Mga Saksi ni Jehova sa Bilog na Kinaban—Zambia
MAHIWAS, alon-alon na kaplanodohan sa ibabaw nin dakulaon, 1,200-metros an langkaw na buklod—ini an Zambia, sarong nasyon sa sentro kan timog-sentral na Aprika. Sa amihanan-sirangan, an Kabukidan nin Muchinga 2,100 metros kalangkaw. An mahiwason na Salog nin Zambezi, na nagraragubrob pasiring sa bantog sa kinaban na Busay nin Victoria, sa kadaklan iyo an linderos sa timog kan nasyon na ini na napapalibotan nin daga. Manlaenlaen na marhay an mga tawo, na may 70 laen-laen na grupong etniko. Walong mayor na lenguahe an itinataram digdi, pero igwa nin dakol pang iba.
Kan 1911 sarong laen na lenguahe an pinonan na iintrodusir asin palakopon sa Zambia. An mga bisita nagdara nin mga kopya kan Studies in the Scriptures, asin poon kaidto an mga Saksi ni Jehova padagos na nagmaigot na palakopon sa Zambia an “dalisay na tataramon” kan katotoohan sa Biblia. (Sofonias 3:9) Partikularmenteng nagtatao nin kasakitan an bakong Makakasuratan na paniniwala dapit sa kamugtakan kan mga gadan. Kan maaraman kan mga tawo an katotoohan asin maheling kun paano sinda inoripon kan mga superstisyon, nakakapatalingkas an epekto!—Juan 8:32.
Halimbawa, sarong maimbod na tugang na babae an nagbareta: “Kan biglang magadan an amaon ko, an sakong ina, sarong maimbod na miembro kan United Church sa Zambia, naribaraw. Pakalihis kan sarong semanang rituwal sa paglobong, nagpuli ako sa baryo tanganing helingon an saiyang kamugtakan. Pag-abot, nanompongan ko sa harong an sarong gurang nang lalaki, asin pakahale nia, hinapot ko an sakong lola kun siisay sia. Sinabi nia na an lalaki sarong parasantiguwar. Katuyohan kan sakong ina na bayadan ini na ipamalos an kagadanan kan tugang nia tanganing an kalag kan amaon ko makapahingalo. Nagtutubod sia na sa presente iyan ‘naglalagawlagaw sana,’ siring sa pagkasabi nia.
“Ipinaliwanag pa ni lola na an sakong pagsongko sarong bendisyon huli ta naghahanap an pamilya nin kuwarta na ibabayad sa parasantiguwar. Hinagadan nia ako na magkontribuwir, pero mataktika kong ipinaliwanag na bilang sarong Kristiano, dai ako puwedeng makikabtang. Nangatanosan ako sa saiya gikan sa Salmo 146:4, na nagpapaheling na an mga gadan mayo nin kaisipan—kaya mayo nin kalag na ‘naglalagawlagaw.’ Pinag-olayan mi man an Roma 12:19, na nagdodoon na ki Jehova an pagbalos asin bakong sato. Pakalihis kaiyan, sinabi ko sa sakong ina an dapit sa paglaom na pagkabuhay liwat na sinabi ni Jesus, siring sa nasusurat sa Juan 5:28, 29. Naghanga sia sa sakong makosog na pagtubod sa mga panuga nin Dios. Dai nahaloy nagpoon siang mag-adal kaiba kan sarong Saksi asin marikas na nag-oswag. Pinutol nia an gabos na koneksion sa saiyang dating relihiyon asin sinimbolisaran an saiyang pagdusay sa Dios paagi sa bautismo. Ngonyan saro na sia sa mga Saksi ni Jehova.”
An saro pang tugang na babae nagbareta: “Nagduman ako sa lobong kan agom kan sakuyang amaon. Pag-abot, nanompongan ko an sakong amaon asin an sakong pinsan na nagugutom. Dai sinda nagkakakan nin ano man poon pa kan aldaw na magadan an sakong inaon. Kan hapoton ko kun taano, nagsimbag sinda na sono sa tradisyon, dai sinda tinotogotan na maggatong tanganing magluto. Nag-opresir ako na magluto, alagad natakot an nagkapira sa mga miembro kan pamilya na kun balgahon ko an paganong kaugalean na ini, an gabos marurungaw!
“Ipinaliwanag ko na bilang saro sa mga Saksi ni Jehova, iginagalang ko an sinasabi kan Biblia sa Levitico 18:30 asin dai ko kinukuyog an bakong Makakasuratan na mga tradisyon. Dangan ipinaheling ko sainda an brochure na Spirits of the Dead. Paagi kaiyan nainaan an tension, asin dinagos ko an pag-andam nin pagkakan para sa sakong amaon asin sa iba pang mga tawo. An mga paryentes kan nagadan napahiro kan sakong kaisogan asin uminoyon na pag-adalan pa nin orog an Biblia. Sinda nagin nang dai pa bautisadong mga parahayag, asin an bilog na pamilya naglalaom na mabautismohan sa dai na mahahaloy.”
Maogmahon nanggad kita kun itinutumba kan dalisay na tataramon nin katotoohan an nakariribaraw na mga kaputikan nin relihiyon, nangorogna an hararomon an pagkatanom na mga pangangatanosan na inooripon an inosenteng mga tawo! Paagi sa bendisyon ni Jehova, an dalisay na tataramon naglalakop sa Zambia, arog kan nangyayari sa bilog na daga.—2 Corinto 10:4.
[Kahon sa pahina 9]
SUMARYO KAN NASYON
1994 Taon nin Paglilingkod
PINAKAHALANGKAW NA BILANG NIN NAGPAPATOTOO: 82,926
KATIMBANG: 1 Saksi sa 107
NAG-ATENDER SA MEMORIAL: 363,372
PROMEDYONG MGA PARAHAYAG NA PAYUNIR: 10,713
PROMEDYONG MGA PAG-ADAL SA BIBLIA: 108,948
BILANG NIN NABAUTISMOHAN: 3,552
BILANG NIN MGA KONGREGASYON: 2,027
SANGANG OPISINA: LUSAKA
[Retrato sa pahina 9]
Mga pasilidad kan sanga kan Watch Tower na nasa paluwas kan Lusaka
[Retrato sa pahina 9]
Paghuhulit sa Shimabala, sa timog kan Lusaka