Kaya ni Jehova na Gibohon Kamong Makapangyarihan
“Sia nagtatao nin kosog sa napapagal; asin sa saro na mayo nin dinamikong kosog saiyang pinadadakol an bilog na puwersa.”—ISAIAS 40:29.
1, 2. Ano an nagkapirang ebidensia kan abundang kapangyarihan ni Jehova?
SI Jehova Dios na “abunda sa kapangyarihan.” Maheheling niato an pruweba kan “daing sagkod na kapangyarihan asin pagka-Dios” nin Dios sa kagayonan kan saiyang pisikal na mga linalang. Daing ikasasarahotan an mga habong midbidon an siring na ebidensia kan saiyang pagigin Kaglalang.—Salmo 147:5; Roma 1:19, 20.
2 An kapangyarihan ni Jehova orog pang nahahayag mantang sinisiyasat nin mga sientista an mas hararayo pang lugar sa uniberso, na dai mabilang an mga galaksia kaiyan sagkod sa distansiang ginatos na milyon na light-year. Sa madiklom pero klarong banggi, tumingag sa kalangitan asin helinga kun baga dai ka makamate nin arog kan sa salmista: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?” (Salmo 8:3, 4) Asin kanigoan karahay kan pag-ataman ni Jehova sa tawo, sa sato! Tinawan nia nin magayon na erokan sa daga an enot na lalaki asin babae. Pati an daga kaiyan may kapangyarihan—na magpatubo nin mga pananom, na nagtatao nin masustansia, daing polusyon na kakanon. An tawo asin mga hayop nagkukua nin pisikal na kapangyarihan sa kapahayagan na ini kan kapangyarihan nin Dios.—Genesis 1:12; 4:12; 1 Samuel 28:22.
3. Apuwera sa pisikal na mga bagay kan uniberso, ano pa an ibang nagpapaheling kan kapangyarihan nin Dios?
3 Apuwera sa bagay na an kalangitan kawiliwili asin an mga pananom saka hayop sa daga magayonon, ipinaheheling kaiyan sa sato an kapangyarihan nin Dios. Si apostol Pablo nagsurat: “An saiyang dai naheheling na mga kuwalidad malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” (Roma 1:20) Alagad igwa nin saro pang ebidensia kan saiyang kapangyarihan na maninigo niatong tawan nin atension asin apresasyon. ‘Ano,’ tibaad isipon nindo, ‘an nagpapaheling kan kapangyarihan nin Dios nin orog pa kisa uniberso?’ An simbag iyo si Jesu-Cristo. An totoo, sa irarom nin pasabong si apostol Pablo nagsasabi na an ipinakong Cristo iyo an “kapangyarihan nin Dios asin an kadonongan nin Dios.” (1 Corinto 1:24) ‘Taano man?’ tibaad ihapot nindo, ‘Asin ano an koneksion kaiyan sa buhay ko ngonyan?’
Kapangyarihan Paagi sa Saiyang Aki
4. Paano ipinaheling an kapangyarihan nin Dios may koneksion sa saiyang Aki?
4 An kapangyarihan nin Dios enot na ipinaheling kan lalangon nia an saiyang bugtong na Aki, na ginibo sa saiyang ladawan. An espiritung Aking ini naglingkod ki Jehova bilang “pangenot na trabahador” paagi sa paggamit kan abundang kapangyarihan nin Dios sa paglalang sa gabos na iba pang bagay. (Talinhaga 8:22, 30) Si Pablo nagsurat sa saiyang Kristianong mga tugang sa Colosas: “Paagi sa saiya an gabos na iba pang bagay linalang sa kalangitan asin sa daga, an mga bagay na naheheling asin an mga bagay na dai naheheling . . . An gabos na iba pang bagay linalang paagi sa saiya asin para sa saiya.”—Colosas 1:15, 16.
5-7. (a) Kan mga nakaagi, paano napalabot an mga tawo sa mga pagpapaheling kan kapangyarihan nin Dios? (b) Ano an dahelan sa pagtubod na an kapangyarihan nin Dios puwedeng ipaheling sa kamugtakan kan mga Kristiano ngonyan?
5 Kaiba kita kan ‘mga bagay na linalang sa daga.’ Kaya ikapaaabot man daw sa satong mga tawo an kapangyarihan nin Dios? Bueno, sa bilog na panahon kan pakikiiba nin Dios sa bakong sangkap na mga tawo, may mga panahon na si Jehova nagtao nin ekstrang kapangyarihan sa saiyang mga lingkod tanganing maotob ninda an saiyang mga katuyohan. Aram ni Moises na, sa pankagabsan, an bakong sangkap na mga tawo nabubuhay nin 70 o 80 taon. (Salmo 90:10) Kumusta man si Moises mismo? Nabuhay sia sagkod sa edad na 120 taon, pero “an saiyang mata dai duminiklom, asin dai nawara an saiyang bagsik.” (Deuteronomio 34:7) Minsan ngani iyan dai nangangahulogan na pinapangyayari nin Dios na an kada saro sa saiyang mga lingkod mabuhay nin siring kaiyan kalawig o magdanay nin siring kaiyan kabagsik, pinatutunayan kaiyan na kaya ni Jehova na tawan nin kapangyarihan an mga tawo.
6 An saro pang nagpapaheling kan kakayahan nin Dios na tawan nin kapangyarihan an mga lalaki asin babae iyo an ginibo nia sa agom ni Abraham. “Si Sara mismo nag-ako kan kapangyarihan na mangidam nin banhi, minsan ngani sia lihis na sa edad, mantang saiyang ibinilang na maimbod idtong nanuga.” O horophoropa kun paano tinawan nin Dios nin kapangyarihan an mga hokom asin iba pa sa Israel: “[Si] Gedeon, Barac, Samson, Jefte, David siring man [si] Samuel asin an iba pang mga propeta, na . . . napakosog hale sa kaluyahan.”—Hebreo 11:11, 32-34.
7 An siring na kapangyarihan puwede man na mangyari sa satuya. A, tibaad dai kita naglalaom ngonyan na magkaaki paagi sa milagro, o tibaad dai kita makapaheling nin kosog na arog kan ki Samson. Pero puwede kitang magin makapangyarihan, arog kan sinabi ni Pablo sa ordinaryong mga tawo sa Colosas. Iyo, si Pablo nagsurat sa mga lalaki, babae, asin aki, na arog kan manonompongan niato sa mga kongregasyon ngonyan, asin sinabi nia na sinda “pinakokosog sa bilog na kapangyarihan.”—Colosas 1:11.
8, 9. Kan enot na siglo, paano ipinahayag an kapangyarihan ni Jehova mapadapit sa mga tawo na arog ta?
8 Kaidtong ministeryo ni Jesus digdi sa daga, liniwanag ni Jehova na an saiyang kapangyarihan naghihiro paagi sa saiyang Aki. Halimbawa, kan panahon na nagburunyog an mga kadaklan ki Jesus sa Capernaum, “an kapangyarihan ni Jehova yaon tanganing sia magpaomay.”—Lucas 5:17.
9 Pagkabuhay nia liwat, ginarantiyahan ni Jesus an saiyang mga parasunod na sinda ‘mag-aako nin kapangyarihan kun dumatong na sainda an banal na espiritu.’ (Gibo 1:8) Totoo nanggad ini! Ibinabareta nin sarong historyador an mga pangyayari mga pirang aldaw pakalihis nin Pentecostes kan 33 C.E.: “Sa dakulang kapangyarihan an mga apostol nagpadagos na magtao kan patotoo manongod sa pagkabuhay liwat kan Kagurangnan na si Jesus.” (Gibo 4:33) Si Pablo mismo saro na ginibong makapangyarihan para sa gibo na isinugo sa saiya nin Dios. Pakatapos na sia makombertir asin makabalik an saiyang pagheling, sia “orog pang nag-ako nin kapangyarihan asin sinosopog an mga Judio na nag-iistar sa Damasco mantang pinatutunayan nia sa lohikong paagi na ini iyo an Cristo.”—Gibo 9:22.
10. Paano nakatabang ki Pablo an kapangyarihan gikan sa Dios?
10 Tunay na kaipuhan ni Pablo an ekstrang kapangyarihan, kun hohorophoropon niato an espirituwal asin mental na kosog na kaipuhan tanganing magibo an tolong biyahe sa pagmimisyonero sa distansiang rinibong milya. Tinios man nia an gabos na klase nin kasakitan, na nagtagal nin mga pagkabilanggo asin inatubang an kagadanan bilang martir. Paano? Sia nagsimbag: “Sinorog ako kan Kagurangnan asin pinakosog ako, tanganing paagi sako an paghuhulit lubos na ikasagibo.”—2 Timoteo 4:6-8, 17; 2 Corinto 11:23-27.
11. Kun dapit sa kapangyarihan nin Dios, anong paglaom an sinabi ni Pablo para sa saiyang kapwa mga lingkod sa Colosas?
11 Kaya bakong makangangalas na si Pablo, kan sinusuratan an saiyang “mga tugang na kasaro ni Cristo” sa Colosas, sinierto sa sainda na sinda puwedeng ‘mapakosog sa bilog na kapangyarihan sono sa sokol kan mamuraway na kapangyarihan ni Jehova tanganing lubos na makatagal asin magin matinios na may kagayagayahan.’ (Colosas 1:2, 11) Minsan ngani an mga tataramon na iyan sa pangenot isinabi sa linahidan na mga Kristiano, an gabos na nagsusunod sa mga gira ni Cristo makikinabang nin dakula sa isinurat ni Pablo.
Tinawan nin Kapangyarihan sa Colosas
12, 13. Ano an kasaysayan sa likod kan surat sa mga taga-Colosas, asin ano an posibleng reaksion dian?
12 An kongregasyon sa Colosas, na yaon sa Romanong probinsia nin Asia, posibleng naorganisar paagi sa paghuhulit kan maimbod na Kristiano na an ngaran Epafras. Minalataw na kan mabaretaan nia an pagkabilanggo ni Pablo sa Roma kan mga 58 C.E., nagdesisyon si Epafras na songkoon an apostol asin pakosogon sia paagi sa marahay na bareta manongod sa pagkamoot asin karigonan kan saiyang mga tugang sa Colosas. Posible na isinaysay man ni Epafras an totoong bareta manongod sa nagkapirang problema sa kongregasyon nin Colosas na kaipuhan na itanos. Si Pablo man napahiro na padarahan an kongregasyon nin surat nin pagpakosog asin paghatol. Kamo man puwedeng mapakosog na marhay kan kapitulo 1 kan surat na iyan, huli ta ihinahayag kaiyan kun paano magigibo ni Jehova na makapangyarihan an saiyang mga lingkod.
13 Maiimahinar nindo an namatean kan mga tugang na lalaki asin babae sa Colosas kan apodon sinda ni Pablo na “maimbod na mga tugang na kasaro ni Cristo.” Maninigo sindang tawan nin komendasyon huli sa saindang “pagkamoot para sa gabos na banal” asin huli sa ‘pagbunga kan maogmang bareta’ poon kan sinda magin mga Kristiano! Masasabi man daw an arog kaining mga tataramon manongod sa satong kongregasyon, manongod sa sato bilang indibiduwal?—Colosas 1:2-8.
14. Ano an kamawotan ni Pablo dapit sa mga taga-Colosas?
14 Napahirong gayo an boot ni Pablo kan baretang inako nia kaya sinabihan nia an mga taga-Colosas na sia dai nag-ontok sa pamimibi para sa sainda asin pag-arang na sinda logod “mapano nin tamang kaaraman kan . . . kabotan [nin Dios] sa bilog na kadonongan asin espirituwal na pakatalastas, tanganing maglakaw na angay ki Jehova.” Sia namibi na sinda logod ‘padagos na magbunga sa gabos na marahay na gibo asin mag-oswag sa tamang kaaraman dapit sa Dios, na pinakokosog sa bilog na kapangyarihan sono sa sokol kan saiyang mamuraway na kapangyarihan tanganing lubos na makatagal asin magin matinios na may kagayagayahan.’—Colosas 1:9-11.
Tinawan Man nin Kapangyarihan Ngonyan
15. Paano niato ikapaheheling an kaisipan na kapareho kan ipinaheheling sa isinurat ni Pablo sa mga taga-Colosas?
15 Kanigoan karahay na halimbawa an itinao sa sato ni Pablo! An mga tugang niato sa bilog na daga nagkakaipo kan satong mga pamibi na sinda logod makatagal asin magdanay na magayagaya sa ibong kan saindang mga kasakitan. Kapareho ni Pablo, maninigo kitang magin espisipiko sa satong mga pamibi kun nababaretaan niato na an mga tugang sa ibang kongregasyon, o ibang nasyon, nasasakitan. Tibaad apektado nin natural na kalamidad o espirituwal na kasakitan an sarong haraning kongregasyon. O tibaad nagtatagal an mga Kristiano sa nasyon na nasasakitan huli sa guerra sibil o paggaradanan nin magkakalaen na tribo. Sa pamibi maninigo niatong arangon sa Dios na tabangan an satong mga tugang na “maglakaw na angay ki Jehova,” padagos na magpaluwas nin bunga kan Kahadean mantang sinda nagtatagal, asin mag-orog an kaaraman. Sa paaging ini an mga lingkod nin Dios nag-aako kan kapangyarihan kan saiyang espiritu, “na pinakokosog sa bilog na kapangyarihan.” Makasisierto kamo na an saindong Ama magdadangog asin mahiro.—1 Juan 5:14, 15.
16, 17. (a) Siring sa isinurat ni Pablo, ano an maninigo niatong pasalamatan? (b) Sa anong sentido na an banwaan nin Dios nakatalingkas asin pinatawad?
16 Nagsurat si Pablo na an mga taga-Colosas maninigong ‘nagpapasalamat sa Ama na nagpakanigo sainda para sa pakikikabtang sa pamana kan mga banal sa liwanag.’ Pasalamatan man niato an satong langitnon na Ama para sa satuyang lugar sa saiyang areglo, baga man sa langitnon o daganon na rona kan saiyang Kahadean. Paano ginibo nin Dios na angay sa saiyang pagheling an bakong sangkap na mga tawo? Sinuratan ni Pablo an saiyang linahidan na mga tugang: “Ilinigtas nia kita hale sa autoridad kan kadikloman asin ibinalyo kita sa kahadean kan Aki nin saiyang pagkamoot, na paagi sa saiya kita nabutasan huli sa pantubos, an kapatawadan kan satong mga kasalan.”—Colosas 1:12-14.
17 Ano man an satong paglaom, langitnon o daganon, pinasasalamatan niato an Dios aroaldaw huli sa pagkakalda sa sato hale sa maraot na palakaw na ini nin kadikloman, na nahimo kan satong pagtubod sa mahalagang marhay na probisyon na pantubos na atang kan namomotan na Aki ni Jehova. (Mateo 20:28) An linahidan nin espiritung mga Kristiano nakinabang sa espesyal na paagi sa pantubos na iinaplikar sa sainda tanganing sinda ‘ikabalyo sa kahadean kan Aki kan pagkamoot nin Dios.’ (Lucas 22:20, 29, 30) Pero an “ibang karnero” nakinabang man sa pantubos minsan ngonyan. (Juan 10:16) Puwede nindang akoon an kapatawadan nin Dios tanganing magkaigwa nin matanos na kamugtakan sa atubangan nia bilang saiyang mga katood. Dakula an kabtang ninda sa pagbalangibog kan “maogmang baretang ini kan kahadean” sa panahon na ini kan katapusan. (Mateo 24:14) Apuwera kaiyan, igwa sinda kan makangangalas na paglaom na magin lubos na matanos asin sangkap sa pisikal, sa katapusan kan Milenyal na Paghade ni Cristo. Mantang binabasa nindo an paglaladawan sa Kapahayagan 7:13-17, helinga kun baga dai kamo umoyon na ini pruweba nin pagkaligtas asin pag-ako nin bendisyon.
18. Anong pakikipag-uli na nasambitan sa Colosas an sagkod ngonyan pinapangyayari nin Dios?
18 Tinatabangan kita kan surat ni Pablo na marealisar kun gurano an utang na boot niato sa pinakadakulang tawo na nabuhay kasuarin pa man. Ano an ginigibo nin Dios paagi ki Cristo? “[Idto tanganing] mapag-uli an gabos na ibang bagay sa saiya man sana paagi sa pakikipagkatoninongan huli sa dugo na saiyang pinabolos sa hariging pasakitan, baga man sinda mga bagay digdi sa daga o mga bagay sa kalangitan.” An katuyohan nin Dios ibalik an gabos na linalang sa lubos na pakikioyon sa saiya, arog kaidto bago an rebelyon sa Eden. An Saro na ginamit sa paglalang kan gabos na bagay iyo man sana an Saro na ginagamit ngonyan sa pagpangyari kan pakikipag-uling ini.—Colosas 1:20.
Tinawan nin Kapangyarihan sa Anong Katuyohan?
19, 20. Sa ano nasasarig an satong pagigin banal asin daing kaninan?
19 Kita na nakipag-uli sa Dios igwa nin mga paninimbagan. Dati kita makasalan asin siblag sa Dios. Alagad ngonyan, mantang nagtubod na sa atang ni Jesus asin mantang mayo na sa mga gibong maraot an satong isip, sa pundamental kita nasa “banal asin daing kaninan” na kamugtakan, “daing kasagwean sa atubangan [nin Dios].” (Colosas 1:21, 22) Isip-isipa, kun paanong dai ikinasopog nin Dios an maimbod na mga saksing idto kan suanoy, dai man nia kita ikinasosopog, na apodon sia bilang satong Dios. (Hebreo 11:16) Ngonyan, mayo nin makasasahot sato na sala an pagdara niato kan saiyang bantog na ngaran, o na takot kita na ipahayag an ngaran na iyan sagkod sa kaporoporohi kan daga!
20 Alagad mangnoha an patanid na idinugang ni Pablo sa Colosas 1:23: “Basta, siyempre, kamo magdanay sa pagtubod, natotogdok sa pundasyon asin marigon patin dai nahahale sa paglaom kan maogmang baretang iyan na nadangog nindo, asin na ikinahulit sa gabos na linalang sa sirong nin langit.” Dakulaon an nasasarig sa pagdadanay niatong maimbod ki Jehova, na sinusundan an mga gira kan saiyang namomotan na Aki. Dakulaon an ginibo para sa sato ni Jehova asin ni Jesus! Ipaheling logod niato an pagkamoot niato sa sainda paagi sa pagkuyog sa hatol ni Pablo.
21. Taano ta dakula an dahelan niato na maogma ngonyan?
21 Seguradong ogmahon an mga Kristianong taga-Colosas na madangog na ‘an maogmang bareta na nadangog ninda’ “ikinahulit [na] sa gabos na linalang sa sirong nin langit.” Ngonyan orog pang nakaoogmang madangog an hiwas kan pagbalangibog kan maogmang bareta kan Kahadean na ginigibo nin labi nanggad sa apat may kabangang milyon na Saksi sa labing 230 kadagaan. Tara, kada taon haros 300,000 hale sa gabos na nasyon an nakikipag-uli sa Dios!—Mateo 24:14; 28:19, 20.
22. Dawa kun kita nagsasakit, ano an kayang gibohon nin Dios para sa sato?
22 Minsan ngani malinaw na nabibilanggo si Pablo kan panahon na gibohon nia an surat sa mga taga-Colosas, dai nia irineklamo an saiyang kamugtakan sa ano man na paagi. Imbes, sia nagsabi: “Ako naggagayagaya ngonyan sa sakong mga kasakitan para sa saindo.” Aram ni Pablo kun ano an boot sabihon kan ‘lubos na pagtagal asin pagigin matinios na may kagayagayahan.’ (Colosas 1:11, 24) Pero aram nia na dai nia ini ginigibo sa sadiri niang kosog. Ginibo siang makapangyarihan ni Jehova! Iyo man ngonyan. An rinibong Saksi na nabilanggo asin pinaglamag dai nawaran kan saindang kagayagayahan sa paglilingkod ki Jehova. Imbes, nasabotan ninda an katotoohan kan mga tataramon nin Dios na yaon sa Isaias 40:29-31: “Sia nagtatao nin kosog sa napapagal . . . An mga nananarig ki Jehova magkakamit nin bagong kosog.”
23, 24. Ano an banal na hilom na sinabi sa Colosas 1:26?
23 Dakulaon an halaga para ki Pablo kan ministeryo kan maogmang bareta na nasesentro ki Cristo. Boot niang maapresyar nin iba an halaga kan kabtang ni Cristo sa katuyohan nin Dios, kaya inapod nia iyan na “an banal na hilom na itinago sa nakaaging mga palakaw nin mga bagay asin sa nakaaging mga kapag-arakian.” Alagad iyan dai perming magigin hilom. Idinugang ni Pablo: “Ngonyan iyan ihinayag sa saiyang mga banal.” (Colosas 1:26) Kan magrebelde sa Eden, si Jehova nanuga nin maabot na mas marahay na mga bagay, na ihinula na ‘an banhi kan babae lulugadon an payo kan halas.’ (Genesis 3:15) Ano an boot sabihon kaini? Sa laog nin dakol na kapag-arakian, nin dakol na siglo, iyan nagdanay na misteryo. Dangan duminatong si Jesus, asin sia “nagtao nin liwanag sa buhay asin pagkadaing kagadanan paagi kan maogmang bareta.”—2 Timoteo 1:10.
24 Iyo, an “banal na hilom” nasesentro ki Cristo asin sa Mesiyanikong Kahadean. Nasambitan ni Pablo an “mga bagay sa kalangitan,” na an boot sabihon idtong mga makikikabtang sa paghade sa Kahadean kaiba ni Cristo. An mga ini magigin instrumento sa pagtao nin dai masabing mga bendisyon sa gabos na “bagay digdi sa daga,” idtong mga magkakamit nin daing katapusan na paraiso digdi. Kaya maheheling nindo kun gurano kaangay na si Pablo magtaram dapit sa “mamuraway na mga kayamanan kan banal na hilom na ini.”—Colosas 1:20, 27.
25. Arog kan ipinaheheling sa Colosas 1:29, ano an maninigong magin kaisipan niato ngonyan?
25 Galagang hinahalat ni Pablo an saiyang lugar sa Kahadean. Pero aram nia na idto bakong bagay na puwede niang laoman na mayo man siang ginigibo. “Ako tunay na nagpapagal, na naghihingoa kaoyon sa paghiro nia asin na naghihiro sa sako na may kapangyarihan.” (Colosas 1:29) Mangnoha na si Jehova, paagi ki Cristo, ginibong makapangyarihan si Pablo tanganing magibo nia an ministeryo na nagliligtas-buhay. Kaya man ni Jehova na gibohon an arog kaiyan ngonyan. Pero maninigo niatong hapoton an satong sadiri, ‘Igwa daw ako kan espiritu sa pag-ebanghelyo na yaon sa sako kan enot kong manodan an katotoohan?’ Ano an saindong simbag? Ano daw an makatatabang sa kada saro sato na makapadagos na ‘nagpapagal asin naghihingoa kaoyon sa paghiro kan kapangyarihan ni Jehova’? An minasunod na artikulo dapit sa mismong bagay na ini.
Namangno daw Nindo?
◻ Taano ta makasisierto kita na kaya ni Jehova na ipaheling an saiyang kapangyarihan para sa mga tawo?
◻ Ano an kasaysayan sa likod kan mga tataramon ni Pablo sa Colosas kapitulo 1?
◻ Paano ginigibo nin Dios an pakipag-uli na nasambitan sa Colosas 1:20?
◻ Paagi sa saiyang kapangyarihan, ano an kayang gibohon ni Jehova paagi sa sato?
[Mapa/Ritrato sa pahina 8]
(Para sa aktuwal na format, helingon an publikasyon)
COLOSAS