An Pakatagal​—Mahalaga sa mga Kristiano

“Idagdag sa saindong pagtubod . . . an pakatagal.”​—2 PEDRO 1:​5, 6.

1, 2. Taano ta kita gabos kaipuhan na magtagal sagkod sa katapusan?

SINOSONGKO nin sarong nagbibiyaheng paraataman asin kan saiyang agom an sarong kapwa Kristiano na nasa mga 90 anyos na. Nagkapirang dekada na sia sa bilog na panahon na ministeryo. Sa pag-erestoryahan ninda, nagirumdoman kan gurang na tugang an iba sa mga nakamtan niang pribilehiyo sa nag-aging mga taon. “Pero,” an agrangay nia mantang nagbobolos an mga luha sa saiyang lalauogon, “ngonyan mayo akong gayo nin nagigibo.” Binuksan kan nagbibiyaheng paraataman an saiyang Biblia asin binasa an Mateo 24:​13, na dian kinotar si Jesu-Cristo sa pagsabing: “An makatagal sagkod sa katapusan iyo an maliligtas.” Dangan hineling kan paraataman an namomotan na tugang asin sinabi: “An ultimong asignasyon sa sato gabos, gurano man kadakol o kakadikit kan kaya niatong gibohon, iyo an magtagal sagkod sa katapusan.”

² Iyo, bilang mga Kristiano kita gabos kaipuhan na magtagal sagkod sa katapusan kan palakaw na ini nin mga bagay o sagkod sa katapusan kan satong buhay. Mayo nin ibang paagi na maako an pag-oyon ni Jehova para sa kaligtasan. Kita nasa paorumbasan para sa buhay, asin kaipuhan na “dumalagan kita na may pakatagal” sagkod na makaantos kita sa sagkodan. (Hebreo 12:1) Idinoon ni apostol Pedro an halaga kan kuwalidad na ini kan sadolon nia an kapwa nia mga Kristiano: “Idagdag sa saindong pagtubod . . . an pakatagal.” (2 Pedro 1:​5, 6) Alagad ta ano man nanggad an pakatagal?

Pakatagal​—An Kahulogan Kaiyan

3, 4. Ano an boot sabihon kan magtagal?

³ Ano an boot sabihon kan magtagal? An berbong Griego para sa “magtagal” (hy·po·meʹno) sa literal nangangahulogan “magdanay o dai humale sa irarom nin.” Iyan minalataw nin 17 beses sa Biblia. Sono sa mga leksikograpong si W. Bauer, F. W. Gingrich, asin F. Danker, iyan nangangahulogan “magdanay imbes na dumulag . . . , tumindog nin marigon, dai sumuko.” An nombreng Griego para sa “pakatagal” (hy·po·mo·neʹ) minalataw nin labing 30 beses. Mapadapit dian, an A New Testament Wordbook, ni William Barclay, nagsasabi: “Iyan an espiritu na kayang tioson an mga bagay, bakong sa pagsuko sana, kundi may malaad na paglaom . . . Iyan an kuwalidad na nagpapahiro sa tawo na magdanay na tindog paatubang sa doros. Iyan an marahay na ugale na kayang liwaton an pinakamasakit na pagbalo na magin kamurawayan ta sa ibong kan kolog natatanaw kaiyan an pasohan.”

⁴ Kun siring, an pakatagal nagpapangyari sato na manindogan asin dai mawaran nin paglaom sa atubang nin mga kaolangan o kasakitan. (Roma 5:​3-5) Tinatanaw kaiyan nin lihis sa presenteng kolog an pasohan​—an premyo, o balaog, na buhay na daing sagkod, baga man sa langit o sa daga.​—Santiago 1:12.

Pakatagal​—Taano?

5. (a) Taano an gabos na Kristiano ta ‘nagkakaipo nin pakatagal’? (b) Sa anong duwang kategoriya puwedeng bangaon an mga pagbalo sa sato?

⁵ Bilang mga Kristiano, kita gabos ‘nagkakaipo nin pakatagal.’ (Hebreo 10:36) Taano? Sa pundamental huli ta kita “napapaatubang sa manlaenlaen na pagbalo.” An tekstong Griego digdi sa Santiago 1:2 nagsusuherir nin dai linalaoman o dai gustong pagkasabatan, arog kun an saro nakakahampang nin sarong parahabon. (Ikomparar an Lucas 10:30.) Napapaatubang kita sa mga pagbalo na puwedeng bangaon sa duwang kategoriya: an mga uso sa mga tawo bilang resulta nin minanang kasalan, asin an mga nangyayari huli sa satong diosnon na debosyon. (1 Corinto 10:​13; 2 Timoteo 3:12) Ano an pira sa mga pagbalong ini?

6. Paano nagtagal an sarong Saksi kan mapaatubang sa makolog na helang?

⁶ Grabeng helang. Kapareho ni Timoteo, an ibang Kristiano kaipuhan na magtagal sa ‘parateng kahelangan.’ (1 Timoteo 5:23) Nangorogna kun napapaatubang sa pabalikbalik, tibaad makologon na helang na kita kaipuhan na magtagal, manindogan, sa tabang nin Dios asin dai paglingawan an satong Kristianong paglaom. Helinga an halimbawa nin sarong Saksi na minatongtong pa sana sa edad na 50 na nakilaban nin haloy asin masakit tumang sa nakagagadan na bukol na marikason an pagdakula. Sa duwang operasyon sia nagdanay na marigon sa desisyon niang dai magpaineksion nin dugo. (Gibo 15:​28, 29) Alagad ta naglataw liwat an bukol sa tulak nia asin nagpadagos na dumakula harani sa udog nia. Huli kaiyan, nakamate sia nin dai masabing kolog na dai kayang haleon nin minsan gurano kadakol na bolong. Pero, tinanaw nia nin lihis sa presenteng kolog an premyong buhay sa bagong kinaban. Ipinadagos niang ihiras an saiyang malaad na paglaom sa mga doktor, nars, asin bisita. Sia nagtagal sagkod sa katapusan​—an katapusan kan saiyang buhay. An problema nindo sa salud tibaad bako man na ikapepeligro nin buhay o makolog arog kan namatean kan namomotan na tugang na idto, pero tibaad iyan magtao pa man giraray nin dakulang pagbalo sa pakatagal.

7. Anong klaseng kolog an kalabot sa pakatagal para sa pira niatong espirituwal na tugang na lalaki asin babae?

⁷ Kolog nin boot. Sa panapanahon, an iba sa banwaan ni Jehova napapaatubang sa “kolog kan puso” na nagbubunga nin “nagsasakit na espiritu.” (Talinhaga 15:13) An grabeng depresyon bakong pambihira sa “delikadong mga panahon [na ini] na masakit pakibagayan.” (2 Timoteo 3:1) An Science News kan Disyembre 5, 1992, nagbareta: “An mga bilang nin grabe, sa parate nakapagpapaluyang depresyon naglalangkaw sa kada minasunod na kapag-arakian na namundag poon kan 1915.” Laen-laen an causa nin siring na depresyon, magpoon sa pisyolohikong mga dahelan sagkod sa makologon na mga inagihan. Para sa nagkapirang Kristiano, an kalabot sa pakatagal pakikilaban sa aroaldaw na manindogan sa atubang nin kolog nin boot. Pero dai sinda minasuko. Sinda nagdadanay na maimbod ki Jehova sa ibong kan mga luha.​—Ikomparar an Salmo 126:​5, 6.

8. Anong pagbalo sa pinansial an tibaad atubangon niato?

⁸ Tibaad kaiba sa laen-laen na pagbalo sa sato an grabeng sakit sa pagbuhay. Kan an sarong tugang sa New Jersey, E.U.A., biglang mawaran nin trabaho, natural sana na sia mahadit manongod sa ipapakakan sa saiyang pamilya asin dai pagkawara kan saiyang harong. Pero dai nia nalingawan an paglaom sa Kahadean. Mientras na naghahanap sia nin ibang trabaho, inaprobetsaran nia an oportunidad na maglingkod bilang auxiliary payunir. Kan huri, nakakua sia nin trabaho.​—Mateo 6:​25-34.

9. (a) Paano puwedeng mangaipo nin pakatagal an pagkawara nin sarong namomotan sa kagadanan? (b) Anong mga teksto an nagpapaheling na bakong sala an lumuha huli sa kamondoan?

⁹ Kun naeksperyensiahan nindo an pagkawara nin sarong namomotan sa kagadanan, kaipuhan nindo nin pakatagal na malawig minsan haloy nang nakabalik sa dating mga gibo-gibo an mga nasa palibot nindo. Tibaad marisa pa ngani nindo na taon-taon nangorognang masakit para sa saindo sa petsang nagadan an saindong namomotan. An pagtagal sa siring na pagkawara dai nangangahulogan na sala an lumuha huli sa kamondoan. Natural sanang ikamondo an pagkagadan nin saro na satuyang namomotan, asin ini dai nanggad nagpaparisa nin kakulangan nin pagtubod sa paglaom sa pagkabuhay liwat. (Genesis 23:​2; ikomparar an Hebreo 11:19.) Si Jesus “naghibi” pagkagadan ni Lazaro, minsan ngani may kompiansa Siang nagsabi ki Marta: “An saimong tugang mabubuhay liwat.” Asin talagang nabuhay liwat si Lazaro!​—Juan 11:​23, 32-35, 41-44.

10. Taano an banwaan ni Jehova ta may pambihirang pangangaipo nin pakatagal?

¹⁰ Apuwera sa pagtagal kan mga pagbalo na uso sa gabos na tawo, an banwaan ni Jehova may pambihirang pangangaipo nin pakatagal. “Ikaoongis kamo kan gabos na nasyon huli sa ngaran ko,” an patanid ni Jesus. (Mateo 24:9) Sinabi man nia: “Kun ako pinaglamag ninda, kamo man paglalamagon ninda.” (Juan 15:20) Taano ta mangyayari an gabos na pagkaongis asin paglamag na iyan? Huli ta saen man kita nabubuhay sa dagang ini bilang mga lingkod nin Dios, pinagmamaigotan ni Satanas na raoton an satong integridad ki Jehova. (1 Pedro 5:​8; ikomparar an Kapahayagan 12:17.) Sa katuyohan na ini parateng pinalalaad ni Satanas an paglamag, na binabalo nin makuri an satong pakatagal.

11, 12. (a) Anong pagbalo sa pakatagal an inatubang kan mga Saksi ni Jehova asin kan saindang mga aki kaidtong mga taon nin 1930 asin enot na mga taon nin 1940? (b) Taano ta nagsasayumang sumaludo sa nasyonal na emblema an mga Saksi ni Jehova?

¹¹ Halimbawa, kan mga taon nin 1930 asin enot na mga taon nin 1940, an mga Saksi ni Jehova asin an saindang mga aki sa Estados Unidos asin Canada nagin mga punteriya nin paglamag huli ta habo sindang sumaludo sa nasyonal na emblema huli sa mga dahelan nin konsensia. Iginagalang kan mga Saksi an emblema kan nasyon na iniistaran ninda, alagad ta kinukuyog ninda an prinsipyong yaon sa Pagboot nin Dios sa Exodo 20:​4, 5: “Dai ka gumibo para sa saimo man sana nin inukit na imahen o porma na kabaing nin ano man na yaon sa kalangitan sa itaas o yaon sa daga sa ibaba o yaon sa katubigan sa irarom kan daga. Dai ka maghorohod sa sainda ni madara na maglingkod sa sainda, huli ta ako si Jehova na saimong Dios sarong Dios na naghahagad nin dai nababangang debosyon.” Kan palayason an nagkapirang eskuwelang Saksi huli ta boot nindang itao sana ki Jehova Dios an saindang pagsamba, an mga Saksi nag-establisar nin mga Eskuwelahan na Pankahadean para sa pagtotokdo sa sainda. Nagbuwelta sa pampublikong mga eskuwelahan an mga estudyanteng ini kan midbidon kan Korte Suprema nin Estados Unidos an saindang relihiyosong paninindogan, arog kan ginigibo ngonyan nin naliwanagan nang mga nasyon. Minsan siring, an mapusong pagtagal kan kaakian na ini nagseserbing marahayon na halimbawa nangorogna para sa Kristianong kaakian na tibaad napapaatubang ngonyan sa mga pag-olog-olog huli ta sinda naghihingoang mamuhay sono sa mga pamantayan kan Biblia.​—1 Juan 5:21.

¹² An laen-laen na pagbalo na satuyang inaatubang​—kapwa an mga uso sa mga tawo asin an mga inaatubang niato huli kan satong Kristianong pagtubod​—nagpapaheling kun taano ta kaipuhan niato an pakatagal. Alagad ta paano kita makatatagal?

Pagtagal Sagkod sa Katapusan​—Paano?

13. Paano si Jehova nagtatao nin pakatagal?

¹³ An banwaan nin Dios may bentaha nanggad sa mga dai nagsasamba ki Jehova. Para sa tabang, puwede kitang umarang sa “Dios . . . na nagtatao nin pakatagal.” (Roma 15:5) Pero paano si Jehova nagtatao nin pakatagal? An sarong paagi na iyan ginigibo nia iyo an mga halimbawa nin pakatagal na nasusurat sa saiyang Tataramon, an Biblia. (Roma 15:4) Mantang hinohorophorop niato an mga ini, bako sana na kita napakokosog na magtagal kundi dakol man kitang nanonodan manongod sa kun paano magtatagal. Horophoropa an duwang pambihirang halimbawa​—an mapusong pakatagal ni Job asin an daing kanawayan na pakatagal ni Jesu-Cristo.​—Hebreo 12:​1-3; Santiago 5:11.

14, 15. (a) Anong mga pagbalo an tinagalan ni Job? (b) Paano natagalan ni Job an mga pagbalong inatubang nia?

¹⁴ Anong mga kamugtakan an buminalo sa pakatagal ni Job? Nag-agi sia nin sakit sa pagbuhay kan mawara saiya an kadaklan sa saiyang mga rogaring. (Job 1:​14-17; ikomparar an Job 1:3.) Namatean ni Job an kolog nin mawaran kan an gabos niang sampulong aki magkagaradan huli sa ariporos. (Job 1:​18-21) Nakamate sia nin grabe, makologon na helang. (Job 2:​7, 8; 7:​4, 5) Pinirit sia kan agom nia mismo na talikdan an Dios. (Job 2:9) An dayupot na kairiba may mga sinabing makolog, bakong maboot, asin putik. (Ikomparar an Job 16:​1-3 asin Job 42:7.) Alagad sa gabos na ini, nanindogan si Job, na pinapagdadanay an integridad. (Job 27:5) An mga bagay na saiyang tinagalan kaagid kan mga pagbalo na inaatubang kan banwaan ni Jehova ngonyan.

¹⁵ Paano natagalan ni Job an gabos na pagbalong idto? An sarong partikular na bagay na nakasustenir ki Job iyo an paglaom. “Igwa nin paglaom minsan para sa sarong kahoy,” an sabi nia. “Kun iyan palodon, iyan masupang liwat, asin an sanga kaiyan dai mawawara.” (Job 14:7) Ano an paglaom ni Job? Arog kan sinasabi pakalihis nin pirang bersikulo, sia nagsabi: “Kun an makosog na tawo magadan puwede pa daw siang mabuhay giraray? . . . Ika maapod, asin ako masimbag sa saimo. Para sa ginibo kan saimong mga kamot ika magkakaigwa nin pagkapungaw [o, pagmawot].” (Job 14:​14, 15) Iyo, nakatanaw si Job nin lihis pa sa saiyang presenteng kolog. Aram nia na an mga pagbalo sa saiya dai magdadanay sagkod lamang. Sa pinakahalawig sia kaipuhan na magtagal sagkod sa kagadanan. An may paglaom na hinahalat nia iyo na si Jehova, na mamomoton na nagmamawot na buhayon liwat an mga gadan, bubuhayon sia liwat.​—Gibo 24:15.

16. (a) Ano an nanonodan niato manongod sa pakatagal sa halimbawa ni Job? (b) An paglaom sa Kahadean dapat na magin gurano katunay para sa sato, asin taano?

¹⁶ Ano an manonodan niato sa pakatagal ni Job? Tanganing makatagal sagkod sa katapusan, dapat na dai niato noarin man paglingawan an satong paglaom. Girumdomon man na an pagkasegurado kan paglaom sa Kahadean nangangahulogan na an ano man na kasakitan na satong atubangon “naagi sana.” (2 Corinto 4:​16-18) An satuyang mahalagang paglaom marigon na napapasikad sa panuga ni Jehova na panahon sa harani nang ngapit na “papahidon nia an gabos na luha sa [satong] mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:​3, 4) An paglaom na iyan, na “dai nagdadara nin kamondoan,” dapat na magbantay sa satong kaisipan. (Roma 5:​4, 5; 1 Tesalonica 5:8) Kaipuhan na iyan tunay para sa sato​—tunay na marhay na paagi sa mga mata nin pagtubod, naiimahinar niato an satong sadiri sa bagong kinaban​—na dai na nakikilaban sa helang asin depresyon kundi nagmamata aroaldaw na may mabagsik na salud asin malinaw na isip; dai na nahahadit manongod sa grabeng mga kagipitan sa pagbuhay kundi nag-eerok sa katiwasayan; dai na nagmomondo huli sa kagadanan nin mga namomotan kundi namamatean an kaogmahan nin pagheling sa pagbuhay liwat sa sainda. (Hebreo 11:1) Kun mayo kan siring na paglaom puwede kitang malunosan na marhay sa satong presenteng mga pagbalo na kita minasuko na. Paagi sa satong paglaom, makosogon an dahelan niato na ipagpadagos an pakikilaban, ipagpadagos an pagtagal sagkod sa katapusan!

17. (a) Anong mga pagbalo an tinagalan ni Jesus? (b) An makuring kasakitan na tinagalan ni Jesus puwedeng marisa sa anong bagay? (Helingon an nota sa ibaba.)

¹⁷ Sinasadol kita kan Biblia na ‘magheling nin maingat’ ki Jesus asin ‘horophoropon sia.’ Anong mga pagbalo an saiyang tinagalan? An iba bunga kan kasalan asin pagkabakong sangkap nin iba. Tinagalan ni Jesus bako sanang an “paglibak nin mga parakasala” kundi pati an mga problemang naglataw sa tahaw kan saiyang mga disipulo, kaiba na an paorootrong diriskutiran ninda manongod sa kun siisay an pinakadakula. Labi pa kaiyan, napaatubang sia sa daing kaagid na pagbalo sa pagtubod. “Tinios nia an pasakitan na kahoy.” (Hebreo 12:​1-3; Lucas 9:​46; 22:24) Masakit minsan imahinaron sana an kasakitan sa isip asin sa hawak na kaiba sa kolog nin pagpako asin sa kasopganan na gadanon bilang paralanghad.a

18. Sono ki apostol Pablo, anong duwang bagay an nakasustenir ki Jesus?

¹⁸ Ano an nagpangyari ki Jesus na makatagal sagkod sa katapusan? Nasasambitan ni apostol Pablo an duwang bagay na nakasustenir ki Jesus: ‘mga pagngayongayo patin mga kahagadan’ saka “kagayagayahan na ibinugtak sa atubangan nia.” Si Jesus, an sangkap na Aki nin Dios, dai nasopog na humagad nin tabang. Sia namibi na “may makosog na mga pagtangis asin luha.” (Hebreo 5:7; 12:2) Nangorogna kan nagdadangadang na an pinakamasakit na pagbalo sa saiya na namatean niang kaipuhan na paorootro asin odok na mag-arang nin kosog. (Lucas 22:​39-44) Bilang simbag sa mga pagngayongayo ni Jesus, dai hinale ni Jehova an pagbalo, pero pinakosog nia si Jesus na matagalan iyan. Nagtagal man si Jesus ta tinanaw nia nin lihis sa hariging pasakitan an balos sa saiya​—an kagayagayahan na kakamtan nia sa pagkontribuwir sa pagpakangbanal sa ngaran ni Jehova asin sa pagtubos kan pamilya nin tawo sa kagadanan.​—Mateo 6:​9; 20:28.

19, 20. Paano kita tinatabangan kan halimbawa ni Jesus na magkaigwa nin realistikong punto-de-vista sa kun ano an kalabot sa pakatagal?

¹⁹ Sa halimbawa ni Jesus, nakanonood kita nin nagkapirang bagay na nakatatabang sato na magkaigwa nin realistikong punto-de-vista sa kun ano an kalabot sa pakatagal. An pagtagal bakong pasil. Kun nadedepisilan kitang tagalan an sarong partikular na pagbalo, nakararangang maaraman na iyan man an namatean ni Jesus. Tanganing makatagal sagkod sa katapusan, kaipuhan na kita paorootrong mag-arang nin kosog. Kun binabalo tibaad may beses na an pagmate niato dai na kita maninigong mamibi. Pero inaagda kita ni Jehova na ipahayag niato sa saiya an laog kan satong puso ‘huli ta sia may pagmakolog sa sato.’ (1 Pedro 5:7) Asin huli sa ipinanuga ni Jehova sa saiyang Tataramon, inoobligar nia an saiyang sadiri na tumao nin “kapangyarihan na lihis sa ordinaryo” sa mga nag-aapod sa saiya na may pagtubod.​—2 Corinto 4:​7-9.

²⁰ Kun beses kaipuhan kitang magtagal na may pagluha. Para ki Jesus an kolog mismo kan hariging pasakitan bakong dahelan na maggayagaya. Imbes, an kagayagayahan nasa balos na ibinugtak sa atubangan nia. Sa kamugtakan niato bakong realistiko na laoman na kita perming magigin magayagaya asin maogma kun kita binabalo. (Ikomparar an Hebreo 12:11.) Minsan siring, paagi sa pagtanaw sa balos tibaad mahimo niatong ‘ibilang na bilog na kagayagayahan’ dawa kun mapaatubang kita sa pinakamasakit na mga situwasyon. (Santiago 1:​2-4; Gibo 5:​41) An mahalaga magdanay kitang marigon​—dawa kun iyan kaipuhan na may pagluha. Total, si Jesus dai nagsabing, ‘An pinakakadikit an luha iyo an maliligtas’ kundi, “An makatagal sagkod sa katapusan iyo an maliligtas.”​—Mateo 24:13.

21. (a) Sa 2 Pedro 1:​5, 6, sinasadol kitang idagdag an ano sa satong pakatagal? (b) Anong mga hapot an pag-oolayan sa minasunod na artikulo?

²¹ Kaya kaipuhan an pakatagal sa kaligtasan. Alagad, sa 2 Pedro 1:​5, 6, sinasadol kita na idagdag sa satong pakatagal an diosnon na debosyon. Ano an diosnon na debosyon? Paano iyan konektado sa pakatagal, asin paano kamo magkakaigwa kaiyan? An mga hapot na ini pag-oolayan sa minasunod na artikulo.

[Nota sa Ibaba]

Ano an Isisimbag Nindo?

◻ Ano an boot sabihon kan magtagal?

◻ Taano an banwaan ni Jehova ta may pambihirang pangangaipo nin pakatagal?

◻ Ano an nagpangyari ki Job na makatagal?

◻ Paano kita tinatabangan kan halimbawa ni Jesus na magkaigwa nin realistikong punto-de-vista sa pakatagal?

[Ritrato sa pahina 10]

An mga Eskuwelahan na Pankahadean inestablisar tanganing tokdoan an Kristianong mga aki na pinalayas sa eskuwelahan huli sa pagtao sana kan saindang pagsamba ki Jehova

[Ritrato sa pahina 12]

Determinadong tawan nin onra an saiyang Ama, si Jesus nag-arang nin kosog na makatagal