Magdanay sa Integridad Asin Mabuhay!
“SUMPAA an Dios asin magadan ka!” Ilinaladawan sa tutob kan samong magasin an agom ni Job, na inatake sia paagi sa mga tataramon na iyan. Nangyari iyan kaidtong mga 3,600 na taon na an nakaagi. Pero an berbal na pag-atakeng iyan sa maimbod na lingkod nin Dios nagtatampok nin isyu na napapaatubang sa katawohan sagkod sa aldaw na ini. An maimbod na si Job nag-agi nin makuring kawaran—an saiyang mga hayop, an saiyang harong, an saiyang sampulong aki. Ngonyan an saiyang hawak pinasasakitan nin dai nararahay na helang, na binabalo kun sagkod saen an saiyang pakatagal. An rason? An poon na kaiwal nin Dios asin nin tawo, si Satanas na Diablo, ipinagpapadagos an angat na an tawo dai kayang magdanay sa integridad sa Dios sa irarom nin makuring pagbalo.—Job 1:11, 12; 2:4, 5, 9, 10.
Ngonyan, arog kan kaaldawan ni Job, “an bilog na kinaban namumugtak sa kapangyarihan kan maraot,” si Satanas na Diablo. (1 Juan 5:19) Iyo nanggad, iyan mas totoo pa ngani ngonyan, huli ta ngonyan “an inaapod Diablo asin Satanas, na nandadaya sa bilog na ineerokan na daga,” iinapon na hale sa kalangitan pasiring sa dagang ini. (Kapahayagan 12:9) Ini an dahelan kan grabeng mga kasakitan na tinitios nin katawohan sa satong panahon. An enot na guerra mundial, na puminutok kan 1914, nagtanda nin “kapinonan kan mga kolog nin kasakitan” na padagos na naggrabe sagkod sa ika-20 siglong ini.—Mateo 24:7, 8.
Sa maringis, raot nang kinaban na ini, namatean na daw nindo na nakaabot na kamo sa sagkodan kan pakatagal nin tawo? Naiisip daw nindo, ‘Igwa daw nin ano man na katuyohan an buhay?’ Tibaad siring kaiyan an namatean ni Job, alagad nungka siang nawaran nin pagtubod sa Dios, minsan ngani nakagibo sia nin mga sala. Ipinahayag nia an saiyang determinasyon sa mga tataramon na ini: “Sagkod na ako magadan dai ko hahaleon sa sakuyang sadiri an sakuyang integridad!” May kompiansa sia na ‘maaaraman nin Dios an saiyang integridad.’—Job 27:5; 31:6.
Si Jesu-Cristo, an mismong Aki nin Dios, kinaipuhan man na magtagal nin mga pagbalo mantang yaon digdi sa daga. Inatake ni Satanas si Jesus sa laen-laen na paagi. Inaprobetsaran nia an pisikal na mga pangangaipo ni Jesus asin binalo an Saiyang pagtitiwala sa Tataramon nin Dios, siring kan nangyari sa bukid kun saen pinagsugotan sia. (Mateo 4:1-11) Rinibok nia si Jesus paagi sa pagpangyari sa apostatang mga eskriba asin Fariseo patin sa mga nadaya ninda na lamagon sia, sahotan sia nin paglanghad, asin magkasapakat na gadanon sia. (Lucas 5:21; Juan 5:16-18; 10:36-39; 11:57) An saindang ginibo ki Jesus orog pa karaot kisa ginibo ki Job kan tolong falsong pararanga.—Job 16:2; 19:1, 2.
Sa hardin nin Getsemane, mantang parani na si Jesus sa kulminasyon kan pagbalong ini, sinabihan nia an saiyang mga disipulo: “An sakong kalag mamondong gayo, sagkod sa kagadanan.” Dangan, “sia naglaob, na namimibi asin nagsasabi: ‘Ama ko, kun mapupuwede, togoti na an kopang ini lumihis sa sako. Minsan siring, bakong an boot ko, kundi an boot mo.’” Sa katapustapusi, sa hariging pasakitan, bilang kaotoban kan makahulang mga tataramon sa Salmo 22:1, si Jesus nagkurahaw: “Dios ko, Dios ko, tadaw ta pinabayaan mo ako?” Pero sa kahurihurihi si Jesus dai pinabayaan nin Dios huli ta si Jesus nagpadanay nin sangkap na integridad sa Saiya, na nagtatao nin arogan tanganing sunodon kan gabos na tunay na Kristiano. Binalosan ni Jehova an pagpadanay ni Jesus nin integridad paagi sa pagbuhay liwat sa saiya asin pagpamuraway sa saiya sa pinakahalangkaw na kalangitan. (Mateo 26:38, 39; 27:46; Gibo 2:32-36; 5:30; 1 Pedro 2:21) Babalosan nin Dios an gabos na iba pa na nagpapadanay man nin integridad sa saiya.
An integridad ni Jesus bako sanang nagtao nin kompletong simbag sa angat ni Satanas kundi an pag-atang kan saiyang sangkap na buhay bilang tawo nagtao man kan pantubos, na basado dian an mga tawong nagdadanay sa integridad puwedeng magkamit nin buhay na daing katapusan. (Mateo 20:28) Enot, tinitipon ni Jesus an linahidan na “sadangoton na aripompon” na magigin kairibang paramana nia sa Kahadean kan kalangitan. (Lucas 12:32) Pakatapos kaini, “sarong dakulang kadaklan” an tinitipon tanganing makaligtas sa “dakulang kahorasaan,” na maluwas dian tanganing magmana nin buhay na daing katapusan sa rona kan Kahadean nin Dios digdi sa daga.—Kapahayagan 7:9, 14-17.
An nagdanay sa integridad na si Job makakaiba sa binilyon na gadan na bubuhayon liwat sa panahon na iyan tanganing magin kabtang kan matoninong na “bagong daga” na sosyedad na iyan. (2 Pedro 3:13; Juan 5:28, 29) Siring kan ipinaheheling sa likod na tutob kan samong magasin, binalosan an integridad kan kaaldawan ni Job kan “binendisyonan [ni Jehova] an kasagkodan ni Job nin labi pa sa saiyang kapinonan.” Nagkamit sia nin espirituwal na kosog bilang saro na “dai nagkasala sa saiyang mga ngabil.” Dinagdagan nin Dios an saiyang buhay nin 140 pang taon. Sa materyal, tinawan nia si Job nin doble kan gabos na yaon sa saiya kaidto, asin si Job ‘nagkaigwa nin pitong aking lalaki asin tolong aking babae,’ na an mga aking babae ibinilang na pinakamagagayon sa bilog na daga. (Job 2:10; 42:12-17) Pero an gabos na prosperidad na ini panamit sana kan mga bendisyon na kakamtan kan mga nagdadanay sa integridad sa Paraiso kan “bagong daga.” Puwede man kamong magkamit kan kagayagayahan na iyan, siring sa ipaliliwanag kan minasunod na mga pahina!
[Retrato sa pahina 4]
Si Jesus nagtao kan sangkap na halimbawa bilang nagdadanay sa integridad