Magpaili Ka ki Jehova
“Sa saimo, O Jehova, ako nagpaili.”—SALMO 31:1.
1. Paano an Salmo 31 nagpapahayag nin kapanarigan sa kakayahan ni Jehova na tumao nin pailihan?
NAG-AAWIT an magayon na boses manongod sa sarong lalaki na, minsan ngani nanluluya an isip asin hawak, itinatao an sadiri ki Jehova. An pagtubod nanggagana, an sabi kan liriko sa banal na kantang iyan. Sa naghahalat na mga takyag kan Kaharohalangkawe, an lalaking ini nakanompong nin pahiplian sa naglalapag na mga paralamag. “Sa saimo, O Jehova, ako nagpaili,” an sabi kan saiyang salmo. “O dai noarin man logod ako masopog. Sa saimong katanosan tawan mo ako nin dudulagan.”—Salmo 31:1.
2. (a) Makapananarig kita ki Jehova bilang satong pailihan basado sa anong duwang harigi? (b) Anong klaseng Dios si Jehova?
2 An salmista igwang sarong pailihan—an pinakamarahay na pailihan! Mapagdududahan an ibang bagay, alagad an katunayan na ini magdadanay: si Jehova iyo an saiyang pailihan, an saiyang kuta. An saiyang kompiansa napapasikad sa duwang seguradong harigi. Enot, an saiyang pagtubod, na dai sosopogon ni Jehova, asin an ikaduwa, an katanosan ni Jehova, na an boot sabihon dai Nia noarin man permanenteng babayaan an Saiyang lingkod. Si Jehova bakong Dios na sinosopog an saiyang maimbod na mga lingkod; bako siang parabalga nin panuga. Imbes, sia Dios nin katotoohan asin parabalos sa mga odok sa boot na nananarig sa saiya. Sa kahurihurihi, an pagtubod babalosan! Maabot an dudulagan!—Salmo 31:5, 6.
3. Paano inoomaw kan salmista si Jehova?
3 Sa pagkompuwesto kan saiyang musika na may pabarobagong tono na minaitaas hale sa mga kairaroman nin kamondoan asin kasakitan pasiring sa mga alitoktok nin kapanarigan, an salmista nakanompong nin pan-irarom na karigonan. Inoomaw nia si Jehova huli sa Saiyang maimbod na pagkamoot. “Pag-omawon si Jehova,” an awit nia, “huli ta nagtao sia sa sako nin makangangalas na mamomoton na kabootan sa siudad na nasa kagipitan.”—Salmo 31:21.
Makosog na Koro nin mga Parabalangibog kan Kahadean
4, 5. (a) Anong makosog na koro an nag-oomaw ki Jehova ngonyan, asin paano ninda nagibo iyan durante kaining nakaaging taon nin paglilingkod? (Helingon an tsart sa pahina 12-15.) (b) Sa anong paagi na an bilang kan nag-atender sa Memorial nagpapaheling na dakol pang indibiduwal an gustong umiba sa koro nin mga parabalangibog kan Kahadean? (Helingon an tsart.) (c) Anong grupo sa saindong kongregasyon an tibaad puwedeng umiba sa koro?
4 Ngonyan, an mga tataramon kan salmong iyan nagkaigwa liwat nin dugang pang kahulogan. An mga awit nin pag-omaw ki Jehova dai puwedeng paontokon nin siisay man na maraot na paratumang, nin ano man na natural na kalamidad, o nin ano man na kasakitan sa ekonomiya; tunay nanggad, an mamomoton na kabootan ni Jehova nagin makangangalas para sa saiyang banwaan. Kan nakaaging taon nin paglilingkod sa bilog na kinaban, an sarong makosog na koro, na uminabot sa pinakahalangkaw na bilang na 4,709,889 sa 231 kadagaan, nag-awit kan mensahe kan Kahadean nin Dios. An langitnon na pamamahala ni Jehova paagi ki Cristo Jesus sarong pailihan na dai sinda ipasusudya. Kan nakaaging taon, an mga parabalangibog na ini kan Kahadean hale sa 73,070 kongregasyon naggamit nin total na 1,057,341,972 na oras sa gibong pag-ebanghelyo. Nagbunga ini nin 296,004 katawo na nagsimbolisar kan saindang pagdusay sa Dios paagi sa bautismo sa tubig. Asin kanigoan kamakangangalas na sorpresa an nakamtan kan gabos na nag-atender sa Banal na Pagtotokdo na Internasyonal na Kombension na ginibo sa Kiev, Ukraine, kaining nakaaging Agosto. Nakaheling sinda nin pinakamahalagang pangyayari sa historya, an pagheling sa pinakadakulang lagduan na bautismo nin tunay na mga Kristiano na ikinarekord kasuarin pa man! Siring sa ihinula sa Isaias 54:2, 3, an banwaan nin Dios nagdadakol sa dai pang kaagid na bilang.
5 Minsan siring, an dugang pang gustong magin sakop kan Kahadean nin Dios naghahalat na sinda man makaiba sa koro. Kan nakaaging taon, an Memorial kan kagadanan ni Jesus inatenderan nin makangangalas na total nin 11,865,765 katawo. Linalaoman na an kadaklan kaini makukuwalipikar na mag-awit kan awit sa Kahadean sa harong-harong durante kan taon na ini nin paglilingkod. Sierto nanggad na an paglaom na iyan pinapano nin kabangisan an kaiwal nin katotoohan, si Satanas na Diablo!—Kapahayagan 12:12, 17.
6, 7. Ipaliwanag kun paano an sarong interesadong lalaki napangganahan an pananalakay nin demonyo sa tabang ni Jehova.
6 Hihingoahon ni Satanas na olangon an iba sa pagdagdag kan saindang tingog sa makosog na korong iyan. Halimbawa, an mga parahayag sa Thailand naheheling an nagdadakol na bilang nin mga tawong dinadamat nin pananalakay nin mga demonyo. Alagad an dakol na sinsero nakatalingkas paagi sa tabang ni Jehova. Pakadalaw sa sarong parasantiguwar huli sa pag-usyoso, an sarong lalaki napairarom sa kapangyarihan kan mga demonyo sa laog nin sampulong taon. Pinagmaigotan niang makabutas sa saindang kapangyarihan paagi sa tabang nin sarong klerigo, pero dai sia nakamate nin tunay na pagrahay. An sarong bilog na panahon na ministro kan mga Saksi ni Jehova pinonan an pakipag-adal sa Biblia sa lalaking ini asin itinokdo sa saiya gikan sa Biblia an solamenteng paagi na makatalingkas sa kapangyarihan nin demonyo—magkua nin tamang kaaraman kan katotoohan, magtubod ki Jehova Dios, asin magngayongayo sa saiya sa pamibi.—1 Corinto 2:5; Filipos 4:6, 7; 1 Timoteo 2:3, 4.
7 Pagkabanggi pakatapos kan pag-orolay na ini, an lalaki nangatorogan na dian an saiyang gadan nang ama hinuma sia kun dai sia magbuwelta sa pagigin patagolainan. An saiyang pamilya nagpoon na magsakit. Habong padara, an lalaki nagpadagos sa saiyang mga leksion sa Biblia asin nagpoon na umatender sa mga pagtiripon. Durante kan saro sa mga pag-adal na idto, ipinaliwanag kan payunir na kun beses an mga bagay na ginagamit sa espiritistikong mga rituwal nagbubukas nin dalan sa mga demonyo na salakayon an mga tawong naghihingoang tumalingkas sa saindang kapangyarihan. Nagirumdoman kan lalaki na may ginamit siang lana bilang anting-anting. Saiyang narealisar ngonyan na dapat niang iapon iyan. Poon kan itapok iyan, dai na sia giraray rinibok kan marompot na mga espiritu. (Ikomparar an Efeso 6:13; Santiago 4:7, 8.) Sia asin an saiyang agom marahay an pag-oswag sa saindang pag-adal asin regular na nag-aatender sa mga pagtiripon para sa pagtotokdo sa Biblia.
8, 9. Ano pang ibang kaolangan an napangganahan nin ibang parabalangibog kan Kahadean?
8 An iba pang kaolangan puwedeng makaampat sa tanog kan maogmang bareta. Dahelan sa masakiton na situwasyon sa ekonomiya sa Ghana, an mga trabahador hinarale sa trabaho. Naglangkaw na marhay an barakalon, na pinagin talagang problema na makakua kan pundamental na mga pangangaipo sa buhay. Paano iyan pinangganahan kan banwaan ni Jehova? Paagi sa pagsarig, bakong sa saindang sadiri, kundi ki Jehova. Halimbawa, sarong aldaw an sarong lalaki iwinalat an sarong sirradong sobre sa resepsion kan sangang opisina. An laog kan sobre $200, o tolong bulan na pinakahababang suweldo. An sobre gikan sa sarong dai nagpabistong kagregalo, pero sa patos ini an nakasurat: “Nawaran ako nin trabaho, pero tinawan giraray ako ni Jehova. Nagpapasalamat ako saiya asin sa saiyang Aki, si Cristo Jesus. Bilang tabang sa pagpalakop kan maogmang bareta kan Kahadean bago umabot an katapusan, ilinalakip ko an diit na kontribusyon.”—Ikomparar an 2 Corinto 9:11.
9 An pag-atender sa mga pagtiripon nakatatabang na sanayon an mga minaiba sa makosog na koro nin pag-omaw ki Jehova. (Ikomparar an Salmo 22:22.) Kaya, sa parteng timog kan Honduras, igwa duman nin sarong kongregasyon na inaapod El Jordan. Ano an interesanteng marhay dapit sa sadit na grupong ini? Iyan an saindang maimbod na pag-atender sa mga pagtiripon. Sa 19 parahayag, an 12 kaipuhan na umibong nin sarong mahiwas na salog tanganing makaatender sa mga pagtiripon kada semana. Bakong gayong problema ini kun tig-init, huli ta puwede sindang bumalyo sa salog paagi sa pagtongtong sa mga gapo. Alagad, durante nin tig-oran, nagliliwat an kamugtakan. An dati daing puwersang katubigan nagigin baha na inaanod an gabos na nasa binubolosan kaiyan. Tanganing mapangganahan an kaolangan na ini, an mga tugang na lalaki asin babae kaipuhan na magin matibay na mga paralangoy. Bago bumalyo, ilinalaog ninda an saindang mga gubing na para sa pagtiripon sa sarong tina (metal na banyera) dangan tinatahoban iyan nin bag na plastik. Ginagamit kan pinakamatibay lumangoy an tina bilang palataw asin ginigiyahan an grupo paibong. Ligtas sa ibong na tampi, saindang pinupunasan an sadiri, nagbobolos, asin minaabot sa Kingdom Hall na maogma asin malinig!—Salmo 40:9.
Kuta na Dian Kita Puwedeng Mag-erok
10. Taano ta makadodolok kita ki Jehova sa mga panahon nin tension?
10 Baga man kamo direktang inaatake nin demonyo o nakamamate nin tension dahelan sa ibang bagay, si Jehova puwedeng magin saindong kuta. Mag-apod sa saiya sa pamibi. Atento siang naghihinanyog dawa sa pinakamaluyang mga agrangay kan saiyang banwaan. An salmista nanompongan iyan na totoo asin nagsurat: “Kilingan sa sakuya an saimong talinga. Ligtasan ako sa madali. Magin ka kuta nin mga gapo para sa sakuya, harong nin mga kuta sa pagligtas sa sako. Huli ta ika an sakuyang gapo asin sakong kuta; asin huli sa saimong ngaran gigiyahan mo ako asin iibanan mo ako. Kukuanon mo ako sa silo na itinago ninda para sa sako, huli ta ika an sakuyang kuta.”—Salmo 31:2-4.
11. Ipaliwanag kun taano an kuta ni Jehova ta bakong temporaryong lugar.
11 Si Jehova nagtatao bako sana nin temporaryong pailihan kundi nin dai masasalakay na kuta na dian kita puwedeng mag-erok na may katiwasayan. An saiyang pagdirehir asin paggiya dai nagpasudya sa saiyang banwaan. An kapangyarihan nin Dios gigibohon na daing kamanungdanan an gabos na pakana ni Satanas asin kan saiyang mga kampon. (Efeso 6:10, 11) Mantang bilog na puso kitang nananarig ki Jehova, irarayo nia kita sa mga siod ni Satanas. (2 Pedro 2:9) Durante kan nakaaging apat na taon, an gibong paghuhulit kan mga Saksi ni Jehova nabuksan sa mga 35 nasyon. Siring man, sa mga lugar sa kinaban na kun saen an sosyal, ekonomiko, o politikal na mga kamugtakan nakaoolang sa paghuhulit kan maogmang bareta, may arog-karnerong mga tawo na nagbalyo sa mga lugar na duman sinda mas libreng makakaolay. An Hapon saro sa siring na lugar.
12. Paano an sarong payunir sa Hapon ginibo si Jehova na saiyang kuta?
12 Sa Hapon dakol an nagraralaog na bisitang trabahador hale sa ibang nasyon, asin dakol na kongregasyon sa ibang tataramon an tinindog. An eksperyensia nin sarong tugang sa sarong kongregasyon na Hapon naglaladawan kun gurano kamabunga an langtad na ini nin ibang tataramon. Binoot niang maglingkod kun saen mas dakula an pangangaipo. Alagad duman sainda may kinokonduktahan na siang sampulong pag-adal sa Biblia. An saro sa saiyang mga katood pasobang nagsabi: “Kun maduman ka sa lugar na mas dakula an pangangaipo, 20 pag-adal sa Biblia an kokonduktahan mo duman!” Nakaresibi sia nin asignasyon asin nagpa-Hiroshima. Pero, pakalihis nin apat na bulan, saro pa sana an saiyang inaadalan sa Biblia. Sarong aldaw sinongko nia an sarong lalaking taga-Brazil na Portugues sana an tataramon. Huling an tugang dai makapakipag-olay sa lalaking idto, buminakal sia nin libro dapit sa Portugues. Pakanood nin pirang simpleng tataramon sa pakipag-olay, dinalaw nia liwat an lalaki. Kan taratarahon sia kan tugang sa tataramon na Portugues, napangalas an lalaki asin, may paghuyom, binuksan an pinto asin pinadagos sia. Naponan an pag-adal sa Biblia. Dai nahaloy an tugang nagkokondukta na nin 22 na pag-adal, 14 sa Portugues, 6 sa Kastila, asin 2 sa Hapon!
Paghuhulit na May Kapanarigan
13. Taano ta mayo nin siisay man na maninigong magprobar na sopogon kita tanganing maglingkod ki Jehova?
13 An banwaan ni Jehova may kapanarigan na inaawit an awit sa Kahadean na igwang lubos na pagtubod na si Jehova an saindang pailihan. (Salmo 31:14) Sinda dai mapapasopog—dai sinda ipahahamak ni Jehova, huli ta ootobon nia an saiyang tataramon. (Salmo 31:17) An Diablo asin an saiyang makademonyong mga parasuportar mapapasopog. Mantang an banwaan ni Jehova sinugo na maghulit nin mensahe na mayong dapat ikasopog, dai sinda puwedeng sopogon nin ibang tawo tanganing maghulit. Bako iyan an paagi ni Jehova, o kan saiyang Aki, sa pagdagka sa mga tawo na sambahon Sia. Kun an puso nin mga tawo pano nin pagtubod asin apresasyon sa karahayan asin mamomoton na kabootan ni Jehova, an marahay na kamugtakan kan saindang puso an magpapahiro sa saindang ngoso na magtaram. (Lucas 6:45) Kun siring, an ano man na oras na ginagamit niato sa paglilingkod kada bulan, nangorogna kun an oras na iyan iyo an satong pinakamakakaya, iyan marahay, bakong makasosopog. Bako daw na lubos na inapresyar ni Jesus asin kan saiyang Ama an duwang marabilis kan balo?—Lucas 21:1-4.
14. Ano an ikakokomento nindo manongod sa pagpapayunir? (Helingon man an tsart.)
14 Para sa nagdadakol na bilang nin mga parahayag, an pagigin bilog na kalag sa saindang pagsamba kabale an paglilingkod bilang mga payunir—890,231 an peak kan nakaaging taon! Kun an pag-oswag sa nakaaging taon magpapadagos, an bilang na ini posibleng lumabi sa 1,000,000. An minasunod na eksperyensia nagpapaheling kun paano an sarong tugang na babae sa Nigeria nagpayunir. Nagsurat sia: “Kan magraduwar na ako sa sekondaryong eskuwelahan, nagtabang ako sa pagluto para sa mga nag-aatender sa paadalan sa payunir kan mga Saksi ni Jehova. Nakabisto ko duman an duwang tugang na babae na matua pa sa sakong lola. Kan maaraman ko na sinda mga payunir na nag-aatender sa paadalan, pinag-isip-isip ko, ‘Kun an duwang idto kayang magpayunir, taano ako ta dai?’ Kaya pakatapos ko nin pag-eskuwela, nagregular payunir man ako.”
15. Sa anong paagi an impormal na pagpapatotoo magbubukas kan dalan para sa iba na magpaili ki Jehova?
15 Bakong gabos puwedeng magpayunir, pero puwede sindang magpatotoo. Sa Belgium an sarong 82 anyos na tugang na babae nagbakal nin karne. Narisa nia na an agom kan parabuno napupurisaw na marhay sa dai pa sana nahahaloy na kariribokan sa politika. Kaya an tugang na babae isinaliot sa kuwarta an tract na What Do Jehovah’s Witnesses Believe? kan magbayad sia. Pagbuwelta kan tugang sa tindahan, an agom kan parabuno, na mayo man lamang nin pagduwaduwa, naghapot kun ano an sinasabi kan Biblia dapit sa sarong posibleng ikatolong guerra mundial. Dinarahan sia kan tugang nin librong True Peace and Security—How Can You Find It? Pakalihis nin pirang aldaw, kan palaog sa tindahan an gurang nang tugang, an agom kan parabuno igwa pang mga hapot sa saiya. An tugang nakamate nin simpatiya sa babaeng ini; an magigibo sana nia alokan sia nin pag-adal sa Biblia, asin inako ini. Ngonyan, an agom kan parabuno gusto nang magpabautismo. Kumusta an parabuno? Saiyang binasa an tract asin ngonyan nag-aadal na man sa Biblia.
‘Kayamanan na Karahayan’
16. Paano si Jehova nagtagama nin kayamanan na karahayan para sa saiyang banwaan?
16 Durante kaining nagtatao nin tension na huring mga aldaw, dai daw si Jehova ‘nagtao nin makangangalas na mamomoton na kabootan’ sa mga nagpaili sa saiya? Siring sa sarong mamomoton, mapagprotehir na ama, si Jehova nagtagama nin kayamanan na karahayan para sa saiyang daganon na mga aki. Pinaoranan nia sinda nin kaogmahan sa atubangan nin gabos na paramasid, arog nanggad kan sabi kan salmista: “Kanigoan kadakula kan saimong karahayan, na saimong iningatan para sa mga natatakot sa saimo! Na itinao mo sa mga nagpapaili sa saimo, sa atubangan kan mga aki nin tawo.”—Salmo 31:19, 21.
17-19. Sa Ghana, anong karahayan an ibinunga kan pagpalegalisar nin sarong gurang na lalaki sa saiyang pag-agom?
17 Kun siring, an kinabanon na mga tawo nakaheheling kan pagkasadiosan kan mga nagsasamba ki Jehova, asin napapahanga sinda. Halimbawa, sa Ghana an sarong 96 anyos na lalaki nagduman sa opisina kan pararehistro nin kasal asin naghagad na irehistro na ngonyan an saiyang 70 taon na pakikisaro. Nabigla an opisyal sa pagkasal asin naghapot: “Segurado mo daw na iyan an gusto mong gibohon? Sa edad mong iyan?”
18 Nagpaliwanag an lalaki: “Boot kong magin saro sa mga Saksi ni Jehova asin makikabtang sa pinakaimportanteng gibohon bago an katapusan kan kinaban—an gibong paghuhulit kan maogmang bareta kan Kahadean nin Dios. An gibohon na ini minagiya sa buhay na daing katapusan. An mga Saksi ni Jehova kinukuyog an ley sibil, kabale na an ley dapit sa pagparehistro nin kasal. Kaya tabi man na gibohon mo an pagrehistro para sa sakuya.” Dai nakagirong an opisyal. Inasikaso nia an pagrehistro, asin an gurang huminaleng maogma ta legal na ngonyan an saiyang pag-agom.—Ikomparar an Roma 12:2.
19 Pakatapos kaidto, an pararehistro nin kasal pinagparahorophorop an mga bagay na saiyang nadangog. “Mga Saksi ni Jehova . . . an pinakaimportanteng gibohon . . . an katapusan kan kinaban . . . Kahadean nin Dios . . . buhay na daing katapusan.” Nagpaparaisip kun ano an kahulogan kaini gabos sa buhay nin sarong 96 anyos na lalaki, nagdesisyon siang hanapon an mga Saksi tanganing orog pang siyasaton an bagay. Nag-ako sia nin pag-adal sa Biblia asin marikas na nag-oswag. Ngonyan, ining pararehistro nin kasal saro nang bautisadong Saksi. Kaya, kun kinukuyog niato si Jehova dawa sa tibaad ibinibilang nin iba na saradit na bagay, puwedeng magbunga iyan nin dai masabing karahayan para sa sato asin duman sa mga nakamamasid kan satong gawe.—Ikomparar an 1 Pedro 2:12.
20. Sa Myanmar, paano an pagkasadiosan nin sarong hoben na tugang na babae nagbunga nin marahay na patotoo?
20 An mga gurang na tinogotan an katotoohan na moldehon sinda na magin sadiosan na mga tawo nagtatao nin marahay na halimbawa sa mga hobenes sa bakong sadiosan na kinaban na ini. Sa Myanmar nag-iistar an saro sa siring na hoben na tugang na babae. Hale sia sa sarong pobre asin hamak na pamilya na may sampulong aki. An ama, na sarong pensionado, regular payunir. Sarong aldaw sa eskuwelahan, an tugang nakaporot nin sarong singsing na brilyante, na dinara tolos nia sa saiyang maestra. Pagpoon kan klase pagkaaga, sinabi kan maestra sa mga eskuwela kun paano an singsing nakua asin itinao tanganing iuli sa kagsadiri. Dangan pinatindog nia an hoben na tugang sa atubangan kan gabos na eskuwela asin pinapagpaliwanag kun taano ta ginibo nia ini, mantang aram nia na an ibang aki tibaad itago na sana iyan. An tugang na babae nagpaliwanag na saro siang Saksi ni Jehova asin na an saiyang Dios habo nin paghabon o ano man na klase nin daya. Nabaretaan iyan kan bilog na eskuwelahan, na nagtao nin marahay na oportunidad sa satong hoben na tugang na makapagpatotoo sa mga maestra asin sa mga estudyante man.
21. Mantang an mga hobenes nananarig ki Jehova, paano an saindang gawe nagtatao nin kaomawan sa saiya?
21 Sa Belgium an sarong maestro interesanteng nagkomento sa klase manongod sa mga Saksi ni Jehova. Namasdan nia an gawe kan saro sa saiyang mga estudyante, na saro man na hoben na tugang na babae, asin nagsabi: “Igwa ako ngonyan nin ibang opinyon mapadapit sa mga Saksi ni Jehova. An daing binabasaran na paghona naggiya sako na isipon na magigin sinda an pinakabakong mapagpahunod na mga tawo. Sinda palan an pinakamapagpahunod, minsan ngani dai ikinokompromiso an saindang mga prinsipyo.” Kada taon may premyong itinatao an mga maestro sa saindang pinakamatibay na mga estudyante. Kabale dian an premyo para sa kurso sa etika. Sa magkasurunodan na tolong taon, an mga premyo para sa tolong pinakahalangkaw na grado itinao kan maestrong ini sa mga aki nin mga Saksi ni Jehova. Iyan an parateng nangyayari sa mga maimbod na nananarig ki Jehova.—Salmo 31:23.
22. Ano an mapangganang konklusyon sa Salmo 31, asin paano iyan nagtatabang sato durante kan huring mga aldaw kaining palakaw nin mga bagay?
22 An Salmo 31 nagtatanog na may mapangganang konklusyon: “Magin kamong mapuso, asin magin logod marigon an saindong puso, kamo gabos na naghahalat ki Jehova.” (Salmo 31:24) Kun siring, mantang napapaatubang kita sa huring mga aldaw kan maraot na palakaw ni Satanas, imbes na bayaan kita, si Jehova maraning marhay sa sato asin ibubugtak sa sato an saiyang kapangyarihan. Si Jehova maimbod asin dai nasusudya. Sia an satong pailihan; sia an satuyang torre.—Talinhaga 18:10.
Nagigirumdoman daw Nindo?
◻ Taano ta may kapanarigan niatong magigibo si Jehova na satong pailihan?
◻ Ano an ebidensia na an sarong makosog na koro nag-aawit nin pag-omaw sa Kahadean na may kapusoan?
◻ Taano ta makapananarig kita na an silo ni Satanas dai makasisiod sa banwaan ni Jehova?
◻ Anong kayamanan an itinagama ni Jehova para sa mga nagpapaili sa saiya?
[Tsart sa pahina 12-15]
REPORT KAN 1993 TAON NIN PAGLILINGKOD KAN MGA SAKSI NI JEHOVA SA BILOG NA KINABAN
(Hilingon an publikasyon)
[Mga ritrato sa pahina 16, 17]
An mga nagpapaili ki Jehova binibilog an makosog na koro nin mga parabalangibog kan Kahadean—4,709,889 gabos!
1. Senegal
2. Brazil
3. Chile
4. Bolivia