Maheherakon Nindang Pinapastoran an Saradit na Karnero
SA GABOS na hayop na magaro sa tawo, mayo nin makapapareho sa magarong karnero. An kadaklan na hayop may kosog asin naturalesa na humanap nin kakanon asin dumulag sa mga hayop na naniniba sa sainda, pero an karnero laen man. Iyan madaling mabiktima nin mga naniniba, na kakadikit kan pandepensa. Kun mayo nin pastor, an karnero matatakton asin daing maginibo. Kun mapasuway sa aripompon, iyan madaling mawara. Kaya an maboot na mga karnero may makosogon na mga dahelan na magin dayupot sa saindang pastor. Kun mayo sia kakadikit kan posibilidad na sinda mabuhay. Huli sa mga karakteristikong ini, ginagamit sa piguratibo kan Biblia an mga karnero na magladawan sa inosente, minamaltrato, o mayong pandepensang mga tawo.
Totoo, maninigo sana an mga balos sa pastor. Bakong pasil an buhay nia. Sia naiinitan asin nalilipotan, asin nakakaeksperyensia sia nin mga bangging daing torog. Kaipuhan na protehiran nia an aripompon sa mga naniniba, na sa parate namemeligro sia mismo. Mantang kaipuhan na papagdanayon kan pastor na tiripon an aripompon, an kadaklan niang oras nauubos sa paghanap sa mga karnero na nalalagalag o nawawara. Kaipuhan na bolongon nia an mga may helang asin nalugadan. Kaipuhan na kargahon an maluluya o napapagal na mga kordero. Yaon permi an kahaditan sa pakakua nin bastanteng pagkakan asin tubig. Bakong pambihira na an pastor matorog sa oma tanganing masiertong ligtas an aripompon. Kaya an pagpastor masakit na buhay na nagkakaipo kan paglilingkod nin sarong lalaki na maisog, mahigos, asin mapamaagi. Orog sa gabos, kaipuhan na sia may kakayahan na magpaheling nin tunay na pagmakolog sa aripompon na ipinaniwala sa saiya.
Pagpastor sa Aripompon nin Dios
Ilinaladawan kan Biblia an banwaan nin Dios na maboot na mga karnero asin an mga namamahala sa sainda bilang mga pastor. Si Jehova mismo iyo an ‘pastor asin paraataman sa satong kalag.’ (1 Pedro 2:25) Si Jesu-Cristo, “an marahay na pastor,” nagpahayag kan kamawotan nia na an mga karnero mag-ako nin maheherakon na pangataman kan sabihan nia si apostol Pedro: ‘Pasabsaba an sakong mga kordero, pastoran mo an saradit kong karnero, pasabsaba an saradit kong karnero.’ (Juan 10:11; 21:15-17) An Kristianong mga paraataman solemneng pinagbotan na “pastoran an kongregasyon nin Dios.” (Gibo 20:28) Asin an gibohon ninda bilang espirituwal na mga pastor naghahagad kan mga kuwalidad nin sarong marahay na literal na pastor—kaisogan, kahigosan, pagkamapamaagi, asin orog sa gabos, odok sa pusong pagmakolog sa ikararahay kan aripompon.
Kan kaaldawan kan propeta nin Dios na si Ezequiel, an mayoriya sa mga pastor na ninombrahan na mag-ataman sa mga pangangaipo kan banwaan ni Jehova sa Israel dai nakaotob sa saindang mga katongdan. Nagsakit na marhay an aripompon nin Dios, na an kadaklan tuminalikod sa tunay na pagsamba. (Ezequiel 34:1-10) Ngonyan, an klero nin Kakristianohan ilinaladawan an sadiri na mga pastor kan Kristiano daang kongregasyon, pero an kamugtakan kaiyan na naghehelang sa espirituwal nagpapatunay na an klero kapareho kan maraot na mga impostor na nagpabaya asin nan-abuso sa mga tawo kan yaon digdi sa daga si Jesus. An relihiyosong mga namomoon sa Kakristianohan arog kan “parapatandan” na “daing pagmakolog sa mga karnero.” (Juan 10:12, 13) Sinda bako nanggad na andam, may kakayahan, o kuwalipikadong magpastor sa aripompon nin Dios.
Mga Pastor na Tunay na Nagmamakolog
Itinao ni Jesus an sangkap na halimbawa para sa gabos na magpapastor sa aripompon ni Jehova. Sa gabos na paagi sia mamomoton, maboot, maheherakon, asin matinabang sa saiyang mga disipulo. Sia an nagsadiring boot na hanapon an mga nangangaipo. Minsan ngani si Jesus sibot asin parateng pagal, permi siang nagtatao nin panahon na hinanyogon an saindang mga problema asin pakosogon sinda. An pagigin andam niang itao an saiyang kalag para sa sainda iyo an kadarudakulaing kapahayagan nin pagkamoot.—Juan 15:13.
Ngonyan, an gabos na nombradong magurang sa kongregasyon, saka ministeryal na mga lingkod, igwa man kan responsibilidad na ini sa aripompon. Kaya minsan an potensial na mga bentaha sa materyal sa ibang nasyon dai nakaaakit sa mayoriya sa responsableng mga lalaking ini na bumalyo asin kun siring bayaan an mga kongregasyon na daing igong tabang asin pamamahala. Nabubuhay sa “delikadong mga panahon na masakit pakibagayan,” an aripompon nagkakaipo nin pagpakosog asin paggiya. (2 Timoteo 3:1-5) Yaon an dai nahahaleng peligro na an iba mabiktima ni Satanas, na “siring sa nangangarob na leon, na naghahanap nin masisiba.” (1 Pedro 5:8) Ngonyan orog kisa kasuarin man, kaipuhan na an Kristianong mga pastor “hatolan . . . an mga masinuhay, rangahon an mga kalag na nagmomondo, tabangan an maluya.” (1 Tesalonica 5:14) Kaipuhan an danay na pagpuka tanganing maolang ninda an pakasuhay sa aripompon kan mga maluya.—1 Timoteo 4:1.
Paano maaaraman kan pastor kun nagkakaipo nin tabang an karnero? An iba sa mas risang mga tanda iyo an dai pakaatender sa Kristianong pagtiripon, iregular na pakikikabtang sa ministeryo sa langtad, asin an tendensiang lumikay sa dayupot na pakikiasosyar sa iba. Maririsa man an mga kaluyahan paagi sa maingat na pagrisa sa kaisipan kan mga karnero asin dalagan kan saindang mga pakikipag-olay. Tibaad may tendensia sindang magtatsar sa iba, tibaad nagpaparisa nin mga pagsentir. An saindang mga pakikipag-olay tibaad sobrang napapasentro sa materyalistikong mga pinag-aaabot imbes na sa espirituwal na mga pasohan. An pankagabsan na kadaihan nin entusiasmo, paglaom sa marahay, asin kagayagayahan tibaad mangahulogan na luminuya an saindang pagtubod. An mamondong panlauog puwedeng tanda na sinda ginigipit nin nagkokontrang mga paryentes o kinabanon na mga katood. Kun marisa an mga tandang ini, mahihingoa kan pastor na aramon kun anong klaseng tabang an kaipuhan.
Kun minasongko sa pagtabang sa kapagtubod, kaipuhan na isaisip kan Kristianong mga pastor an pangenot nindang katuyohan. Iyan bako sanang sosyal na pagbisita na daing kamanungdanan na mga bagay an pinag-oolayan. An pasohan ni apostol Pablo sa pagsongko sa saiyang mga tugang ‘makawaras sa sainda nin espirituwal na mga balaog tanganing sinda maparigon asin magkaigwa nin pagriribayan nin pagpakosog.’ (Roma 1:11, 12) Tanganing magibo ini, kaipuhan an patienot na pag-andam.
Enot, analisaron an tawo, asin pagmaigotan na aramon kun ano an saiyang espirituwal na kamugtakan. Kun aram na iyan, isipon kun anong klaseng paggiya, pagpakosog, o paghatol an pinakakapakipakinabang. An Tataramon nin Dios, an Biblia, maninigo na magin iyo an pangenot na pinagkukuanan nin impormasyon ta iyan “mapuwersa.” (Hebreo 4:12) Puwedeng helingon an mga magasin na Torrengbantayan asin Awake! para sa mga artikulo na manongod sa espisipikong mga pangangaipo nin mga karnero na napapaatubang sa espesyal na mga problema. May makukuang nakapababagsik asin nakapagiginhawang mga eksperyensia sa Yearbook of Jehovah’s Witnesses. An pasohan makatao nin espirituwal na bagay na magigin ‘marahay para sa pagpakosog sa tawo.’—Roma 15:2.
Pagpapastor na Nakapakokosog
An pastor nin sarong aripompon nin literal na mga karnero nakaaaram na sinda nagsasarig sa saiya para sa proteksion asin pangataman. An pinakausong mga peligro gikan sa pagkalagalag, helang, kapagalan, lugad, asin mga naniniba. Sa kaagid na paagi an espirituwal na pastor dapat na midbidon asin atubangon an kaagid na mga peligro sa karahayan kan aripompon. Uya an pirang usong problema asin pirang suhestion sa kun ano an puwedeng sabihon tanganing makatao nin impormasyon na nakapakokosog sa espirituwal.
(1) Siring sa karnero na bakong listo, an ibang Kristiano napapasuhay sa aripompon nin Dios ta sinda nadadara nin garo baga inosente asin makaoogmang mga pan-akit. Tibaad malingling sinda asin tibaad maparayo pa ngani huli sa pag-aabot sa mga pasohan na konektado sa materyalismo, dibersion, o pag-aling-aling. (Hebreo 2:1) Puwedeng ipagirumdom sa siring na mga tawo an pagkaapretado kan mga panahon, an pangangaipo na magdanay na harani sa organisasyon ni Jehova, asin an halaga nin pag-enot sa buhay kan intereses kan Kahadean. (Mateo 6:25-33; Lucas 21:34-36; 1 Timoteo 6:8-10) Manonompongan an nakatatabang na hatol sa artikulong “Keep Your Balance—How?” sa The Watchtower kan Mayo 15, 1984, pahina 8-11.
(2) An pastor kaipuhan na bolongon an karnero na nagkakahelang. Siring man, kaipuhan na tabangan nin espirituwal na mga pastor an mga Kristiano na nagkakahelang sa espirituwal huli sa negatibong mga bagay sa saindang buhay. (Santiago 5:14, 15) Tibaad sinda daing trabaho, may magabat na problema sa salud, o nagkakaproblema sa saindang pamilya. An siring na mga tawo tibaad daing gayo nin gana para sa espirituwal na kakanon o pakikiasosyar sa banwaan nin Dios. Ini man nagbubunga nin pagsolosolo asin panluluya nin boot. Kaipuhan na parigonon an saindang boot na si Jehova may pagmakolog sa sainda asin tatabangan sinda sa masakit na mga panahon. (Salmo 55:22; Mateo 18:12-14; 2 Corinto 4:16-18; 1 Pedro 1:6, 7; 5:6, 7) Tibaad makatabang man na repasohon an artikulong “Look Straight Ahead as a Christian,” na yaon sa The Watchtower kan Hunyo 1, 1980, pahina 12-15.
(3) An pastor kaipuhan na mag-alisto sa mga karnero na napapagal. An iba dakol nang taon na nagtatagal nin maimbod sa paglilingkod ki Jehova. Naghingoa sinda sa dakol na pagbalo asin kasakitan. Ngonyan nagpapaheling sinda nin mga tanda nin pagkapagal sa paggibo nin marahay asin tibaad nagpapahayag pa ngani nin mga pagduda sa pangangaipo nin desididong paghuhulit. Kaipuhan na buhayon liwat an saindang espiritu, na pinakokosog liwat an saindang pag-apresyar sa mga kagayagayahan asin bendisyon na gikan sa bilog na pusong paglilingkod sa Dios bilang pag-arog ki Jesu-Cristo. (Galacia 6:9, 10; Hebreo 12:1-3) Tibaad puwede sindang matabangan na masabotan na inaapresyar ni Jehova an maimbod nindang paglilingkod asin kaya sindang pakosogon para sa maabot pang mga aktibidad sa ikaoomaw nia. (Isaias 40:29, 30; Hebreo 6:10-12) Tibaad kapakipakinabang na ihiras an mga punto sa artikulong “Dai Kamo Umontok sa Paggibo nin Karahayan,” na nagluwas sa An Torrengbantayan kan Agosto 1, 1988, pahina 8-12 (w88-E 7/15 p. 9-14).
(4) Siring sa mga karnerong nalugadan, an ibang Kristiano nakolgan kan sa pagheling ninda salang gawe. Pero kun kita mapagpatawad sa iba, itatao sato kan satong langitnon na Ama an kinakaipuhan na kapatawadan. (Colosas 3:12-14; 1 Pedro 4:8) An ibang tugang na lalaki o babae tibaad nag-ako nin hatol o disiplina na sa paghona ninda bakong makatanosan. Minsan siring, kita gabos puwedeng makinabang sa espirituwal na hatol asin disiplina, asin nakararangang maaraman na dinidisiplina ni Jehova an mga namomotan nia. (Hebreo 12:4-11) Huling dai sinda tinawan nin mga pribilehiyo sa paglilingkod na sa paghona ninda kuwalipikado sinda, tinogotan nin iba an pagsentir na magbunga nin siwang sa pag-oltanan ninda asin kan kongregasyon. Alagad ta kun kita marayo sa organisasyon ni Jehova, mayo na nin ibang padudumanan para sa kaligtasan asin tunay na kagayagayahan. (Ikomparar an Juan 6:66-69.) An nakatatabang na impormasyon sa mga bagay na ini manonompongan sa artikulong “Maintaining Our Christian Oneness,” na yaon sa The Watchtower kan Agosto 15, 1988, pahina 28-30.
(5) An mga karnero kaipuhan na protehiran tumang sa mga naniniba. Sa kaagid na paagi, an iba tibaad tinutumang o hinuhuma nin daing pagtubod na mga paryentes o katrabaho. Tibaad sinasalakay an saindang integridad kun ginigipit sinda tanganing mapogolan an paglilingkod ninda sa Dios o mapapondo an pakikikabtang sa Kristianong ministeryo. Pero napakokosog sinda kun natatabangan sindang marealisar na an pagtumang malalaoman asin sa katotoohan saro sa mga pruweba na kita tunay na mga disipulo ni Jesu-Cristo. (Mateo 5:11, 12; 10:32-39; 24:9; 2 Timoteo 3:12) Tibaad kapakipakinabang na idoon na kun sinda maimbod, si Jehova nungka sindang babayaan asin babalosan an saindang pakatagal. (2 Corinto 4:7-9; Santiago 1:2-4, 12; 1 Pedro 5:8-10) An artikulo na may titulong “Maogmang Nagtatagal sa Ibong nin Paglamag” sa An Torrengbantayan kan Disyembre 1, 1982, pahina 7-11 (w82-E 4/15 p. 21-7), nagtatao nin dugang pang pagpakosog.
Mga Pastor—Otoba an Saindong mga Paninimbagan
Kadakol kan pangangaipo kan aripompon nin Dios, asin sarong eksidong trabaho an tamang pangataman. Kun siring, an Kristianong mga pastor dapat na maheherakon, tunay na mapagmakolog, asin interesadong tumabang. Mahalaga an pagpapasensia asin pakamansay. Minsan ngani an iba nagkakaipo nin hatol asin sadol, an iba nakikinabang nin orog sa pagpakosog. An pirang personal na pagsongko tibaad bastante na sa ibang kamugtakan, mantang sa iba man kaipuhan an regular na pag-adal sa Biblia. Sa kada kamugtakan an pangenot na pasohan magtao nin nakapakokosog sa espirituwal na paggiya o mamomoton na hatol na mamotibar sa tawo na ponan an marahay na mga ugale sa pag-adal, magin o magpadagos na regular sa pag-atender sa mga pagtiripon kan kongregasyon, asin maogma sa aktibong pakikikabtang sa Kristianong ministeryo. An mga ini pangenot na mga paagi na masukorohan an mga kapagtubod asin matabangan sinda na mabukasan an dalan para sa daing kaolangan na pagbolos kan banal na espiritu ni Jehova.
An mga pastor na nagtatao kan siring na pagsuportar naggigibo nin mahalagang marhay na paglilingkod sa aripompon nin Dios. (Helingon an The Watchtower kan Nobyembre 15, 1985, pahina 23-7.) An ginigibo kan espirituwal na mga pastor inaapresyar na marhay kan aripompon. Pakaako sa siring na tabang, an sarong payo nin pamilya nagsabi: ‘Pakalihis nin 22 anyos niamo sa katotoohan, naakit kami nin materyalismo pasiring sa kinaban. Sa parate boot ming umatender sa mga pagtiripon, pero garo baga dai mi magibo. Dai man kami mapamugtak sa palakaw ni Satanas, kaya biyo kaming daing naaayonan, nagsosolo. Huli kaini nadisganar asin mamondoon kami. Kaipuhan mi nin mga pagpakosog. Kan songkoon kami nin sarong magurang, maogma ming inako an probisyon na pag-adal sa Biblia sa samong harong. Ngonyan kami gabos nakabalik na sa tiwasay na organisasyon ni Jehova. Dai ko ikapahayag an kaogmahan na namamatean ko!’
May dahelan para sa dakulang paggayagaya kun an nawawara o nanluluya an boot na mga tugang niatong lalaki asin babae nabubuhay liwat sa espirituwal asin napahihiro liwat. (Lucas 15:4-7) Naootob an katuyohan ni Jehova manongod sa saiyang banwaan kun sinda nagkakasararo “siring sa aripompon sa toril.” (Miqueas 2:12) Sa tiwasay na sirongan na ini, sinda ‘nakakakua nin kaginhawahan para sa saindang kalag’ sa tabang kan Marahay na Pastor, si Jesu-Cristo. (Mateo 11:28-30) An sararong aripompon sa bilog na kinaban nag-aako nin paggiya, ranga, asin proteksion kaiba an abundang espirituwal na kakanon.
Ngonyan, paagi sa pagpapastor na ini, ipinahahaman ni Jehova an sarong mamomoton na gibohon na oyon sa saiyang suanoy na panuga: “Hahanapon ko an sakong mga karnero asin aatamanon ko sinda. . . . Ililigtas ko sinda hale sa gabos na lugar na saindang nagkawararakan . . . Pasasabsabon ko sinda sa marahay na sabsaban . . . Hahanapon ko an nawara, . . . asin bubugkosan ko an nabarian asin pakokosogon ko an naghehelang.” (Ezequiel 34:11-16) Kanigoan na karangahan sa pakaaram na si Jehova an satong Pastor!—Salmo 23:1-4.
Huli sa banal na mga probisyon para sa pagpastor sa aripompon nin Dios, bilang mga lingkod ni Jehova puwede man niatong ipahayag an saboot ni David, na nagsabi: “Sa katoninongan ako mahigda asin matotorog, huli ta ika sana, O Jehova, an nagpapaontok sa sako sa katiwasayan.” (Salmo 4:8) Iyo, an banwaan ni Jehova tiwasay sa saiyang mamomoton na pangataman asin nagpapasalamat na an Kristianong mga magurang maheherakon na nagpapastor sa saradit na karnero.
[Picture Credit Line sa pahina 20, 21]
Potter’s Complete Bible Encyclopedia