Determinadong Maglingkod ki Jehova!

“DAI ka maghulit!” “Dai mo pagpadalawon digdi an saimong mga kapagtubod!” Dakol na Kristiana an nakadadangog kaini asin nin kaparehong mga tataramon sa saindang nagkokontrang mga agom. Alagad kun an mga lalaking ini naglilingkod sa puwersa armada, an saindang mga agom napapaatubang sa espesyal na mga angat sa saindang pagtubod. (Isaias 2:4; Juan 17:16) Kun siring, paano daw nahihimo kan siring na Kristianang mga agom na magdanay na makosog sa espirituwal asin aktibo sa paglilingkod sa Kahadean?

An kaimbodan ki Jehova Dios kaiba an personal na determinasyon nakatatabang saindang makatagal. “Sa paghona ko iyan an sakong sadiring lubos na determinasyon,” an paliwanag ni Yvonne, agom nin sarong soldados. “Aram ko na siertong igwa nin mga paagi na ako dai maolang kan pagkontra kan sakong agom.” Totoo nanggad, igwa.

An saro pang Kristiana, na agom nin sarong opisyal sa armi, nagsaysay kun paano an saiyang determinadong paninindogan pinagin mas pasil pa ngani an buhay para sa saiyang agom. “Aram nia an sakong iskedyul siring man an saiya, asin inaapresyar iyan nin mga militar,” an paliwanag nia. Minsan siring, an saiyang padagos na paglilingkod ki Jehova bakong pasil na dalan.

Pakapanggana sa Kamondoan

An mga agom nin mga militar parateng napapaatubang sa angat na bumalyo sa pipira sanang aldaw na notisya kun boot nindang ibanan an saindang agom sa destino na harayo sa harong. Dangan, kun yaon na sa bakong pamilyar na mga palibot, madaling makamate na an saro nasosolo. Pero dai kaipuhan na magin arog kaini. An mga naglilingkod ki Jehova may bentaha. Ano iyan? Sono sa Kristianong apostol na si Pedro, iyan an “bilog na kasararoan nin mga tugang.” Ngonyan minilyon na an kabilangan, an mga Saksi ni Jehova sa 231 nasyon naghihiro bilang sarong dakulang Kristianong pamilya, sarong “asosasyon nin magturugang.” Manonompongan nindo sinda sa haros gabos na lugar.​—1 Pedro 2:​17, nota sa ibaba.

Si Susan, na biglang hinale sa saiyang sadiring lugar, uminabot tanganing umistar sa base kan aviacion militar na nadedestinohan kan saiyang agom. Bagohan sa pagtubod asin ginigipit kan saiyang daing pagtubod na agom na umontok sa pakikikabtang sa Kristianong ministeryo, isinaysay nia: “Tolos-tolos akong nagduman sa lokal na mga pagtiripon, asin duman nakataed asin nakaolay ko an ibang tugang na babae. Masasabi ko nin totoo na an asosasyon na ini an nakatabang sakong magpadagos.”

Kun beses an kamondoan nagkacausa nin depresyon. Minsan pa, an marahay na bareta nagtatao nin marahayon na karangahan. Si Glenys, sarong tugang na Ingles na inibanan an saiyang agom kan sia madestino sa ibang nasyon, nagsaysay: “Kan talagang mamondo ako, dai linalaoman, an saro na namidbid ko dakol nang taon an nakaagi kan ako mismo nasa armi pa nagsurat asin nagsabi na nabautismohan sia dai pa sana nahaloy bilang saro sa mga Saksi ni Jehova. Nakatao iyan sako nin pagpapakosog na tamang-tama sa panahon.”

Napatunayan ni Jane, na nagbiyahe kaiba kan saiyang agom pa-Kenya, na an Kristianong mga pagtiripon kaipuhan na marhay tanganing makapagpadagos, dawa ngani ginigibo sa mga lenguahe na dai nia nasasabotan. “Aram ko na digdi ako boot ni Jehova,” an paliwanag nia. “Kaiba ako kan sakong mga tugang, asin sinda garo bolong na nakapakokosog. Inako ninda ako, asin pagmate ko kami sarong pamilya.”

Si Jane saro sana sa dakol na nasa mga kamugtakan na ini na nakanompong nin espirituwal na mga paryentes na dai ngani nia aram na igwa sia!​—Marcos 10:​29, 30.

Marigon sa Atubangan nin Paglamag

“Dai kamo mag-isip na ako napadigdi sa pagdara nin katoninongan sa daga,” nagpatanid si Jesus. “Ako napadigdi sa pagdara, bakong nin katoninongan, kundi nin minasbad.” (Mateo 10:34) Ano an boot niang sabihon? Dawa sa laog nin sarong pamilya, kun saen malalaoman an katoninongan, tibaad magkaigwa nin “bigla na sanang pagpatama nin minasbad,” nagkomento si A. T. Robertson sa Word Pictures in the New Testament. “Sa katotoohan,” sinabi ni Jesus, “an magigin mga kaiwal nin saro iyo mismo an mga nasa laog kan saiyang pamilya.” (Mateo 10:36) Kanigoan katotoo kan mga tataramon na ini kun an agom naoongis sa katotoohan!

Kan si Diane nagpoon na mag-adal sa Biblia kaiba kan mga Saksi ni Jehova, an saiyang agom, na opisyal kan aviacion militar, naanggot na gayo. Ano an nagin epekto kaini sa saindang pag-agoman? “Idto garo sarong blokeng yelo na yaon sa pag-oltanan niamo,” an paliwanag ni Diane. “Dati maogma an samong pag-agoman. Sa panale nag-eeksister na sana kami sa sarong harong.” Kun siring, paano sia nakapanggana? “An personal na kombiksion asin determinasyon iyo an mahalaga, kabale na an tabang gikan ki Jehova asin an saiyang espiritu.” Isinapuso ni Diane an halimbawa sa Biblia kan propetang si Daniel.

Kan desterrado sa Babilonya asin inalok nin kakanon na dai inaako kan sarong lingkod nin Dios, “itinanom [ni Daniel] sa saiyang puso na dai nia didigtaan an saiyang sadiri kan mga kakanon kan hade.” Iyo, may pakaaram na nagdesisyon si Daniel. Nagdesisyon sia sa saiyang puso na nungkang digtaan an saiyang sadiri paagi sa pagkakan kaiyan. Kanigoan na sarig nin boot an ipinaheling nia kaidto mantang “danay siang nakikimaherak sa pangenot na opisyal sa korte tanganing dai madigtaan an saiyang sadiri”! An resulta? Binendisyonan ni Jehova an saiyang determinadong paninindogan.​—Daniel 1:​8, 9, 17.

Siring man ngonyan an nagkokontrang agom na lalaki tibaad hagadon na an saiyang agom umontok sa pag-atender sa mga pagtiripon kan kongregasyon. Ano an maninigong magin reaksion nia? Nanompongan ni Jane an saiyang sadiri sa situwasyon na ini. Nagpaliwanag sia: “Nungka akong minasuko sa irarom nin pangigipit. Aram kong dai ako puwedeng makikompromiso. Kaipuhan kong ipaheling kun gurano kahalaga sa sako kan mga pagtiripon.” Binendisyonan ni Jehova an saiyang desisyon mantang padagos siang nag-aatender.

“Pinagmaigotan kan sakong agom na olangon ako sa pagduman sa mga pagtiripon, pero dai iyan naghaloy na gayo,” nagsaysay si Glenys. “Nagduduman pa man giraray ako. Sa pagpuli ko, kun beses binubugbog nia ako, asin sa ibang panahon dai ako ginigirong.” Alagad, nakapanggana sia, na paorootrong namimibi. Siring man, an duwa sa mga magurang kan kongregasyon regular na namimibi kaiba nia, na nakapakosog na gayo saiya na padagos na mag-atender.​—Santiago 5:​13-15; 1 Pedro 2:23.

Kun beses an mga mas halangkaw an ranggo sa agom na lalaki tibaad piriton sia na paluyahon an boot kan saiyang agom sa paghuhulit kan maogmang bareta. Naheling ni Diane na kaipuhan niang liwanagon sa saiyang agom kun ano an saiyang mga pinahahalagahan. “Andam ako,” sabi nia, “na akoon an mga ibubunga kan sakong padagos na paghuhulit.” Arog nanggad ini kan paninindogan kan mga apostol! (Gibo 4:​29, 31) Minsan siring, maingat sia sa saiyang paghuhulit. Nagsaysay sia: “Dati akong nangingimbitar para magkape asin inaalok ko an gabos na presente kan librong Katotoohan.”​—Mateo 10:16; 24:​14.

Pagpasakop na Daing Pakikompromiso

Minsan ngani nasasakitan sa tension nin mag-agom, an Kristianang mga agom naglalaom sa ngapit asin nagsasarig ki Jehova. Tinatabangan sinda kaini na mapagdanay an timbang na pagmansay. Itinatao ninda sa saindang agom an ano man na pagsuportar na kaya ninda na dai ikinokompromiso an saindang pagtubod. Sa paggibo kaiyan, sinusunod ninda an ipinasabong na sadol ni Pedro: “Kamong mga agom na babae, magpasakop kamo sa saindong agom.” (1 Pedro 3:1) Sa The Amplified New Testament, arog kaini an pagkasabi kan apostolikong instruksion na ini: “Ipasakop an saindong sadiri bilang ikaduwa sa asin nagdedepende sainda, asin makibagay kamo sa sainda.” Mangnoha kun paano kinuyog ni Jane an sadol na ini. “Sinabihan ako kan sakong agom na an sakong boot na gibohon dai maninigong makaolang sa saiyang karera,” an paliwanag nia. “Kaya pinagmaigotan kong humanap nin mga paagi na puwede ko siang tabangan.”

Kaya may Kristianang mga agom na uminoyon na umatender sa sosyal na mga katiriponan na dian naimbitaran an saindang agom. Pero nagdesisyon pa man giraray sinda na nungkang ikompromiso an saindang pagtubod. Guminamit si Jane nin panahon na ipakipag-olay sa saiyang agom an dapit kaini. Maboot niang ipinaliwanag na andam siang umatender pero habo nia na an saiyang presensia makapasopog sa lalaki. “Aram ko na paminsanminsan an gabos na presente linalaoman na tumindog asin makikabtang sa pagtagay. Nanodan ko na an kaimbodan angay sanang itao ki Jehova, asin an pagtagay orog pa sa pagpaheling sana nin paggalang. Narealisar kan sakong agom na magigin nanggad alanganon an situwasyon, kaya sinabi na sana nia: ‘Dai ka na mag-iba!’ Nagkuyog ako.”

Sa ibong na kampi, uminiba si Glenys sa saiyang agom sa siring na katiriponan, alagad minasdan nia an mga opisyal sa kabesera kan lamesa. Kan maheling nia sindang nag-aandam para sa pagtagay, may kadonongan siang huminale paduman sa kasilyas! Iyo, an mga babaeng ini nakibagay pero nungkang nakikompromiso.

“Madara Minsan Daing Tataramon”

“Kun paooswagon ko an sakong sadiring abilidad bilang agom na babae, maheheling kan sakong agom na binabago ako kan katotoohan,” nangatanosan si Yvonne. Kaya paorootro niang binasa an kapitulo sa librong Family Life na may temang “A Wife Who Is Dearly Loved.”a “Tinawan ko nin partikular na atension an materyal sa irarom kan subtemang ‘The Weepers, the Naggers’! Pero naheling ko na mantang orog kong pinagmamaigotan na makipag-olay sa sakong agom, nagigin mas maraot an mga bagay.” Alagad, sa katapustapusi, natabangan nia an saiyang agom na maglingkod ki Jehova. Paano? Paagi sa pag-aplikar kan prinsipyo na itinao sa 1 Pedro 3:​1, na an mga agom na lalaki tibaad “madara minsan daing tataramon.”

An paagi nin pag-asikaso kan Kristianang mga agom sa saindang pamilya dakula an nagigibo tanganing ikarekomendar an Kristianismo sa iba. “Pinagmaigotan kong gibohon an katotoohan na kaakit-akit sagkod na mapupuwede,” nagsaysay si Diane. “Kun minaduman ako sa mga pagtiripon, namamatean kan sakong agom na sia nagsosolo na, kaya sinisierto ko na tawan nin instruksion an mga aki na nangorognang magin pormal na marhay pag-abot mi sa harong. Pinagmamaigotan ko man na tawan sia nin ekstrang atension pagbalik niamo.” Luway-luway na naliwat an kaisipan kan saiyang agom mantang sia napahihiro kan maboot na atension kan saiyang pamilya.

An mga kapwa lingkod ni Jehova makatatabang man. Iinestorya ni Jane na an saiyang agom naogma sa pakikiiba kan mga misyonerong Saksi na namidbid kaini sa Kenya. “Nakiamigo sinda saiya asin nag-orolay dapit sa putbol, asin mapagpasakat nanggad sinda. Sa nagkapirang okasyon, inimbitaran kami sa laen-laen na erokan nin misyonero para sa mga pagkakan.” Sa huri ipinaliwanag kan saiyang agom: “Nagpoon akong helingon an pagtubod ni Jane sa biyong laen na punto-de-vista. An saiyang mga katood intelihenteng gayo na kayang makipag-olay manongod sa manlaenlaen na tema.” Sa kaagid na paagi, naliwat kan agom ni Diane an punto-de-vista nia sa katotoohan. Kan maraot an minamaneho niang kotse, sinukorohan sia nin sarong hoben na Saksi. “Talagang hinangaan ko iyan,” sabi nia.

Siyempre, bakong gabos na agom napapasa katotoohan. Ano na? Nagtatao si Jehova nin tabang tanganing papangyarihon na makatagal an mga maimbod. (1 Corinto 10:13) Horophoropa an pagpakosog ni Glenys para sa mga an kamugtakan kapareho nia: “Nungka, nungkang magduwaduwa na si Jehova an Saro na nagpundar kan pag-aragoman asin na boot niang an mag-aragom magdanay na magkaibanan. Kaya ano man an tibaad gibohon kan agom na lalaki o ano man na pagtumang an tibaad akoon nindo sa mga nasa palibot nindo, nungka kamong totogotan ni Jehova na matanyog.” Minsan ngani an saiyang agom dai pa nagsasamba ki Jehova, kuminalma na an kaisipan kaini sa saiya asin sa katotoohan.

‘Magtanom na May Luha; Mag-ani na May Kagayagayahan’

Tunay nanggad, an mga Kristianang ini determinadong maglingkod ki Jehova. Kun kamo nasa kaagid na mga kamugtakan, gibohon ining desisyon man nindo. Girumdoma an pagpakosog: “Ki Jehova na saimong Dios maninigo kang matakot. Sa saiya maninigo kang maglingkod, asin sa saiya maninigo kang magdanay.”​—Deuteronomio 10:20.

“An minalakaw, na nagtatangis, dara an supot nin mga banhi, sierto na mabalik na may maogmang kurahaw, na dara an saiyang mga goygoy,” an ipinahayag kan salmista. (Salmo 126:6) “Talagang kadakoldakol kan ihihibi mo mantang pinagmamaigotan mong ipaheling sa saimong agom an katotoohan, magsalang sa toninong o sa berbal na paagi,” an pag-ako kan sarong Saksi. “Alagad sa huri magayagaya kang makurahaw huli ta dawa sia dai nag-aako kan katotoohan, binibendisyonan ka ni Jehova sa paghihingoa na ginigibo mo.”

An gabos na maimbod na naglilingkod ki Jehova sa ibong nin pagtumang sa harong nagkakamit nin tunay na komendasyon. Angay sindang tawan nin pagsuportar asin pagkamoot. Mapagdanay logod ninda an saindang daing pakikompromisong paninindogan, na determinadong maglingkod ki Jehova!

[Nota sa Ibaba]

[Ritrato sa pahina 28]

An mapagngayongayong pag-adal nagpaparigon sa Kristianong determinasyon