An mga Parabalangibog kan Kahadean Aktibo sa Bilog na Daga
“Kamo magigin mga saksi ko . . . sagkod sa kaporoporohi nin daga.”—GIBO 1:8.
1. Anong mensahe an isinabi ni Jesus na ibabalangibog kan saiyang mga parasunod sa satong kaaldawan?
KAN ilinaladawan an gibohon na isinugo ni Jehova sa saiyang Aki digdi sa daga na otobon, si Jesus nagsabi: “Kaipuhan na ipahayag ko . . . an maogmang bareta kan kahadean nin Dios.” (Lucas 4:43) Kaagid kaiyan, kan isinasaysay an dapit sa gibohon na ootobon kan saiyang mga disipulo digdi sa daga pagbalik nia na may makahadeng autoridad, si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
2. (a) Taano ta mahalagang marhay na an mensahe kan Kahadean matawan nin mahiwas na publisidad? (b) Anong hapot an maninigong ihapot niato gabos sa satong sadiri?
2 Taano an bareta manongod sa Kahadean nin Dios ta mahalagang marhay? Taano an Kahadean ta naghahagad nin siring kahiwas na publisidad? Huli ta an Mesiyanikong Kahadean an mabindikar sa unibersal na pagkasoberano ni Jehova. (1 Corinto 15:24-28) Paagi kaiyan, si Jehova magibo nin paghokom tumang sa presenteng satanikong palakaw nin mga bagay asin ootobon an saiyang panuga na bendisyonan an gabos na pamilya sa daga. (Genesis 22:17, 18; Daniel 2:44) Paagi sa pagpatao nin patotoo manongod sa Kahadean, nanompongan ni Jehova idtong pakatapos kaiyan saiyang linahidan na magin kairibang paramana kan saiyang Aki. Paagi sa pagbalangibog kan Kahadean, may pagbubulagbulag na ginigibo man ngonyan. (Mateo 25:31-33) Boot ni Jehova na an mga tawo sa gabos na nasyon makaisi manongod sa saiyang katuyohan. Gusto niang kamtan ninda an oportunidad na pilion an buhay bilang mga sakop kan saiyang Kahadean. (Juan 3:16; Gibo 13:47) Igwa daw kamong lubos na pakikikabtang sa pagbalangibog kan Kahadean na ini?
Paghalat sa Katapusan kan mga Panahon nin mga Hentil
3. (a) Angay nanggad, ano an temang itinampok ni C. T. Russell sa enot na pagbiyahe sa pag-organisar nin mga grupo para sa pag-adal sa Biblia? (b) Ano an narealisar kan enot na mga Estudyante sa Biblia manongod sa maninigong magin kamugtakan kan Kahadean nin Dios sa saindang buhay?
3 Kaidtong 1880, si Charles Taze Russell, an enot na editor kan magasin na Watch Tower, nagbiyahe sa norteng-sirangan kan Estados Unidos tanganing dagkahon an pagporma nin mga grupo para sa pag-adal sa Biblia. Angay nanggad, an tema kan saiyang pahayag “Mga Bagay Manongod sa Kahadean nin Dios.” Siring kan ipinaheling sa enot na mga luwas kan Watch Tower, narealisar kan mga Estudyante sa Biblia (an apod kaidto sa mga Saksi ni Jehova) na kun gusto nindang patunayan na angay sindang magkaigwa nin kabtang sa Kahadean nin Dios, dapat na enot nindang interes an Kahadean, na maogmang ginagamit an saindang buhay, an saindang kakayahan, asin an saindang mga rogaring sa paglilingkod dian. An gabos na iba pa sa buhay dapat na segunda. (Mateo 13:44-46) Kabale sa saindang paninimbagan an pagbalangibog sa iba kan maogmang bareta manongod sa Kahadean nin Dios. (Isaias 61:1, 2) Sagkod saen ninda ginibo iyan bago kan katapusan kan mga Panahon nin mga Hentil kan 1914?
4. Gurano kahiwas kan pagwaras nin mga literatura sa Biblia kan sadit na grupo nin mga Estudyante sa Biblia bago kan 1914?
4 Poon kan mga taon nin 1870 sagkod kan 1914, an mga Estudyante sa Biblia pipira sana an bilang. Kan 1914, mga 5,100 sana an aktibong nakikikabtang sa pagpapatotoo sa publiko. Alagad pambihira nanggad na pagpapatotoo idto! Kan 1881, duwang taon sana pakalihis kan enot na pagpublikar kan Watch Tower, ginibo ninda an pagwaras kan 162-pahinas na publikasyon na Food for Thinking Christians. Sa laog nin pirang bulan, nakawaras sinda nin 1,200,000 na kopya. Sa laog nin pirang taon, manampulong milyon na tract an iwinawaras taon-taon sa dakol na tataramon.
5. Sairisay an mga colporteur, asin anong klase nin espiritu an saindang ipinaheling?
5 Magpoon man kan 1881, an iba iinopresir an saindang paglilingkod bilang colporteur na mga paraebanghelyo. Ini an mga naenot sa mga payunir (pambilog na panahon na mga paraebanghelyo) ngonyan. An ibang colporteur, na nagraralakaw o nagbibisekleta, personal na nagpatotoo sa haros gabos na parte kan nasyon na ineerokan ninda. An iba nakaabot sa mga langtad sa ibang nasyon asin iyo an mga enot na nagpaabot kan maogmang bareta sa mga lugar na arog kan Finlandia, Barbados, asin Burma (na ngonyan Myanmar). Nagpaheling sinda nin kaigotan sa pagmimisyonero arog kan ki Jesu-Cristo asin sa saiyang mga apostol.—Lucas 4:43; Roma 15:23-25.
6. (a) Gurano kaharayo kan mga pagbiyahe ni Tugang na Russell sa pagpalakop kan katotoohan sa Biblia? (b) Ano pa an ginibo sa pagpahiwas kan paghuhulit kan maogmang bareta sa ibang nasyon bago kan katapusan kan mga Panahon nin mga Hentil?
6 Si Tugang na Russell mismo nagbiyahe nin hararayo tanganing ipalakop an katotoohan. Pabalikbalik sia sa Canada; nagdiskurso sa Panama, Jamaica, asin Cuba; doseng beses na nagbiyahe sa Europa; asin linibot an globo sa biyaheng pag-eebanghelyo. Saiya man na isinugo an ibang lalaki tanganing ponan asin pangenotan an paghuhulit kan maogmang bareta sa ibang nasyon. Si Adolf Weber isinugo sa Europa sa katahawan kan mga taon nin 1890, asin an saiyang ministeryo nakaabot magpoon sa Switzerland sagkod sa Pransia, Italia, Alemania, asin Belgium. Si E. J. Coward ipinadara sa lugar nin Caribeano. Si Robert Hollister iinasignar sa Oriente kan 1912. Duman, may espesyal na mga tract na inandam sa sampulong tataramon, asin minilyon na kopya kaiyan an idinistribuwir sa India, Tsina, Hapon, asin Korea kan mga parawaras na tagaduman. Kun buhay na kamo kaidto, napahiro daw kamo kan saindong puso na gumibo nin odok na pagmamaigot na mapaabotan kan maogmang bareta an iba sa saindong komunidad asin sa iba pang lugar?
7. (a) Paano ginamit an mga diaryo sa pagpahiwas kan pagpapatotoo? (b) Ano an “Photo-Drama of Creation,” asin pira katawo an nakaheling kaiyan sa laog sana nin sarong taon?
7 Mantang an mga Panahon nin mga Hentil naghaharani sa katapusan kaiyan, an mga diaryo ginamit sa pagpublikar kan mga sermon sa Biblia na ipinahayag ni Tugang na Russell. An saindang pangenot na idinoon bakong an taon 1914 kundi, imbes, an katuyohan nin Dios asin an kasegurohan kan kaotoban kaiyan. Mga 2,000 na diaryo na durungan, na nakakaabot sa 15,000,000 na parabasa, an regular na nagtatampok kan mga sermon na ini. Dangan, sa pagpopoon kan taon 1914, pinonan kan Sosyedad an pagpaheling kaini sa publiko kan “Photo-Drama of Creation.” Sa apat na 2-oras na presentasyon, ipinaheling kaiyan an mga katotoohan sa Biblia poon sa paglalang sagkod sa Milenyo. Sa laog sana nin sarong taon, naheling iyan kan mga nag-atender na an total labing nuwebe milyones sa Amerika del Norte, Europa, Australia, asin New Zealand.
8. Kan 1914, pirang kadagaan an napaabotan na nin maogmang bareta kan mga Estudyante sa Biblia?
8 Sono sa makukuang mga rekord, kan huring kabtang kan 1914, an maigot na grupong ini nin mga paraebanghelyo ikinapalakop na an saindang pagbalangibog kan Kahadean nin Dios sa 68 kadagaan.a Alagad kapinonan sana idto!
Maigot na Nagbabalangibog kan Natindog Nang Kahadean
9. Sa mga kombension sa Cedar Point, paano tinawan nin espesyal na pagdodoon an gibong pagpapatotoo sa Kahadean?
9 Kan magtiripon an mga Estudyante sa Biblia sa Cedar Point, Ohio, kan 1919, si J. F. Rutherford, an presidente kaidto kan Watch Tower Society, nagpahayag: “An satong trabaho kaidto asin ngonyan ianunsiar an madatong na mamuraway na kahadean kan Mesiyas.” Sa ikaduwang kombension sa Cedar Point, kan 1922, si Tugang na Rutherford itinampok an katunayan na sa katapusan kan mga Panahon nin mga Hentil, kan 1914, ‘an Hade na may kamurawayan kinapotan an saiyang dakulang kapangyarihan asin nagpoon na maghade.’ Sunod, direkta niang iinatubang an isyu sa mga nagdadangog saiya, na nagsasabing: “Nagtutubod daw kamo na an Hade na may kamurawayan pinonan na an saiyang paghade? Kaya balik kamo sa langtad, O kamong mga aki kan kaharohalangkaweng Dios! . . . Ibalangibog nindo an mensahe sa hararayo. An kinaban dapat na makaaram na si Jehova Dios asin na si Jesu-Cristo Hade nin mga hade asin Kagurangnan nin mga kagurangnan. Ini an aldaw kan gabos na aldaw. Uya, an Hade naghahade na! Kamo an saiyang mga ahente sa pagpaisi.”
10, 11. Paano epektibong ginamit gabos an radyo, mga sasakyan na may laudispiker, asin plakard na mapaabotan an mga tawo kan katotoohan kan Kahadean?
10 Labing 70 taon na an nakaagi magpoon kan mga kombension na idto sa Cedar Point—haros 80 taon na magpoon kan ponan ni Jehova na ipahayag an saiyang pagkasoberano paagi sa Mesiyanikong pamamahala kan saiyang Aki. Sagkod saen aktuwal na inotob kan mga Saksi ni Jehova an gibohon na isinabi sainda sa Tataramon nin Dios? Anong pakikikabtang an personal nindong ginigibo dian?
11 Amay kan mga taon nin 1920, nagkaigwa nin radyo bilang instrumento na magagamit sa pagtao nin mahiwas na publisidad sa mensahe kan Kahadean. Durante kan mga taon nin 1930, an mga diskurso sa kombension na nagtatampok kan Kahadean bilang paglaom kan kinaban pinaagi sa mga organisasyon nin mga istasyon nin radyo o durangan na pagbrodkast asin sa mga linya nin telepono sa palibot kan globo. An mga sasakyan na kinabitan nin mga laudispiker ginamit man sa pagpatanog kan irinekord na mga diskurso sa Biblia sa pampublikong mga lugar. Dangan, kan 1936, sa Glasgow, Scotland, an satong mga tugang nagpoon na magsulot nin mga plakard mantang sinda nagpaparada sa komersial na mga lugar tanganing ipaisi an mga pahayag-publiko. Ini gabos epektibong paagi nin pagpapatotoo sa dakol na tawo kan panahon na idto na dikit pa sana an satong bilang.
12. Siring sa ipinaheheling kan Kasuratan, ano an saro sa pinakaepektibong mga paagi na makapagpatotoo kita bilang indibiduwal?
12 Sabihon pa, liniliwanag kan Kasuratan na bilang mga Kristiano, kita bilang indibiduwal may paninimbagan na magpatotoo. Dai niato puwedeng basta na sana ipagibo iyan sa mga artikulo nin diaryo o sa pagbrodkast sa radyo. Rinibong maimbod na Kristiano—mga lalaki, babae, asin hobenes—an nag-ako kan paninimbagan na iyan. Bilang resulta, an paghuhulit sa harong-harong nagin nang nagpapamidbid na tanda kan mga Saksi ni Jehova.—Gibo 5:42; 20:20.
Pakaabot sa Bilog na Ineerokan na Daga
13, 14. (a) Taano an ibang Saksi ta minabalyo sa ibang banwaan, pati sa ibang nasyon, sa pagpadagos kan saindang ministeryo? (b) Paano an mamomoton na pagmakolog sa mga tawo sa lugar na namundagan nin saro nakatabang na ikalakop an maogmang bareta?
13 Sa pakaaram na an mensahe kan Kahadean kaipuhan na ikahulit sa bilog na ineerokan na daga, an ibang Saksi ni Jehova odok na pinaghorophorop kun ano an saindang personal na magigibo na maabot an mga lugar sa luwas kan saindang komunidad.
14 An dakol na tawo nakanood kan katotoohan pakatapos na humale sa lugar na namundagan ninda. Minsan ngani tibaad nagbalyo sinda para sa materyal na bentaha, may nanompongan sindang orog kahalaga, asin an iba napahirong bumalik sa nasyon o komunidad na namundagan ninda tanganing ihiras an katotoohan. Kaya, amay kan siglong ini an paghuhulit kan maogmang bareta nakaabot sagkod sa Scandinavia, Grecia, Italia, mga nasyon sa Sirangan na Europa, asin dakol pang ibang lugar. Pati ngonyan, sa mga taon nin 1990, an mensahe kan Kahadean nakalalakop sa iyo man sanang paagi.
15. Durante kan mga taon nin 1920 asin 1930, ano an nahaman kan iba na an kaisipan arog kan ipinahayag sa Isaias 6:8?
15 Iinaaplikar an hatol kan Tataramon nin Dios sa saindang buhay, an iba nakapagboluntaryo sa paglilingkod sa mga lugar na dai pa ninda naistaran kaidto. Si W. R. Brown (na parateng inaapod na “Bible Brown”) saro sa mga ini. Kan 1923, tanganing mapahiwas an pag-eebanghelyo, sia buminalyo hale sa Trinidad pasiring sa Solnopan na Aprika. Durante kan mga taon nin 1930, si Frank asin Gray Smith, Robert Nisbet, asin David Norman kabilang duman sa mga nagdara kan mensahe kan Kahadean sa sirangan na mga baybayon nin Aprika. An iba nagtabang na kultibaron an langtad sa Amerika del Sur. Kan amay na mga taon kan 1920, si George Young, sarong taga-Canada, nakikabtang sa gibohon sa Argentina, Brazil, Bolivia, Chile, asin Peru. Si Juan Muñiz, na naglingkod sa España, binalikan an Argentina, Chile, Paraguay, asin Uruguay. An gabos na ini nagpaheling nin espiritu na arog kan ipinahayag sa Isaias 6:8: “Uya ako! Sugoa ako.”
16. Apuwera sa pangenot na mga sentro nin populasyon, saen ginibo an pagpapatotoo kan mga taon bago an guerra?
16 An paghuhulit kan maogmang bareta nakaabot maski sa puwerang mga lugar. An mga baroto na pinadadalagan kan mga Saksi sinongko an saradit na baryo nin mga parasira sa Newfoundland, an mga baybayon nin Norway pasiring sa Artico, an mga isla sa Pasipiko, asin an mga duungan sa Timog-Sirangan na Asia.
17. (a) Kan 1935, pirang kadagaan an naabot kan mga Saksi? (b) Taano an gibohon ta dai pa tapos kan panahon na idto?
17 Makangangalas, kan taon 1935, an mga Saksi ni Jehova sibot sa paghuhulit sa 115 kadagaan, asin may naabot pa sindang 34 kadagaan magsalang sa mga ekspedisyon sa pagpapatotoo o paagi sa literaturang ipinadadara sa koreo. Alagad, an gibohon dai pa tapos. Kan taon na idto binuksan ni Jehova an saindang mga mata sa saiyang katuyohan na tiponon an “sarong dakulang kadaklan” na makaliligtas pasiring sa saiyang bagong kinaban. (Kapahayagan 7:9, 10, 14) Dakula pang pagpapatotoo an dapat na gibohon!
18. Sa gibong pagbalangibog kan Kahadean, anong kabtang an inotob kan Paadalan nin Gilead asin kan Paadalan sa Ministeryal na Pagsasanay?
18 Maski kan an daga nasa tahaw kan Guerra Mundial II asin igwa nin mga pagprohibir sa literatura o aktibidad kan mga Saksi ni Jehova sa dakol na kadagaan, pinonan kan Paadalan sa Biblia kan Watchtower sa Gilead na magsanay nin magigin mga misyonero tanganing mahaman an mas dakula pang gibohon nin pankinaban na pagbalangibog kan Kahadean. Sagkod sa ngonyan, an mga naggraduwar sa Gilead naglingkod sa labing 200 na kadagaan. An ginibo ninda bako sanang magpasakamot nin literatura dangan bumalyo sa ibang lugar. Sinda nagkondukta nin mga pag-adal sa Biblia, nag-organisar nin mga kongregasyon, asin nagsanay nin mga tawo sa pagsaabaga nin teokratikong mga paninimbagan. Dai pa sana nahahaloy, an mga magurang asin ministeryal na lingkod na naggraduwar sa Paadalan sa Ministeryal na Pagsasanay nakatabang man na mapanoan an mga pangangaipo may koneksion sa gibohon na ini sa anom na kontinente. Ikinabugtak na an posog na pundasyon para sa padagos na pag-oswag.—Ikomparar an 2 Timoteo 2:2.
19. Sagkod saen an simbag kan mga lingkod ni Jehova sa pangagdang maglingkod sa mga lugar na mas dakula an pangangaipo?
19 Makatatabang daw an iba na maasikaso an ibang dai pa nagigibong mga teritoryo? Kan 1957, sa mga kombension sa bilog na kinaban, an mga indibiduwal asin pamilya—maygurang na mga Saksi ni Jehova—dinagka na horophoropon an pagbalyo sa mga lugar na mas dakula an pangangaipo na duman na mag-istar asin magpadagos kan saindang ministeryo. An pangagda siring nanggad kan iinatubang nin Dios ki apostol Pablo, na naheling sa bisyon an sarong lalaking nakikimaherak saiya na: “Magdigdi ka sa Macedonia asin tabangi kami.” (Gibo 16:9, 10) An iba buminalyo durante kan mga taon nin 1950, an iba kan huri. Mga sangribong Saksi an buminalyo sa Irlandia asin Colombia; ginatos an buminalyo sa dakol na iba pang lugar. Manampulong ribo an nagbalyo sa mga lugar na mas dakula an pangangaipo sa laog kan sainda mismong nasyon.—Salmo 110:3.
20. (a) Magpoon kan 1935, ano an nahaman bilang kaotoban kan hula ni Jesus sa Mateo 24:14? (b) Durante kan nakaaging pirang taon, paano nagkaigwa nin pagpaparikas sa gibohon?
20 Paagi sa bendisyon ni Jehova sa saiyang banwaan, an gibong pagbalangibog kan Kahadean nagpapadagos sa pag-oswag sa pambihirang rikas. Magpoon kan 1935 an bilang kan mga parahayag nag-oswag nin haros otsentang doble, asin an rikas nin pag-oswag sa mga payunir labi nin 60 porsiento kisa sa rikas nin pag-oswag sa bilang kan mga parahayag. An areglo nin pag-adal sa Biblia sa harong pinonan durante kan mga taon nin 1930. An promedyo ngonyan labi sa apat may kabangang milyon na kinokonduktahan bulan-bulan. Magpoon kan 1935 labing 15 bilyones na oras an idinusay sa gibong pagbalangibog kan Kahadean. An regular na paghuhulit kan maogmang bareta ginigibo ngonyan sa 231 kadagaan. Mantang nabuksan an mga teritoryo sa Sirangan na Europa asin Aprika para sa mas libreng paghuhulit kan maogmang bareta, an internasyonal na mga kombension epektibong ginamit sa malinaw na pagpaheling kan mensahe kan Kahadean sa atubangan kan publiko. Siring kan kaidto pa ihinula ni Jehova, sa Isaias 60:22, siertong ‘pinaririkas nia an gibohon sa kapanahonan kaiyan.’ Kanigoan kadakulang pribilehiyo nanggad na makikabtang kita dian!
Pagpaabot kan Maogmang Bareta sa Gabos na Mapupuwede
21, 22. Ano an personal na magigibo niato na magin mas epektibong mga Saksi saen man kita naglilingkod?
21 An Kagurangnan dai pa nagsasabing tapos na an gibohon. Rinibo pa sagkod ngonyan an nag-aako kan tunay na pagsamba. Kaya minalataw an hapot, Ginigibo daw niato an gabos na mahihimo sa paggamit nin marhay kan panahon na itinogot kan pagpapasensia ni Jehova para sa gibohon na ini?—2 Pedro 3:15.
22 Bakong gabos puwedeng bumalyo sa teritoryo na bihirang magibo. Alagad lubos daw nindong ginagamit an mga oportunidad na bukas saindo? Nagpapatotoo daw kamo sa mga katrabaho? sa mga maestro asin kaeskuwela? Nakibagay na daw kamo sa pabarubagong mga kamugtakan sa saindong teritoryo? Kun, bilang resulta kan pabarubagong iskedyul nin trabaho, pipira sanang tawo an nasa harong kun aldaw, liniwat daw nindo an saindong iskedyul tanganing masongko sinda kun banggi? Kun an mga edipisyo dai puwedeng makalaog an dai imbitadong mga bisita, kamo daw naggigibo nin pagpapatotoo paagi sa telepono o nagpapatotoo paagi sa surat? Binabalikan daw nindo an ipinaheling na interes asin nag-aalok na magkondukta nin mga pag-adal sa Biblia sa harong? Lubos daw nindong inootob an saindong ministeryo?—Ikomparar an Gibo 20:21; 2 Timoteo 4:5.
23. Mantang pinagheheling ni Jehova kun ano an satong ginigibo sa paglilingkod saiya, ano an maninigong maheling sa kabtang niato?
23 Otobon logod niato gabos an satong ministeryo sa paaging malinaw na nagpapaheling ki Jehova na tunay niatong inaapresyar an dakulang pribilehiyo nin pagigin saiyang mga Saksi sa mahalagang mga panahon na ini. Magin pribilehiyo logod niato na makaheling mantang ginigibo ni Jehova an paghokom sa maraot na daan na palakaw asin pinoponan an mamuraway na Milenyal na Paghade ni Jesu-Cristo!
[Nota sa Ibaba]
a Binilang sono sa paagi kan pagbanga sa daga kan amay na mga taon nin 1990.
Bilang Pagrepaso
◻ Taano ta mahalagang marhay an paghuhulit kan mensahe kan Kahadean?
◻ Sagkod saen ikinahulit an maogmang bareta sagkod kan 1914?
◻ Gurano kakosog na pagpapatotoo an ikinatao magpoon kan pagkatindog kan Kahadean?
◻ Ano an puwedeng magpangyari na magin mas mabunga an satong kabtang sa ministeryo?
[Kahon sa pahina 16, 17]
AN MGA SAKSI NI JEHOVA—Mga Parabalangibog kan Kahadean nin Dios
Sa ginatos na kombension sa bilog na kinaban durante kan 1993-94, iinanunsiar an pagluwas kan sarong bagong libro na may titulong Jehovah’s Witnesses—Proclaimer’s of God’s Kingdom. Ini pinakanakakaimpormar, kompletong historya kan mga Saksi ni Jehova. Iyan 752-pahinang libro, magayon an pagkailustrar, na igwa nin labing sangribong retrato na tinipon hale sa 96 na laen-laen na nasyon. Sa katapusan kan 1993, ipinublikar na iyan sa 25 lenguahe asin tinatradusir sa dakol pa.
Ano an minagibo sa siring na libro na napapanahon? Sa dai pa sana nahahaloy na mga taon minilyon katawo sa bilog na kinaban an nagin Saksi ni Jehova. Sinda gabos maninigong maimpormaran na marhay dapit sa historya kan organisasyon na dian asosyado sinda. Saro pa, an saindang paghuhulit asin paagi nin pagsamba nakalaog na sa nasyonal asin rasyal na mga grupo sa bilog na kinaban asin inako na nin mga hobenes asin gurang, sa gabos na ekonomiko asin edukasyonal na grado. Bilang resulta, an dakol na nakakaobserbar kan nangyayari igwa nin mga hapot manongod sa mga Saksi—bako sanang manongod sa saindang mga paniniwala kundi dapit man sa saindang ginikanan, saindang historya, saindang organisasyon, saindang mga katuyohan. An iba nagsurat dapit sa sainda, dawa bakong perming daing ipinaoorog. Pero mayo nin mas nakakaaram kan modernong aldaw na historya nin mga Saksi ni Jehova kisa sa mga Saksi mismo. An mga editor kan librong ini nagmaigot na iatubang an historyang iyan sa makatotoohan asin prangkang paagi. Sa paggibo kaiyan, dokumentadong itinala man ninda an kaotoban sagkod ngonyan kan makahulogan nanggad na kabtang kan tanda kan presensia ni Cristo na isinurat sa Mateo 24:14, asin ginibo ninda iyan na may mga detalye na puwede sanang ikatao kan mga kalabot nanggad sa trabahong ihinula dian.
An libro binangabanga sa pitong pangenot na section:
Section 1: An kabtang na ini ipinaliliwanag an historikong mga pinaghalean kan mga Saksi ni Jehova. Kabale dian an diretso sa punto, nakakaimpormar na sumaryo kan saindang modernong aldaw na historya poon kan 1870 sagkod 1992.
Section 2: Yaon digdi an naghahayag na repaso kan progresibong pagkabilog nin mga paniniwala na ipinalalaen an mga Saksi ni Jehova sa ibang relihiyosong grupo.
Section 3: An kabtang na ini kan libro nagsisiyasat kan pagkabilog kan saindang organisasyon. Nagsasaysay iyan nin interesanteng mga bagay dapit sa saindang mga pagtiripon sa kongregasyon asin mga kombension, siring man sa paagi kan saindang pagtogdok nin mga Kingdom Hall, darakulang Assembly Hall, asin mga pasilidad para sa pagpublikar kan literatura sa Biblia. Ipinahahayag kaiyan an kaigotan nin mga Saksi ni Jehova sa pagbalangibog kan Kahadean nin Dios asin an pagkamoot na naheheling mantang inaasikaso ninda an kada saro sa mga panahon nin krisis.
Section 4: Digdi maheheling nindo an kawiliwiling mga detalye manongod sa kun paano nakaabot an pagbalangibog kan Kahadean nin Dios sa darakulang nasyon asin puwerang mga isla sa bilog na kinaban. Imahinara sana—an paghuhulit sa 43 na kadagaan kan taon 1914, alagad sa 229 nang kadagaan kan 1992! An mga eksperyensia kan mga nakikabtang sa pankinaban na pag-oswag na ini tunay na nakakaogma.
Section 5: An paggibo kan gabos na trabahong ini na pagbalangibog kan Kahadean kinaipuhan an pagpahiwas nin internasyonal na mga pasilidad para sa pagpublikar nin mga Biblia siring man nin literatura sa Biblia sa labing duwang gatos na lenguahe. Manonodan nindo digdi an dapit sa kabtang na iyan kan saindang gibohon.
Section 6: Napaatubang man an mga Saksi sa mga pagbalo—an nagkapira huli sa pagkabakong sangkap nin tawo, an iba huli sa falsong mga tugang, asin orog pa ngani huli sa direktang paglamag. An Tataramon nin Dios nagpatanid na ini mangyayari. (Lucas 17:1; 2 Timoteo 3:12; 1 Pedro 4:12; 2 Pedro 2:1, 2) An kabtang na ini kan libro buhay na iiniestorya an aktuwal na nangyari asin kun paano an pagtubod kan mga Saksi ni Jehova pinangyari sinda na magin mapanggana.
Section 7: Sa konklusyon, ipinaliliwanag kan libro kun taano an mga Saksi ni Jehova ta biyong kombensido na an organisasyon na dian kabtang sinda tunay na ginigiyahan nin Dios. Ipinaliliwanag man kaiyan kun taano ta namamatean ninda an pangangaipo, sa organisasyonal asin sa indibiduwal na paagi, na magdanay na puka.
Bilang dagdag sa nasa enotan, an magayon an pagkadisenyong tomo na ini kaibanan an magayon asin nakakaimpormar na marhay na 50-pahinang kabtang nin de-kolor na mga retrato, na ipinaheheling an pankinaban na opisina prinsipal siring man an mga sangang opisina na ginagamit kan mga Saksi ni Jehova sa bilog na kinaban.
Kun dai pa nindo nagigibo, siertong makikinabang kamo sa pagkua asin pagbasa nin sarong kopya kaining kawiliwiling publikasyon.
Mga Komento Hale sa Iba na Nakabasa Na Kaiyan
Ano an reaksion kan mga nakabasa na kaining libro? Uya an pira:
“Natapos ko pa sanang basahon an kawiliwili, buhay na dokumentaryong Jehovah’s Witnesses—Proclaimer’s of God’s Kingdom. Solamente an organisasyon na maimbod asin mapakumbabang dusay sa katotoohan an makakasurat nin siring kaprangka, mapuso, asin mapagmansay na gayo.”
“Siring iyan kan libro nin Mga Gibo, sa pagkasadiosan asin pagkaprangka kaiyan.”
“Nakakaintriga nanggad na bagong publikasyon! . . . Iyan historikong obra maestra.”
Pakabasa kan mga kabanga kan libro, an sarong lalaki nagsurat: “Ako namungnan, napula, asin haros maghibi. . . . Sa gabos na taon sa buhay ko, mayo nang ibang publikasyon an nakapahiro nin arog kaini sa emosyon.”
“Nag-aawit an sakuyang puso kada maisip ko kun paano pakokosogon kan librong ini an pagtubod kan mga hobenes siring man kan mga bagohan na minalaog sa organisasyon ngonyan.”
“Pinahalagahan ko kaidto pa an katotoohan, pero an pagbasa kan librong ini binuksan an sakong mata asin tinabangan akong marealisar orog kisa kasuarin pa man na an banal na espiritu ni Jehova nasa likod kan gabos na iyan.”
[Mga ritrato sa pahina 18]
Dakol na tawo an napaabotan kan mensahe kan Kahadean dawa kan pipira pa sana an bilang kan mga Saksi