Iba Na an mga Panahon
SIERTO nanggad na magayagayang marhay na mag-istar sa suanoy na Israel sa irarom kan mamuraway na paghade kan maimbod na si Hadeng Salomon! Idto panahon nin katoninongan, prosperidad, asin kaogmahan. Durante kan panahon na marigon na pinanindogan ni Salomon an tunay na pagsamba, an nasyon abundang binendisyonan ni Jehova. Ki Hadeng Salomon, an Dios bako sanang nagtao nin dakulang kayamanan kundi siring man “nin madonong asin mapagsabot na puso” tanganing makapamahala si Salomon na may katanosan asin pagkamoot. (1 Hade 3:12) Sinasabi kan Biblia: “An gabos na hade sa daga naghihimuyawot na makaatubang si Salomon tanganing madangog an saiyang kadonongan, na ibinugtak kan tunay na Dios sa saiyang puso.”—2 Cronica 9:23.
Sa banwaan, si Jehova nagtao nin seguridad, katoninongan, asin abundansia nin marahay na mga bagay. An Tataramon nin Dios nagsasabi: “Kadakoldakol kan Juda asin Israel, siring kadakol kan mga baybay na yaon sa gilid nin dagat, na nagkakarakan asin nag-iirinom patin nag-oorogma.” Kapwa sa literal asin piguratibong paagi, an banwaan “padagos na nag-erok sa seguridad, na an lambang saro sa irarom kan saiyang ubasan asin sa irarom kan saiyang higuerra . . . sa gabos na aldaw ni Salomon.”—1 Hade 4:20, 25.
Iba na an mga panahon. An buhay ngonyan laen nang marhay kisa sa maogmang mga aldaw na idto kan suanoy. Bakong arog kaidtong panahon ni Salomon, an sarong mayor na problema ngonyan iyo an kadukhaan. Maski sa mayayaman na nasyon, igwa nin kadukhaan. Halimbawa, kapwa sa Estados Unidos asin sa Unyon Europeo, haros 15 porsiento kan mga tawo an nasa kadukhaan, an sabi kan United Nations Development Program.
Mapadapit sa kamugtakan sa bilog na globo, an The State of the World’s Children 1994, sarong report kan UNICEF (United Nations Children’s Fund), nagsabi na un-kinto kan populasyon sa kinaban an nasa absolutong kadukhaan, na sinasabi pa na para sa kadaklan kan mga dukha sa kinaban an buhay “paorog nang paorog na nagigin masakit asin desesperado.”
Sa ibang nasyon, an bigla an paglangkaw na implasyon nakadadagdag sa mga kasakitan kan mga dukha. Nagsabi an sarong misis sa sarong nasyon sa Aprika: “May naheling kamo sa sadan, asin nagsabi kamo, ‘Sige, mapuli nguna ako asin makua nin kuarta na pambakal kaiyan.’ Pagbalik nindo pakalihis nin sarong oras sasabihan kamo na dai na nindo iyan kayang bakalon huli ta linangkawan na an presyo. Ano an gigibohon nin sarong tawo? Iyan nakahahayo nanggad.”
Saro pang misis duman an nagsabi: ‘Tanganing mabuhay, linilingawan mi an ibang mga pangangaipo. An samong pinagkakasibotan ngonyan iyo an kun paano makakukua nin kakanon.’
Sono sa Naciones Unidas, an ngapit nakasusustong paghelingon. Halimbawa, kinakarkulo kan UNICEF na kun an pagdakol kan populasyon sa presente magpapadagos, an bilang kan mga dukha sa bilog na kinaban magigin apat na doble “sa laog kan lawig nin buhay nin sarong tawo.”
Pero, sa ibong kan nagraraot na mga kamugtakan sa ekonomiya asin sosyal, an mga lingkod nin Dios igwa nin dahelan na makamateng may marahay na malalaoman. Minsan ngani nabubuhay sinda sa tahaw kan mga nag-oorog an kadaihan nin paglaom sa ngapit, an mga lingkod nin Dios nagtatanaw sa ngapit na may kagayagayahan asin kompiansa. Aaramon kan sunod na artikulo an mga dahelan kun taano.
[Pasasalamat para sa pinagkuanan kan retrato sa pahina 3]
De Grunne/Sipa Press