Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • w94 9/15 p. 10-15
  • Magpahayag sa Publiko kan Ngaran ni Jehova

Mayong video na available para digdi.

Sori, may error sa pag-load kan video.

  • Magpahayag sa Publiko kan Ngaran ni Jehova
  • An Torrengbantayan Nagpapahayag kan Kahadean ni Jehova—1994
  • Mga Subtema
  • Kaagid na Materyal
  • An Kabtang kan mga Propeta
  • Mga Saboot Asin Motibasyon
  • “Gikan sa Kapanoan kan Puso”
  • Mga Resulta kan Pagpahayag sa Publiko
  • Pag-iribanan sa Ministeryo sa Langtad
  • Gibohon na Arogan an mga Propeta nin Dios
    An Torrengbantayan Nagpapahayag kan Kahadean ni Jehova—1994
  • “An Maogmang Bareta Kaipuhan na Ikahulit Nguna”
    An Torrengbantayan Nagpapahayag kan Kahadean ni Jehova—1988
  • Pag-atubang sa mga Kadepisilan kan Ministeryo sa Harong-Harong
    An Torrengbantayan Nagpapahayag kan Kahadean ni Jehova—2008
  • Arugon an Pagigin Mapagsakripisyo kan mga Propeta
    An Torrengbantayan Nagpapahayag kan Kahadian ni Jehova (Pag-aadalan)—2016
Iba Pa
An Torrengbantayan Nagpapahayag kan Kahadean ni Jehova—1994
w94 9/15 p. 10-15

Magpahayag sa Publiko kan Ngaran ni Jehova

“Danay kitang magdolot sa Dios nin atang nin pag-omaw, na iyo an bunga nin mga ngabil na nagpapahayag sa publiko kan saiyang ngaran.”—HEBREO 13:15

1. Ano an isinadol ni propeta Oseas na dapat gibohon kan mga kapwa Israelita?

AN PROPETA ni Jehova na si Oseas igwa nin mahalagang mensahe para sa saiyang mga kapwa Israelita. Kan ikawalong siglo bago kan Komon na Kapanahonan, dinagka niang magsolsol an saiyang bikong mga katemporanyo. Sia nagsadol: “Magdara kamo mismo nin mga tataramon asin magbalik kamo ki Jehova. Magsabi kamo sa saiya, kamo gabos, “Patawadon mo logod an kasalan; asin akoa an marahay, asin idodolot niamo bilang balos an mga ogbon na baka kan samong mga ngabil.’” (Oseas 14:2) Sa pagsadol sa banwaan na idolot ki Jehova ‘an mga ogbon na baka kan saindang mga ngabil,’ an hula ni Oseas nagdadagka sa mga Israelita na magsolsol asin tumao nin mga atang nin sinserong pag-omaw sa Dios.

2. Dinagka ni apostol Pablo an mga Kristiano na magdolot nin anong klaseng atang?

2 An mga Saksi ni Jehova nagdodolot ngonyan nin ‘mga ogbon na baka kan saindang mga ngabil.’ Hinihimate man ninda an pagdagka ni apostol Pablo, na nagsambit kan mga tataramon na iyan sa hula ni Oseas kan sia sumurat: “Paagi [ki Jesu-Cristo] danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.“ (Hebreo 13:15) Sa siring, an mga lingkod nin Dios magayagayang nag-oomaw ki Jehova, siring sa saindang aktibidad na paghuhulit kan Kahadean.—Mateo 24:14.

3. Paano kita makakadolot ki Jehova nin “atang nin pag-omaw, asin kiisay na mga aktibidad an sisiyasaton niato ngonyan?

3 An pagpahayag sa publiko kan ngaran ni Jehova sarong dai na kutana maninigong pribilehiyo para sa bakong sangkap na mga tawo. Naoogma nanggad kita na itaram sa iba an manongod sa satong Dios, sa siring nagdodolot ki Jehova nin “atang nin pag-omaw,” ‘an mga ogbon na baka kan satong mga ngabil”! Bilang pampakosog sato sa paghuhulit sa publiko kan maogmang bareta kan Kahadean ngonyan, siyasaton niato an sinasabi sa sato kan Biblia manongod sa mga propeta nin Dios asin iba pang lingkod ni Jehova. Sa saindang dalan nin buhay dakol kitang manonodan na makakatabang sato na maogma sa satong aktibidad na paghuhulit.—Roma 15:4.

An Kabtang kan mga Propeta

4, 5. (a) Sa orihinal na mga lenguahe kan Biblia, ano an pundamental na kahulogan kan mga tataramon na trinadusir na “propeta”? (b) Ano an nagpapaheling na an mga propeta nagkaigwa nin pambihirang kabtang sa areglo nin Dios?

4 An mga propeta ni Jehova nagkapribilehio na magbalangibog sa publiko kan saiyang mensahe. An Hebreong termino para sa “propeta” (na·viʼʹ) bakong segurado an pinaghalean, pero an pagkagamit kaiyan sa Biblia nagpaparisa na an tunay na mga propeta mga representante sa pagtaram ni Jehova, mga tawohan nin Dios na igwang ipinasabong na mga mensahe. An Griegong termino na trinadusir na “propeta” (pro·pheʹtes) literal na nangangahulogan “sarong mapusong espiker,” na may itataram “sa atubangan nin” o “sa atubang” nin saro. An propeta saro na nagbabalangibog nin mga mensahe na iinaatribuwir na naggikan sa Dios. Sa parate, pero bakong permi, an tunay na mga propeta nin Dios naghula nin mga pangyayari sa ngapit.

5 Manongod sa pambihirang kabtang kan mga propeta sa areglo nin Dios, an Cyclopædia ni M’Clintock asin Strong nagsasabi: “Kun beses hinahapot an saindang sadol . . . Pero orog kaparateng namamatean ninda mismong napapahiro an boot na kaolayon an mga tawo na dai na hinahapot an saindang sadol, asin dai sinda natatakot na umatubang sa mga lugar na an saindang presensia, tibaad, ikinaaanggot asin ikinatatakot.“ (Tomo VIII, pahina 640) Horophoropa an nagkapirang halimbawa dapit sa kun ano an nagpahiro sa mga propeta na mapusong manindogan nin siring kaiyan.

Mga Saboot Asin Motibasyon

6, 7. Ano an pinakakan ni Jehova sa saiyang propetang si Ezequiel, asin ano an nagin epekto kaini?

6 Bago kan pagkalaglag nin Jerusalem kan 607 B.C.E., si Jehova nagtaram sa desterradong mga Judio sa Babilonya paagi sa saiyang propetang si Ezequiel. Si Jehova nagsabi saiya: ‘Aki nin tawo, an saimong manompongan, kakana. Kakana an balumbon na ini, asin lakaw, magtaram ka sa harong ni Israel.” Kuminuyog si Ezequiel. Sia nagsabi: “Kaya binuka ko an sakong ngoso, asin luway-luway nia akong pinakakan kan balumbon na ni. Asin nagpadagos sia sa pagsabi sa sako: ‘Aki nin tawo, maninigo mong papangyarihon na kumakan an saimong tulak, tanganing mabasog mo an saimong bituka kan balumbon na ini na itinatao ko saimo.’ Asin pinonan kong kakanon iyan, asin sa sakuyang ngoso iyan nagin garo tangguli sa hamis.”—Ezequiel3:1-3.

7 An satong hawak nagkukua nin mga sustansia sa satong kinakakan, asin sa sarong sentido an mga ini nagigin kabtang niato. Kaagid kaiyan an “balumbon“ na kinakan ni Ezequiel—an mensahe ni Jehova na dapat ipahayag kan propeta—dapat na magin kabtang nia, na nakakaapektar sa saiyang emosyon. An mga tataramon nin Dios nakapahiro nanggad sa kairairaroming pagmate ni Ezequiel kaya an pagpahayag kaiyan sa publiko ikinawili nia. Kun kamo sarong Saksi ni Jehova, ikinaoogma daw nindo an pagpahayag sa publiko kan mensahe nin Dios?

8, 9. Ano an nagpahiro ki Amos na maghula?

8 Horophoropa man, an propetang si Amos. Nabuhay kan ikasiyam na siglo B.C.E., kabilang sia sa enot na mga propetang Hebreo na nagsurat nin libro sa Biblia na inginaran sa saiya mismo. Arog ki Ezequiel, si Amos sarong prangkang parabalangibog kan tataramon ni Jehova. Tara, an ekspresyon na “iyo ini an isinabi ni Jehova” 11 beses na inootro sa bilog na libro na igwa kan saiyang ngaran! (Amos 1:3, 6, 9, 11, 13; 2:1, 4, 6; 3:12; 5:4- 7:17) Namatean ni Amos an pangangaipong ipahayag sa publiko an mga tataramon nin Dios.

9 Bilang propeta nin Dios, si Amos naghimate sa mga kapahayagan nin Dios paagi sa tolos- tolos na paghiro. Paagi ki Amos, an Dios nagsabi: “May leon na nag-ungal! Siisay an dai matatakot? An Soberanong Kagurangnan na Jehova mismo nagtaram! Siisay an dai maghuhula?” (Amos 3:8) Dai mapogolan na napahiro an propeta na magpahayag kan mensahe ni Jehova.

10. Ano an reaksion kan modernong aldaw na mga lingkod ni Jehova kun tinutumang an saindang paghuhulit?

10 Sa garo leon na paagi si Jehova nag-uungal nin mga mensahe nin paghokom sa presenteng maraot na palakaw sa kinaban. Arog ni Amos, an mga lingkod ni Jehova sa modernong aldaw napapahirong gayo na magpahayag sa publiko kan mga tataramon nin Dios. Dawa kun hinuhuma nin mga paratumang, saindang sinusunod an halimbawa kan mga apostol na sinda Pedro asin Juan, na mapuwersang nagpahayag: “Kun para sa samo, dai kami puwedeng mag-ontok sa pagtaram dapit sa mga bagay na samong naheling asin nadangog.” Nanindogan man an mga apostol: “Kami kaipuhan na magkuyog sa Dios bilang puon kisa mga tawo.” (Gibo 4:20; 5:29) Kaya, kumusta man kita? Marahay na siyasaton an satong saboot manongod sa pagpahayag sa publiko kan ngaran ni Jehova.

“Gikan sa Kapanoan kan Puso”

11. Ano an maninigong magpahiro sato na magpadagos sa pagpahayag sa publiko kan ngaran ni Jehova.

11 Mayong duwa-duwa na an mga propeta ni Jehova nagpasalamat sa saindang mga pribilehiyo. An kaagid na pagpasalamat ki Jehova maninigong magpahiro sato na magpahayag sa publiko kan saiyang ngaran. An Salmo 145:1, 2 nagsasabi: “Papahalangkawon taka, O sakuyang Dios na Hade, asin pag-oomawon ko an saimong ngaran sa panahon na daing katapusan, sagkod lamang pa ngani. Sa bilog na aldaw pag-oomawon taka, asin pag-oomawon ko an saimong ngaran sa panahon na daing katapusan, sagkod lamang pa ngani.” Ipinapabanaag daw kan mga tataramon na iyan an saindong kaisipan? Tinatabangan kita kan regular na pag-adal sa Biblia na pararomon an satong pagpahalaga sa ginibo, ginigibo, asin gigibohon pa ni Jehova para sa sato. Asin kun iriba niatong pinag-aadalan an Biblia bilang sarong pamilya, dai daw niato naheheling na an Tataramon nin Dios igwa nin puwersa, na ginigibo kitang gustong magtaram manongod sa saiya asin sa saiyang mga katuyohan? (Hebreo 4:12) Tanganing magin epektibo sa pagpahayag sa publiko kan ngaran ni Jehova kaipuhan man niatong lubos na gamiton an Kristianong mga publikasyon na itinatao ni Jehova Dios paagi sa linahidan na “maimbod asin madonong na oripon.”—Mateo 24:45-47.

12. Paano an Kristianong mga pagtiripon asin paghorophorop pareho nakakatabang sato na magpahayag sa publiko?

12 Kun boot niatong omawon si Jehova nin gikan sa mapagpasalamat na puso, kaipuhan kitang regular na umatender sa Kristianong mga pagtiripon. Maninigong himateon kan bilog na banwaan ni Jehova an sadol ni apostol Pablo: “Magpasaradolsadol kita na magdagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.” (Hebreo 10:24, 25) Kamo daw regular na presente sa Kristianong mga pagtiripon? Parate daw kamong nagtataram manongod sa mga katotoohan sa Kasuratan, magagayon na eksperyensia, asin nakakaogmang mga bareta dapit sa teokratikong pag-oswag na saindong nadadangog sa mga pagtiripon kan banwaan nin Dios? Kun kamo nag-aalangan na magpahayag manongod ki Jehova asin sa saiyang mga katuyohan, tumao nin panahon para sa paghorophorop sa saiyang Tataramon tanganing an saiyang mga kaisipan tumaros nin hararom sa saindong puso. (Salmo 77:12; 143:5) Iyo, an Kristianong mga pagtiripon asin regular na paghorophorop sa Tataramon nin Dios pareho maninigong makatabang saindo na pahalagahan an makangangalas na pribilehiyo ni pagpahayag sa publiko kan ngaran ni Jehova.

13. Paano kita ‘minapaluwas nin marahay’ gikan sa satong puso?

13 Paagi sa puso na pano nin pagpasalamat ki Jehova, kita nagpapaluwas ni mararahay na bagay. “An marahay na tawo minapaluwas nin marahay gikan sa marahay na kayamanan kan saiyang puso,” an ipinangatanosan ni Jesus, “alagad an maraot na tawo minapaluwas nin maraot gikan sa saiyang maraot na kayamanan huli ta gikan sa kapanoan kan puso an saiyang ngoso nagtataram.” (Lucas 6:45) Ano pa an maorog na paagi sa pagpaluwas nin marahay kisa sa pagpahayag sa publiko kan ngaran ni Jehova asin pagtaram manongod kan saiyang mga katuyohan sa satong kataraed, satong mga paryentes—iyo nanggad, sa gabos na satong nakakaolay?

Mga Resulta kan Pagpahayag sa Publiko

14. (a) Ano an puwedeng maeksperyensiahan kan nagpapahayag asin kan nagdadangog sa mensahe kan Kahadean? (b) Ano an nagigibo paagi sa paghuhulit kan Kahadean?

14 An mga propeta nin Dios nakanompong nin kagayagayahan sa saindang paglilingkod, asin an saindang sinabi pinakinabangan kan nag-aakong mga nagdadangog. Kabaing kaiyan, an pagpahayag sa publiko kan mensahe kan Kahadean nagtatao nin dakulang kagayagayahan sa mga parabalangibog kaiyan. (Gibo 20:35) Asin pinapakinabangan nanggad iyan kan mapagpahalagang mga nagdadangog! An pag-ako sa maogmang bareta nakakatabang sa mga tawo na daogon an depresyon o atubangon iyan. Ikinaoogma kan mga nagadanan an mga paglaom sa pagkabuhay liwat. An mga adikto nakakadulag sa pagkaoripon sa nikotina, heroina, asin iba pang nakakaadiktong mga droga. Dakol an napaparahay sa moral, asin an gabos na nag-aako sa katotoohan kan Biblia nagkakamit nin espirituwal na katalingkasan. (Juan 5:28, 29; 8:32) An pagbalangibog kan Kahadean bilang solamenteng paglaom kan katawohan nagseserbi man na patanid sa mga maraot, mantang nagpapaluwas nin maogmang reaksion sa mga sadiosan an puso. Kaya an mga tawo pinagbubulagbulag magsalang para sa “pagkaparang daing katapusan” o para sa “buhay na daing katapusan,” kun gibohon na an paghokom nin Dios sa maraot na kinaban na ini. (Mateo 24:14; 25:31-46; Ezequiel 33:1-9; 1 Timoteo 2:3, 4) An satong paghuhulit sarong dai pang kaagid na gibong pagliligtas, an pinakamahiwas asin pinakalakop na ipinapaising kapahayagan na ginibo kasuarin pa man digdi sa daga!

15. Ano an magigibo tanganing tabangan an magigin mga maninigo sa teritoryo na satong pinapatotoohan?

15 Bilang mga Saksi ni Jehova sa modernong aldaw, kita maogma asin makinuyog na naglilingkod sa satong langitnon na Ama. (Roma 12:11) Kun siring naoogma kitang regular na magtagama nin panahon na makikabtang sa gibohon na paghuhulit kan maogmang bareta sa publiko asin sa harong-harong. (Gibo 5:42; 20:20) An pambilog na kinaban na mga report nagpapaheling na igwa pa nin nagkapirang maninigo sa satong mga teritoryo. Mantang nagliliwat an mga kamugtakan sa kinaban, an mga tawo apektado sa manlaenlaen na paagi. Dakol an dai linalaoman na magin mga dulag, nakikihimanwa sa ibang nasyon. Tibaad may nagkapira sa mga tawong ini sa teritoryo na satong pinapatotoohan. Kun igwa, gibohon niato an satong makakaya na tabangan sinda sa espirituwal mantang nagmamaigot kita sa banal na gibohon kan maogmang bareta.” (Roma 15:16) May mga Kristiano na nag-adal nin ibang lenguahe tanganing ikapahayag an maogmang bareta kan Kahadean sa siring na mga tawo.

16. Ano an makatatabang sato na magpadagos sa pagpahayag kan ngaran ni Jehova?

16 An dakol sa mga propeta nin Dios nagkaigwa nin depisilon na mga asignasyon. Bakong pasil para sa sainda na magpahayag kan mga mensahe nin Dios sa dai naghihimateng mga tawo. Kaagid kaiyan, bakong gabos na nagdusay ki Jehova napapasilan na magpahayag sa publiko kan Saiyang ngaran, nangorogna sa mga teritoryo na dai naghihimate an kadaklan. Minsan siring, paagi sa pagkaigwa kan kompiansa na bunga kan mapagngayongayong pag-adal sa Tataramon nin Dios, kaiba kan kosog na itinatao ni Jehova, makapagpapadagos kita sa pagpahayag kan mensahe nin Kahadean. (Filipos 4:13; Kapahayagan 14:6) Manongod kaini, ano pa an satong manonodan sa mga propeta ni Jehova asin sa iba pa niang lingkod kan suanoy na mga panahon?

Pag-iribanan sa Ministeryo sa Langtad

17. Ano an nagkapirang Makakasuratan na halimbawa nin kapakipakinabang na pag-iribanan sa paglilingkod sa Dios?

17 Sa pag-asikaso kan saiyang asignasyon, an propeta nin Dios na si Moises kan primero tinabangan kan saiyang matuang tugang, si Aaron. Sinabihan ni Jehova si Moises: ”Si [Aaron] mataram sa banwaan para sa saimo, asin mangyayari na sia maglilingkod bilang ngoso sa saimo.” (Exodo 4:16) Horophoropa man, an kaaldawan kan mga propetang si Elias asin Eliseo, kan nagdakol “an mga aking lalaki kan mga propeta.” Minalataw na an mga ini mga grupo kan mga lingkod nin Dios na nagtatarabangan na daing duwa-duwang naoogma sa marahay na pag-oroiribanan. (2 Hade 2:3-5; 4:38; ikomparar an 1 Samuel 10:5, 10.) Siyempre si Moises asin Aaron patin “an mga aking lalaki kan mga propeta” dai nakikabtang sa pagpahayag kan maogmang bareta kan Kahadean. Alagad, an saindang pakikiasosyar kapakipakinabang sa sainda gabos. Pakalihis nin mga siglo isinugo ni Jesu-Cristo sa pagmiministeryo an 70 disipulo na “manduwaduwa,” asin mayong pagduda na an mga ini nakinabang sa itinaong pag-iribanan.—Lucas 10:1-16; ikomparar an Gibo 17:10, 11; 20:20.

18. Paano an pag-iribanan sa ministeryo nagserbi sa nakatatabang na katuyohan ngonyan?

18 Kan taon 1953, pinonan kan mga Saksi ni Jehova an sarong programa na an mga parabalangibog kan Kahadean nag-iiribanan sa ministeryo sa langtad. Siyempre, dai ini ginibo para sana sa pag-iribanan. An programang ini sa pagsasanay dinisenyo tanganing gibohon na mas epektibong mga paratokdo asin parahulit kan maogmang bareta an mga lingkod nin Dios. Nasa isip an katuyohan na iyan, an mas may kabatidan na mga parahayag kan Kahadean nakikabtang sa ministeryo kaiba kan mga mas bagohan. An programang ini sa pagsasanay sa harong-harong nagin kapakipakinabang na marhay asin nakatabang sa banwaan ni Jehova na umoswag sa pagpahayag sa publiko kan saiyang ngaran. (1 Timoteo 4:16) Ngonyan, an seguridad saro pang dahelan na an mga Kristiano mas marahay na makikabtang sa ministeryo nin “manduwaduwa,” nangorogna sa nagkapirang lugar.

19. Ano an maninigong isaisip manongod sa personal na mga pasohan sa ministeryo?

19 Baga man kamo may kaibang sarong kapagtubod sa ministeryo o kamo solong minaduman sa pinto, maghingoang aboton an sarong personal na pasohan o katuyohan. Iyan maninigong realistiko, puwedeng aboton. Kaipuhan daw nindo nin tabang sa pagbagay kan saindong introduksion tanganing mapukaw an interes kan mga tawo sa saindong teritoryo? Kun iyo, tibaad puwede kamong umiba sa sarong payunir, sarong pambilog na panahon na parabalangibog kan Kahadean, o sa sarong parahayag na puwedeng espesyalmenteng epektibo sa paggamit nin mahusay na mga introduksion. An saindong kaibanan puwedeng makatabang saindo sa pag-andam asin paggamit kan mga introduksion na itinao sa An Satong Ministeryo sa Kahadean o sa librong Reasoning From the Scriptures. Sa mga okasyon na magkaibanan kamong nagpapatotoo sa harong-harong, maingat na maghinanyog sa mga pag-atubang kan saindong kaibanan. Dangan probaran nindo mismo an kaparehong pag-atubang sagkod na magin tuod na kamo sa kabtang na ini kan saindong ministeryo.

20, 21. Ano an makapagpapangyari sa pag-iribanan sa ministeryo sa langtad na magin nangorognang nakatatabang?

20 Ano kun nangangaipo kamo nin tabang sa paggibo nin epektibong mga pagdalaw liwat na an katuyohan makapoon nin pag-adal nin Biblia sa harong? Puwedeng paagi sa saindong konduktor sa Pag-adal sa Libro kan Kongregasyon, ikaaareglong ibanan kamo sa paglilingkod sa langtad nin sarong parahayag sa Kahadean na epektibo nang gayo sa pagpoon nin mga pag-adal sa Biblia. Dai magin silensiong kaiba kun magkaibanan kamong nagdadalaw liwat. Imbes pakatapos na ipaheling kan kaibanan nindo kun paano nia ginigibo an sarong pagdalaw, puwedeng maheling nindong kapakipakinabang na arogon an pag-atubang kun magibo kan sunod na pagdalaw liwat. Yaon an kaibanan nindo tanganing tumabang asin tumao nin suhestion pakatapos.—Ikomparar an Galacia 6:6.

21 An siring kamamomoton na tabang gikan sa sarong kaiba sa paglilingkod sa langtad makatatabang saindo na maabot an saindong mga pasohan sa ministeryo. An tabang na ini asin an saindong odok na pagpahalaga sa mamomoton na kabootan ni Jehova sa pagtogot saindo na gibohon an pribilehiyong trabahong ini magpapangyari saindo na magin mas epektibo pa ngani sa saindong mga aktibidad sa paghuhulit kan Kahadean. Asin padangaton logod nindo an saindong pribilehiyo nin pag-omaw ki Jehova paagi sa perming pagtaram nin marahay manongod sa saiya asin paagi sa regular na pagpahayag sa publiko kan saiyang ngaran.—Salmo 145:1, 2, 9-13.

22. An sunod niatong pag-aradal tatabangan kiang simbagon an anong mga hapot?

22 Bilang mga Saksi ni Jehova, kita paorootrong nagsosongko sa satong ministeryo sa harong-harong. Dakol an naghihinanyog sa maogmang bareta na may odok na pagpahalaga. Alagad, an iba tibaad nag-aalangan na maghinanyog sa mensahe kan Kahadean. Ano an maninigo niatong gibohon sa irarom nin siring na mga kamugtakan? Paano kita makapagpapadagos sa gibohon na iinasignar ni Jehova sa saiyang banwaan? Anong Makakasuratan na mga halimbawa an makatatabang o makagigiya sa sato? Sisimbagon an mga hapot na ini sa sunod na artikulo.

Nasabotan daw Nindo an mga Puntong Ini?

◻ Ano an sinabi kapwa ni Oseas asin apostol Pablo monongod sa mga atang sa Dios?

◻ Ano an nagmotibar ki Ezequiel asin Amos na maghula?

◻ Paano niato maninigong mansayon an satong gibohon na paghuhulit kan Kahadean?

◻ Anong mga pakinabang an makukua sa pag-iribanan sa ministeryo sa langtad?

[Mga ritrato sa pahina 13]

An makahulogan na pag-iribanan makatatabang sato na umoswag sa ministeryo

    Bicol Publications (1983-2025)
    Mag-log Out
    Mag-log In
    • Bicol
    • I-share
    • Settings na Gusto Mo
    • Copyright © 2025 Watch Tower Bible and Tract Society of Pennsylvania
    • Kasunduan sa Paggamit
    • Palisiya sa Privacy
    • Privacy Settings
    • JW.ORG
    • Mag-log In
    I-share