Mga Hapot Hale sa mga Parabasa

Si Maria daw na nagin ina ni Jesus bados na kan magsongko sia sa saiyang paryenteng si Elizabet?

Iyo, malinaw na bados na sia.

Sa Lucas kapitulo 1, enot niatong mababasa an manongod sa pagbados ni Elizabet, an agom kan saserdoteng si Zacarias, na nangaki ki Juan (na Bautisador). Kan si Elizabet nasa “ikaanom niang bulan an anghel na si Gabriel” dinalaw si Maria tanganing paisihon sia na sia mangingidam asin mangangaki kan “Aki kan Kaharohalangkawe.” (Lucas 1:​26, 30-33) Alagad kasuarin nagbados si Maria?

An tala ni Lucas padagos na nagsasaysay na pakatapos tolos kaiyan si Maria nagduman sa Juda tanganing songkoon an saiyang bados nang paryenteng si Elizabet. Kan maghelingan an duwang babae, an omboy sa matris ni Elizabet (si Juan) luminukso. Nasambitan ni Elizabet an ‘bunga kan matris ni Maria,’ asin inapod nia si Maria na “ina kan sakong Kagurangnan.” (Lucas 1:​39-44) An lohikong konklusyon kun siring iyo na si Maria nangidam na, na sia bados na kan magduman sia ki Elizabet.

An Lucas 1:56 nagsasabi: “Dangan si Maria nagdanay sa saiya nin mga tolong bulan, asin nagbalik sa saiyang sadiring harong.” An bersikulong ini dai nagtatao nin eksaktong kuenta sagkod sa eksaktong aldaw sa kalendaryo. Iyan nagsasabing “mga tolong bulan,” na nangangahulogan na si Elizabet yaon na sa saiyang ikasiyam na bulan nin pagbabados.

Pakatapos na makatabang ki Elizabet durante kan huring kabtang kan pagbados kaini, si Maria nagpuli na sa saiyang harong sa Nazaret. Posibleng narealisar ni Maria na oras na mangaki si Elizabet (ki Juan), tibaad dakol an masongko, na an iba sa sainda mga paryentes pa ngani. Magigin alangan o makasosopog iyan para sa sarong daraga na bados man. Pirang bulan nang bados si Maria kan magpuli sia sa Nazaret? Mantang “mga tolong bulan” siang kaiba ni Elizabet, si Maria posibleng nasa paghinanapos kan ikatolong bulan o pagpopoon kan ikaapat na bulan kan saiyang pagbados kan magbalik sia sa Nazaret.