Pagtitiwalag—Saro daw na Mamomoton na Probisyon?
“BANAL, banal, banal si Jehova Dios, an Makakamhan sa gabos.” (Kapahayagan 4:8) Kaoyon sa paglaladawan na iyan, si Jehova iyo an Burabod nin banal na mga pamantayan. An mga ini nasusurat sa “banal na mga kasuratan,” asin an mga Kristiano obligadong sumunod sa mga giyang ini. Iyo nanggad, dapat nindang likayan an ano man na marigsok sa pagheling ni Jehova.—2 Timoteo 3:15; Isaias 52:11.
An Biblia malinaw na nagboboot: “Kaoyon sa Banal na Saro na nag-apod sa saindo, magin man kamong mga banal sa gabos nindong gawe, huli ta nasusurat: ‘Kaipuhan kamong magin banal, huli ta ako banal.’” (1 Pedro 1:15, 16) Poon pa kan mag-eksister an Kristianong kongregasyon kaidtong 19 siglo na an nakaagi, nakikipaglaban na nin maigot an tunay na mga Kristiano tanganing protehiran iyan sa espirituwal asin moral na karigsokan.—Judas 3.
Kun Taano ta Kaipuhan an Proteksion
An gabos na lingkod nin Dios napapaatubang sa angat na pagdadanay na malinig sa moral asin espirituwal. Sa katuyohan na iyan, tolong makokosog na kaiwal an dapat na tumangon—si Satanas, an saiyang kinaban, asin an satong makasalan na mga inklinasyon nin laman. (Roma 5:12; 2 Corinto 2:11; 1 Juan 5:19) An kinaban ni Satanas susugotan kamo na magin inmoral, aagyaton kamo na akoon an mga dalan kaiyan, asin aalokon kamo nin materyal na kayamanan, kabantogan, posisyon, pagkaprominente, asin kapangyarihan. Alagad an mga desididong magpadagos sa tunay na pagsamba tinutumang an mga alok ni Satanas asin nagdadanay na “daing digta kan kinaban.” Taano? Huli ta boot nindang magdanay sa nagpoprotehir asin mamomoton na pag-ataman kan malinig na organisasyon ni Jehova.—Santiago 1:27; 1 Juan 2:15-17.
Si Jehova nagtatao nin tabang sa siisay man na miembro kan Kristianong kongregasyon na nabibiktima kan mga sugot ni Satanas huli sa kaluyahan nin tawo. An kualipikado sa espirituwal na kamagurangan ninombrahan na protehiran an kongregasyon asin mamomoton na tabangan an mga nagkakasala na magsolsol sa saindang kasalan asin gumibo kan mga pagliliwat na kaipuhan tanganing makabalik. An siisay man na Kristiano na napapalabot sa salang gibo maninigo na mapasensiang tabangan na magsolsol asin liwaton an saiyang mga dalan.—Galacia 6:1, 2; Santiago 5:13-16.
Kun Paanong Mamomoton an Pagtitiwalag
An bautisadong mga lingkod ni Jehova na tuyong nagsusunod sa makasalan na dalan asin habong magbago dapat na ibilang na daing pagsolsol asin sa siring bakong angay para sa Kristianong pakikikatood. (Ikomparar an 1 Juan 2:19.) An siring na mga indibiduwal dai puedeng togotan na magdanay sa laog kan malinig na Kristianong kongregasyon asin sa siring makaolakit dian. Sinda dapat na pahaleon.
An pagigin angay kan pagpahale sa mga naggigibo nin maraot ikaiilustrar kan minasunod na situwasyon: Huli sa nag-oorog na mga pag-atake asin madahas na krimen tumang sa mga estudyante, may mga eskuelahan na naggibo nin sarong regulasyon na “naghahagad nin permanenteng pagpahale sa eskuelahan kan mga estudyante na naggagamit o nanhuhumang gumamit nin mga armas,” an ibinareta kan The Globe and Mail, sarong diaryo sa Toronto, Canada. An pagpahale ginigibo tanganing protehiran an mga estudyante na gustong makinabang sa programa nin edukasyon na dai namemeligro sa mga kadahasan.
Taano daw ta mamomoton na pahaleon sa kongregasyon an daing pagsolsol na parakasala? An paggibo kaiyan sarong kapahayagan nin pagkamoot ki Jehova asin sa saiyang mga dalan. (Salmo 97:10) An aksion na ini nagpapaheling nin pagkamoot para duman sa mga nagpapadagos sa matanos na dalan huli ta hinahale kaiyan sa tahaw ninda an saro na puedeng magin maraot na impluwensia sa sainda. Pinoprotehiran man kaiyan an kadalisayan kan kongregasyon. (1 Corinto 5:1-13) Kun tinotogotan na magdanay sa kongregasyon an grabeng inmoralidad o espirituwal na karigsokan, iyan maoolakitan asin dai na magigin angay para sa pagtao nin banal na paglilingkod ki Jehova, na banal. Dugang pa, an pagpahale sa parakasala puedeng makatabang sa saiya na maheling an pagkaseryoso kan saiyang bikong dalan, magsolsol, asin gumibo nin kinakaipuhan na mga pagbabago asin sa siring akoon liwat sa laog kan kongregasyon.
An Epekto sa Iba
Kun an sarong miembro kan kongregasyon makagibo nin seryosong kasalan, na arog nin pagsambay, dai nia napaoogma an puso ni Jehova. (Talinhaga 27:11) An siisay man na Kristiano na napadadara sa seksuwal na inmoralidad tunay nanggad na dai nag-iisip nin arog ni Jose kan hingoahon kan agom ni Potifar na akiton siang makidorog sa saiya. An reaksion ni Jose: “Paano ko magigibo an dakulang karatan na ini asin aktuwal na magkasala tumang sa Dios?” (Genesis 39:6-12) Iginalang ni Jose an banal na mga pamantayan ni Jehova asin dinulagan nia an situwasyon. Sa ibong na kampi, minalataw na an sarong parasambay mayo nin igong pagkamoot sa Dios na likayan an pagpanigo sa horot kan saiyang laman.—Galacia 5:19-21.
An sarong bautisado na naglalapas sa mga pagboot nin Dios daing pagmakolog sa danyos asin kolog na dadarahon nia sa saiyang mga paryentes na may pagtubod. An epekto sa emosyon dai kayang tagalan nin iba. Pakadiskobre na inmoral an saiyang aki, an sarong Kristiana nanambitan: “Kakadikit, kun igwa man, na tugang na lalaki asin babae an garo baga nakasasabot kun gurano kami nakolgan asin nadanyaran. . . . Laglag an samong puso.” An reputasyon kan bilog na pamilya tibaad pagdudahan. An depresyon asin pakamate nin sala tibaad ikasakit kan maimbod na mga miembro nin pamilya. Sa siring, an maraot na dalan kan parakasala nagdadara sa pamilya nin kakologan sa puso.
Mamomoton na Tabang Para sa mga Miembro nin Pamilya
Kaipuhan na girumdomon kan maimbod na Kristianong mga kapamilya nin mga pinahale na an pagtitiwalag pareho mamomoton asin nagpoprotehir. Ginigibo an gabos na posibleng paghihingoa na matabangan an parakasala. Alagad kun sia masumbikal sa Dios asin sutil na habong magsolsol, an kongregasyon kaipuhan na protehiran asin mayo nin ibang magigibo kundi humiro oyon sa ipinagboboot kan Tataramon nin Dios: “Haleon nindo an maraot na tawo dian sa tahaw nindo.” (1 Corinto 5:13) Arog kan pagkasabi nin sarong Saksi, “an pagtitiwalag kaimbodan ki Jehova.”
Kun natiwalag an sarong miembro nin pamilya, an Kristianong mga paryentes nakokologan. An nombradong kamagurangan kun siring maninigong gumibo kan saindang pinakamakakaya na mapaginhawa sinda sa espirituwal. (1 Tesalonica 5:14) An kamagurangan puedeng mamibi para sa sainda asin kaiba ninda. Sa parate puedeng songkoon an maimbod na mga Kristianong ini tanganing pag-olayan an nakapakokosog na mga punto sa Kasuratan. Maninigong gamiton kan mga pastor kan aripompon an gabos na oportunidad na pakosogon sa espirituwal an mga namomotan na ini bago asin pakatapos nin Kristianong mga pagtiripon. Ikatatao an dugang pang pampakosog paagi sa pag-iba sa sainda sa ministeryo sa langtad. (Roma 1:11, 12) An espirituwal na mga pastor dapat na magpaheling sa maimbod na mga lingkod na ini ni Jehova kan pagkamoot asin atension na maninigo sa sainda.—1 Tesalonica 2:7, 8.
An makasalan na dalan nin saro bakong dahelan na dai na pag-intindihon an siisay man sa saiyang pamilya na nagdadanay na maimbod ki Jehova. An maraot na si Hadeng Saul nin Israel isinikwal nin Dios, alagad dai ini tinogotan ni David na makaolang sa saiya mismong kapadangatan sa aki ni Saul na si Jonatan. An totoo, an relasyon ni David asin Jonatan kuminosog na marhay. (1 Samuel 15:22, 23; 18:1-3; 20:41) Kaya an gabos sa kongregasyon maninigong magin mapagsuportar asin mamomoton sa mga Kristiano na an mga paryentes nagkakasala tumang ki Jehova.
Bako nanggad na mamomoton na dai na pag-intindihon o dai maherak sa siring na mga maimbod! An maimbod na mga miembro nin pamilya igwa nin espesyal na pangangaipo nin pagpakosog. Tibaad makamate sindang nagsosolo asin masakitan na marhay sa saindang situwasyon. Tibaad may ikasaysay kamo sa saindang espirituwal na bareta o nakapakokosog na eksperyensia paagi sa telepono. Kun an pinahale sa kongregasyon an makasimbag sa telepono, sabihon sana na gusto nindong makaolay an Kristianong paryentes. Puede nindong imbitaran an maimbod na mga miembro kan siring na pamilya sa sarong sosyal na pagtiripontipon o sa sarong karakanan sa harong nindo. Kun manompongan nindo sinda mantang namamakal, puede nindong gamiton an okasyon na iyan para sa nakapakokosog na pag-ibahan. Girumdomon, an maimbod na mga Kristiano na igwang mga paryentes na natiwalag kabtang pa man giraray kan malinig na organisasyon ni Jehova. Sinda madaling mapasuhay asin panluyahan nin boot. Kun siring, magin alisto na pahelingan sinda nin kabootan asin pagkamoot. Padagos na gumibo nin marahay ‘sa gabos na may relasyon sa saindo sa pagtubod.’—Galacia 6:10.
Pahalagahan an Probisyon ni Jehova
Makapasasalamat nanggad kita na si Jehova Dios nagpapaheling nin mamomoton na pagmakolog sa lambang saro sa pambilog na kinaban na pamilya kan mga parasamba sa saiya. Paagi sa saiyang organisasyon sia mamomoton na nagtatao nin sarong areglo tanganing tabangan kita sa paglakaw sa atubangan nia sa matanos na paagi. Dawa kun an sarong miembro nin pamilya tuyong naggigibo nin kasalan asin dapat na pahaleon sa kongregasyon, igwa nin paagi na makabalik kun sia tunay na nagsosolsol. Iiniilustrar ini kan minasunod na halimbawa:
An kamagurangan naghingoang tabangan an saro na aapodon niatong Ana, alagad sia nanigarilyo, nagburat, asin nagdroga. Sia dai nagsolsol asin dai nagdanay sa laog kan kongregasyon. Minsan siring, dai nahaloy nagpoon na hidawon ni Ana an mamomoton na pakikikatood kan malinig na kongregasyon ni Jehova asin namibi sia sa saiya para sa tabang. Saiyang inadmitir na dai nia lubos na nasabotan kun gurano kadakula kan pagmakolog kan kamagurangan sa mga nalalagalag. Si Ana nagpoon na umatender giraray sa mga pagtiripon, asin ini naggiya sa pagsolsol. Pakatapos kaiyan, inako sia liwat sa laog kan mamomoton asin nagpoprotehir na kongregasyon. Sa giraray, si Ana nagsusuportar na sa halangkaw na pamantayan ni Jehova sa moralidad. Sia nagpapasalamat sa pagkamoot na ipinaheling kan kamagurangan asin nagsabi man: “Dai nindo maiisip kun gurano kadakula kan ikinatabang sa sako kan Kristianong mga publikasyon. Tunay nanggad na inaasikasong marhay ni Jehova an satong mga pangangaipo.”
Iyo, an Dios nagtatao nin paagi na makabalik an mga pinahale sa kongregasyon alagad sa huri nagsosolsol. Naheling niato na pati an pagtitiwalag mismo sarong mamomoton na probisyon. Alagad mas marahay nanggad na likayan an mamondong eksperyensiang ini paagi sa perming pagkuyog sa matanos na mga dalan kan satong banal na Dios! Permi logod niatong pasalamatan an pribilehiong omawon si Jehova bilang kabtang kan saiyang malinig, mamomoton, asin nagpoprotehir na organisasyon.
[Retrato sa pahina 26]
Nagpapaheling daw kamo nin pagkamoot sa maimbod na mga paryentes kan mga pinahale sa kongregasyon?