Mga Hapot Hale sa mga Parabasa
Anong paggawe an maninigong ipaheling sa Kristianong mga bautismo?
Interesanteng hapot iyan, huli ta maski ngani dakol sa satong mga parabasa an bautisado na, kalabot sinda, siring man an mga nagpapabautismo. Komentohan nguna niato an mga binabautismohan, na biyong ilinulubog sa tubig. Ano an maninigong magin paggawe ninda?
Sa Mateo 28:19, 20, sinabihan ni Jesus an saiyang mga parasunod na paduman asin gumibo nin mga disipulo sa mga tawo, na tokdoan asin bautismohan sinda. Dai nia iinatubang an bautismo bilang sarong labi-labi kaemosyonal na eksperyensia, sarong akto na bunga nin madali sanang kaogmahan. Iyan seryosong tangga, siring kan maheheling niato sa halimbawa ni Jesus. An Lucas 3:21 nagsasabi: “Si Jesus nabautismohan man asin, mantang sia namimibi, an langit nabukasan.” Iyo, an satong Arogan minansay an bautismo sa seryoso, mapagngayongayong paagi. Dai niato sia maiimahinar, pagkabutwa sa tubig, na nagsesenyas nin kapangganahan, nagkukurahaw, o pig-iiroitaas an saiyang mga takyag, minsan ngani sa dai pa sana nahahaloy may mga naggibo nin siring kaiyan. Dai, solamente an presente si Juan Bautista, duminolok si Jesus sa saiyang Ama sa pamibi.
Minsan siring, an Biblia dai nagsusuherir na an bautismo magin sarong mamondo o mapungaw na pangyayari, na naghahagad nin espesyal na mga posisyon o tataramon, siring sa hinahagad nin nagkapirang iglesya sa Kakristianohan ngonyan. Tara, isip-isipa an aldaw nin Pentecostes, kan magpabautismo bilang Kristiano an rinibong Judio asin proselita. Pinag-adalan na ninda an Pagboot nin Dios asin igwa na sinda nin relasyon sa saiya. Kaya kaipuhan na sana nindang makanood manongod sa asin akoon an Mesiyas, si Jesus. Oras na ginibo na ninda iyan, puwede na sindang bautismohan.
Ibinabareta kan Gibo 2:41: “Idtong mga maogmang nag-ako kan saiyang tataramon binautismohan.” An bersion kan Biblia ni Weymouth nagsasabi: “Kun siring, idtong mga magayagayang nag-ako kan saiyang tataramon binautismohan.” Nakanompong sinda nin kagayagayahan sa nakaoogmang bareta manongod sa Mesiyas, asin siertong an odok sa pusong kagayagayahan na iyan sagkod sa bautismo mismo, bautismo sa atubangan nin ginatos na maogmang paramasid. Pati an mga anghel sa langit nagmamasid asin naggagayagaya. Girumdoma an mga tataramon ni Jesus: “Sinasabi ko saindo, nagkakaigwa nin kagayagayahan an mga anghel nin Dios huli sa sarong parakasala na nagsolsol.”—Lucas 15:10.
Igwa nin manlaenlaen na paagi na an kada saro sa sato makakapaheling kapwa kan pagigin seryoso asin kan kagayagayahan nin bautismo. Sa nagkapirang iglesya an mga nagpapabautismo nagsusulot nin puti o itom na halabang mga gubing. Mayo nanggad nin Makakasuratan na pagsuportar sa siring na kahagadan. Minsan siring, bakong angay an garo kinulang nin tela o mahimpison na mga gubing na pankarigos, baga man sa mga lalaki o sa mga babae. Asin siring sa nasabi na, pagkabutwa sa tubig, dai maninigong gumibo an bagong Kristiano nin espesyal na mga mustra o mag-akto na garo baga nanggana sia nin dakula. An iba sa Kristianong asosasyon nin magturugang naoogma na an bagohan nagpabautismo. Maninigo niang masabotan na an pagpaheling na ini nin pagtubod kapinonan sana sa halawig na dalan nin integridad tanganing magkamit kan pag-oyon nin Dios.—Mateo 16:24.
Kita, bilang mga paramasid sa bautismo sa publiko, nakikikabtang sa kagayagayahan kan okasyon, nangorogna kun an saro na binabautismohan sarong paryente o saro na inadalan niato sa Biblia. Alagad, tanganing lubos na makapakikabtang, dapat kitang maghinanyog sa bilog na pahayag kaiba kan mga kandidato, magdangog sa sainda sa pagsimbag sa publiko kan mga hapot na iinaatubang sa sainda, asin umiba sa pamibi. An paggibo kaiyan matabang sa sato na papagdanayon an tamang punto-de-vista sa aktuwal na bautismo; magkakaigwa kita kan punto-de-vista nin Dios dian. Pakatapos kan pagbautismo, an satong kagayagayahan dai naghahagad nin sarong selebrasyon, sarong bukey nin burak, o sarong parti na nagtataong onra sa saro na binautismohan. Pero puwede tang dolokon an satong bagong tugang na lalaki o babae tanganing ipahayag an kaogmahan sa ginibong marahayon na tangga asin tanganing itao an maogmahon na pag-ako sa satong Kristianong asosasyon nin magturugang.
Kun siring, bilang sumaryo, kita gabos, kabale na an mga nagpabautismo sa tubig, dapat na mansayon an bautismo na may angay na pagkaseryoso. Bako iyan an panahon para sa emosyonal na mga pagkurahaw, para sa pagparti, o para sa maribok na kaorogmahan. Ni na iyan sarong mamondo o mapungaw na panahon. Tama sanang maggayagaya kita na an mga bagohan uminiba sa sato sa dalan pasiring sa buhay na daing katapusan. Asin magayagaya niatong maaako an satong bagong mga tugang na lalaki asin babae.
[Bilog na pahinang ritrato sa pahina 31]