Mga Namamahala sa Rona nin mga Espiritu

SIISAY daw an namamahala sa kinaban? Igwa daw nin sarong klase nin lihis sa tawong pangangataman? O pinabayaan na daw nin Dios an mga tawo na iyong mag-asikaso sa saindang sadiri? Sa paghanap nin simbag sa mga hapot na ini, pag-olayan nguna niato an sarong pangyayari durante kaidtong ministeryo ni Jesu-Cristo digdi sa daga.

Dai nahaloy pakatapos kan saiyang bautismo, si Jesus sinugotan nin sarong dai naheheling na espiritung linalang na inaapod na Satanas na Diablo. Sa pagsambit sa saro sa mga sugot, an Biblia nagsasabi: “Dinara [si Jesus] kan Diablo sa sarong halangkawon na bukid, asin ipinaheling sa saiya an gabos na kahadean kan kinaban asin an kamurawayan kan mga iyan.” (Mateo 4:8) Dangan si Satanas nagsabi ki Jesus: “Itatao ko sa saimo an gabos na autoridad na ini asin an kamurawayan kaiyan, huling iyan itinao sa sako, asin kun siisay an boot kong tawan itinatao ko iyan. Ika, kun siring, kun ika gumibo nin sarong akto nin pagsamba sa atubangan ko, iyan gabos mapapasaimo.”​—Lucas 4:​6, 7.

Naghingako si Satanas na sia an may autoridad sa gabos na kahadean, o gobyerno, sa kinaban na ini. Pignigaran daw ni Jesus an paghihingakong ini? Dai. An totoo, pinatunayan nia iyan sa saro pang pangyayari paagi sa pag-apod ki Satanas na “namamahala sa kinaban.”​—Juan 14:30.

Sono sa Biblia, si Satanas sarong maraot na anghel na igwa nin dakulang kapangyarihan. An Kristianong apostol na si Pablo iinaasosyar si Satanas sa “maraot na mga puersang espiritu” asin inaapod sinda na “mga namamahala sa kinaban sa kadikloman na ini.” (Efeso 6:​11, 12) Saro pa, si apostol Juan nagsabi na “an bilog na kinaban namumugtak sa kapangyarihan kan maraot.” (1 Juan 5:19) An libro sa Biblia na Kapahayagan nagsasabi na si Satanas “nandadaya sa bilog na ineerokan na daga.” (Kapahayagan 12:9) Sa simbolikong mga termino, si Satanas ilinaladawan man kan Kapahayagan na sarong dragon na nagtatao sa politikal na palakaw kan kinaban “kan kapangyarihan kaiyan asin kan trono kaiyan patin dakulang autoridad.”​—Kapahayagan 13:2.

An mga pangyayari sa kinaban nagpapatunay man na igwa nin naghihirong maraot na kapangyarihan, na minamaniobra an mga tawo sa saindang ikararaot. Huli sa ano pang ibang dahelan na an mga gobyerno nin tawo dai nakapalalakop nin katoninongan? Ano pa daw an magpapangyari sa mga tawo na mag-inorongisan asin maggaradanan? Nakukubhanan sa mga bangkay asin garadanan sa sarong guerra sibil, an sarong nakaheling nagsabi: “Inda ko kun paano nangyari ini. Iyan bako sanang pagkaongis. Sarong maraot na espiritu an naggagamit sa mga tawong ini na maggaradanan.”

Sarong Tunay na Persona na Tumang sa Dios

Ngonyan, dakol an dai naniniwala ki Satanas na Diablo. Pero, sia bako sanang an prinsipyo nin karatan na nasa katawohan, arog kan paniniwala nin iba. An Biblia asin mga pangyayari sa kinaban pareho nagpapaheling na sia sarong tunay na persona. Dugang pa, si Satanas biyong tumang ki Jehova Dios. Siempre, si Satanas bakong kapantay nin Dios. Mantang si Jehova an Kaglalang na makapangyarihan sa gabos, sia an may katanosan na Namamahala sa gabos na linalang.​—Kapahayagan 4:11.

An Dios dai naglalang nin sarong maraot na linalang na tumang sa saiya man sana. Imbes, an saro sa mga anghel na “aki nin Dios” nagpatalubo nin paslong kamawotan na agawon nia an pagsamba na si Jehova an may katanosan na panongdan. (Job 38:7; Santiago 1:​14, 15) An pagmawot na ini naggiya sa saiya na magpoon na magrebelde tumang sa Dios. Paagi sa pagrebelde, an espiritung linalang na ini ginibo an saiyang sadiri na Satanas (na an boot sabihon “paratumang”) asin Diablo (na an boot sabihon “parabalobagi”). Kun kokonsideraron ini gabos, tibaad mag-isip kamo kun taano ta tinotogotan si Satanas na mamahala sa kinaban.

Kun Taano ta Tinotogotan na Mamahala si Satanas

Nagigirumdoman daw nindo an sinabi ni Satanas ki Jesus manongod sa pamamahala sa daga? “Itatao ko sa saimo an gabos na autoridad na ini . . . huling iyan itinao sa sako,” an sabi ni Satanas. (Lucas 4:6) An pananaram na iyan nagpapaheling na si Satanas na Diablo igwa nin autoridad sa pagtogot sana nin Dios. Alagad taano ta tinotogotan nin Dios si Satanas?

An simbag sa hapot na iyan konektado sa mga pangyayari sa tatamnan nin Eden, kun saen pinonan ni Satanas an saiyang karera bilang namamahala sa kinaban. Duman pinalataw ni Satanas na sala an paagi nin pamamahala nin Dios paagi sa pangunguri nin sarong bagay na marahay sa enot na lalaki asin babae, si Adan asin Eva. Sono ki Satanas, kun kakakanon ninda an bunga na ipinangangalad nin Dios, sinda makatatalingkas. Si Adan asin Eva magigin talingkas asin independiente ki Jehova. Sinda magigin arog mismo nin Dios!​—Genesis 2:​16, 17; 3:1-5.

Paagi sa pagputik sa paaging ini asin sa pagtentar ki Eva saka pag-agyat ki Adan paagi ki Eva na lapason an pagboot nin Dios, nadara ni Satanas an enot na tawong mag-agom na mapasa irarom kan saiyang pangengenot asin kontrol. Sa siring an Diablo an nagin saindang dios, saro na tumang ki Jehova. Minsan siring, imbes na katalingkasan, si Adan asin Eva nakaeksperyensia nin kaoripnan ki Satanas, sa kasalan, asin sa kagadanan.​—Roma 6:16; Hebreo 2:​14, 15.

Kaoyon sa saiyang sangkap na hustisya, puede kutanang gadanon tolos ni Jehova si Satanas asin an duwang bagong parasunod kaini. (Deuteronomio 32:4) Pero, igwang napapalabot na moral na isyu. Kinustion ni Satanas an pagigin may katanosan kan paagi nin pamamahala ni Jehova. Sa saiyang kadonongan, tinogotan nin Dios na umagi an panahon tanganing mapatunayan na an pagigin independiente sa saiya nagdadara nin kapahamakan. Tinogotan ni Jehova an mga rebelde na padagos ngunang mabuhay, na nagtogot ki Adan asin Eva na magkaaki.​—Genesis 3:​14-19.

Minsan ngani an kadaklan sa aki ni Adan dai nagpasakop sa pamamahala ni Jehova, an mga ginibo nin Dios sa Saiyang mga parasamba nagpaheling kan pagigin mas halangkaw kaiyan. An tamang pagmidbid sa autoridad ni Jehova nagtatao nin kaogmahan asin tunay na katiwasayan. Sa ibong na kampi, kasakitan asin kapurisawan an ibinunga kan pamamahala nin tawo sa irarom kan impluwensia ni Satanas. Iyo, “an tawo nagsakop sa tawo sa saiyang ikararaot.” (Eclesiastes 8:9) An mga tawo dai nakanompong nin tunay na katiwasayan asin nagdadanay na kaogmahan sa irarom kan pamamahala nin tawo sa kinaban na ini na namumugtak sa kapangyarihan ni Satanas. Minsan siring, igwa nin tamang dahelan na magkaigwa nin marahay na paglaom.

Halipot na Sana an Panahon ni Satanas!

Temporaryo an impluwensia ni Satanas digdi sa daga. Dai na totogotan ni Jehova na lumawig pa an satanikong pamamahala! Madali nang gaposon an Diablo. Sarong bagong namamahala an makapot sa daga, sarong matanos na hade na an Dios mismo an puminili. An Hadeng iyan iyo si Jesu-Cristo. Mapadapit sa saiyang pagtukaw sa trono sa langit, an Kapahayagan nagsasabi: “An kahadean kan kinaban nagin nang kahadean kan satong Kagurangnan [si Jehova] asin kan saiyang Cristo.” (Kapahayagan 11:15) An kronolohiya sa Biblia, kadungan kan kaotoban kan hula sa Kasuratan, nagpapatunay na ini nangyari kan taon 1914.​—Mateo 24:​3, 6, 7.

Ilinaladawan man kan Biblia an nangyari dai nahaloy pagkatukaw ni Jesus sa trono. Iyan nagsasabi: “Puminotok an ralaban sa langit: Si Miguel [si Jesu-Cristo] asin an saiyang mga anghel nakipaglaban sa dragon [si Satanas na Diablo], asin an dragon asin an mga anghel kaiyan nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog kaiba nia.”​—Kapahayagan 12:​7-9.

Ano an magigin resulta kan pagpahale ki Satanas sa langit? An mga nasa langit makapaggagayagaya, alagad kumusta an mga nag-eerok sa daga? “Herak man kan daga asin kan dagat,” an sabi kan Kapahayagan 12:​12, “huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” Tunay nanggad, an pagpalayas ki Satanas hale sa langit nagdara nin kasakitan sa daga. An The Columbia History of the World nagsasabi: “An dakulang kapahamakan kan Apat na Taon na Guerra kan 1914–1918 . . . nagpaheling sa Solnopan na dai kaiyan kayang protehiran an sibilisasyon sa sadiring kakablasan o maraot na kapusokpusokan kaiyan. An kasarigan nin boot kan Solnopan nungka talagang naulian sa kalaglagan na idto.”

An mga kasakitan kan kapag-arakian na ini labi pa sa laglag na kasarigan nin boot. Si Jesus naghula: “An nasyon matindog tumang sa nasyon asin an kahadean tumang sa kahadean, asin magkakaigwa nin mga kakulangan nin kakanon asin mga linog sa surunodsunod na lugar.” Naghula man sia na magkakaigwa nin mga peste. (Mateo 24:​7, 8; Lucas 21:11) Saro pa, an Biblia nagsasabi na sa “huring mga aldaw” kan palakaw nin mga bagay ni Satanas, dakol an magigin “mamomoton sa sainda man sana, mamomoton sa pirak, . . . masumbikal sa mga magurang, . . . dai maoyonan.” An mga tawo magigin man “mga mamomoton sa kasingawan kisa magin mamomoton sa Dios.”​—2 Timoteo 3:​1-5.

Mga guerra, peste, kakulangan sa kakanon, linog, asin pagruro nin mga pamantayan sa moral​—an gabos na iyan nangyari sa dai pang kaagid na sokol poon kan 1914, siring nanggad kan pagkahula sa Biblia. Ipinaririsa kaiyan na an anggot na kaiwal nin Dios asin nin tawo​—si Satanas na Diablo—​pinahale na sa langit asin ngonyan inuubos an saiyang kaanggotan sa mga sakop kan daga. Alagad ipinaheheling man kan Biblia na si Satanas dai totogotan na maghaloy pa sa paghiro. Sia igwa na sana nin ‘halipot na panahon’ na natatada sagkod sa Armagedon, kun laglagon na nin Dios an palakaw sa kinaban na kontrolado ni Satanas.

Ano na an mangyayari ki Satanas? Si apostol Juan nagsurat: “Naheling ko an sarong anghel na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinolog nia sia sa bungaw asin pinintoan nia idto patin sinelyohan idto sa ibabaw nia.” (Kapahayagan 20:​1-3) Kanigoan na kaginhawahan para sa nagsasakit na katawohan!

Paggayagaya sa Irarom kan Pamamahala kan Kahadean

Mantang mayo nang maginibo si Satanas, an Kahadean nin Dios na kapot ni Jesu-Cristo lubos nang makontrol sa mga aktibidad kan katawohan. Imbes kan pagkaigwa nin dakol na gobyerno digdi sa daga, solamente sarong langitnon na gobyerno an magdadanay tanganing mamahala sa bilog na planeta. An guerra magigin nang bagay kan nakaagi, asin an katoninongan makalalakop sa gabos na lugar. Sa pamamahala kan Kahadean nin Dios, an gabos iribang mag-eerok na may mamomoton na asosasyon nin magturugang.​—Salmo 72:​7, 8; 133:1; Daniel 2:44.

Magigin anong klaseng namamahala si Jesus? Kan uya sia digdi sa daga, sia nagpaheling nin hararom na pagkamoot sa mga tawo. Si Jesus madinamayon na nagtao nin kakanon sa mga nagugutom. Pinaomayan nia an mga may helang asin tinawan liwat nin pakaheling an mga buta, nin pakataram an mga pula, asin nin kabagsikan nin tabay an mga pilay. Nagbuhay pa ngani liwat si Jesus nin mga gadan! (Mateo 15:​30-38; Marcos 1:34; Lucas 7:​11-17) An mga milagrong idto mga patanaw kan kahangahangang mga bagay na gigibohon pa nia bilang Hade. Abaa kagayon na magkaigwa nin siring kaboot na namamahala!

Daing katapusan na mga bendisyon an maeeksperyensiahan kan mga nagpapasakop sa soberaniya ni Jehova. An Kasuratan nanunuga: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula makurahaw sa kaogmahan.” (Isaias 35:​5, 6) Itinotokdo an mamuraway na aldaw na iyan, si apostol Juan nagsurat: “Nakadangog ako nin makosog na tingog hale sa trono na nagsabi: ‘Uya! An tabernakulo nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’”​—Kapahayagan 21:​3, 4.

An mga kaogmahan na itinao kan pamamahala ni Jehova Dios paagi sa saiyang Aki, si Jesu-Cristo, matao nin balos na labi pa sa ano man na kasakitan na tibaad naeksperyensiahan niato sa presenteng palakaw nin mga bagay na dominado ni Satanas na Diablo. Sa ipinanuga nin Dios na bagong kinaban, an mga tawo dai mag-iisip, ‘Siisay man nanggad an namamahala?’ (2 Pedro 3:13) An makinuyog na katawohan magigin maogma asin tiwasay sa daganon na sakop kan mamomoton na mga Namamahala sa rona nin mga espiritu, si Jehova asin si Cristo. Taano ta dai akoon an paglaom na makabilang sa mga sakop ninda?

[Retrato sa pahina 7]

An katawohan magigin tiwasay sa daganon na sakop kan Kahadean nin Dios

[Pasasalamat para sa pinagkuanan kan retrato sa pahina 4]

Retrato kan NASA