Pagpanigo sa Sarong Pundamental na Pangangaipo nin Tawo Paagi sa Pagmidbid
AN SINSERONG “Marahay na gibo!” “Naoogma ako sa saimo!” o “Ginibo mo an saimong pinakamakakaya; ipinag-oorgolyo mi ika” nakatatabang na marhay na mapaoswag an paggalang sa sadiri, nangorogna kun iyan hale sa saro na iginagalang nindo. An mga tawo naoogma asin napaparahay kun nakakaako nin pagmidbid. Paagi kaiyan, nag-ooswag sinda asin mas maogma. Iyo nanggad, an maninigong pagmidbid mahalaga sa isip asin puso kun paanong an marahay na pagkakan mahalaga sa hawak.
An sarong diksionaryo tinatawan nin kahulogan an pagmidbid na “pag-ako sa sarong indibiduwal bilang maninigo na tawan nin konsiderasyon o atension” asin “espesyal na pagmangno o atension.” Iyan konektadong marhay sa paggalang, pakamate nin respeto, na kun itinao nagpaparisa nin makatanosan na pagkarkulo o pagturotimbang sa sarong tawo asin nin grado nin pagmidbid na maninigo sa saiya.
Pagmidbid—Sarong Pundamental na Pangangaipo
An pagtao nin kredito kun saen maninigo an kredito makatanosan asin mayong pagpapalaen. Si Jesus nagtao nin arogan sa saiyang ilustrasyon kan mga oripon na pinaniwalaan kan kagurangnan kan saiyang mga rogaring. Sa pagmidbid sa tamang pag-asikaso kan saiyang mga kayamanan, sia nagsabi: “Marahay na gibo, marahay asin maimbod na oripon!” (Mateo 25:19-23) Alagad, parateng marhay na an maninigong itaong paggalang na ini nalilingawan. An dai pakatao nin pagmidbid nagpopogol sa entusiasmo asin sadiring kabotan. Siring kaini an pagkasabi kaiyan ni Iona: “An pagmidbid pinapamate kamong kinakaipuhan, nagugustohan, asin pinahahalagahan . . . Nagtatao iyan sa saindo nin sadiring kabotan. Kun kamo nalilingawan, nakakamate kamong matamlay asin pinabayaan.” Dagdag pa ni Patrick: “Dangan depisil na mapagdanay an halangkaw na kuwalidad asin produksion.” Mahalaga nanggad, kun siring, na makanood kita kun paano asin noarin matao nin pagmidbid. Kita gabos nagmamawot na gayo kan katiwasayan sa pakaaram na kita inaako. Iyan sarong pundamental na pangangaipo nin tawo.
An sarong tataramon nin pag-omaw, dagdag na paninimbagan, o minsan materyal na regalo nag-aanimar sa saindo na padagos na gibohon an saindong pinakamakakaya. Totoo ini baga man kamo magurang, agom na lalaki, agom na babae, aki, miembro nin kongregasyon, o paraataman. “Kun tinatawan nin pagmidbid,” an sabi ni Margaret, “ako naoogma, nakakamateng kaipuhan, asin igwa ako kan pagmawot na gumibo nin mas marahay.” Minaoyon si Andrew, na an sabi: “Naggagayagayang marhay ako, na nagtatao nin pag-animar na orog pa nganing magmaigot.” Alagad, an pagtao nin pagmidbid asin paggalang sa saro nangangaipo nin maingat na paghorophorop asin marahay na paghusgar.
Arogon an Arogan ni Jehova sa Pagtao nin Pagmidbid
An pangenot na halimbawa nin pagmidbid sa halaga nin iba iyo si Jehova Dios. Minimidbid nia an mga maninigong tawan nin pagmidbid. Ginirumdom nia an mga tawong siring baga ki Abel, Enoc, asin Noe. (Genesis 4:4; 6:8; Judas 14) Minidbid ni Jehova si David huli sa saiyang pambihirang kaimbodan. (2 Samuel 7:16) Si Samuel, na bilang sarong propeta tinawan nin onra si Jehova sa laog nin dakol na taon, tinawan man nin Dios nin onra, na tolos-tolos na sinimbag an pamibi ni Samuel para sa tabang na daogon an mga Filisteo. (1 Samuel 7:7-13) Dai daw kamo makakamate nin onra na magkamit kan siring na pagmidbid nin Dios?
An pagpasalamat asin pag-apresyar konektadong marhay sa pagmidbid. Sinasadol kita kan Biblia na ‘ipaheling niato na kita nagpapasalamat’ asin na magtanaw nin utang na boot huli sa ginibo para sa sato. (Colosas 3:15; 1 Tesalonica 5:18) Minsan ngani espisipikong minaaplikar ini sa pagigin mapagpasalamat ki Jehova, totoo man iyan sa aroaldaw na mga bagay sa buhay. Inapresyar ini ni apostol Pablo. Tinawan nia nin pagmidbid si Febe na ‘paratabang sa dakol’ asin sinda Prisca asin Aquila huli sa saindang ‘pagsapeligro kan saindang mga liog’ para sa saiya asin para sa iba. (Roma 16:1-4) Imahinara an siertong namatean ninda kan maresibi an hayagan na pagpasalamat na iyan. Marahay man para ki Pablo na magkaigwa kan kaogmahan sa pagtao nin pagmidbid, onra, asin pagpakosog. Puwede man niatong arogon si Jehova asin an saiyang mapagpahalagang mga parasamba paagi sa pagpaheling nin tamang pagmidbid sa mga maninigo kaiyan.—Gibo 20:35.
Pagmidbid sa Laog kan Pamilya
“An dikit na pagmidbid nakatatabang na marhay sa paggibong magin maogma an buhay,” an sabi ni Mitchell, sarong agom na lalaki asin Kristianong magurang sa kongregasyon. “Napapamoot kamo, posibleng sagkod lamang, sa saro na nagtatao saindo nin pagmidbid.” Halimbawa, an sarong Kristianong agom na lalaki nagpapasan nin magabat na paninimbagan asin naggigibo nin importanteng mga desisyon na kalabot an karahayan kan pamilya. Dapat siang magtagama para sa espirituwal, materyal, asin emosyonal na mga pangangaipo kan pamilya. (1 Timoteo 5:8) Kanigoan an pagpasalamat nia kun ipinaheheling an tamang pagmidbid sa itinao nin Dios na asignasyon sa saiya bilang payo nin pamilya asin kun an saiyang agom nagpapaheling sa saiya nin “hararom na paggalang”!—Efeso 5:33.
Dai dapat lingawan an trabaho nin sarong agom na babae, na ginigibo na dai naheheling nin publiko. An modernong mga ideya puwedeng menuson an siring na trabaho asin halean iyan nin dignidad asin halaga. Pero, iyan nakaoogma sa Dios. (Tito 2:4, 5) Nakagiginhawa nanggad kun an mapagmansay na agom na lalaki inoomaw an saiyang agom, partikular na sa gabos na kabtang nin buhay na dian nangongorog sia, na itinatao sa saiya an siring na pagmidbid sa irarom kan saiyang pagkapayo! (Talinhaga 31:28) Si Rowena nagsasabi manongod sa saiyang agom: “Kun minimidbid nia an sakong ginigibo, napapasilan akong magpasakop sa saiya asin na tawan sia nin onra patin igalang.”
An Amerikanong edukador na si Christian Bovee nagsabi kaidto: “An makatanosan na pag-omaw para sa mga aki kun paanong an saldang para sa mga burak.” Iyo, minsan an saditon pang aki nangangaipo nin dayaday na pag-asegurar na sia pinahahalagahan na miembro nin pamilya. Durante kan mga taon nin pagtin-edyer, na pano nin bagong emosyonal asin pisikal na mga pagliliwat, igwa nin nadudugangan na pagparaisip manongod sa personal na itsura, na kadungan an pagmawot nin independensia asin pagmidbid. Nangorogna sa panahon na ini, an sarong tin-edyer kaipuhan na makamateng namomotan kan saiyang mga magurang asin trataron na may pagsabot asin sa-tawong kabootan. An naggugurang na mga magurang asin apoon nangangaipo man nin pag-asegurar na sinda may pakinabang pa asin namomotan, na sinda dai ‘isinikwal sa panahon nin kagurangan.’ (Salmo 71:9; Levitico 19:32; Talinhaga 23:22) An tamang pagpanigo sa pangangaipong midbidon nagtatao nin dagdag na kaogmahan asin kapangganahan sa laog kan pamilya.
Pagmidbid sa Laog kan Kristianong Kongregasyon
Igwa nin dakulang halaga sa pagpatalubo nin sinserong interes sa iba sa Kristianong kongregasyon asin suweltong pagpahayag nin apresasyon sa saindang mga gibo asin paghihingoa. An Kristianong mga magurang maninigong mangenot paagi sa pagmidbid sa mga naginibo asin paghihingoa kan iba sa kongregasyon. “Sagkod sana kan pakaako ko nin dakol na pagsongko sa pagpapastor na narealisar ko kun gurano kahalaga kan mga iyan kun manongod sa pagpakosog, satispaksion, asin kaogmahan,” an sabi ni Margaret. “Narealisar ko kun ano an nawawara kun an pankagabsan na pagmidbid dai ikinakatao.” Kanigoan karahay na dahelan sa pagpaheling nin tunay, mamomoton na personal na interes sa gabos na nasa kongregasyon! Midbidon an saindang marahay na gibo. Suweltong magtao nin komendasyon asin magpakosog. Sa dakol na kongregasyon igwang nagsosolong mga magurang na nagmamaigot na idoon an espirituwal na mga pamantayan sa saindang mga aki. An mga siring maninigong tawan nin espesyal na pag-omaw. Itampok an mga positibo imbes na an mga negatibo. Ipaheling sa iba an saindong sa-magturugang na kapadangatan para sa sainda. Ipaheling sa sainda na kamo may pagmakolog. Sa paaging ini, an mamomoton na mga paraataman nakakatabang na pakosogon an kongregasyon. (2 Corinto 10:8) An indibiduwal na mga miembro minabalos paagi sa pagtao nin maninigong pagmidbid asin paggalang sa siring na mga maimbod na nagmamaigot para sa saindang kapakanan.—1 Timoteo 5:17; Hebreo 13:17.
Pero igwa nin saro pang lado, o anggulo, sa bagay na ini. Totoo na an pagmawot na midbidon makosog na marhay. Kan kaaldawan ni Jesus nagin kabangkagan iyan sa tahaw kan relihiyosong mga namomoon. Kinaipuhan ni Jesus na itanos an salang pagmansay kan saiyang mga disipulo manongod sa bagay na ini. (Marcos 9:33-37; Lucas 20:46) An mga Kristiano kaipuhan na magin makatanosan asin timbang. Kun dai pinopogolan, an pagmawot na midbidon magigin peligroso sa espirituwal. (Santiago 3:14-16) Kapahapahamak nanggad, halimbawa, kun an sarong magurang magin mapalangkaw asin magpoon nang hagadon na akoon kan iba an saiya mismong halangkaw na pagheling sa sadiri!—Roma 12:3.
Madonong na sinadol ni apostol Pablo an mga kapwa Kristiano sa Roma: “Sa pagkamoot nin sa magturugang magkaigwa kamo nin mamomoton na kapadangatan sa lambang saro. Sa pagpaheling nin onra sa lambang saro mangenot kamo.” (Roma 12:10) An mga tataramon na ini nangorognang minaaplikar sa Kristianong mga magurang, na sa gabos na panahon dapat na midbidon si Cristo bilang Payo kan kongregasyon. An pagpasakop sa saiyang may autoridad na paggiya maheheling paagi sa paghanap kan pagdirehir ni Cristo paagi sa banal na espiritu, mga prinsipyo sa Biblia, asin sa paggiya na itinatao kan Namamahalang Grupo kan “maimbod asin madonong na oripon.”—Mateo 24:45-47; helingon an Kapahayagan 1:16, 20; 2:1.
Kaya, kun nagmimiting an mga magurang, asin namimibi sinda para sa paggiya ni Jehova na pastoran an aripompon nin Dios, hihingoahon ninda na gumibo nin mga desisyon na tama sa Kasuratan. An Kristianong kababaan nin boot, kahoyoan, asin kapakumbabaan maolang sa siisay man na magurang sa paghihingoang ilangkaw an saiyang sadiri, dominaron an saiyang mga tugang, asin ipaotob an saiyang opinyon sa mga miting na ini. (Mateo 20:25-27; Colosas 3:12) Kun posible, marahay na hagadan nguna kan tsirman sa grupo nin mga magurang nin mga ideya an mga kapwa magurang dangan patienot nang itao haloy pa an lista kan pag-oorolayan tanganing magtao nin panahon para sa maingat asin mapagngayongayong paghorophorop sa kada puntong ilinista. Durante kan miting kan mga magurang, hihingoahon nia na, dai kontrolon an opinyon kan mga magurang, kundi, imbes, dagkahon sindang gamiton an “katalingkasan nin pagtaram” dapit sa mga bagay na pinag-oorolayan. (1 Timoteo 3:13) Dangan man, an mga kapwa magurang maninigong maingat na maghinanyog sa mga kapahayagan kan lambang saro asin maogmang makinabang sa pakamansay kan mga magurang na igwang dakol na taon nin Kristianong kabatidan.—Exodo 18:21, 22.
Alagad, nasasabotan kan mga paraataman na puwedeng gamiton ni Cristo an siisay man na magurang sa grupo na magtao nin mga prinsipyo sa Biblia na kaipuhan sa pagresolber sa sarong situwasyon o sa paggibo nin importanteng desisyon. An marahay na espiritu magdadanay sa tahaw kan grupo kun itinatao sa lambang magurang an tamang pagmidbid para sa saiyang kontribusyon sa pag-asikaso kan espirituwal na intereses kan kongregasyon.—Gibo 15:6-15; Filipos 2:19, 20.
Magmaigot sa Pagtao Asin Pagkamit nin Maninigong Pagmidbid
An pagmidbid nakakaparigon. Iyan nagpapakosog asin nagpapangyaring kamotan nin iba. “Dawa kun an pagmate niato ordinaryo sana kita,” an sabi ni Mary, “nangangaipo kita nin pagpakosog para sa satong pagpahalaga sa sadiri.” Sinserong midbidon an aroaldaw na mga paghihingoa kan iba. An paggibo kaiyan ginigibong orog na kapakipakinabang asin maogma an buhay para sa sainda. Mga magurang, aki, paraataman, asin miembro kan Kristianong kongregasyon, puwede kamong magkamit nin pagmidbid paagi sa kun paano kamo nagtataram asin paano kamo minagawe. Inoomaw kan Biblia an mahigos, hababa an boot, asin mapakumbabang mga tawo. (Talinhaga 11:2; 29:23; Hebreo 6:1-12) Pag-adalan na midbidon sa maboot na paagi an halaga kan iba. Konsideraron an mga saboot nin iba mantang kamo nagtatrabaho kaiba ninda. Itinao ni apostol Pedro an sadol na ini: “Kamo gabos magkaigwa nin saro sanang pag-isip, may pakikipagkapwa, naggigibo nin kapadangatan sa tugang, madinamayon sa mamomoton na paagi, mapakumbaba sa isip.” (1 Pedro 3:8) Ini naghahagad nin pagtao nin pagmidbid sa iba, sa siring pinaninigoan an sarong pundamental na pangangaipo nin tawo.