Nagigirumdoman daw Nindo?

Naogma daw kamo sa pagbasa kan dai pa sana nahaloy na mga luwas kan The Watchtower asin An Torrengbantayan? Kun iyo, magigin interesante saindo na girumdomon an minasunod:

▫ Taano an mga espiyang Israelita ta piniling dumagos sa harong ni Rahab na patotot?

An mga espiyang Israelita namuhay oyon sa Pagboot nin Dios, kaya dai sinda nagdagos sa harong ni Rahab para sa inmoral na mga katuyohan. Tibaad nangatanosan sinda na an saindang presensia sa harong kan sarong patotot posibleng dai makapukaw nin pagsuspetsa sa siudad. Na an saiyang harong itinogdok sa may lanob kan siudad tibaad mas makapadali sa pagdulag. Pero orog sa gabos, giniyahan sinda ni Jehova sa sarong parakasala na an puso naapektaran sa marahay na paagi kan mga bareta manongod sa mga ginibo nin Dios sa mga Israelita kaya sia nagsolsol asin nagbakle sa saiyang mga dalan.​—w-E 12/15, pahina 24-5.

▫ Paano an kaanggotan nakaaapektar sa satong salud?

An mga pagsiyasat nagpapaheling na an kaanggotan nagpoprodusir nin mga hormona nin tension. An parateng pagkaanggot puwedeng magcausa nin pagkabakong balanse kan nagpoprotehir asin kan nakararaot na mga porma nin kolesterol, na isinasapeligro kita sa helang sa puso.​—w-BI 12/15, pahina 32.

▫ Anong mga suhestion an matabang sa sato na madagdagan an satong pagdistribuwir kan mga magasin na Torrengbantayan asin Awake!?

Magin mapaggirumdom sa Torrengbantayan asin Awake!; gibohon na simple an pag-atubang; magin madaling makibagay paagi sa pag-andam nin pirang haralipot na pag-atubang; magbugtak nin personal na pasohan.​—w-BI 1/1, pahina 24-5.

▫ Taano si Moises ta marahayon na teokratikong halimbawa na maninigo niatong arogon?

Hinagad ni Moises an paggiya ni Jehova manongod sa mga bagay. Mayo siang personal na mga ambisyon kundi nagmakolog dapit sa kamurawayan ni Jehova. Makosog an saiyang pagtubod, asin nungka niang liningawan na si Jehova an tunay na Poon kan nasyon nin Israel.​—w-BI 1/15, pahina 11.

▫ Ano an pirang paagi na nanggagana an banal na pagtotokdo?

Nanggagana an banal na pagtotokdo paagi sa pagtao sa banwaan ni Jehova nin progresibong pakasabot sa katotoohan. Dinadara kaiyan an mga tawo sa espirituwal na liwanag, asin ipinaheheling kaiyan sa mga mahoyo kun paano sasambahon an Dios “sa espiritu asin katotoohan.” (Juan 4:24) Nanggagana man an banal na pagtotokdo sa mga pagbalo asin sa maraot na kinaban.​—w-BI 2/1, pahina 10-12.

▫ Ano an liyabe sa mapangganang pagsadol?

An liyabe iyo an tamang paggalang sa sarong tawo asin sa saiyang diretso na trataron sa may dignidad na paagi. Kaya, an Kristianong parakonseho maninigong magin maboot asin marigon pero maninigong gubingan nin dignidad an sinasadol.​—w-BI 2/1, pahina 27.

▫ Paano inako kan Iglesya Katolika Romana an Asuncion ni Maria bilang sarong doktrina?

Kan enot na mga siglo pagkagadan ni Jesus, an ideya manongod sa Asuncion ni Maria sa langit biyong mayo sa kaisipan nin mga Kristiano. Alagad, pakatapos na an doktrina nin Trinidad magin opisyal na doktrina kan iglesya, tinawan si Maria nin nag-oorog na importanteng kabtang. An teoriya nin Asuncion dai inako bilang doktrina sagkod kan Nobyembre 1, 1950, kan ianunsiar ni Papa Pio XII: “Tinatawan mi iyan nin kahulogan na sarong doktrina na ipinahayag nin Dios.”​—Munificentissimus Deus.​—w-E 2/15, pahina 26-7.

▫ Sa Jeremias kapitulo 24, ano an irinirepresentar kan duwang basket nin higos, an marahay na mga higos asin an mga raot?

An marahay na mga higos nagrepresentar sa mga Judio na kan enot binihag sa Babilonya, na gikan dian an natatada mabalik sa Juda. An raot na mga higos nagladawan ki Hadeng Zedequias asin sa saiyang mga kaibanan na nagrebelde tumang ki Hadeng Nabucodonosor sa ibong kan panunumpa sa ngaran nin Dios. Kaagid kaiyan, naheheling ta sa modernong mga panahon an natatada sa espirituwal na Israel, na nagbunga nin mararahay sa saindang buhay, kabaliktaran sa klero nin Kakristianohan, na nagbunga nin mga raot.​—w-BI 3/1, pahina 14-16.

▫ Sairisay an mga Quartodecimanos, asin taano ta interesante sinda para sa mga Kristiano ngonyan?

Pakalihis kan panahon nin mga apostol, igwa nin mga nagselebrar kan Pamanggihan kan Kagurangnan sa Nisan 14 kada taon, na sinusunod an apostolikong arogan. Sinda namidbid bilang “Mga Gusto sa Ikakatorse,” o Quartodecimanos. Ini interesante ngonyan, huli ta ipinaheheling kaiyan na dawa pagkagadan kan mga apostol, igwa nin mga naggibo nin tamang paagi sa paggirumdom kan kagadanan ni Jesus sarong beses kada taon sa Nisan 14.​—w-BI 3/15, pahina 4-5.

▫ Siisay si William Whiston?

Sia madonong na iskolar kan ika-18 siglo sa Inglaterra, dayupot na kaiba ni Sir Isaac Newton. Trinadusir ni Whiston an Kristianong Griegong Kasuratan, hayag na kinontra an katokdoan kan doktrina nin Trinidad, asin nagin instruktor sa astronomiya asin matematika. Alagad posibleng nagigirumdoman na gayo si Whiston huli sa saiyang traduksion sa Ingles kan mga surat kan Judiong historyador na si Flavius Josephus.​—w-E 3/15, pahina 26-8.

▫ Paano an tawo linalang sa ladawan nin Dios? (Genesis 1:27)

Linalang an tawo na may abilidad na gumibo kan pangenot na mga kuwalidad nin Dios na pagkamoot, hustisya, kadonongan, asin kapangyarihan​—siring man nin iba pang kuwalidad.​—w-BI 4/1, pahina 25.