Mga Saksi ni Jehova sa Bilog na Kinaban—An Republika nin Pilipinas
AN 7,083 na mabukid na tropikong mga isla na minabilog sa Republika nin Pilipinas iyo an kalangkawan nin sarong nakalunod an kabanga na palabang bukid.a Asin an 62,000,000 na nag-iistar sa Pilipinas nawiwili na mag-orolay manongod sa haros ano man na tema. An espiritung ini nin pagigin pasil kaolayon nagreresulta sa mabungang langtad para sa pagpapatotoo sa Kahadean.
Pagpapatotoo sa Eskuwelahan
Sa isla nin Masbate, an sarong hoben na estudyante sa haiskul nakapatotoo sa saiyang maestra asin klase durante nin sarong tama o sala na eksaminasyon. Nagbareta sia:
“An mga tataramon iyo ini, ‘Kun namomotan ako nin Dios, dai nia ako tatawan nin mga problema o totogotan akong magsakit.’ Kan magtsek an sakong maestra kan samong mga papel, naheling nia na an gabos apuwera sa sako nagsimbag nin tama. Tinogotan ako kan sakong maestra na ipaliwanag sa klase kun taano ta nagsimbag ako nin sala. Sinabi ko na bako an Dios an nagtatao sa sato nin mga problema, minsan ngani tinotogotan nia an mga kasakitan asin itinotogot kitang baloon. Ginagamit an sakong Biblia, na permi kong dinadara sa eskuwelahan, nangatanosan ako sa klase manongod sa mga tataramon sa 1 Juan 4:8, ‘An Dios pagkamoot.’ Pakapaliwanag ko, nakombensir an sakong maestra, tinaptap an saiyang lamesa, asin nagsabi: ‘Tama si Marilou.’ Ako sana an nakakua kan tamang simbag sa hapot na ini asin nag-ako kan pinakahalangkaw na grado.”
An Mensahe kan Kahadean Nasa Gabos na Lugar
Mantang nagmiministeryo sa harong-harong sa saro pang parte kan Pilipinas, nakamidbid nin sarong regular payunir (bilog na panahon na parabalangibog kan maogmang bareta) an ina nin tolong saradit na aki. Nagpaheling an misis nin dakulang interes sa mensahe nin Kahadean, asin pinagin pasil kaini na maponan sia nin pag-adal sa Biblia. Minsan ngani an saiyang agom dai naogma na sia nag-aako nin mga leksion sa Biblia, nangorogna gikan sa mga Saksi ni Jehova, nagpadagos an pag-adal.
Ibinalyo kan lalaki an saiyang pamilya sa ibang siudad, na hinohona na popondohon kaini an pakikiasosyar kan saiyang agom sa mga Saksi. Alagad dai naghaloy, nanompongan ninda an misis na ini, asin ipinagpadagos nia an saiyang pag-adal sa Biblia. Sabihon pa, talagang naanggot an saiyang agom. Dara-dara nia an saiyang kaanggotan sagkod sa saiyang trabaho, kun saen ilinuwas nia an saiyang mga saboot sa sarong parokyano na an sasakyan saiyang hinihirahay. Dai aram kan lalaki na an parokyanong ini saro sa mga Saksi ni Jehova.
Ipinaliwanag kan Saksi na magigin kapakipakinabang nanggad para sa bilog na pamilya kun magpapadagos an saiyang agom sa saiyang mga leksion sa Biblia. Puwede niang ponan na iaplikar an mga prinsipyo sa Biblia sa harong mismo. Isinuherir man na mismong an agom na lalaki puwedeng makinabang paagi sa pakanood manongod sa Kahadean nin Dios.
Ano an ibinunga kan pag-orolay na ini? Nagkaigwa nin orog na katalingkasan an agom kan lalaki na mag-adal sa Biblia, asin nagdesisyon an lalaki na ibalik an saiyang pamilya sa saindang dating harong. Duman nag-oswag sa espirituwal an misis sagkod sa punto na nagin dai pa bautisadong parahayag kan Kahadean. Nag-ako man an saiyang agom nin pag-adal sa Biblia, asin an bilog na pamilya nagpoon na umatender sa Kristianong mga pagtiripon.
[Nota sa Ibaba]
a Para sa dugang na impormasyon, helingon an 1994 Calendar of Jehovah’s Witnesses.
[Kahon sa pahina 8]
SUMARYO KAN NASYON
1993 na Taon nin Paglilingkod
PINAKAHALANGKAW NA BILANG NIN NAGPAPATOTOO: 116,576
KATIMBANG: 1 Saksi sa 549
NAG-ATENDER SA MEMORIAL: 357,388
PROMEDYONG MGA PARAHAYAG NA PAYUNIR: 22,705
PROMEDYONG MGA PAG-ADAL SA BIBLIA: 94,370
BILANG NIN NABAUTISMOHAN: 7,559
BILANG NIN MGA KONGREGASYON: 3,332
SANGANG OPISINA: MANILA
[Ritrato sa pahina 9]
An pagpapatotoo sa sadan nagdadara nin marahay na mga resulta
[Ritrato sa pahina 9]
Sangang opisina kan Watchtower Society sa Manila