An Kristianong Pamilya Inienot an Espirituwal na mga Bagay

“Kamo logod gabos magkaigwa nin saro sanang pag-isip, may pakikipagkapwa, naggigibo nin sa-magturugang na pagkamoot, mapagmahal nin maboot, mapakumbaba sa isip.”​—1 PEDRO 3:8.

1. Anong pagpili an yaon sato gabos, asin paano an satong pagpili makaaapektar sa satong ngapit?

KANIGOAN karahay na minaaplikar an teksto sa itaas sa pinakasuanoy na institusyon nin tawo​—an pamilya! Asin kanigoan kahalaga na an mga magurang nagpapaheling nin pangengenot sa mga bagay na ini! An saindang positibo asin negatibong mga kuwalidad parateng maheheling sa mga aki. Minsan siring, an oportunidad na pumili nagdadanay sa kada miembro nin pamilya. Bilang mga Kristiano, puwede tang pilion na magin espirituwal na mga tawo o makalaman na mga tawo. Puwede tang pilion na paogmahon an Dios o pamondoon sia. An pagpili na iyan puwedeng magresulta nin arin man sa bendisyon, an buhay na daing sagkod asin katoninongan​—o padusa, an daing sagkod na kagadanan.​—Genesis 4:​1, 2; Roma 8:​5-8; Galacia 5:​19-23.

2. (a) Paano ipinaheling ni Pedro an saiyang pagmakolog sa pamilya? (b) Ano an espirituwalidad? (Helingon an nota sa ibaba.)

² An mga tataramon kan apostol sa 1 Pedro kapitulo 3, bersikulo 8, kasunod tolos kan pirang magayon na sadol na itinao nia sa mga agom na babae asin lalaki. Si Pedro tunay na interesado sa ikakarahay kan Kristianong mga pamilya. Aram nia na an marigon na espirituwalidad iyo an liyabe sa nagkakasararo, nagmamakolog na pamilya.a Kaya, ipinasabot nia sa bersikulo 7 na kun inignoro an sadol nia sa mga agom na lalaki, magreresulta iyan sa espirituwal na olang sa pag-oltanan kan agom na lalaki asin ni Jehova. An pamibi kan agom na lalaki maoolang kun pinababayaan nia an mga pangangaipo kan saiyang agom o sinasakop sia na dai nin kabootan.

Si Cristo​—An Sangkap na Halimbawa nin Espirituwalidad

3. Paano itinampok ni Pablo an halimbawa ni Cristo para sa mga agom na lalaki?

³ An espirituwalidad kan pamilya minadepende sa marahay na halimbawa. Kun an agom na lalaki ginigibo an saiyang pagka-Kristiano, itinatao nia an halimbawa sa pagpaheling nin espirituwal na mga kuwalidad. Kun mayo nin may pagtubod na agom na lalaki, an ina sa parate pinagmamaigotan na otobon an responsibilidad na iyan. Sa arin man na kamugtakan, si Jesu-Cristo nagtatao nin sangkap na arogan na dapat sunodon. An saiyang gawe, an saiyang mga tataramon, asin an saiyang pag-isip perming nakapakokosog asin nakarerepresko. Paorootro, ginigiyahan ni apostol Pablo an parabasa sa mamomoton na modelo ni Cristo. Halimbawa, sinasabi nia: “An lalaki iyo an payo kan saiyang agom kun paanong si Cristo iyo man an payo kan kongregasyon, mantang sia an paraligtas kan hawak na ini. Mga agom na lalaki, padagos nindong mamotan an saindong mga agom na babae, kun paanong si Cristo namoot man sa kongregasyon asin iinatang an saiya man sana dahel kaiyan.”​—Efeso 5:​23, 25, 29; Mateo 11:​28-30; Colosas 3:19.

4. Anong halimbawa nin espirituwalidad an itinao ni Jesus?

⁴ Si Jesus an nangongorog na halimbawa nin espirituwalidad asin pagkapayo na ikinapaheling sa pagkamoot, kabootan, asin pagkaherak. Mapagsakripisyo sia sa sadiri, bakong mapagpanigo sa sadiri. Permi niang pinamumuraway an saiyang Ama asin iginagalang an saiyang pagkapayo. Sinunod nia an paggiya kan Ama, kaya makakasabi sia: “Dai ako makagigibo ni sarong bagay sa sadiri kong boot; sono sa sakong nadangog, ako naghohokom; asin an paghokom na sakuyang ginigibo matanos, huli ta pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.” “Dai ako naggigibo nin ano man sa sakong kabotan; kundi siring sa pagkatokdo sa sako kan Ama itinataram ko an mga bagay na ini.”​—Juan 5:30; 8:28; 1 Corinto 11:3.

5. Sa pagtagama para sa saiyang mga parasunod, anong halimbawa an itinao ni Jesus sa mga agom na lalaki?

⁵ Ano an kahulogan kaini para sa mga agom na lalaki? Nangangahulogan ini na an modelo na dapat nindang sunodon sa gabos na bagay iyo si Cristo, na perming ipinapasakop an saiyang sadiri sa saiyang Ama. Halimbawa, kun paanong si Jehova nagtagama nin kakanon sa gabos na nabubuhay digdi sa daga, si Jesus nagtagama man nin kakanon sa saiyang mga parasunod. Dai nia pinabayaan an saindang pangenot na materyal na mga pangangaipo. An saiyang milagro sa pagpakakan kan 5,000 na lalaki patin kan 4,000 mga patotoo kan saiyang pangangataman asin pagkaresponsable. (Marcos 6:​35-44; 8:​1-9) Siring man ngonyan, an responsableng mga payo nin pamilya pinangangatamanan an pisikal na mga pangangaipo kan saindang mga pamilya. Pero minatapos na daw dian an saindang responsibilidad?​—1 Timoteo 5:8.

6. (a) Anong importanteng pangangaipo nin pamilya an kaipuhan na asikasohon? (b) Paano an mga agom na lalaki asin ama makakapaheling nin pagsabot?

⁶ An mga pamilya igwa man nin iba pa, mas importanteng pangangaipo, arog kan idinoon ni Jesus. (Deuteronomio 8:​3; Mateo 4:4) May interaksion kita sa iba, kapwa sa pamilya asin sa kongregasyon. Nangangaipo kita nin marahay na paggiya na mamotibar sato na magin nakapagpapakosog. Sa bagay na ini an mga agom na lalaki asin ama igwa nin pangenot na katongdan na dapat otobon​—orog nang gayo kun sinda mga magurang o ministeryal na lingkod sa kongregasyon. An nagsosolong mga magurang nagkakaipo nin kaparehong mga kuwalidad kun tinatabangan an saindang mga aki. Kaipuhan na saboton kan mga magurang bako sana an itinataram kan mga miembro kan pamilya kundi siring man kun ano an dai ikinakataram. Nagkakaipo iyan nin pagmansay, panahon, asin pagpasensia. Iyan an sarong dahelan kun taano si Pedro ta makakasabi na an mga agom na lalaki maninigong magin makonsiderasyon asin makiiba sa saindang agom oyon sa kaaraman.​—1 Timoteo 3:​4, 5, 12; 1 Pedro 3:7.

Mga Peligrong Dapat Likayan

7, 8. (a) Ano an kaipuhan kun boot nin pamilya na malikayan an espirituwal na pagkalunod? (b) Ano pa an kaipuhan apuwera sa marahay na pagpopoon sa Kristianong dalan? (Mateo 24:13)

⁷ Taano ta mahalagang marhay an pagtao nin atension sa espirituwalidad kan pamilya? Sa pag-ilustrar, puwede tang ihapot, Taano ta mahalaga na an piloto nin bapor atenderan nin marhay an saiyang mga tsart kun ginigiyahan an bapor sa peligrosong katubigan na may mga parteng hababaw? Kan Agosto 1992 an naglalayag na bapor na Queen Elizabeth 2 (QE2) napasadsad sa lugar na dai namamangnohan an mga bahora asin gapo na duman an mga nabigador sinasabing parateng nasasala. An sarong residente duman nagkomento: “Kadakol nang trabaho an nawara huli sa lugar na iyan.” An QE2 buminunggo sa sarong bunton sa irarom nin tubig. Iyan nagin magastos na gayong pagkasala. Naraot an ikatolong kabtang kan kasko, asin an bapor kinaipuhan na dai nguna magbiyahe sa laog nin pirang semana tanganing hirahayon.

⁸ Sa kaagid na paagi, kun an “piloto” kan pamilya dai maingat na sinisiyasat an tsart, an Tataramon nin Dios, an saiyang pamilya puwedeng madaling mameligro sa espirituwal. Para sa magurang o ministeryal na lingkod, an resulta puwedeng pagkawara nin mga pribilehiyo sa laog kan kongregasyon asin posibleng seryosong danyos sa iba pang miembro kan pamilya. Kun siring, an kada Kristiano maninigong mag-ingat na dai madaog nin espirituwal na pagkakontento sa sadiri, na nagsasarig sana sa dating marahay na ugale sa pag-adal asin kaigotan. Sa satong Kristianong dalan, bako pang igo na marahay an satong pagpopoon; an biyahe kaipuhan na mapangganang makompleto.​—1 Corinto 9:​24-27; 1 Timoteo 1:19.

9. (a) Gurano kaimportante an personal na pag-adal? (b) Anong mahalagang mga hapot an puwedeng ihapot ta sa sadiri?

⁹ Tanganing malikayan an espirituwal na mga kahababawan, gapo, asin bahora, kaipuhan kitang danay na nagsusubaybay sa satong mga “tsart” paagi sa regular na pag-adal kan Tataramon nin Dios. Dai kita makakapanarig sa pundamental na pag-adal sana na nagdara sato sa katotoohan. An satong espirituwal na kosog nagdedepende sa regular asin balanseng programa nin pag-adal asin paglilingkod. Halimbawa, mantang kita nag-aatender sa Pag-adal sa Torrengbantayan kan kongregasyon na kapot an mismong isyung ini, puwede tang hapoton an satong sadiri, ‘Talaga daw na inadalan ko, o niamo bilang pamilya, an artikulong ini, na hinahanap an mga teksto asin hinohorophorop an aplikasyon kaiyan? O lininyahan mi daw sana an mga simbag? Tibaad napabayaan daw niamo minsan an pagbasa kan artikulo bago nag-atender sa pagtiripon?’ An sadiosan na mga simbag sa mga hapot na ini puwedeng makapahiro sato na seryosong isip-isipon an satong mga ugale sa pag-adal asin makapukaw nin pagmawot na umoswag​—kun iyan kinakaipuhan.​—Hebreo 5:​12-14.

10. Taano ta importanteng siyasaton an satong sadiri?

¹⁰ Taano ta importante an siring na pagsiyasat sa sadiri? Huli ta nabubuhay kita sa kinaban na dominado kan espiritu ni Satanas, kinaban na, sa dakol na tusong paagi, pinagmamaigotan na laglagon an satong pagtubod sa Dios asin saiyang mga panuga. Iyan an kinaban na boot kitang papagdanayon na sibot na marhay na mayo na kita nin panahon sa pag-asikaso sa espirituwal na mga pangangaipo. Kun siring puwede tang hapoton an satong sadiri, ‘Makosog daw sa espirituwal an sakong pamilya? Ako daw bilang magurang makosog siring sa maninigo sa sako? Kinukultibar daw niamo bilang pamilya an espirituwal na puwersang iyan na nagpapahiro sa isip na nagtatabang samuya na magdesisyon basado sa katanosan asin kaimbodan?’​—Efeso 4:​23, 24.

11. Taano an Kristianong mga pagtiripon ta kapakipakinabang sa espirituwal? Tumao nin halimbawa.

¹¹ An satong espirituwalidad maninigong maparigon kan lambang pagtiripon na inaatenderan niato. An mahalagang marhay na mga oras na iyan sa Kingdom Hall o sa Pag-adal sa Libro kan Kongregasyon nakatatabang na represkohan kita pagkatapos nin halawig na oras na ginamit niato sa pagmamaigot na makaligtas sa maringis na kinaban ni Satanas. Halimbawa, nagin nakarerepresko nanggad na pag-adalan an librong The Greatest Man Who Ever Lived! Nakatabang ini sato na magkaigwa nin mas orog pang pakasabot ki Jesus, sa saiyang buhay, asin saiyang ministeryo. Maingat niatong binasa an sitadong mga teksto, naggibo nin personal na pagsiyasat, asin kun siring orog na nakanood sa halimbawang itinao ni Jesus.​—Hebreo 12:​1-3; 1 Pedro 2:21.

12. Paano binabalo nin ministeryo sa langtad an satong espirituwalidad?

¹² An Kristianong ministeryo sarong marahay na pagbalo sa satong espirituwalidad. Tanganing makapagmaigot sa satong pormal asin impormal na pagpapatotoo, na sa parate sa atubang nin indiperente o nagkokontrang publiko, kinakaipuhan ta an tamang motibasyon, pagkamoot sa Dios asin pagkamoot sa kataed. Siyempre, mayo nin siisay man na naoogmang isikwal, asin iyan puwedeng mangyari sa satong ministeryo sa langtad. Pero maninigo tang girumdomon na an maogmang bareta an isinisikwal ninda, bakong kita bilang indibiduwal. Si Jesus nagsabi: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. Kun kamo kabtang kan kinaban, an kinaban maoogma sa saiyang sadiri. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo. . . . Alagad gigibohon ninda an gabos na bagay na ini tumang sa saindo huli sa ngaran ko, huli ta dai ninda namimidbid sia na nagsugo sa sako.”​—Juan 15:​18-21.

Mas Makosog Magtaram an mga Hiro Kisa mga Tataramon

13. Paano an sarong tawo makalalaglag sa espirituwalidad nin pamilya?

¹³ Ano an nangyayari sa pamilya kun gabos apuwera sa sarong miembro iginagalang an kalinigan asin pagkaareglado kan harong? Sa sarong maoran na aldaw, an gabos apuwera sa malilingawon na saro nag-iingat na dai makadara nin laboy sa harong. An malaboy na mga gira minsan saen nagtatao nin ebidensia kan kadaihan nin pag-iingat kan sarong iyan, na nakakadagdag pa sa trabaho kan iba. An iyo man sanang bagay minaaplikar sa espirituwalidad. An minsan sarong makasadiri o pabayang indibiduwal puwedeng makaati sa reputasyon kan pamilya. An gabos sa harong, bako sana an mga magurang, maninigong maghingoa na ikapaheling an mental na disposisyon ni Cristo. Nakarerepresko nanggad kun an gabos iribang naggigibo na may paglaom sa buhay na daing sagkod! An kamugtakan nin isip kan pamilyang iyan nasa espirituwal (pero bako sa pagpakangmatanos sa sadiri). Bibihira na may mga marka nin espirituwal na kapabayaan sa siring na pamilya.​—Eclesiastes 7:​16; 1 Pedro 4:​1, 2.

14. Anong mga sugot sa materyal an ibinubugtak ni Satanas sa satong dalan?

¹⁴ Kita gabos igwa nin pundamental na mga pangangaipo sa materyal na kaipuhan na mapanigoan tanganing masusteniran an satong buhay sa aroaldaw. (Mateo 6:​11, 30-32) Pero parate na an satong mga pangangaipo natatahoban kan satong mga kamawotan. Halimbawa, an palakaw ni Satanas iinaalok sato an gabos na klase nin gamit asin kasangkapan. Kun mawot niatong perming kamtan an mga pinakabago asin pinakauso sa gabos na bagay, nungka kitang magigin kontento, huli ta an mga pinakahuri minalihis tolos, asin an bagong uso nin mga modelo minaralataw. An kinaban nin komersio naggibo nin siklo na nungkang minaontok. Sinusutsotan kita kaiyan sa orog pang pagpadakol nin kuwarta tanganing panigoan an nag-oorog pang mga kamawotan. Puwede ining gumiya sa “dakol na rungaw asin nakararaot na horot,” o “lolong asin peligrosong mga ambisyon.” Puwede iyan magresulta sa bakong balanseng buhay na orog na naiinaan an panahon para sa espirituwal na mga aktibidad.​—1 Timoteo 6:​9, 10; The Jerusalem Bible.

15. Sa anong paagi mahalaga an halimbawa kan payo nin pamilya?

¹⁵ Sa giraray, an halimbawang itinatao kan payo kan Kristianong pamilya mahalagang gayo digdi. An saiyang timbang na kaisipan para sa sekular asin espirituwal na mga responsibilidad maninigong makainspirar sa iba pang miembro kan pamilya. Siertong makararaot kun an ama nagtao nin magayon na berbal na pagtotokdo pero dai ngani nakakasunod sa saiyang sadiring mga tataramon. Dai mahaloy marerealisar kan mga aki an paagi nin saro na sinasabihan an iba kan dapat nindang gibohon pero dai nia mismo iyan ginigibo. Kaagid kaiyan, an magurang o ministeryal na lingkod na dinadagka an iba sa ministeryo sa harong-harong pero bihirang iniibanan an saiyang pamilya sa aktibidad na iyan dai mahaloy nawawaran nin kredibilidad, kapwa sa pamilya asin sa kongregasyon.​—1 Corinto 15:58; ikomparar an Mateo 23:3.

16. Anong mga hapot an puwede tang ihapot sa sadiri?

¹⁶ Kun siring, kapakipakinabang niatong masisiyasat an satong buhay. Sibot-sibot daw kita sa pag-aaabot nin sekular na kapangganahan asin sa siring pinababayaan an espirituwal na pag-oswag? Nag-ooswag daw kita sa mga okupasyon sa kinaban pero nagrururo sa kongregasyon? Girumdoma an sadol ni Pablo: “An tataramon na iyan maimbod. Kun an siisay man na lalaki naghihingoang maabot an katongdan nin paraataman, sia boot sa marahay na gibo.” (1 Timoteo 3:1) An pagkaresponsable sa kongregasyon mas nagpapamidbid sa satong espirituwalidad kisa paglangkaw kan posisyon sa trabaho. An maingat na pagkatimbang dapat na papagdanayon tanganing an satong mga among sa trabaho dai makapamogol sato na garo baga kita nagdusay sa sainda asin bakong ki Jehova.​—Mateo 6:​24.

An Makahulogan na Komunikasyon Pinaooswag an Espirituwalidad

17. Ano an nakakokontribuwir sa pagkultibar nin tunay na pagkamoot sa laog nin pamilya?

¹⁷ An minilyon na harong ngonyan nagin garo mga harong na pinapaarkilahan na torogan. Paano? An mga miembro kan pamilya minapuli sana sa harong tanganing magtorog asin kumakan, dangan naghihidaleng minahale. Bihira na minatukaw sindang magkaaratubang sa lamesa tanganing maogmang magkarakan. Mayo an kaogmahan sa pagigin dayupot kan pamilya. An resulta? Mayo nin komunikasyon, mayo nin makahulogan na pag-orolay. Asin iyan puwedeng magresulta sa kadaihan nin interes sa ibang miembro, tibaad kadaihan nin tunay na pagmakolog. Kun nagkakaminorootmootan kita, nagtatao kita nin panahon na makipag-olay asin maghinanyog. Nagpapakosog kita, asin nagtatabang kita. An kabtang na ini nin espirituwalidad kalabot an makahulogan na komunikasyon sa pag-oltanan nin mag-agom asin sa pag-oltanan nin mga magurang asin mga aki.b Nagkakaipo iyan nin panahon asin taktika mantang dinadagka niato an lambang saro tanganing ihiras an satong kagayagayahan, mga eksperyensia, asin problema.​—1 Corinto 13:​4-8; Santiago 1:19.

18. (a) Ano an parateng pangenot na olang sa komunikasyon? (b) Sa ano nakatogdok an makahulogan na pag-iribaiba?

¹⁸ An marahay na komunikasyon nagkakaipo nin panahon asin pagmamaigot. Nangangahulogan iyan nin pagtagama nin panahon na makipag-olay asin maghinanyog sa lambang saro. An saro sa pinakadakulang mga kaolangan kaini iyo an nakauubos nin oras na aparato na nagkukua kan lugar nin onra sa dakol na harong​—an TV. Iinaatubang kaini an sarong angat​—kinokontrol daw kamo kan TV, o kinokontrol nindo iyan? An pagkontrol sa TV nagkakaipo nin marigon na pagdesidir​—kabale an determinasyon na gadanon iyan. Pero an paggibo kaiyan mabukas kan dalan para sa sato na makiayon sa lambang saro bilang mga miembro kan pamilya asin bilang espirituwal na mga tugang na lalaki asin babae. An makahulogan na pag-iribaiba nagkakaipo nin marahay na komunikasyon, na masabotan an kada saro, an satong mga pangangaipo asin kagayagayahan, nin pakipag-estoryahan sa lambang saro kun gurano niato inaapresyar an gabos na kabootan na naginibo sa sato. Sa ibang pagtaram, an makahulogan na komunikasyon nagpapaheling na kita mapagpasalamat sa iba asin pinahahalagahan sinda.​—Talinhaga 31:​28, 29.

19, 20. Kun pinagmamakologan niato an gabos sa pamilya, ano an gigibohon niato?

¹⁹ Kun siring, kun nagmamakolog kita sa lambang saro sa laog kan pamilya​—asin kabale dian an pagmakolog sa daing pagtubod na mga miembro kan pamilya—​dakol kitang magigibo sa pagparigon asin pagpapadanay kan satong espirituwalidad. Sa kamugtakan sa laog nin pamilya, masusunod niato an sadol ni Pedro: “Sa katapustapusi, kamo logod gabos magkaigwa nin saro sanang pag-isip, may pakikipagkapwa, naggigibo nin sa-magturugang na pagkamoot, mapagmahal nin maboot, mapakumbaba sa isip, na dai nagbabalos nin maraot sa maraot o nin pagmuda sa pagmuda, kundi, al kontraryo, nagbebendisyon, huli ta kamo inapod sa dalan na ini, tanganing kamo magmana nin bendisyon.”​—1 Pedro 3:​8, 9.

²⁰ Magkakamit kita ngonyan nin bendisyon ni Jehova kun pinagmamaigotan niato na papagdanayon an satong espirituwalidad, asin ini makatatabang sa pagmana niato kan saiyang bendisyon sa ngapit kun akoon niato an balaog na buhay na daing sagkod sa paraiso digdi sa daga. May iba pang bagay na magigibo kita bilang pamilya na magtinarabangan sa espirituwal. An sunod na artikulo ipapaliwanag an mga pakinabang sa iribang paggibo bilang pamilya.​—Lucas 23:​43; Kapahayagan 21:​1-4.

[Mga Nota sa Ibaba]

Nagigirumdoman daw Nindo?

◻ Ano an espirituwalidad?

◻ Paano an payo kan pamilya makaaarog sa halimbawa ni Cristo?

◻ Paano niato malilikayan an mga uma sa satong espirituwalidad?

◻ Ano an puwedeng makalaglag sa espirituwalidad nin pamilya?

◻ Taano ta mahalaga an makahulogan na komunikasyon?

[Ritrato sa pahina 12]

An pag-atender sa Pag-adal sa Libro kan Kongregasyon pinaririgon an pamilya sa espirituwal