Si Job Nakatagal​—Iyo Man Kita!

“Uya! Inaapod tang maogma idtong mga nakatagal.”​—SANTIAGO 5:11.

1. Ano an sinabi nin sarong gurang nang Kristiano manongod sa mga pagbalo sa saiya?

‘LINALAPAG ako kan Diablo! Namamatean ko an arog kan ki Job!’ Paagi sa mga tataramon na iyan ipinahayag ni A. H. Macmillan an saiyang mga saboot sa sarong dayupot na katood sa opisina prinsipal kan mga Saksi ni Jehova. Natapos ni Tugang na Macmillan an saiyang daganon na buhay sa edad na 89 kan Agosto 26, 1966. Aram nia na an kredito para sa maimbod na paglilingkod kan linahidan na mga Kristianong siring saiya ‘mapapasakaibanan ninda.’ (Kapahayagan 14:13) Iyo nanggad, sinda magpapadagos na daing ontok sa paglilingkod ki Jehova paagi sa pagkabuhay liwat sa inmortal na buhay sa langit. Naggayagaya an saiyang mga katood na si Tugang na Macmillan nagkamit kan balos na iyan. Alagad, sa saiyang ultimong mga taon digdi sa daga, sia nag-agi nin manlaenlaen na pagbalo, kabale an mga problema sa salud na nagpangyari saiya na mamatean na gayo an mga pagprobar ni Satanas na barion an saiyang integridad sa Dios.

2, 3. Siisay si Job?

² Kan sabihon ni Tugang na Macmillan na namatean nia an arog kan ki Job, an sinasabi nia sarong tawo na nagtagal nin dakulang mga pagbalo sa pagtubod. Si Job nag-erok sa “daga nin Uz,” na posibleng sa amihanan na Arabia. Sarong gikan kan aki ni Noe na si Sem, sia sarong parasamba ki Jehova. An mga pagbalo ki Job minalataw na nangyari mga pag-oltanan kan pagkagadan ni Jose asin kan panahon na pinatunayan ni Moises an saiyang sadiri na matanos. Durante kan peryodong idto mayo ni saro digdi sa daga na kapareho ki Job an diosnon na debosyon. Si Jehova minansay si Job bilang tawong daing kanawayan, matanos, natatakot sa Dios.​—Job 1:​1, 8.

³ Bilang “an pinakadakula sa gabos na taga-Subangan,” si Job igwang dakol na surogoon, asin an saiyang mga hayop may kabilangan na 11,500. Pero an espirituwal na mga kayamanan an pinakamahalaga sa saiya. Arog nin diosnon na mga ama ngonyan, posibleng marhay na tinokdoan ni Job an saiyang pitong aking lalaki asin tolong aking babae manongod ki Jehova. Dawa dai na sinda nag-iistar sa saiyang harong, sia nagserbi bilang saserdote nin pamilya paagi sa pagdolot nin mga atang para sa sainda, kun halimbawang sinda nagkasala.​—Job 1:​2-5.

4. (a) Taano ta maninigong horophoropon nin binabalong mga Kristiano an tawong si Job? (b) Manongod ki Job, anong mga hapot an pag-oolayon niato?

⁴ Si Job saro na puwedeng horophoropon nin pinaglalamag na mga Kristiano tanganing pakosogon an saindang sadiri para sa mapasensiang pakatagal. “Uya!” an isinurat ni disipulo Santiago. “Inaapod tang maogma idtong mga nakatagal. Nadangog nindo an dapit sa pakatagal ni Job asin naheling an bunga na itinao ni Jehova, na si Jehova malomoy na gayo sa kapadangatan asin maheherakon.” (Santiago 5:11) Arog ki Job, an linahidan na mga parasunod ni Jesus asin an “dakulang kadaklan” sa presenteng aldaw nangangaipo nin pakatagal tanganing mapangganahan an mga pagbalo sa pagtubod. (Kapahayagan 7:​1-9) Kaya, anong mga pagbalo an tinagalan ni Job? Taano ta nangyari an mga iyan? Asin paano kita puwedeng makinabang sa saiyang mga eksperyensia?

Sarong Mahalagang Marhay na Isyu

5. Dai aram ni Job, ano an nangyayari kaidto sa langit?

⁵ Dai naaaraman ni Job, sarong dakulang isyu an papalatawon sa langit. Sarong aldaw “an mga aki kan tunay na Dios nagtirindog sa atubangan ni Jehova.” (Job 1:6) Presente an bugtong na Aki nin Dios, an Tataramon. (Juan 1:​1-3) Siring man an matanos na mga anghel asin an masumbikal na mga anghel na ‘aki nin Dios.’ (Genesis 6:​1-3) Yaon duman si Satanas, huli ta an pagpalayas saiya sa langit dai mangyayari pakatapos na mapatindog an Kahadean kan 1914. (Kapahayagan 12:1-12) Kan kaaldawan ni Job, si Satanas mapalataw nin sarong mahalagang marhay na isyu. Kukustionon nia an pagigin matanos kan soberaniya ni Jehova sa gabos Niang linalang.

6. Ano an hinihingoang gibohon ni Satanas, asin paano nia pinakaraot si Jehova?

⁶ “Saen ka hale?” an hapot ni Jehova. Si Satanas nagsimbag: “Sa paglibot sa daga asin sa paglakawlakaw dian.” (Job 1:7) Sia nagpaparahanap nin sarong masisiba. (1 Pedro 5:​8, 9) Paagi sa pagbari sa integridad kan mga indibiduwal na naglilingkod ki Jehova, pagmamaigotan ni Satanas na patunayan na mayo nin siisay man na biyong magkukuyog sa Dios huli sa pagkamoot. Kinokonsiderar an isyu, hinapot ni Jehova si Satanas: “Narisa mo daw an sakong lingkod na si Job, na mayo ni saro na nakaaagid sa saiya sa daga, lalaking daing kanawayan asin matanos, na natatakot sa Dios asin naglilikay sa maraot?” (Job 1:8) Si Job nakaabot sa mga pamantayan nin Dios na kinonsiderar an saiyang mga pagkabakong sangkap. (Salmo 103:​10-14) Pero suminimbag si Satanas: “Natatakot daw si Job sa Dios na mayo nin kabayadan? Bako daw na ika mismo nagbugtak nin proteksion sa palibot nia asin sa saiyang harong asin sa gabos niang sadiri? Binendisyonan mo an gibo kan saiyang mga kamot, asin an saiyang mga hayop nakalakop sa daga.” (Job 1:​9, 10) Sa siring pinakaraot kan Diablo si Jehova paagi sa pagparisa na mayo nin siisay man na namomoot asin nagsasamba sa Saiya huli sa kun ano Sia kundi na sinusuholan Nia an mga linalang tanganing maglingkod sa Saiya. An aligasyon ni Satanas iyo na si Job naglingkod sa Dios huli sa paslong pakinabang, bakong huli sa pagkamoot.

Nan-aatake si Satanas!

7. Sa anong paagi inangat kan Diablo an Dios, asin paano suminimbag si Jehova?

⁷ “Alagad,” sabi ni Satanas, “ngonyan, tabi unata an saimong kamot asin dotdota an gabos niang sadiri asin helinga kun baga dai ka nia langhadan sagkod sa saimong lalauogon.” Paano sisimbagon nin Dios an siring kanakakainsultong angat? “Uya!” an sabi ni Jehova. “An gabos niang sadiri nasa saimong kamot. Dai mo sana pag-unaton an saimong kamot tumang sa saiya mismo!” Nagsabi an Diablo na an gabos na sadiri ni Job binendisyonan, dinugangan, asin prinotehiran. Itotogot nin Dios na magsakit si Job, pero dai dodotdoton an saiyang hawak. Determinadong gumibo nin maraot, binayaan ni Satanas an asamblea.​—Job 1:​11, 12.

8. (a) Anong materyal na mga pagkalugi an naeksperyensiahan ni Job? (b) Ano an totoo manongod sa “mismong kalayo nin Dios”?

⁸ Dai nahaloy, nagpoon an satanikong pag-atake. An saro sa mga surogoon ni Job nagtao saiya kan maraot na baretang ini: “Nangyari na kan an mga baka mismo nag-aarado asin an mga asna nagsasarabsab sa harani sainda kan an mga Sabeo nagdatong sa pagsalakay asin pag-agaw sa sainda, asin an mga nag-aataman ginadan ninda sa tarom nin minasbad.” (Job 1:​13-15) Hinale na an proteksion sa pagsadiri ni Job. Haros tolos-tolos, ginamit an direktang kapangyarihan nin demonyo, huli ta an saro pang surogoon nagbareta: “An mismong kalayo nin Dios huminolog hale sa kalangitan asin naglaad sa tahaw kan mga karnero asin sa mga nag-aataman asin inubos sinda.” (Job 1:16) Sa diablo nanggad na palatawon na an Dios an may paninimbagan sa siring na kalamidad sa saiya mismong lingkod! Huling hale sa langit an kikilat, si Jehova tolos an puwedeng basolon, pero aktuwalmente gikan sa demonyo an kalayo.

9. Paano an pagbagsak nin kabuhayan nakaapektar sa relasyon ni Job sa Dios?

⁹ Mantang padagos sa pag-atake si Satanas, an saro pang surogoon nagbareta na inagaw kan mga Caldeo an mga kamelyo ni Job asin na ginadan an gabos na iba pang nag-aataman. (Job 1:17) Minsan ngani si Job nag-agi nin pagbagsak nin kabuhayan, dai ini nakaraot sa saiyang relasyon sa Dios. Matatagalan daw nindo an dakulang kawaran sa materyal na dai binabari an saindong integridad ki Jehova?

Nangyari an Mas Dakulang Trahedya

10, 11. (a) Ano an nangyari sa sampulong aki ni Job? (b) Pakatapos kan makaturotristeng pagkagadan kan mga aki ni Job, paano nia minansay si Jehova?

¹⁰ Dai pa tapos si Satanas sa pag-atake ki Job. Pero saro pang surogoon an nagbareta: “An saimong mga aking lalaki asin mga aking babae nagkakarakan asin nag-iirinom nin arak sa harong kan saindang matuang tugang na lalaki. Asin, uya! may nagdatong na makosog na doros hale sa rehiyon nin kaawagan, asin sinaguso kaiyan an apat na kanto kan harong, kaya nagaba iyan sa ibabaw kan mga barobata asin sinda nagkagaradan. Asin ako nakadulag, ako sana, tanganing magsabi saimo.” (Job 1:​18, 19) An mga natawan nin salang impormasyon tibaad magsabi na an kalaglagan na causa kan doros na idto ‘sarong gibo nin Dios.’ Alagad, an kapangyarihan nin demonyo tuminama ki Job nangorogna sa saiyang madaling makolgan na pagmate.

¹¹ Huli sa grabeng kamondoan, ‘ginisi ni Job an saiyang daing takyag na pan-ibabaw na gubing, kinaris an buhok sa saiyang payo, huminurohod sa daga, asin nagduko.’ Minsan siring, hinanyoga an saiyang mga tataramon. “Si Jehova mismo an nagtao, asin si Jehova mismo an buminawe. Padagos na pag-omawon an ngaran ni Jehova.” Idinagdag pa kan tala: “Sa gabos na ini si Job dai nagkasala o nagsahot nin ano man na sala sa Dios.” (Job 1:​20-22) Nadaog giraray si Satanas. Kumusta kun maeksperyensiahan niatong magadanan asin magmondo bilang mga lingkod nin Dios? An daing kapasloan na debosyon ki Jehova asin pagsarig sa saiya puwedeng magpangyari sato na makatagal bilang mga nagpapadanay nin integridad, siring kan ginibo ni Job. An mga linahidan asin an saindang kairiba na igwang paglaom sa daga siertong makakakua nin karangahan asin kosog sa talang ini dapit sa pakatagal ni Job.

Orog na Nag-iinit an Isyu

12, 13. Sa saro pang asamblea sa langit, ano an hinagad ni Satanas, asin paano suminimbag an Dios?

¹² Dai nahaloy si Jehova nag-apod nin saro pang asamblea sa langitnon na mga rona. Mayo nang aki si Job, nagtitios na tawo, na garo baga pinapasakitan nin Dios, pero marigon an saiyang integridad. Siyempre, dai aakoon ni Satanas na falso an saiyang mga sahot tumang sa Dios asin ki Job. Ngonyan an ‘mga aki nin Dios’ makakadangog kan argumento asin pangangatanosan mantang minamaniobra ni Jehova an Diablo tanganing tapuson na an isyu.

¹³ Pinapanimbag si Satanas, naghapot si Jehova: “Saen ka hale?” An simbag? “Sa paglibot sa daga asin sa paglakawlakaw dian.” Si Jehova nagtao giraray nin atension sa saiyang daing kanawayan, matanos, natatakot sa Dios na lingkod na si Job, na marigon pang nangangapot sa saiyang integridad. An Diablo suminimbag: “Kublit para sa kublit, asin an gabos na sadiri nin tawo itatao nia para sa saiyang kalag. Alagad ta, unata tabi an saimong kamot asin dotdota sagkod an saiyang tolang asin an saiyang laman patin helinga kun baga dai ka nia isumpa sagkod sa saimo mismong lalauogon.” Kaya an Dios nagsabi: “Uya sia yaon sa saimong kamot! Ingate sana an saiyang kalag mismo!” (Job 2:​2-6) Naghohona na dai pa man hinale ni Jehova an gabos na nagpoprotehir na olang, hinagad ni Satanas an pagdotdot sa tolang asin laman ni Job. Dai totogotan an Diablo na gadanon si Job; pero aram ni Satanas na an pisikal na helang ikakokolog nia asin papalatawon na garo baga sia nagtitios nin silot gikan sa Dios huli sa hilom na mga kasalan.

14. Ano an ipinamate ni Satanas ki Job, asin taano ta mayo nin tawong makapagiginhawa sa nagsasakit?

¹⁴ Pinahale sa asambleang idto, si Satanas naghale na igwa nin makadiablong kaogmahan. Pinasakitan nia si Job nin “nakagagadan na pigsa poon sa dapan kan saiyang bitis sagkod sa alimpoporo kan saiyang payo.” Labi-labing kasakitan an tinagalan ni Job mantang sia nagtutukaw sa abo asin kinakaros an saiyang sadiri paagi sa sarong pidaso nin koron! (Job 2:​7, 8) Mayo nin tawong doktor na makakapaginhawa sa saiya sa makologon, makababalde, asin makasosopog na kamatean na ini, huli ta causa iyan nin satanikong kapangyarihan. Solamenteng si Jehova an makakapaomay ki Job. Kun kamo sarong naghehelang na lingkod nin Dios, nungkang lingawan na kaya kamong tabangan nin Dios na makatagal asin puwede nia kamong tawan nin buhay sa sarong bagong kinaban na mayo nin helang.​—Salmo 41:​1-3; Isaias 33:24.

15. Ano an isinadol kan agom ni Job na gibohon nia, asin ano an saiyang reaksion?

¹⁵ Sa katapustapusi, an agom ni Job nagsabi: “Nangangapot ka pa giraray sa saimong integridad? Sumpaa an Dios asin magadan ka!” An “integridad” nangangahulogan nin daing kanawayan na debosyon, asin tibaad sia mapan-insultong nagtaram tanganing ikasumpa ni Job an Dios. Pero nagsimbag sia: “Ika nagtataram siring sa pagtaram nin saro sa mga babaeng lolong. Aakoon sana daw niato an marahay hale sa tunay na Dios asin dai man aakoon an maraot?” Maski an pakanang ini ni Satanas dai nag-aser, huli ta an sabi sato: “Sa gabos na ini si Job dai nagkasala sa saiyang mga ngabil.” (Job 2:​9, 10) Ipamugtak na an nagkokontrang mga miembro nin pamilya magsabi na may kamangmangan na pinapapagal niato an satong sadiri sa Kristianong mga aktibidad asin sadolon kita na isikwal si Jehova Dios. Arog ki Job, kaya niatong tagalan an siring na pagbalo huling namomotan niato si Jehova asin minamawot ta na omawon an saiyang banal na ngaran.​—Salmo 145:​1, 2; Hebreo 13:15.

Tolong Aroganteng Impostor

16. Sairisay an nagdaratong, na soboot tanganing rangahon si Job, pero paano sinda minaniobra ni Satanas?

¹⁶ Sa saro pang nagin satanikong pakana, tolong “kairiba” an nagdatong, na soboot tanganing rangahon si Job. An saro iyo si Elifaz, na posibleng gikan ni Abraham paagi ki Esau. Huling si Elifaz an enot na nagtaram, mayong duwa-duwa na sia an pinakamatua. Presente man si Bildad, sarong gikan ni Sua, na saro sa mga aki ni Abraham ki Cetura. An ikatolong lalaki iyo si Zofar, na inaapod na Naamatita tanganing ipamidbid an saiyang pamilya o lugar na iniistaran, na posibleng sa solnopan na amihanan nin Arabia. (Job 2:11; Genesis 25:​1, 2; 36:​4, 11) Arog kan mga naghihingoang papangyarihon an mga Saksi ni Jehova na isikwal an Dios ngonyan, an tolong ini minaniobra ni Satanas sa paghihingoang papangyarihon si Job na mag-akong may kasalan sa falsong mga sahot asin barion an saiyang integridad.

17. Ano an ginibo kan tolong bisita, asin ano an dai ninda ginibo sa laog nin pitong aldaw asin pitong banggi?

¹⁷ An tolo hayagan na nagpaheling nin pakikidamay paagi sa pagtangis, paggisi kan saindang mga gubing, asin pagbumbon nin kabokabo sa ibabaw kan saindang payo. Pero tuminukaw sinda sa kaibahan ni Job sa laog nin pitong aldaw asin pitong banggi na daing itinataram ni sarong tataramon nin pagranga! (Job 2:​12, 13; Lucas 18:​10-14) An tolong aroganteng impostor na ini mayo nanggad nin espirituwalidad kaya mayo sindang ano man na nakararangang ikataram manongod ki Jehova asin sa saiyang mga panuga. Minsan siring, sinda naggigibo nin salang mga konklusyon asin nag-aandam na gamiton iyan tumang ki Job kun maotob na ninda an pormalismo nin pagtangis sa publiko. Interesante nanggad, bago natapos an pitong aldaw na pagsilensio, an solterong si Eliu tuminukaw sa distansiang madadangog nia an orolay.

18. Taano si Job ta nagmawot nin katoninongan sa kagadanan?

¹⁸ Sa katapustapusi pinondo ni Job an pagkasilensio. Huling dai nakakua nin karangahan sa tolong bisita, isinumpa nia an aldaw kan saiyang pagkamundag asin naghorophorop kun taano ta pinalalawig an saiyang miserableng buhay. Nagmawot sia nin katoninongan sa kagadanan, na dai ngani naiimahinar na puwede pa siang magkaigwa nin tunay na kagayagayahan bago sia magadan, ngonyan na sia nasa grabeng pagtios, nagadanan, asin makuri an kamatean. Pero dai itotogot nin Dios na dotdoton si Job na puwede niang ikagadan.​—Job 3:1-26.

Nag-atake an mga Nagsasahot ki Job

19. Sa anong mga bagay putik na pinagsahotan ni Elifaz si Job?

¹⁹ Si Elifaz an enot na nagtaram sa tolong pagdebate na orog pang buminalo sa integridad ni Job. Sa saiyang enot na pahayag, si Elifaz naghapot: “Saen pinoroho an mga matanos?” Ikinonklusyon nia na si Job siertong may nagibong maraot kaya nag-ako kan silot nin Dios. (Job, kapitulo 4, 5) Sa saiyang ikaduwang pahayag, tinuya ni Elifaz an kadonongan ni Job asin naghapot: “Ano sa aktuwal an aram mo na dai niamo aram?” Ipinarisa ni Elifaz na hinihingoa ni Job na ipaheling an saiyang sadiri na mas halangkaw sa Makakamhan sa gabos. Tinatapos an saiyang ikaduwang pagsalakay, ilinadawan nia si Job na nagkasala nin apostasiya, pagsuhol, asin pandadaya. (Job, kapitulo 15) Sa saiyang ultimong pahayag, putik na pinagsahotan ni Elifaz si Job nin dakol na krimen​—pangingikil, pangunguri nin tinapay asin tubig sa mga dukha, asin pan-aapi sa mga balo asin ilo.​—Job, kapitulo 22.

20. Anong klase an mga pag-atake ni Bildad ki Job?

²⁰ Bilang ikaduwang mataram sa kada saro kan tolong pagdebate, parateng sinusunod ni Bildad an pankagabsan na temang inestablisar ni Elifaz. An mga pahayag ni Bildad mas halipot pero mas nakakokolog. Pinagsahotan pa ngani nia nin salang gibo an mga aki ni Job asin sa siring maninigo sa kagadanan. Paagi sa salang pangangatanosan, ginamit nia an ilustrasyon na ini: Kun paanong naaalang asin nagagadan an papiro asin gaho kun mayong tubig, iyo man an mangyayari sa “gabos na nagkakarilingaw sa Dios.” Totoo an pahayag na iyan, pero bako iyan aplikado ki Job. (Job, kapitulo 8) Ibinilang ni Bildad an mga pagsakit ni Job na siring kan mga nangyayari sa mga maraot. (Job, kapitulo 18) Sa saiyang halipot na ikatolong pahayag, nangatanosan si Bildad na an tawo “sarong alimon” asin “sarong ulod” asin kun siring marigsok sa atubangan nin Dios.​—Job, kapitulo 25.

21. Ano an ipinagsahot ni Zofar ki Job?

²¹ Si Zofar an ikatolong mataram sa debate. Sa pankagabsan, an saiyang pangangatanosan nakakaagid kan ki Elifaz asin Bildad. Pinagsahotan ni Zofar si Job nin karatan asin sinadol siang isikwal an saiyang makasalan na mga gibo. (Job, kapitulo 11, 20) Si Zofar uminontok sa pagtaram pakatapos kan duwang pagdebate. Mayo na siang ikadagdag sa ikatolong pagdebate. Alagad, durante kan bilog na debate, mapusong sinimbag ni Job an mga nagsasahot sa saiya. Halimbawa, sa sarong punto sia nagsabi: “Kamo gabos mga pararangang nakapariribok! Matatapos daw an mga tataramon na madoros?”​—Job 16:​2, 3.

Puwede Kitang Makatagal

22, 23. (a) Siring sa kaso ni Job, paano puwedeng hingoahon kan Diablo na barion an satong integridad ki Jehova Dios? (b) Minsan ngani si Job nagtagal nin manlaenlaen na pagbalo, ano an puwede niatong ihapot manongod sa saiyang kaisipan?

²² Arog ki Job, puwedeng mapaatubang kita sa labi sa sarong pagbalo sa sarong panahon, asin puwedeng gumamit si Satanas nin pagpadisganar o iba pang dahelan sa saiyang paghihingoang barion an satong integridad. Puwede niang hingoahon na patalikodon kita ki Jehova kun igwa kita nin mga problema sa pagbuhay. Kun magadan an sarong namomotan o mag-agi kita nin helang, puwedeng hingoahon ni Satanas na sutsutan kitang basolon an Dios. Arog kan kairiba ni Job, may saro na tibaad sahotan pa ngani kita nin putik. Siring kan sabi ni Tugang na Macmillan, puwedeng ‘linalapag kita’ ni Satanas, pero puwede kitang makatagal.

²³ Siring kan narisa na niato, tinagalan ni Job an manlaenlaen na pagbalo sa saiya. Alagad, basta na sana daw sia nagtagal? Aktuwal daw na nagkaigwa sia nin laglag na espiritu? Helingon niato kun baga nawaran man nanggad nin paglaom si Job.

Paano Kamo Masimbag?

◻ Anong dakulang isyu an pinalataw ni Satanas kan kaaldawan ni Job?

◻ Paagi sa ano lubos na nabalo si Job?

◻ Ano an ipinagsahot kan tolong “kairiba” ni Job sa saiya?

◻ Siring sa kaso ni Job, paano puwedeng hingoahon ni Satanas na barion an satong integridad ki Jehova?

[Ritrato sa pahina 10]

A. H. Macmillan