Paghanap nin Masasarigan na mga Prediksion
“SIA na kayang maheling an mga mangyayari tolong aldaw pa magigin mayaman sa rinibong taon.” Siring an sinasabi nin sarong sarabihon na Intsik.
An mga tawo boot nanggad na maaraman kun ano an mangyayari sa ngapit, asin dakol an gustong magbayad nin dakol para sa siring na klase nin matitiwalaan na impormasyon. Hinahanap ninda an masasarigan na mga prediksion. Siring sa naheheling poon sa pagbareta sa magigin kamugtakan nin panahon asin sa mga estadistika nin ekonomiya, interesado kita sa mga mangyayari sa ngapit. Dugang pa, an masasarigan na kaaraman kan ngapit magpapangyari sato na iplano asin iareglo an satong buhay.
An pagmawot na maaraman an mangyayari sa ngapit nagdara sa dakol na makihumapot sa mga parahimalad, guru, astrologo, asin parasantiguwar. An mga tindahan nin libro asin estante nin mga magasin pano-pano nin suanoy asin modernong mga sinurat kaidtong mga naghihingako na makahuhula kan ngapit. Pero kadakol nin pagduda sa mga klaseng ini nin prediksion. An Romanong estadista na si Cato ibinareta na nagsabing: ‘Nagngangalas ako ta an sarong huklob dai nagngingisi kun nakaheheling sia nin saro pang huklob.’
Siyempre, kadakol na klase an prediksion. Kan 1972 an sarong internasyonal na grupo nin madodonong asin negosyante na midbid na Club of Rome ipinublikar an sarong pag-adal na an prediksion an kinaban madali nang maubosan nin mga rekurso na dai nasasalidahan. Mawawaran iyan nin bulawan sa 1981, asoge sa 1985, zinc sa 1990, petroleo sa 1992, asin iba pa. Naheheling ta ngonyan na an mga prediksion na ini dai nangaotob.
An dakol na prediksion basado sa relihiyosong mga punto-de-vista. Sa pag-ilustrar: An obispong Saxon na si Wulfstan nagtubod na an pagsakop kan mga Danes sa Inglaterra amay kan ika-11 siglo sarong tanda na an katapusan kan kinaban harani na. Kan 1525, si Thomas Münzer pinangenotan an rebolusyon nin mga paraomang Aleman ta sa sarong bisyon nakaheling sia nin mga anghel na nagtatahis nin mga kagot para sa hinona niang magigin sarong dakulang pag-ani. Malinaw nanggad, an mga prediksion na ini sala.
Siring kan puwedeng aram nindo, an Biblia naglalaman nin mga prediksion. Dugang pa, an mga kagsurat kan Biblia naghingako na mga pinasabngan nin Dios. An Kristianong apostol na si Pedro nagsabi: “Daing hula nin Kasuratan na hale sa ano man na sadiring pakahulogan. Huli ta an hula nagdatong bakong sa kabotan nin tawo, kundi an mga tawo nagtaram hale sa Dios huling sinda pinahiro kan banal na espiritu.”—2 Pedro 1:20, 21.
Kabilang sa iba pang bagay, an Biblia naghula nin laen-laen na pangyayari na nagpapamidbid sa henerasyon na makaeeksperyensia kan presensia ni Jesu-Cristo sa kapangyarihan kan langitnon na Kahadean. An daing kaagid na guerra, kakulangan nin pagkakan, linog, asin pagbagsak nin moral magigin midbid na tanda kan ilinaladawan sa Biblia na “huring mga aldaw.” (2 Timoteo 3:1-5; Mateo 24:3-14, 34) Sono sa Biblia, an paghale sa presenteng palakaw nin mga bagay magbubukas kan dalan para sa kaogmahan nin katawohan sa sarong bagong kinaban nin daing katapusan na mga bendisyon.—2 Pedro 3:13; Kapahayagan 21:1-4.
Paano nindo minamansay an siring na mga prediksion sa Biblia? Arog kan dakol na iba pang hula, iyan daw mga pagbanabana sana? Puwede tang baloon an pagkamasasarigan kan dai pa nagkaorotob na hula sa Biblia paagi sa pagdeterminar kun baga an mga prediksion sa Biblia dapit sa nakaaging mga pangyayari masasarigan. Sa sunod na artikulo, pag-oolayan niato an iba kaini.
[Picture Credit Line sa pahina 3]
Sa karahayan nin boot kan National Weather Service