Mga Saksi ni Jehova sa Bilog na Kinaban—An Bahamas
AN Republika nin Bahamas—sarong puro nin 3,000 na darakula asin saradit na isla—garo kuwintas na korales sa 900 kilometros na kolor turkesang dagat sa pag-oltanan kan Florida asin Cuba. Sa 267,000 na nag-eerok dian igwa nin nagkokosog na koro nin mga parabalangibog kan Kahadean. An saindang awit nin pag-omaw nagpapagirumdom kan Isaias 42:10-12: “Awit kamo ki Jehova nin bagong awit, nin saiyang kaomawan magpoon sa kaporoporohi kan daga, kamo na mga nagdadalhog sa dagat asin sa nakapapano dian, kamong mga isla asin kamong mga nag-eerok dian. . . . Poon sa kaitaasan kan mga bukid kumurahaw nin makosog an banwaan. Iatribuwir ninda ki Jehova an kamurawayan, asin sa mga isla magtaram sinda pati kan saiyang kaomawan.”
Inangat an Bagong Pagtubod
Kan Hulyo 1992, an sarong regular payunir (pambilog na panahon na parahulit kan Kahadean) nakapasakamot sa sarong amigo sa negosyo kan pantabang sa pag-adal sa Biblia na Puwede Kamong Mabuhay Sagkod Lamang sa Paraiso Digdi sa Daga. Pakabasa kan lalaki kan libro, sinabi nia sa sadiri, ‘An relihiyon na ini bagay na kaipuhan kong siyasaton.’ Sa suminunod na duwang Domingo, nag-atender sia nin mga pagtiripon sa duwang magkalaen na Kingdom Hall kan mga Saksi ni Jehova. Sunod, naponan saiya an pag-adal sa Biblia. Alagad, anom pa sanang semana pakapoon kan saiyang mga leksion sa Biblia, luminataw an angat na mabalo kan saiyang bagong pagtubod—an mga kompleanyo.
An pamilya kan negosyante mahilig na gayo sa siring na mga selebrasyon, pero an pagkamoot nia para sa Tataramon nin Dios dinagka sia na magpadagos sa saiyang mga leksion sa Biblia. Mantang an kaaraman nia sa Makakasuratan na katotoohan nagtatalubo, iyo man an saiyang pakasabot manongod sa mga kompleanyo asin kinabanon na mga kapiyestahan patin sa punto-de-vista ni Jehova sa mga ini.
Kan an agom kan lalaking ini mag-organisar nin sarong pagtiripontipon para sa Aldaw ni Tatay, magalang siang nagsayuma na umatender. Pero an paghona kan agom na babae dai na sia namomotan kan lalaki asin ineenot kaini an saiyang relihiyon kisa sa saiya asin sa pamilya. Maboot na ipinaliwanag kan lalaki na an pag-aplikar kan saiyang nanonodan gikan sa Biblia nakatatabang na bagohon sia na magin mas marahay na agom na lalaki asin ama. Sa katapustapusi, nagtalubo an apresasyon kan babae sa pagkamoot kan lalaki sa Makakasuratan na katotoohan asin uminoyon na mag-adal sa Biblia. Ngonyan nagkokondukta na an lalaki nin pag-adal sa Biblia sa saiyang pamilya. Asin kanigoan an kagayagayahan nia sa “Banal na Pagtotokdo” na Pandistritong Kombension kaining nakaaging taon! An saiyang agom asin aking babae presente asin naheling siang binautismohan.
An mga Dayo Naghihinanyog kan Bagong Awit
Rinibong dayong taga-Haiti an nakikisalak sa sosyedad kan Bahamas. Kaipuhan man nindang madangog an bagong awit kan katotoohan nin Kahadean. An mga Saksi na nag-iistar sa Bahamas nagpapasalamat na duwang mag-agom na Amerikanong taga-Haiti an uminabot. An mga indibiduwal na ini nakatabang na pakosogon an bago pa sanang mabilog na mga grupong taga-Haiti sa mga isla nin Grand Bahama asin Abaco.
Bilang dugang pang tabang sa mga taga-Haiti na interesado sa mensahe kan Kahadean, an kaenot-enote na pandistritong kombension sa lenguaheng Creole sa Bahamas ginibo kan Hulyo 31 sagkod Agosto 1, 1993. Uminabot sa 214 an nag-atender, na may tolong bagohan na binautismohan. An dakol na taga-Haiti na nakanood kan katotoohan sa Bahamas poon kaidto puminuli na sa saindang sadiring isla o buminalyo sa ibang lugar tanganing idugang an saindang tingog sa lokal na mga Saksi sa pag-awit nin pag-omaw ki Jehova.
[Kahon sa pahina 8]
SUMARYO KAN NASYON
1993 na Taon nin Paglilingkoda
PINAKAHALANGKAW NA BILANG NIN NAGPAPATOTOO: 1,294
KATIMBANG: 1 Saksi sa 197
NAG-ATENDER SA MEMORIAL: 3,794
PROMEDYONG MGA PARAHAYAG NA PAYUNIR: 186
PROMEDYONG MGA PAG-ADAL SA BIBLIA: 1,715
BILANG NIN NABAUTISMOHAN: 79
BILANG NIN MGA KONGREGASYON: 22
SANGANG OPISINA: NASSAU
[Nota sa Ibaba]
a Para sa dugang na impormasyon, helingon an 1994 Calendar of Jehovah’s Witnesses.
[Ritrato sa pahina 9]
An enot na Kingdom Hall, kaiba an sangang opisina asin erokan kan misyonero
[Ritrato sa pahina 9]
An mga Saksi maigot na nagpapahayag kan maogmang bareta
[Ritrato sa pahina 9]
Si Milton G. Henschel asin si Nathan H. Knorr kaiba kan mga misyonero sa Nassau mga 45 taon na an nakaagi
[Ritrato sa pahina 9]
An bagong sangang opisina, na idinedikar kan Pebrero 8, 1992