautismo paagi sa biyong paglubog sa tahaw nin mga Kristiano? Iyo nanggad. Asin interesanteng maaraman na dakol na darakulang planggana para sa pagbautismo na angay sa biyong paglubog an nag-eeksister pa sa nagkapirang nasyon. “An ebidensia nin arkeolohiya nagpapatunay na marhay sa biyong paglubog bilang an komon na paagi nin bautismo durante kan enot na sampulo sagkod katorseng siglo,” an sabi kan magasin na Ministry. Dugang pa kaiyan: “Sa mga kagabaan nin suanoy na Kristianong mga edipisyo, asin siring man sa suanoy na mga simbahan na ginagamit pa, puwedeng masusog an kasaysayan nin Kristianong bautismo. An mga ipininta sa mga pantson sa irarom nin daga asin sa mga simbahan, mga mosaico sa mga salog, asin kisame, inukit na mga eskultura, asin mga drowing sa suanoy na mga manuskrito kan Bagong Tipan nagdadagdag nin mga detalye sa kasaysayan na ini . . . Ini dugang sa ebidensia na yaon sa gabos na surat kan mga ama kan iglesya na an biyong paglubog iyo an komon na paagi nin bautismo kan enot na iglesya.”

Inako kan New Catholic Encyclopedia: “Malinaw na an Bautismo sa enot na Iglesya paagi sa biyong paglubog.” Kaya bakong makangangalas, nakababasa kita nin mga bareta sa diaryo na arog kaini: “An mga Katoliko Ibinabalik an Bautismong Biyong Paglubog” (The Edmonton Journal, Canada, Setyembre 24, 1983), “An Bautismo Paagi sa Biyong Paglubog Nagigin Popular sa mga Katoliko Digdi” (St. Louis Post-Dispatch, Abril 7, 1985), “Kadakol na Katoliko an Pinipili an Bautismo Paagi sa Biyong Paglubog” (The New York Times, Marso 25, 1989), asin “An Bautismong Biyong Paglubog Nabubuhay Liwat” (The Houston Chronicle, Agosto 24, 1991).

Sa Anong Katuyohan?

Taano ta hinagad ni Jesus na pabautismo an saiyang mga disipulo? Bueno, iyan angay na simbolo kan saindang bilog na pusong pagdusay sa Dios. An “maogmang bareta” kaipuhan na ihulit sa bilog na daga, asin kaipuhan na gumibo nin mga disipulo “sa mga tawo kan gabos na nasyon.” (Mateo 24:​14; 28:​19) Ini nangangahulogan na an Dios bako na sanang sa Judiong nasyon may relasyon, na binibilog nin mga tawo na dusay sa saiya poon sa pagkaaki. Si Cornelio asin an saiyang pamilya an enot na mga Hentil, o bakong mga Judio, na nag-ako kan katotoohan manongod ki Jesu-Cristo asin binautismohan.

An paglubog sa tubig nagpapaheling na an mga binabautismohan nagadan na sa klase nin buhay na nakasentro sa saindang sadiri. An saindang paghawas sa tubig nagsisimbolo na sinda buhay na ngonyan sa paggibo kan kabotan nin Dios asin ibinubugtak iyan na enot sa saindang buhay, arog kan ginibo ni Jesus. (Mateo 16:24) An pagbautismo sainda “sa ngaran kan Ama asin kan Aki patin kan banal na espiritu” nagpaheling na nanodan asin inako ninda an katotoohan manongod sa kada saro sa mga ini asin minidbid sinda sa kun ano talaga sinda. (Mateo 28:​19; ikomparar an Gibo 13:48.) An bautismo enot sanang tangga nin pagkuyog sa Dios asin pagpasakop sa saiyang kabotan.

An Kasuratan dai nagsusuportar sa lakop na marhay na relihiyosong opinyon na an bautismo sarong sakramento, an boot sabihon, relihiyosong seremonya na nagtatao nin merito​—biyaya, kabanalan, o espirituwal na pakinabang—​sa sarong binautismohan. Halimbawa, an pagboot kan papa na si Papa Eugenio IV na kinotar sa naenot na artikulo nagpadagos na magsabi manongod sa bautismo: “An epekto kan sakramentong ini iyo an pankanselar kan gabos na kasalan, orihinal asin aktuwal; siring man nin gabos na padusa huli sa kasalan. Bilang resulta, mayo nin kabayadan sa nakaaging mga kasalan na hinahagad sa mga binabautismohan; asin kun sinda magadan bago makakomitir nin ano man na kasalan, nakakamit tolos ninda an kahadean nin langit asin an pakaheling sa Dios.”

Pero si Jesus binautismohan minsan ngani sia “dai nakaginibo nin kasalan.” (1 Pedro 2:22) Saro pa, sono sa Kasuratan, an kapatawadan nin mga kasalan maabot sana paagi sa pantubos na atang ni Jesu-Cristo. Dinagka ni Ananias si Saulo na taga-Tarso: “Tindog, asin pabautismo ka patin hugasa an saimong mga kasalan paagi sa saimong pag-apod sa ngaran [ni Jesus].” (Gibo 22:​12-16) Iyo, an kaligtasan posible sana paagi sa pinabolos na dugo ni Jesus asin paagi sa “pag-apod sa saiyang ngaran” na may pagtubod.​—Hebreo 9:​22; 1 Juan 1:7.

Kun siring, ano an boot sabihon kan mga tataramon ni Pedro sa 1 Pedro 3:21? Sia nagsabi dian: “An katimbang kaini nagliligtas naman saindo ngonyan, an bautismo, (bakong an paghale kan ramog nin laman, kundi an paghagad sa Dios nin marahay na konsensia,) paagi sa pagkabuhay liwat ni Jesu-Cristo.” Iinaagid ni Pedro an bautismo sa eksperyensia ni Noe sa pag-agi sa tubig kan Baha. (Bersikulo 20) Si Noe, sa pagpapaheling nin bilog na pagtubod sa Dios, ginibo an dahong para sa kaligtasan kan saiyang pamilya. (Hebreo 11:7) Siring man, paagi sa paggibo nin pagtubod ki Jehova Dios asin sa saiyang probisyon para sa kaligtasan paagi ki Cristo Jesus, an mga tawo puwedeng maligtas ngonyan sa presenteng maraot na kinaban na ini. Maninigo man sindang humiro sono sa pagtubod na iyan. Paagi sa pagsolsol sa mga kasalan, pagtalikod sa salang dalan, asin paggibo nin lubos na pagdusay ki Jehova Dios sa pamibi, ginigibo an kahagadan sa Dios para sa sarong marahay na konsensia. Alagad basado sa atang ni Jesus, asin sa saiyang pagkabuhay liwat na paagi kaiyan itinao nia an halaga kan atang na iyan sa Dios sa langit, na ipinatatawad an mga kasalan asin posible an kaligtasan.​—1 Pedro 3:22.

Ano an Gigibohon Nindo?

Kamo daw saro na haloy-haloy nang nakiaasosyar sa mga Saksi ni Jehova? Tibaad naggibo na kamo kan kinakaipuhan na mga pagbabago sa saindong buhay sono sa mga prinsipyo kan Biblia pero dai pa kamo naggigibo nin mga tangga nin pagdusay asin bautismo. Tibaad boot nindong gibohon an kabotan nin Dios, alagad tibaad natatakot kamong oobligaron kamo nin bautismo. Huli kaini, tibaad boot nindong likayan nguna an siring na responsibilidad asin paninimbagan. Haros 11.5 milyones katawo an nag-atender sa selebrasyon nin Pamanggihan kan Kagurangnan kan nakaaging taon. Pero an pinakahalangkaw na bilang kan gabos na nakikakabtang sa paghuhulit kan maogmang bareta sa bilog na taon kulang sa 4.5 milyones. Ini nangangahulogan na haros pitong milyon katawo an nagpapaheling nin apresasyon para sa katotoohan nin Dios, minsan ngani sinda dai bautisadong mga Saksi ni Jehova. Siyempre, an nagkapira kaini hoben na kaakian asin bago pa sanang mga interesado. Pero an nagkapira sa nakikakabtang sa paghuhulit dai pa bautisado. Kadakol kan nag-ako nin tamang kaaraman sa Biblia pero dai pa lubos na nag-aaprobetsar sa probisyon nin Dios para sa kaligtasan paagi sa pagpabautismo.

An sarong mahalagang punto na dapat girumdomon iyo na an kaaraman sa kun ano an hinahagad nin Dios sa saindo an nagtatao nin paninimbagan. “Kun naaaraman nin saro kun paano gigibohon an tama alagad dai nia iyan ginigibo, iyan kasalan para sa saiya,” an sabi kan Santiago 4:17. Ipinaheheling kan Ezequiel 33:​7-9 na an saro na sinabihan kan mga pagboot asin instruksion nin Dios responsable na otobon iyan. Kaya an hapot iyo na kun baga an saro igwa nin odok sa boot na pagkamoot para sa Dios asin tunay na pagmawot na paogmahon sia. An saro na tunay na igwa nin siring na pagkamoot asin minamawot an sarong espesyal na relasyon ki Jehova Dios dai magduduwaduwa sa pagdusay kan saiyang buhay sa saiya. Panluwas sanang simbolo kan pagdusay na iyan an bautismo. Iyan kinakaipuhan na tangga pasiring sa kaligtasan. An tunay na mga nagtutubod nagpapabautismo.​—Gibo 8:12.

An dakulang mga paglaom na itatao nin Dios para sa maimbod, nagdusay na mga indibiduwal sa maabot na bagong kinaban nakaoorog nanggad sa ano man na temporaryong mga kapakinabangan na garo baga iinaalok kan maraot na daan na palakaw nin mga bagay na ini. Mawawara an takot sa kapwa kun gigirumdomon niato an makapangyarihan na kamot nin Dios. (1 Corinto 10:​22; 1 Pedro 5:​6, 7) Tunay na ini an panahon na hapoton an saimong sadiri, arog kan paghapot kan kapon na Etiope ki Felipe: “Ano an nakaoolang sako na mabautismohan?”

[Ritrato sa pahina 7]

Arog kan kapon na Etiope, hinahapot mo daw an saimong sadiri: “Ano an nakaoolang sako na mabautismohan?”