Si Jehova—An Tunay Asin Nabubuhay na Dios

SI Faraon nin Egipto nagtaram na may pag-angat asin pagduhagi kan sia maghapot: “Siisay man si Jehova?” (Exodo 5:2) Siring kan ipinaheling sa sinundan na artikulo, an ugaleng iyan nagdara nin damat asin kagadanan sa mga Egipcio, pati nin matubig na lolobngan ki Faraon asin sa saiyang puwersa militar.

Sa suanoy na Egipto, pinatunayan ni Jehova an saiyang pagkasupremo sa falsong mga dios. Pero mas dakol pa an manonodan manongod sa saiya. Ano an pirang kabtang kan saiyang personalidad? Asin ano an hinahagad nia sa sato?

An Saiyang Ngaran Asin Kabantogan

Kan ipaabot nia an mga kahagadan ki Faraon nin Egipto, dai sinabi ni Moises na: ‘An Kagurangnan nagsasabi nin arog kaini asin arog kaiyan.’ Si Faraon asin an ibang Egipcio ibinilang an dakol nindang falsong dios na mga kagurangnan. Dai, ginamit ni Moises an banal na ngaran, Jehova. Nadangog nia mismo iyan na isinabi hale sa itaas kan yaon sia sa may naglalaad na palongpong sa daga kan Midian. An sabi kan pinasabngan na surat:

“An Dios tuminaram pa ki Moises asin nagsabi sa saiya: ‘Ako si Jehova. . . . Ako, pati ako, nakadangog kan inagagha kan mga aki ni Israel, na inooripon kan mga Egipcio, asin nagirumdoman ko an sakong tipan. Kaya ngani sabihan mo an mga aki ni Israel, “Ako si Jehova, asin kokoon ko kamo sa irarom kan mga pagabat kan mga Egipcio asin kakaldahon ko kamo sa pangongoripon ninda, asin tutuboson ko kamo paagi sa unat na takyag asin sa darakulang paghokom. Asin ibibilang ko kamo na siring sa sakuyang banwaan, asin ako nanggad an magigin Dios nindo; asin makaiisi kamo na ako si Jehova na saindong Dios na minakua saindo sa irarom kan mga pagabat kan Egipto. Asin ilalaog ko kamo sa daga [nin Canaan] na iinitaasan ko kan sakong kamot sa panumpa na itatao ko [sa saindong mga apoon,] ki Abraham, Isaac asin Jacob; asin itatao ko nanggad iyan sa saindo siring sa pamana. Ako si Jehova.”’”​—Exodo 6:​1-8.

Iyan mismo an ginibo ni Jehova. Kinalda nia an mga Israelita sa pagkabihag sa Egipto asin pinapag-erok sinda sa daga nin Canaan. Siring sa ipinanuga, an Dios pinapangyari ini gabos. Angay na marhay! An saiyang ngaran na Jehova, nangangahulogan “Saiyang pinangyayari.” Inaapod si Jehova kan Biblia sa mga titulong arog nin “Dios,” “Soberanong Kagurangnan,” “Kaglalang,” “Ama,” “an Makakamhan sa gabos,” asin “an Kaharohalangkawe.” Alagad an saiyang ngaran na Jehova nagpapamidbid sa saiya bilang an tunay na Dios na padagos na pinangyayari an saiyang mamuraway na mga katuyohan.​—Isaias 42:8.

Kun babasahon ta an Biblia sa orihinal na mga tataramon kaini, maheheling ta an ngaran nin Dios nin rinibong beses. Sa Hebreo irinirepresentar ini kan apat na konsonanteng Yod He Waw He (יהוה), na inaapod na Tetragramaton, na an pagbasa poon sa too pawala. An mga nagtataram nin Hebreo binugtakan ini nin mga bokales, pero dai aram nin sierto kan mga tawo ngonyan kun mga ano idto. Mantang may mga minaoyon sa pagdeletriyang Yahweh, an pormang Jehova pinagkatodan na asin angay na nagpapamidbid sa satong Kaglalang.

An paggamit kan ngaran na Jehova nagpapamidbid man kan pagkakalaen nin Dios sa saro na inaapod “sakong Kagurangnan” sa Salmo 110:​1, na an sarong traduksion: “An KAGURANGNAN [sa Hebreo, יהוה] nagsabi sa sakong Kagurangnan, Tumukaw ka sa sakong too, sagkod na magibo ko an saimong mga kaiwal na magin saimong tongtongan.” (King James Version) Sa pagsambit sa paglataw digdi sa Hebreong teksto kan ngaran nin Dios, mababasa sa New World Translation: “An sabi ni Jehova sa sakong Kagurangnan: ‘Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.’” An mga tataramon na iyan ni Jehova Dios makahulang ipinanonongod ki Jesu-Cristo, na inaapod kan kagsurat na “sakong Kagurangnan.”

Si Jehova guminibo nin ngaran para sa saiyang sadiri kan kaaldawan ni Faraon. Paagi ki Moises, sinabihan nin Dios an matagas an pusong hadeng idto: “Ngonyan dadarahon ko sa saimo an gabos kong pasakit sa saimong puso asin sa saimong mga oripon pati sa saimong banwaan, tanganing maisihan mo na mayo nin ibang siring sa sako sa bilog na daga. Huli ta ngonyan ikabibikyaw ko an sakong kamot tanganing lugadon taka asin an saimong banwaan nin mga peste asin tanganing mapara ka na sa daga. Alagad, an totoo, huli kaini pinapagdanay taka, tanganing ipaheling ko saimo an sakong kapangyarihan asin tanganing an sakong ngaran ikapahayag sa bilog na daga.”​—Exodo 9:​14-16.

Manongod sa pagluwas kan Israel sa Egipto asin pagkapahale kan pirang hadeng Cananeo, an babaeng si Rahab nin Jerico sinabihan an duwang Hebreong espiya: “Naaaraman ko na itatao nanggad sa saindo [mga Israelita] ni Jehova an daga, asin na an pagkatakot sa saindo napasa samuya, asin na an gabos na nag-eerok sa daga pinanluluyahan nin boot huli sa saindo. Huli ta nadangog niamo kun paano pinamara ni Jehova an Dagat na Pula sa atubangan nindo kan kamo humale sa Egipto, asin an ginibo nindo sa duwang hade kan mga Amorreo na nasa ibong kan Jordan, si Sihon asin si Og, na saindong linaglag. Kan mabaretaan niamo iyan, an samong puso nagkaturunaw, asin mayo pa nin espiritung minaluwas sa siisay man huli sa saindo, huli ta si Jehova na saindong Dios Dios sa kalangitan sa itaas asin sa daga sa ibaba.” (Josue 2:​9-11) Iyo, an kabantogan ni Jehova nakalakop.

Si Jehova Asin an Saiyang mga Kuwalidad

An salmista ipinahayag an odok sa pusong kamawotan na ini: “Tanganing an mga tawo makaaram na ika, na an ngaran iyo si Jehova, ika sana an Kaharohalangkawe sa bilog na daga.” (Salmo 83:18) Huling an soberaniya ni Jehova pambilog na uniberso, an linalamag na mga parasunod ni Jesus makapamimibi: “Soberanong Kagurangnan, ika an Saro na guminibo sa langit asin daga asin dagat patin sa gabos na bagay na yaon dian.” (Gibo 4:24) Asin nakararanga nanggad na maaraman na si Jehova iyo an “Paradangog nin pamibi”!​—Salmo 65:2.

An pangenot na atributo ni Jehova pagkamoot. Tunay nanggad, “an Dios pagkamoot”​—an mismong kabilogan kan kuwalidad na ini. (1 Juan 4:8) Dugang pa, “sa saiya igwa nin kadonongan asin kakosogan.” Si Jehova an pinakamadonong asin pinakamakapangyarihan, pero nungka niang inaabuso an saiyang kapangyarihan. (Job 12:​13; 37:23) Makasisierto man kita na si Jehova perming tatrataron kita na may katanosan, huli ta an “katanosan asin paghokom an marigon na namumugtakan kan saiyang trono.” (Salmo 97:2) Kun kita nagkakasala pero nagsosolsol, mararanga kita sa pakaaram na si Jehova “Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.” (Exodo 34:6) Daing duda na makapaggagayagaya kita sa paglilingkod ki Jehova!​—Salmo 100:​1-5.

An Dai Ikaaagid na Langitnon na Hade

An aki ni Jehova, si Jesu-Cristo, nagsabi: “An Dios Espiritu.” (Juan 4:24) Kun siring, si Jehova dai naheheling nin mga mata nin tawo. An totoo, si Jehova nagsabi ki Moises: “Dai mo maheheling an sakuyang lalauogon, huli ta mayong tawo na makaheheling sako asin mabubuhay.” (Exodo 33:20) An langitnon na Hadeng ini mamurawayon nanggad na an mga tawo dai makatatagal sa pagheling sa saiya.

Dawa dai niato naheheling si Jehova, igwa nin abundang patotoo sa saiyang pag-eksister bilang an Makakamhan sa gabos na Dios. Tunay nanggad, “an saiyang dai naheheling na mga kuwalidad malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” (Roma 1:20) An daga​—an mga doot, kahoy, prutas, gulay, asin mga burak kaiyan—​nagpapatotoo sa pagka-Dios ni Jehova. Bakong arog kan daing halagang mga idolong dios, si Jehova nagtatao nin oran asin mabungang mga panahon. (Gibo 14:​16, 17) Helinga an mga bitoon sa langit kun banggi. Dakulaon na ebidensia nanggad kan pagka-Dios asin pagkaorganisado ni Jehova!

Inorganisar man ni Jehova an saiyang banal, intelihenteng espiritung mga linalang sa langit. Bilang nagkakaoroyon na organisasyon, inootob ninda an kabotan nin Dios, arog kan sabi kan salmista: “Omawa nindo si Jehova, O kamong mga anghel nia, makosog, na nag-ootob kan saiyang tataramon, paagi sa paghinanyog sa tingog kan saiyang tataramon. Omawa nindo si Jehova, kamo gabos na hukbo nia, kamo gabos na ministro nia, na naggigibo kan saiyang kabotan.” (Salmo 103:​20, 21) Inorganisar man ni Jehova an saiyang banwaan sa daga. An nasyon nin Israel organisadong marhay, asin iyo man an enot na mga parasunod kan Aki nin Dios. Kapareho man ngonyan, si Jehova igwa nin pambilog na kinaban na organisasyon nin maigot na mga Saksi, na nagbabalangibog kan maogmang bareta na an saiyang Kahadean harani na.​—Mateo 24:14.

Si Jehova an Tunay Asin Nabubuhay na Dios

An pagka-Dios ni Jehova ikinapaheling na sa kadakol na paagi! Pinasopgan nia an falsong mga dios nin Egipto asin ligtas na dinara an mga Israelita sa Dagang Panuga. An mga linalang nagtatao nin abundang ebidensia sa pagka-Dios ni Jehova. Asin dai nanggad sia ikakokomparar sa daing kamanungdanan na mga idolong dios nin falsong relihiyon.

Ipinaheling ni propeta Jeremias an dakulang kalaenan ni Jehova, an nabubuhay na Dios, asin kan daing buhay na gibo nin tawong mga idolo. An kalaenan na iyan ipinahayag na marhay sa Jeremias kapitulo 10. Laen sa iba pang bagay, si Jeremias nagsurat: “Si Jehova sa katotoohan iyo an Dios. Sia an nabubuhay na Dios asin an Hade sa panahon na daing katapusan.” (Jeremias 10:10) An nabubuhay asin tunay na Dios, si Jehova, linalang an gabos na bagay. Ilinigtas nia an mga Israelita na nanluluya na huli sa pagkabihag sa Egipto. Mayong imposible sa saiya.

Si Jehova, “an Hade na dai nin katapusan,” sisimbagon an pamibing: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.” (1 Timoteo 1:​17; Mateo 6:​9, 10) An langitnon na Mesiyanikong Kahadean, na kapot na ni Jesu-Cristo, sa dai na mahahaloy mahiro tumang sa mga maraot asin lalaglagon an gabos na kaiwal ni Jehova. (Daniel 7:​13, 14) An Kahadean na iyan ipaaabot man an sarong bagong kinaban nin daing katapusan na mga bendisyon para sa makinuyog na katawohan.​—2 Pedro 3:13.

Kadakol pa kan dapat na maaraman dapit ki Jehova asin sa saiyang mga katuyohan. Taano ta dai nindo gibohon na determinasyon na magkua nin siring na kaaraman asin humiro sono dian? Kun gigibohon nindo ini, magkakapribilehiyo kamong magkamit nin buhay na daing sagkod sa sarong daganon na paraiso sakop kan pamamahala kan Kahadean. Mamumuhay kamo na an pagtangis, kolog, asin minsan an kagadanan nakalihis na asin an kaaraman dapit ki Jehova nakapapano sa daga. (Isaias 11:​9; Kapahayagan 21:​1-4) Iyan an magigin kamugtakan nindo sa buhay kun kamo humanap, kumua, asin humiro sono sa basado sa Bibliang mga simbag sa hapot na, “Siisay si Jehova?”

[Picture Credit Line sa pahina 7]

Pictorial Archive (Near Eastern History) Est.