Mga Saksi ni Jehova sa Bilog na Kinaban—Brazil
AN Brazil sarong higanteng daga huli sa dakol na bagay. Kapwa sa kadakulaan asin populasyon, iyan an ikalimang pinakadakulang nasyon sa kinaban. Sakop kaiyan an haros kabanga kan daga kan Amerika del Sur asin mas dakol an populasyon kaiyan kisa sa pinagsararong populasyon sa gabos na iba pang nasyon sa kontinenteng iyan. Yaon man sa Brazil an pinakamahiwas na kadlagan sa kinaban. Nagbobolos sa kadlagan na iyan an pinakamakosog na salog sa daga—an Amazon.
An Brazil saro man na higante sa saro pang sentido. An bilang kan mga parahayag duman kan maogmang bareta kan Kahadean nin Dios haros 400,000 na, asin kan nakaaging taon labing 1,000,000 an nag-atender sa Memorial kan kagadanan ni Cristo. An daga na ini kun siring nangorognang lataw kun pag-oolayan an gibohon na paghuhulit kan Kahadean. An bago pa sanang mga eksperyensia nagpapaheling kan bagay na ini.
Paglilingkod kun Saen Mas Dakula an Pangangaipo
Ginibo ni Antonio asin kan saiyang agom an depisil na desisyon na bayaan an saindang mga paryentes asin an sarong segurado, halangkaw an sueldong trabaho sa São Paulo tanganing maglingkod kun saen mas dakula an pangangaipo para sa mga parabalangibog kan Kahadean sa estado nin Minas Gerais. Kabale sa teritoryo ninda an sarong grupo nin mga trabahador sa sarong pabrika nin asukar. Kan enot na aldaw na naghulit sinda duman, nakapoon sinda nin siyam na pag-adal sa Biblia. Mayo pang 18 bulan, nagkokondukta na sinda nin labing 40 pag-adal!
Sa primero, an mga pagtiripon ginigibo duman mismo sa pabrika. Minsan siring, an bagong mga parahayag gustong makaheling nin sarong tunay na Kingdom Hall. Huli kaini, sarong auto an inarkila tanganing lunadan nin 75 tawo pasiring sa pinakaharaning kongregasyon. Dangan nagkaigwa nin sarong kombension; 45 sa bagong mga estudyante sa Biblia an nag-atender asin ininterbio. Kinse kaini an nabautismohan sa okasyon na idto. Sabihon pa, nagbolos an mga luha nin kagayagayahan!
An iyo man sanang kompanya nin auto an ginamit sa kaagid na mga pagbiahe, asin ininaan kan mga opisyal an plete. Bilang pag-apresyar, tinawan ni Antonio nin pantabang sa pag-adal sa Biblia an kagsadiri kan kompanya. Uminoyon ini na ponan an pag-adal sa Biblia kan mismong bangging idto asin nabautismohan sia pakalihis nin nagkapirang bulan nin mahigos na pag-adal. Kan primero, kontra sa pag-adal an saiyang agom, alagad pag-abot nin panahon, nagin maboot ini. Ngonyan sia saro na man na bautisadong Saksi ni Jehova.
Kan Pebrero 1992 sarong kongregasyon na may 22 na aktibong parahayag an inorganisar. Pag-abot nin 1994 an bilang na ini nagin 42, na 4 an regular payunir, o pambilog na panahon na mga parahulit kan maogmang bareta. Bilang resulta, si Antonio nagkonklusyon: “Naheling niamo mag-agom na kun satuyang ‘babaloon si Jehova,’ siring sa sinasabi kan Malaquias 3:10, ‘uulaan nia kita nin bendisyon sagkod na mayo na nin kulang.’”
Pag-alok nin mga Literatura sa Biblia
Posible na an saro pang dahelan kaya dakulaon an pag-oswag kan gibohon na paghuhulit sa Brazil iyo na an mga Saksi nag-aalok nin mga literatura sa Biblia sa gabos na oportunidad. Halimbawa, sarong kongregasyon an nagsurat sa sangang opisina kan Watch Tower Society na naghahagad na padarahan nin 250 kopya kan librong Questions Young People Ask—Answers That Work. Taano ta siring kadakol kan pedido?
An surat nagpaliwanag: ‘An saro sa mga eskuelahan sa banwaan nagdesisyon na gamiton an librong ini bilang materyal sa pagtotokdo sa saro sa mga klase. An dahelan kan desisyon kan mga autoridad sa eskuelahan iyo an impormal na pagpapatotoo na ginigibo kan mga magurang kan mga estudyante na Mga Saksi ni Jehova asin kan saro sa mga superbisor kan eskuelahan. Padagos logod na bendisyonan ni Jehova an saiyang mga lingkod mantang itinatao ninda an marahay na pagtotokdo paagi sa librong ini.’ Iyo, asin padagos logod na bendisyonan ni Jehova an marahay na pag-oswag kan gibohon na paghuhulit kan Kahadean sa higanteng daga nin Brazil.
[Kahon sa pahina 8]
SUMARYO KAN NASYON
1994 Taon nin Paglilingkod
PINAKAHALANGKAW NA BILANG NIN NAGPAPATOTOO: 385,099
KATIMBANG: 1 Saksi sa 404
NAG-ATENDER SA MEMORIAL: 1,018,210
PROMEDYONG MGA PARAHAYAG NA PAYUNIR: 38,348
PROMEDYONG MGA PAG-ADAL SA BIBLIA: 461,343
BILANG NIN NABAUTISMOHAN: 24,634
BILANG NIN MGA KONGREGASYON: 5,928
SANGANG OPISINA: CESÁRIO LANGE
[Retrato sa pahina 9]
Sarong autong may laudispiker na ginamit sa São Paulo kaidtong mga 1940
[Retrato sa pahina 9]
Paghuhulit sa Hardin Botaniko sa Rio de Janeiro
[Retrato sa pahina 9]
An sangang opisina sa Cesário Lange