Magmapuso Kamo!

“Magkaigwa kita nin kapusoan asin magsabi: ‘Si Jehova an sakong paratabang.’”​—HEBREO 13:6.

1. Anong kapusoan an ipinaheling kan mga nakanood kan katotoohan nin Dios kaidtong enot na siglo C.E.?

KAIDTO enot na siglo kan satong Komon na Kapanahonan. Nagdatong na an haloy-hinalat na Mesiyas. Tinokdoan nia nin marhay an saiyang mga disipulo asin pinonan an mahalagang marhay na gibong paghuhulit. Panahon nang madangog nin mga tawo an maogmang bareta kan Kahadean nin Dios. Kaya, an mga lalaki asin babae na nakanood kan katotoohan mapusong nagpahayag kan makangangalas na mensaheng iyan.​—Mateo 28:​19, 20.

2. Taano ta nagkakaipo nin kapusoan ngonyan an mga Saksi ni Jehova?

² An Kahadean dai tinindog kan mga aldaw na idto. Pero an Designadong Hade, si Jesu-Cristo, naghula manongod sa saiyang maabot na dai naheheling na presensia na may kapangyarihan sa Kahadean. Iyan tatandaan nin mga bagay na arog nin daing kabaing na mga guerra, gutom, peste, linog, asin lakop sa kinaban na paghuhulit kan maogmang bareta. (Mateo 24:​3-14; Lucas 21:​10, 11) Bilang mga Saksi ni Jehova, kaipuhan niato an kapusoan na makaya an mga kamugtakan na ini asin an paglamag na inaagihan niato. Kun siring, magigin kapakipakinabang na pag-olayan an mga kasaysayan sa Biblia manongod sa mapusong mga parabalangibog kan Kahadean kaidtong enot na siglo C.E.

Kapusoan na Arogon si Cristo

3. Siisay an nagtatao kan pinakamarahay na halimbawa nin kapusoan, asin ano an isinabi manongod sa saiya sa Hebreo 12:​1-3?

³ Si Jesu-Cristo an nagtatao kan pinakamarahay na halimbawa nin kapusoan. Pakasitara kan “dakulang panganoron” nin mapusong mga saksi ni Jehova bago kan panahon nin mga Kristiano, isinentro ni apostol Pablo an atension ki Jesus sa pagsabing: “Huli ta napalilibotan kita nin dakulang panganoron nin mga saksi, pabayaan ta man an gabos na kagabatan asin an kasalan na pasil sanang nakagagapos sa sato, asin dumalagan kita na may pakatios sa paorumbasan na nasa atubang ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios. Sa katotoohan, paghorophoropa nindo an saro na nagtios nin siring na paglibak nin mga parakasala tumang sa saindang sadiring kapakanan, tanganing dai kamo mapagal asin manluya sa saindong kalag.”​—Hebreo 12:​1-3.

4. Paano nagpaheling nin kapusoan si Jesus kan sugotan ni Satanas?

⁴ Pakatapos kan bautismo nia asin 40 aldaw na paghorophorop, pamimibi, asin pag-ayuno sa kaawagan, mapusong tinumang ni Jesus si Satanas. Sinusugotan kan Diablo na gibohon na tinapay an mga gapo, nagsayuma si Jesus ta sala na magmilagro tanganing mapanigoan an personal na kamawotan. “Nasusurat,” sabi ni Jesus, “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” Kan angaton sia ni Satanas na tumagbang sa ibabaw kan lanob kan templo, nagsayuma si Jesus ta kasalan an pagtentar sa Dios na iligtas sia sa potensial na paghuhugot. “Sa giraray nasusurat,” sabi ni Cristo, “Dai mo pagbaloon si Jehova na saimong Dios.” Iinopresir sa saiya ni Satanas an gabos na kahadean sa kinaban karibay nin sarong “akto nin pagsamba,” pero habo ni Jesus na magin apostata asin suportaran an pagduhagi kan Diablo na an mga tawo dai magdadanay na maimbod sa Dios kun binabalo. Kaya si Jesus nagsabi: “Humale ka, Satanas! Huli ta nasusurat, ‘Ika magsamba ki Jehova na saimong Dios, asin sa saiya ka sana magtao nin banal na paglilingkod.’” Huli kaiyan, an Parasugot “binayaan sia sagkod sa ibang kombenyenteng panahon.”​—Mateo 4:​1-11; Lucas 4:13.

5. Ano an makatatabang sato na mapaglabanan an sugot?

⁵ Si Jesus nagpasakop ki Jehova asin tumang ki Satanas. Kun kita man ‘pumasakop sa Dios asin tumangon an Diablo, sia madulag sa sato.’ (Santiago 4:7) Kapareho ni Jesus, mapuso niatong mapaglalabanan an sugot kun iaaplikar niato an Kasuratan, tibaad kinokotar pa iyan sa panahon na kita nasusugotan na gumibo nin bagay na kasalan. Posible daw na padara kita sa sugot na maghabon kun sa oras na iyan inootro niato sa satong sadiri an pagboot nin Dios na: “Dai ka maghabon”? Posible daw na an duwang Kristiano padara sa seksuwal na inmoralidad kun minsan an saro sana sa sainda mapusong kokotaron an mga tataramon na: “Dai ka magsambay”?​—Roma 13:​8-10; Exodo 20:​14, 15.

6. Paano si Jesus mapusong ganador sa kinaban?

⁶ Bilang mga Kristiano na ikinaoongis kan kinaban na ini, kaya niatong likayan an espiritu asin makasalan na gawe kaiyan. Sinabihan ni Jesus an saiyang mga parasunod: “Sa kinaban magkakaigwa kamo nin kasakitan, alagad magmapuso kamo! Nadaog ko an kinaban.” (Juan 16:33) Nadaog nia an kinaban paagi sa dai pag-arog dian. An halimbawa nia bilang ganador asin an resulta kan saiyang pagdadanay sa integridad makapapano sato kan kapusoan na arogon sia paagi sa pagdadanay na siblag sa kinaban na ini asin dai nadigtaan kaiyan.​—Juan 17:16.

Kapusoan na Magpadagos sa Paghuhulit

7, 8. Ano an makatatabang sato na magpadagos sa paghuhulit sa ibong nin paglamag?

⁷ Si Jesus asin an saiyang mga disipulo nagsarig sa Dios para sa kapusoan na magpadagos sa paghuhulit sa ibong nin paglamag. Mapusong inotob ni Cristo an saiyang ministeryo sa ibong nin paglamag, asin pakalihis kan Pentecostes 33 C.E., an pinaglalamag niang mga parasunod nagpadagos na ibalangibog an maogmang bareta dawa pinagmaigotan nin Judiong mga namomoon sa relihiyon na papondohon sinda. (Gibo 4:​18-20; 5:29) An mga disipulo namibi: “Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon sa bilog na kapusoan.” Asin ano an nangyari? “Pakatapos na sinda makapagngayongayo, an lugar na saindang pinagkakatiriponan natanyog,” sabi kan kasaysayan, “asin sinda gabos napano kan banal na espiritu asin nagtaram kan tataramon nin Dios na may kapusoan.”​—Gibo 4:​24-31.

⁸ Mantang an mayoriya sa mga tawo ngonyan habong umako kan maogmang bareta, sa parate kaipuhan an kapusoan na magpadagos sa paghuhulit sa sainda. Nangorogna kun pinaglalamag, kaipuhan kan mga lingkod ni Jehova an kapusoan na itinatao nin Dios tanganing makatao nin lubos na patotoo. (Gibo 2:​40; 20:24) Kaya sinabihan kan mapusong parabalangibog kan Kahadean na si Pablo an sarong hoben pa, kulang pa nin kabatidan na katabang: “An Dios nagtao sato bakong nin espiritu nin pagkamatalaw, kundi nin kapangyarihan asin nin pagkamoot patin nin marahay na kaisipan. Kaya dai mo ikasopog an patotoo dapit sa satong Kagurangnan, ni ako na bilanggo huli sa saiya, kundi makikabtang ka sa pagtios nin maraot para sa maogmang bareta sono sa kapangyarihan nin Dios.” (2 Timoteo 1:​7, 8) Kun kita maarang nin kapusoan, makapagpapadagos kita sa paghuhulit, asin minsan paglamag dai makahahale kan satong kagayagayahan bilang mga parabalangibog kan Kahadean.​—Mateo 5:​10-12.

Kapusoan na Manindogan sa Lado ni Jehova

9, 10. (a) Ano an ginibo nin mga Judio asin Hentil kan enot na siglo tanganing magin bautisadong mga parasunod ni Cristo? (b) Taano ta kinaipuhan an kapusoan tanganing magin sarong Kristiano?

⁹ An dakol na Judio asin Hentil kan enot na siglo mapusong tinalikdan an mga tradisyon na bakong sono sa Kasuratan tanganing magin bautisadong mga parasunod ni Cristo. Dai nahaloy pakalihis kan Pentecostes 33 C.E., “an bilang nin mga disipulo marikas na nagdakol sa Jerusalem; asin an dakulang kadaklan nin mga saserdote nagpoon na magkuyog sa pagtubod.” (Gibo 6:7) An mga Judiong idto nagkaigwa kan kapusoan na putolon an relihiyosong mga koneksion asin akoon si Jesus bilang Mesiyas.

¹⁰ Poon kan 36 C.E., nagturubod an dakol na Hentil. Kan si Cornelio, an mga miembro kan saiyang pamilya, asin iba pang Hentil makadangog kan maogmang bareta, sinda tolos na nag-ako kaiyan, nag-ako nin banal na espiritu, asin ‘nabautismohan sa ngaran ni Jesu-Cristo.’ (Gibo 10:​1-48) Sa Filipos an sarong Hentil na bantay sa bilanggoan asin an saiyang pamilya tolos na nag-ako sa Kristianismo, asin “sia asin an saiyang harong tolos na nabautismohan.” (Gibo 16:​25-34) Kinaipuhan an kapusoan na magibo an siring ta kaidto an mga Kristiano pinaglalamag, bakong popular na minoriya. Sagkod ngonyan iyo pa man giraray. Pero kun kamo dai pa nagdudusay sa Dios asin nababautismohan bilang saro sa mga Saksi ni Jehova, bako daw na panahon nang gibohon nindo an mapusong mga paghirong ini?

Kapusoan sa Nababangang mga Pamilya

11. Si Eunice asin Timoteo nagtao nin anong marahay na mga halimbawa nin kapusoan?

¹¹ Si Eunice asin an aki niang si Timoteo nagtao nin marahay na mga halimbawa nin mapusong pagtubod sa sarong pamilya na nababanga sa relihiyon. Minsan ngani pagano an agom ni Eunice, tinokdoan nia an saiyang aki kan “banal na mga kasuratan” poon sa pagkaomboy. (2 Timoteo 3:​14-17) Kan sia magin Kristiana, sia nagpaheling nin “pagtubod na dai nin pagsaginsagin.” (2 Timoteo 1:5) Nagkaigwa man sia kan kapusoan na tawan nin Kristianong pagtotokdo si Timoteo mantang nagpapaheling nin paggalang sa pagkapayo kan saiyang agom na daing pagtubod. Tunay na binalosan an saiyang pagtubod asin kapusoan kan an aki nia na natokdoan nin marahay pilion na umiba ki Pablo sa mga biyahe sa pagmimisyonero. Ini makapakokosog nanggad sa Kristianong mga magurang na nasa kaagid na mga kamugtakan!

12. Nagin anong klaseng tawo si Timoteo, asin sairisay ngonyan an nagigin arog nia?

¹² Minsan ngani si Timoteo nasa pamilyang nababanga sa relihiyon, saiyang mapusong inako an Kristianismo asin nagin sia espirituwal na tawo na manongod sa saiya nasabi ni Pablo: “Ako naglalaom sa Kagurangnan na Jesus na sa madali ikasobol ko si Timoteo sa saindo [mga taga-Filipos], tangani na ako magin maogmang kalag kun maaraman ko na an mga bagay mapadapit sa saindo. Huli ta mayo na ako nin iba na may kaisipan na arog kan sa saiya na mangangataman nin tunay sa mga bagay mapadapit sa saindo. Aram nindo an patotoo na saiyang itinao manongod sa saiya man sana, na siring sa aki sa kaibanan nin ama sia naglingkod sa kaibanan ko sa pagpalakop kan maogmang bareta.” (Filipos 2:​19-22) Ngonyan, an dakol na aking lalaki asin babae sa mga pamilyang nababanga sa relihiyon mapusong inaako an tunay na Kristianismo. Kapareho ni Timoteo sinda nagtatao nin patotoo manongod sa sainda man sana, asin kanigoan an kagayagayahan niato na sinda kabtang kan organisasyon ni Jehova!

Kapusoan na ‘Isapeligro an Satong Liog’

13. Sa anong paagi na si Aquila asin Priscila nagpaheling nin kapusoan?

¹³ Si Aquila asin an saiyang agom, si Priscila (Prisca), nagtao nin halimbawa paagi sa mapusong ‘pagsapeligro kan saindang liog’ para sa sarong kapagtubod. Pinadagos ninda sa saindang harong si Pablo, nagtrabaho kaiba nia sa paggibo nin tolda, asin tinabangan sia na pakosogon an bagong kongregasyon sa Corinto. (Gibo 18:​1-4) Sa laog kan 15 anyos nindang pagkakatood, isinapeligro pa ngani ninda an saindang buhay para sa saiya sa dai sinabing paagi. Nag-iistar sinda sa Roma kan sabihan nia an mga Kristiano duman: “Ikumusta nindo ako ki Prisca asin Aquila na mga katabang ko dian ki Cristo Jesus, na isinapeligro an saindang mga liog para sa sakong kalag, na sa sainda nagpapasalamat bako sanang ako kundi pati an gabos na kongregasyon kan mga nasyon.”​—Roma 16:​3, 4.

14. Sa pagsapeligro kan saindang liog para ki Pablo, si Aquila asin Priscila guminawe kaoyon sa anong togon?

¹⁴ Paagi sa pagsapeligro kan saindang liog para ki Pablo, si Aquila asin Priscila guminawe nin oyon sa mga tataramon ni Jesus: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan.” (Juan 13:34) “Bago” an togon na ini ta iyan nakalalabi sa kahagadan kan Pagboot ni Moises na kamotan nin saro an saiyang kataed nin siring sa pagkamoot nia sa saiyang sadiri. (Levitico 19:18) Hinagad kaiyan an mapagsakripisyong pagkamoot na masagkod sa pagtao kan buhay nin saro para sa iba, arog kan ginibo ni Jesus. Kinotar kan parasurat na si Tertuliano kan ikaduwa asin ikatolong siglo C.E. an mga tataramon nin mga kinabanon manongod sa mga Kristiano kan sia sumurat: “‘Helinga,’ sinda nagsasarabi, ‘kun paano sinda nagkakaminorootmootan . . . asin kun paano sinda andam na magadan para sa lambang saro.’” (Apology, kapitulo XXXIX, 7) Nangorogna sa panahon nin paglamag na kita puwedeng maobligar na ipaheling an pagkamoot sa tugang paagi sa mapusong pagsapeligro kan satong buhay tangani na dai mag-agi nin panriringis o kagadanan an mga kapagtubod sa kamot nin mga kaiwal.​—1 Juan 3:16.

An Kapusoan Nagtatao nin Kagayagayahan

15, 16. Arog kan ipinaheheling sa Gibo kapitulo 16, paano puwedeng konektado an kapusoan asin kagayagayahan?

¹⁵ Si Pablo asin Silas nagtatao nin ebidensia na makatatao nin kagayagayahan an pagpaheling nin kapusoan sa panahon nin mga pagbalo. Sa pagboot kan mga mahistrado sibil sa siudad nin Filipos, sinda pinaghampak nin mga samulig sa atubangan nin publiko asin pinandogan sa bilanggoan. Pero dai sinda natakot na may kamondoan. Sa ibong kan masakit nindang mga kamugtakan, igwa pa sinda nin kapusoan na itinao nin Dios asin kan kagayagayahan na itinatao kaiyan sa maimbod na mga Kristiano.

¹⁶ Kaidtong matanga na, si Pablo asin Silas namimibi asin nag-oomaw sa Dios sa pag-awit. Sa panale, tinanyog nin sarong linog an bilanggoan, hinubad an saindang mga gapos, asin binukasan an mga pinto. An natakot na bantay sa bilanggoan asin an saiyang pamilya tinawan nin mapusong patotoo na nagbunga kan pagkabautismohi sa sainda bilang mga lingkod ni Jehova. Sia mismo “naggayagaya nin makuri kaiba kan bilog niang harong ngonyan na sia nagtubod na sa Dios.” (Gibo 16:​16-34) Kanigoan na kagayagayahan an seguradong itinao kaini ki Pablo asin Silas! Mantang napag-adalan ini asin an ibang halimbawa nin kapusoan sa Kasuratan, paano daw kita makapagdadanay na mapuso bilang mga lingkod ni Jehova?

Magpadagos na Mapuso

17. Arog kan ipinaheheling sa Salmo 27, paano konektado sa kapusoan an paglaom ki Jehova?

¹⁷ An paglaom ki Jehova makatatabang sato na magdanay na mapuso. Si David nag-awit: “Maglaom ka ki Jehova; magmapuso ka asin pakosoga an saimong puso. Iyo, maglaom ka ki Jehova.” (Salmo 27:14) Ipinaheheling kan Salmo 27 na si David nagsarig ki Jehova bilang an “kasarigan” kan saiyang buhay. (Bersikulo 1) An pakaheling sa ginibo nin Dios sa mga kaiwal ni David kan mga nakaagi nagtao saiya nin kapusoan. (Bersikulo 2, 3) Saro pang bagay an pag-apresyar sa sentro nin pagsamba ki Jehova. (Bersikulo 4) An pagsarig sa tabang, proteksion, asin pagliligtas ni Jehova nakaparigon man sa kapusoan ni David. (Bersikulo 5-10) Nakatabang man an padagos na pagtotokdo sa mga prinsipyo kan matanos na dalan ni Jehova. (Bersikulo 11) An may pagsarig na pamibi na makaligtas sa saiyang mga kaiwal, kaiba an pagtubod asin paglaom, nakatabang ki David na magin mapuso. (Bersikulo 12-14) Maparirigon niato an satong kapusoan sa kaagid na mga paagi, sa siring ipinaheheling na kita talagang ‘naglalaom ki Jehova.’

18. (a) Ano an nagpapaheling na an dayaday na pakikiasosyar sa mga kapwa nagsasamba ki Jehova makatatabang sato na magdanay na mapuso? (b) Ano an kabtang nin Kristianong mga pagtiripon sa pagparigon sa kapusoan?

¹⁸ An dayaday na pakikiasosyar sa mga kapwa nagsasamba ki Jehova makatatabang sato na magdanay na mapuso. Kan si Pablo mag-apelar ki Cesar asin pasiring sa Roma, sinabat sia nin mga kapagtubod sa Sadan nin Apio asin Tolong Sakatan. “Kan maheling sinda,” sabi kan tala, “si Pablo nagpasalamat sa Dios asin nagkaigwa nin kapusoan.” (Gibo 28:15) Sa dayaday niatong pag-atender sa Kristianong mga pagtiripon, kinukuyog niato an hatol ni Pablo: “Magpasaradolsadol kita sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.” (Hebreo 10:​24, 25) Ano an boot sabihon kan pagpakinosogan? An pagpakosog boot sabihon “motibaron nin kapusoan, espiritu, o paglaom.” (Webster’s Ninth New Collegiate Dictionary) Dakula an magigibo niato na mamotibar nin kapusoan an ibang Kristiano, asin an pagpakosog ninda makaparirigon man kan kuwalidad na ini sa sato.

19. Paano an Kasuratan asin an Kristianong mga publikasyon konektado sa satong pagdadanay na mapuso?

¹⁹ Tanganing magdanay na mapuso, kaipuhan na dayaday niatong pag-adalan an Tataramon nin Dios asin iaplikar an hatol kaiyan sa satong buhay. (Deuteronomio 31:​9-12; Josue 1:8) Maninigong kaiba sa satong dayaday na pag-adal an Kristianong mga publikasyon na basado sa Kasuratan, ta an itinataong madonong na hatol makatatabang sato na maatubang na may kapusoan na itinao nin Dios an mga pagbalo sa pagtubod. Sa mga kasaysayan kan Biblia, naheling niato kun paano an mga lingkod ni Jehova nagin mapuso sa laen-laen na kamugtakan. Sa oras mismong ini, tibaad dai niato aram kun paano kita matatabangan kan siring na impormasyon, pero may puwersa an Tataramon nin Dios, asin an nanonodan niato dian perming magtatao nin pakinabang sa sato. (Hebreo 4:12) Halimbawa, kun magpoon na makaapektar sa satong ministeryo an takot sa tawo, tibaad magirumdoman niato kun paano si Enoc nagkaigwa kan kapusoan na itao an mensahe nin Dios sa mga maraot.​—Judas 14, 15.

20. Taano ta masasabi na kaipuhan an pamibi tangani na kita magdanay na mapuso bilang mga lingkod ni Jehova?

²⁰ Tanganing magdanay na mapuso bilang mga lingkod ni Jehova, kaipuhan na kita magmaigot sa pamibi. (Roma 12:12) Mapusong natagalan ni Jesus an mga pagbalo sa saiya ta sia “nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.” (Hebreo 5:7) Paagi sa pagdadanay na dayupot sa Dios sa pamibi, dai kita magigin kapareho nin mga kobardeng kinabanon na nakatalagang mag-agi sa “ikaduwang kagadanan” na dian mayo na nin pagkabuhay liwat. (Kapahayagan 21:8) An proteksion nin Dios asin an buhay sa bagong kinaban nin Dios para sa saiyang mapusong mga lingkod.

21. Taano ta puwedeng magmapuso an maimbod na mga Saksi ni Jehova?

²¹ Bilang maimbod na mga Saksi ni Jehova, dai kita kaipuhan na matakot sa mga kaiwal na demonyo asin tawo, ta nasa sato an pagsuportar nin Dios asin an mapusong halimbawa ni Jesus bilang ganador sa kinaban. An nakapakokosog sa espirituwal na pakikiasosyar sa banwaan ni Jehova nakatatabang man sato na magin mapuso. Napakokosog man an satong kapusoan paagi sa paggiya asin hatol kan Kasuratan asin Kristianong mga publikasyon. Asin an mga kasaysayan sa Biblia manongod sa mga lingkod nin Dios kaidtong mga nakaagi nakatatabang sato na mapusong maglakaw sa saiyang mga dalan. Kun siring, sa delikadong huring mga aldaw na ini, mapuso kitang umabante sa banal na paglilingkod. Iyo, magmapuso logod an bilog na banwaan ni Jehova!

Ano an Isisimbag Nindo?

◻ Paano kita mapapano nin kapusoan kan halimbawa ni Jesus?

◻ Ano an nagtao nin kapusoan ki Jesus asin sa saiyang mga disipulo na magpadagos sa paghuhulit?

◻ Taano ta kinaipuhan nin mga Judio asin Hentil an kapusoan na manindogan sa lado ni Jehova?

◻ Anong mga halimbawa nin kapusoan an itinao ni Eunice asin Timoteo?

◻ Ano an ebidensia na an kapusoan nagtatao nin kagayagayahan minsan sa panahon nin paglamag?

[Ritrato sa pahina 18]

Kapareho ni Jesus, mapaglalabanan niato an sugot kun satuyang iaaplikar asin kokotaron an Kasuratan