Mga Hapot Hale sa mga Parabasa

Sa teknikal na pagtaram, igwa daw nin pagkakalaen an mga termino sa Biblia na “ibang karnero” asin “dakulang kadaklan”?

Iyo, pero dai man kita maninigong magin labi-labi kasensitibo manongod sa paggamit nin termino o mauyam kun may saro na napagbabarobalyo an paggamit sa mga terminong ini.

An kadaklan na Kristiano pamilyar sa mga teksto na manonompongan niato kan mga terminong ini. Saro an Juan 10:16. Dian si Jesus nagsabi: “Igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” An saro pang ekspresyon, na “dakulang kadaklan,” maheheling sa Kapahayagan 7:9. Satong mababasa: “Pakalihis kan mga bagay na ini ako nagheling, asin, uya! an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon, na nagtitindog sa atubangan kan trono asin sa atubangan kan Kordero, na nagugubingan nin maputing mga gubing; asin igwa nin mga sanga nin palma sa saindang mga kamot.”

Pag-olayan nguna niato an Juan 10:16. Sairisay daw an mga karnero? Bueno, marahay na girumdomon na an gabos na maimbod na parasunod ni Jesus inaapod na karnero. Sa Lucas 12:​32, inaapod niang “sadangoton na aripompon” an saiyang mga disipulo na maduman sa langit. Aripompon nin ano? Nin mga karnero. An mga “karnero” sa “sadangoton na aripompon” magigin kabtang kan Kahadean sa langit. Minsan siring, igwa nin iba pa, an mga may laen na paglaom, na ibinibilang man ni Jesus na mga karnero.

Maheheling niato ini sa Juan kapitulo 10. Pakatapos na magtaram dapit sa mga karnero arog baga kan saiyang mga apostol na iimbitaran niang mabuhay sa langit, idinugang ni Jesus sa bersikulo 16: “Igwa pa ako nin ibang karnero, na bakong sa toril na ini; kaipuhan man na darahon ko an mga ini.” Haloy nang inaako kan Mga Saksi ni Jehova na sa bersikulong ini si Jesus nagtataram dapit sa mga tawo na igwa nin paglaom na mabuhay digdi sa daga. An dakol na maimbod bago kan mga panahon na Kristiano, arog ki Abraham, Sara, Noe, asin Malaquias, igwa kan siring na mga paglaom. Kaya tamang iiba niato sinda na kabtang kan “ibang karnero” sa Juan 10:16. Durante kan Milenyo, an maimbod na mga saksing iyan bago kan panahon na Kristiano bubuhayon liwat dangan makakanood dapit ki asin aakoon si Cristo Jesus, na magigin “ibang karnero” kan Marahay na Pastor.

Aram man niato na poon kan matapos an pankagabsan na pag-apod sa grupong langitnon, minilyon an nagin tunay na Kristiano. An mga ini tamang apodon man na “ibang karnero,” huling sinda bakong kabtang kan “sadangoton na aripompon.” Imbes, an ibang karnero ngonyan naglalaom na makaantos na buhay sa sarong daganon na paraiso.

Ngonyan, ano an masasabi manongod sa kun siisay an “dakulang kadaklan” na nasambitan sa Kapahayagan 7:9? Bueno, helinga an bersikulo 13 asin an hapot na, “Sairisay sinda asin saen sinda nagharale?” Makukua niato an simbag sa Kapahayagan 7:14: “An mga ini an nagluwas sa dakulang kahorasaan.” Kaya an “dakulang kadaklan” kompuesto kan mga maluwas, o makaliligtas, sa dakulang kahorasaan. Arog kan sinasabi sa bersikulo 17, sinda ‘gigiyahan sa mga burabod kan tubig nin buhay’ digdi sa daga.

Pero, siempre, tanganing makaligtas an mga ini sa nagdadangadang na dakulang kahorasaan, bago kaini dapat na sinda naghugas na kan saindang mga gubing sa dugo kan Kordero, na nagigin tunay na mga parasamba. Huli kaini, minsan ngani ilinaladawan kan Kapahayagan 7:9 an kadaklan na ini pakalihis kan kahorasaan, puede niatong iaplikar an terminong “dakulang kadaklan” sa gabos na may daganon na mga paglaom na nagtatao ki Jehova nin banal na paglilingkod ngonyan, bago magpoon an dakulang kahorasaan paagi sa pagsalakay kan mga nasyon sa falsong relihion.

Bilang sumaryo, puedeng girumdomon niato na an “ibang karnero” mas mahiwas na termino, na kabilang an gabos na lingkod nin Dios na igwang paglaom na mabuhay sagkod lamang digdi sa daga. Kabale dian an mas limitadong kategoriya nin mga arog-karnero ngonyan na tinitipon bilang “dakulang kadaklan” na may paglaom na makaligtas na buhay sa nagdadangadang na dakulang kahorasaan. An kadaklan sa maimbod na mga Kristiano na buhay ngonyan kabilang sa “ibang karnero,” asin kabtang man sinda kan “dakulang kadaklan.”

Mahalagang otrohon na, minsan ngani tamang magin eksakto dapit sa mga kahulogan na ini, dai kaipuhan na an siisay man na Kristiano magin labi-labi kamapag-isip dapit sa termino​—na puedeng apodon na kritiko sa termino. Si Pablo nagpatanid dapit sa nagkapira na “maabhaw” asin napapalabot sa mga “pasuruhay manongod sa mga tataramon.” (1 Timoteo 6:4) Kun kita personal na nakasasabot sa nagkapirang pagkakalaen nin mga termino, marahay iyan. Pero, kita dai kaipuhan na, minsan sa panluwas o sa panlaog, magin kritiko sa iba na tibaad medyo bakong eksakto an paggamit sa mga termino sa Biblia.

An 1 Juan 4:18 nagsasabi sa sato: “Dai nin takot dian sa pagkamoot, kundi an sangkap na pagkamoot minasikwal nin pagkatakot.” Alagad si Pedro nagsurat: “Mamoot kamo sa bilog na kasararoan nin mga tugang, matakot kamo sa Dios.” (1 Pedro 2:17) Paano niato mapag-ooyon an duwang bersikulong ini?

Si Pedro asin Juan pareho apostol na direktang nakanood ki Jesu-Cristo mismo. Sa siring makakokompiar kita na an saindang isinurat talagang nagkakaoyon. Kun manongod sa mga bersikulong kinotar sa itaas, an liabe iyo na an duwang apostol nagtataram dapit sa magkalaen na klase nin takot.

Pag-olayan nguna niato an hatol ni Pedro. Siring sa ipinaheheling kan konteksto, tinatawan ni Pedro an mga kapwa Kristiano nin ipinasabong na sadol dapit sa saindang kaisipan manongod sa mga may autoridad. Sa ibang pagtaram, nagkokomento sia dapit sa tamang pagmansay sa pagpapasakop sa nagkapirang bagay. Sa siring, sinadol nia an mga Kristiano na magpasakop sa mga tawo na nagkakapot nin may autoridad na mga katongdan sa mga gobyerno nin tawo, arog nin mga hade o gobernador. (1 Pedro 2:​13, 14) Sa pagpadagos, si Pedro nagsurat: “Tawan nin onra an gabos na klase nin tawo, mamoot kamo sa bilog na kasararoan nin mga tugang, matakot kamo sa Dios, tawan nin onra an hade.”​—1 Pedro 2:17.

Kun kokonsideraron an konteksto, malinaw na kan si Pedro magsabi na an mga Kristiano maninigong ‘matakot sa Dios,’ boot niang sabihon na kita maninigong magkaigwa nin hararom, may pagsambang paggalang sa Dios, pagkatakot na mapamondo an pinakahalangkaw na autoridad.​—Ikomparar an Hebreo 11:7.

Kumusta man an komento ni apostol Juan? Sa enotan kan 1 Juan kapitulo 4, an apostol nagpaliwanag dapit sa pangangaipong baloon an “ipinasabong na mga tataramon” arog kan mga hale sa falsong mga propeta. An mga tataramon na iyan sierto nanggad na bakong gikan ki Jehova Dios; iyan gikan sa o impluwensiado kan maraot na kinaban.

Sa kabaliktaran, an linahidan na mga Kristiano “gikan sa Dios.” (1 Juan 4:​1-6) Huli kaiyan, si Juan nagsadol: “Mga namomotan, padagos kitang magkaminorootmootan, huli ta an pagkamoot gikan sa Dios.” An Dios an enot na nagpaheling nin pagkamoot​—“isinugo [nia] an saiyang Aki bilang pantubos na atang para sa satong mga kasalan.” (1 Juan 4:​7-10) Ano an maninigong magin reaksion niato?

Malinaw nanggad, maninigo kitang magdanay na kasaro kan satong mamomoton na Dios. Dai kita maninigong makubhanan sa saiya ni magtakig sa pagdolok sa saiya sa pamibi. Bago kaini si Juan naghatol: “Kun dai kita kondenaron kan satong puso, igwa kita nin katalingkasan sa pagtaram sa Dios; asin ano man an satong hagadon inaako niato gikan sa saiya, huli ta kinukuyog niato an saiyang mga pagboot.” (1 Juan 3:​21, 22) Iyo, an malinig na konsensia nagtatao sa sato kan katalingkasan na dumolok sa Dios na mayong nakapaparalisar o nakapopogol na takot. Huli sa pagkamoot, nakamamate kitang talingkas na mag-apod, o dumolok, ki Jehova sa pamibi. Sa bagay na ini, “dai nin takot dian sa pagkamoot.”

Kaya pagsaroon niato an duwang ideya. An sarong Kristiano dapat na perming magkaigwa nin may pagsambang takot ki Jehova, bunga nin hararom na paggalang sa saiyang katongdan, kapangyarihan, asin hustisya. Alagad sato man na namomotan an Dios bilang satong Ama asin nakamamate kita nin kadayupotan sa saiya asin nin katalingkasan na dumolok sa saiya. Imbes na mapogolan nin ano man na takot sa saiya, nananarig kita na puede kitang dumolok sa saiya, kun paanong an sarong aki nakamamateng talingkas na dumolok sa sarong mamomoton na magurang.​—Santiago 4:8.