Sarong Mamomoton na Pangagda sa mga Napapagal
“Madia kamo sa sako, kamo gabos na nagpapagal asin nagagabatan, asin pagiginhawahon ko kamo.”—MATEO 11:28.
1. Ano an naheling ni Jesus sa Galilea sa saiyang ikatolong biahe nin paghuhulit?
KAN madali nang magpoon an taon 32 C.E., si Jesus nasa saiyang ikatolong biahe nin paghuhulit sa distrito nin Galilea. Naglibot sia sa mga siudad asin baryo, “na nagtotokdo sa saindang mga sinagoga asin naghuhulit kan maogmang bareta kan kahadean asin nagpapaomay sa gabos na klase nin kahelangan asin gabos na klase nin kamatean.” Mantang ginigibo nia ini, naheling nia an kadaklan, asin “naherak sia sainda, huli ta sinda naanitan asin nagkakaralagalag siring sa mga karnero na mayong pastor.”—Mateo 9:35, 36.
2. Paano tinabangan ni Jesus an mga tawo?
2 Minsan siring, labi pa sa pagkaherak sana sa kadaklan an ginibo ni Jesus. Pakapagboot sa saiyang mga disipulo na mamibi sa “Kagurangnan kan anihon,” si Jehova Dios, isinugo nia sinda na tabangan an mga tawo. (Mateo 9:38; 10:1) Dangan iinopresir nia sa mga tawo an saiyang personal na pag-asegurar dapit sa paagi na makamtan an tunay na kaginhawahan asin karangahan. Ipinaabot nia sa sainda an pangagdang ini na nakaoogma sa puso: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin mapakumbaba sa puso, asin makakukua kamo nin kaginhawahan para sa saindong kalag.”—Mateo 11:28, 29.
3. Taano ta nakaaakit man ngonyan an pangagda ni Jesus?
3 Nabubuhay kita ngonyan sa panahon na dakol an nagagabatan na marhay. (Roma 8:22; 2 Timoteo 3:1) Para sa iba, an paghanap-buhay sana nakauubos na nin dakol na panahon asin kosog kaya kakadikit na sana an natatada para sa saindang pamilya, mga katood, o ano pa man. Dakol an nagagabatan sa grabeng kamatean, kasakitan, depresyon, asin iba pang pisikal asin emosyonal na mga problema. Huli sa pagkagipit, an iba nagpoprobar na makakua nin kaginhawahan paagi sa pagkabangkag sa paghanap nin kasingawan, pagkakan, pag-inom, pag-abuso pa ngani sa droga. Siempre, dinadara sana sinda kaini sa pabalikbalik na maraot na dalagan, na nagtatao sa sainda nin orog na problema asin kagipitan. (Roma 8:6) Malinaw nanggad, an mamomoton na pangagda ni Jesus nakaaakit ngonyan siring kaidto.
4. Anong mga hapot an maninigo niatong horophoropon tanganing makinabang sa mamomoton na pangagda ni Jesus?
4 Minsan siring, sa ano napairarom an mga tawo kan kaaldawan ni Jesus kaya sinda garo “naanitan asin nagkakaralagalag,” na nakapahiro ki Jesus na maherak sa sainda? Ano an mga pagabat asin pasan na dapat nindang darahon, asin paano makatatabang sa sainda an pangagda ni Jesus? An simbag sa mga hapot na ini makatatabang na gayo sa sato na makinabang sa mamomoton na pangagda ni Jesus sa mga napapagal.
An mga “Nagpapagal Asin Nagagabatan”
5. Taano ta angay na si apostol Mateo an nagbareta dapit sa pangyayaring ini sa ministeryo ni Jesus?
5 Interesante na si Mateo sana an nagbareta dapit sa pangyayaring ini sa ministeryo ni Jesus. Huli sa pagigin dating parasingil nin buhis, si Mateo, na inaapod man na Levi, nakaaaram na marhay kan sarong partikular na pagabat sa mga tawo. (Mateo 9:9; Marcos 2:14) Nagsasabi an librong Daily Life in the Time of Jesus: “An mga buhis na [kinaipuhan kan mga Judio] na bayadan paagi sa kuarta asin rogaring o serbisyo labi-labi kagabat, asin iyan orog pa nganing magabat huli ta duwang buhis an dungan na hinahagad sa sainda, an mga buhis sibil asin buhis relihioso; asin pareho iyan bakong magian.”
6. (a) Ano an sistema sa buhis na ginagamit kan panahon ni Jesus? (b) Taano ta maraoton an reputasyon kan mga parasingil nin buhis? (c) Dapit sa ano nakamate nin pangangaipo si Pablo na pagirumdomon an saiyang mga kapwa Kristiano?
6 An nagpangyari sa gabos na ini na magin nangorognang magabat iyo an sistema sa buhis kan panahon na idto. Ipinakontrata kan Romanong mga opisyal an diretsong maningil nin buhis sa mga probinsia sa mga pinakahalangkaw an tasar. Sinda naman an nagkukua nin mga tawo sa lokal na mga komunidad na iyo an magdirehir sa aktuwal na trabaho nin paniningil nin buhis. An lambang saro sa piramideng pamamaagi nin transaksion naghona na biyong may katanosan na idagdag an saiyang sadiring komisyon, o kahirasan. Halimbawa, isinaysay ni Lucas na “igwa nin sarong lalaki na inaapod sa ngaran na Zaqueo; asin sia sarong poon na parasingil nin buhis, asin mayaman sia.” (Lucas 19:2) An “poon na parasingil nin buhis” na si Zaqueo asin an mga nasa irarom kan saiyang pagdirehir minalataw na yuminaman sa pagsakit kan mga tawo. An pag-abuso asin karatan na bunga kan siring na sistema nagpangyari sa mga tawo na ibilang an mga parasingil nin buhis sa mga parakasala asin patotot, asin posibleng tama man sa kadaklan na kaso. (Mateo 9:10; 21:31, 32; Marcos 2:15; Lucas 7:34) Huling haros dai na makaya kan mga tawo an pagabat, bakong makangangalas na namatean ni apostol Pablo an pangangaipong pagirumdomon an saiyang mga kapwa Kristiano na dai masurang sa pagdominar kan Roma kundi “itao sa gabos an nanonongod sa sainda, sa saiya na naghahagad nin buhis, an buhis; sa saiya na naghahagad nin bayad, an bayad.”—Roma 13:7a; ikomparar an Lucas 23:2.
7. Paano an mga ley kan Roma sa pagpadusa nakadagdag sa pagabat sa mga tawo?
7 Ipinagirumdom man ni Pablo sa mga Kristiano na itao “sa saiya na naghahagad nin takot, an siring na takot; sa saiya na naghahagad nin onra, an siring na onra.” (Roma 13:7b) An mga Romano midbid sa karingisan asin kakurihan kan saindang mga ley sa pagpadusa. An pagpasakit, paghampak, maringis na mga sentensia sa bilanggoan, asin paggadan parateng ginagamit tanganing papagdanayon na nasasakop an mga tawo. (Lucas 23:32, 33; Gibo 22:24, 25) Pati an Judiong mga namomoon tinawan nin autoridad na ipaotob an siring na padusa kun hinohona nindang angay. (Mateo 10:17; Gibo 5:40) An siring na sistema tunay nanggad na mapandaogdaog na gayo, kun bakong biyong mapan-api, sa siisay man na sakop kaiyan.
8. Paano an mga namomoon sa relihion nagpapasan nin pagabat sa mga tawo?
8 Minsan siring, mas grabe pa kisa sa mga buhis sa asin ley kan Roma an pagabat na ipinapapasan sa ordinaryong mga tawo kan mga namomoon sa relihion kan kaaldawan na idto. Sa katunayan, minalataw na ini an pangenot na ikinahahadit ni Jesus kan iladawan nia an mga tawo na “nagpapagal asin nagagabatan.” Sinabi ni Jesus na imbes na tawan nin paglaom asin karangahan an mga tawong api, an mga namomoon sa relihion “nagbobogkos nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang moro.” (Mateo 23:4; Lucas 11:46) Risang marhay sa mga Ebanghelyo an dai mapapasalang paglaladawan sa mga namomoon sa relihion—espesyalmente an mga eskriba asin Fariseo—bilang mapalangkaw, daing puso, asin mapagsaginsagin na grupo. Hinahamak ninda an ordinaryong mga tawo bilang daing inadalan asin marigsok, asin ikinaoongis ninda an mga tagaibang banwaan na nasa tahaw ninda. An sarong komentaryo dapit sa saindang ugale nagsasabi: “An sarong tawo na sobra an ikinakarga sa kabayo maninimbag na ngonyan sa ley. Kumusta an saro na ipinapapasan an 613 togon sa ‘mga tawo kan daga’ na dai nagkaigwa nin relihiosong pagsasanay; dangan, mayong ginigibo na tabangan sinda, kinondenar sinda bilang daing Dios?” Siempre, bakong an Mosaikong Pagboot, kundi an kadakoldakol na tradisyon na ipinaootob sa mga tawo an tunay na pagabat.
Tunay na Dahelan nin Kasakitan
9. Paano an mga kamugtakan kan mga tawo kan panahon ni Jesus nakakokomparar sa mga kamugtakan kaidtong kaaldawan ni Hadeng Salomon?
9 Kun beses grabe an materyal na pagabat sa mga tawo, kaya lakop an kadukhaan. An mga Israelita kaipuhan na magbayad kan rasonableng mga buhis na sinasabi kan Mosaikong Pagboot. Dangan durante kan pamamahala ni Salomon, an mga tawo an naggasto sa mahalon na nasyonal na mga proyekto, arog kan pagtogdok kan templo asin iba pang edipisyo. (1 Hade 7:1-8; 9:17-19) Pero, an Biblia nagsasabi sa sato na an mga tawo “nagkakarakan asin nag-iirinom patin nag-oorogma. . . . Asin an Juda asin Israel padagos na nag-erok sa seguridad, na an lambang saro sa irarom kan saiyang ubasan asin sa irarom kan saiyang higuerra, poon sa Dan sagkod sa Beer-seba, sa gabos na aldaw ni Salomon.” (1 Hade 4:20, 25) Ano an ipinagkakalaen?
10. Ano an dahelan kan situwasyon sa Israel pag-abot kan enot na siglo?
10 Sagkod na an nasyon nagdadanay na marigon para sa tunay na pagsamba, sinda nagkamit kan pag-oyon ni Jehova asin binendisyonan nin seguridad asin prosperidad sa ibong kan magabat na gasto kan nasyon. Minsan siring, si Jehova nagpatanid na kun sinda “tumalikod nanggad sa pagsunod sa [saiya] asin dai mag-otob sa [saiyang] mga togon,” sinda maagi nin grabeng mga pagtios. Sa katunayan, “an Israel magigin nanggad matalinhagang kasabihan asin katuyaan sa tahaw kan gabos na banwaan.” (1 Hade 9:6, 7) Nagin siring nanggad kaiyan an situwasyon. An Israel napasairarom kan pagsakop nin ibang banwaan, asin an dating mamuraway na kahadean nagin na sanang kolonya. Abaa kamakaturotristeng naabtan huli sa pagpabaya sa saindang espirituwal na mga obligasyon!
11. Taano ta an pagmate ni Jesus an mga tawo “naanitan asin nagkakaralagalag siring sa mga karnero na mayong pastor”?
11 Tinatabangan kita kaini gabos na masabotan kun taano ta namatean ni Jesus na an mga tawong naheling nia “naanitan asin nagkakaralagalag.” An mga ini Israelita, banwaan ni Jehova, na sa pankagabsan naghihingoang mamuhay sono sa mga pagboot nin Dios asin gibohon an saindang pagsamba sa inaakong paagi. Minsan siring, sinda inaprobetsaran asin inapi bako sanang kan politikal asin komersial na mga kapangyarihan kundi siring man kan apostatang mga namomoon sa relihion sa tahaw ninda. Sinda “siring sa mga karnero na mayong pastor” huli ta mayo nin nag-aasikaso o minasurog sa sainda. Kaipuhan ninda nin tabang na makapanggana sa maringison na mga katunayan. Napapanahon nanggad an mamomoton asin maboot na pangagda ni Jesus!
An Pangagda ni Jesus Ngonyan
12. Anong mga pangigipit an namamatean ngonyan kan mga lingkod nin Dios asin kan iba pang sinserong tawo?
12 Sa dakol na paagi pareho an situwasyon ngonyan. An sinserong mga tawo na naghihingoang maghanap-buhay nin sadiosan nasasakitan sa mga pangigipit asin kahagadan kan maraot na palakaw nin mga bagay. Pati an mga nagdusay kan saindang buhay ki Jehova nabibiktima. Ipinaheheling nin mga report na an nagkapira sa mga lingkod ni Jehova paorog nang paorog na nasasakitan sa pag-otob sa gabos nindang paninimbagan, minsan ngani boot nindang gibohon iyan. Nagagabatan sinda, napapagal, napapaoy nang marhay. An iba naghohona pa ngani na makagiginhawa sinda kun pabayaan na sana ninda an mga bagay asin dai na magpaheling tanganing matrangkilo an saindang isip. Nakamate na daw kamo nin siring? May aram daw kamong dayupot sa saindo na nasa situwasyon na iyan? Iyo, an nakaoogma sa pusong pangagda ni Jesus igwa nin dakulang kahulogan para sa sato ngonyan.
13. Taano ta nakaseseguro kita na matatabangan kita ni Jesus na makakua nin karangahan asin kaginhawahan?
13 Bago itao ni Jesus an saiyang mamomoton na pangagda, sia nagsabi: “An gabos na bagay itinao na sa sako kan sakong Ama, asin dai nin siisay man na lubos na nakamimidbid sa Aki kundi an Ama, ni na an siisay man lubos na nakamimidbid sa Ama kundi an Aki asin an siisay man na boot kan Aki na pahayagan dapit sa saiya.” (Mateo 11:27) Huli sa dayupot na relasyon na ini ni Jesus asin kan saiyang Ama, nakaseseguro kita na paagi sa pag-ako kan pangagda ni Jesus asin pagigin saiyang disipulo, magkakaigwa kita nin dayupot, personal na relasyon ki Jehova, “an Dios nin gabos na karangahan.” (2 Corinto 1:3; ikomparar an Juan 14:6.) Dugang pa, mantang ‘an gabos na bagay itinao na sa saiya,’ si Jesu-Cristo sana an may kapangyarihan asin autoridad na pagianon an mga pagabat sa sato. Arin na mga pagabat? An mga itinatao kan maraot na politikal, komersial, asin relihiosong mga palakaw, siring man an pagabat na itinatao kan satong minanang kasalan asin pagkabakong sangkap. Iyan nakapakokosog na tolos asin nakapasasarig sa boot na isipon!
14. Sa anong pagpapagal makatatao nin kaginhawahan si Jesus?
14 Si Jesus nagsabi pa: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo.” (Mateo 11:28) Sierto nanggad na si Jesus dai nagtataram tumang sa magabat na trabaho, ta parate niang sinasadol an saiyang mga disipulo na magmaigot sa gibohon na yaon sa sainda. (Lucas 13:24) Alagad an “nagpapagal” (“nagtatrabaho,” Kingdom Interlinear) nagpaparisa nin halawig asin nakapapaoy na trabaho, na sa parate mayo nin kapakipakinabang na resulta. Asin an “nagagabatan” igwa kan ideya na pagpasan nin labi sa normal na makakaya. An kalaenan ikaaagid sa pagkakalaen nin sarong tawo na nagkokotkot nin natatagong kayamanan asin nin saro na nagkakalot nin mga kali sa sarong kampo nin pagtrabaho. Parehong magabat na trabaho an ginigibo ninda. Sa saro, an trabaho ginigibong may pagkagalaga, alagad an sa saro, iyan daing katapusan na trabahong nakapupungot. An ipinagkakalaen iyo an katuyohan kan trabaho o an kadaihan nin katuyohan.
15. (a) Ano an mga maninigo niatong ihapot sa satong sadiri kun namamatean niato na dakula na an pagabat sa satong abaga? (b) Ano an masasabi manongod sa gikanan kan mga pagabat sato?
15 Namamatean daw nindo na kamo “nagpapagal asin nagagabatan,” na kadakol kan hinahagad sa saindong panahon asin kosog? An mga pagabat daw sa saindo garo baga dai na nindo kaya? Kun iyo, tibaad makatabang na hapoton an saindong sadiri, ‘Ano an pinagpapagalan ko? Anong klaseng pasan an pinapasan ko?’ Sa bagay na ini, sarong komentarista sa Biblia an nagkomento kaidtong labi nang 80 taon an nakaagi: “Kun kokonsideraron niato an mga pagabat sa buhay duwang klase iyan; puede niatong apodon an mga ini na an tao sa sadiri asin an dai malilikayan: an mga dahelan, asin an mga bakong dahelan, sa satong sadiring mga hiro.” Dangan idinagdag nia: “Dakol sa sato an mabibigla, pakatapos nin estriktong pagsiyasat sa sadiri, na madiskobre kun gurano kadakulang kabtang kan mga pagabat sato an tao niato sa sadiri.”
16. Anong mga pagabat an tibaad daing kadonongan na itao niato sa satong sadiri?
16 Ano an nagkapira sa mga pagabat na tibaad itao niato sa satong sadiri? Kita ngonyan nabubuhay sa materyalistiko, mamomoton sa kasingawan, asin inmoral na kinaban. (2 Timoteo 3:1-5) Minsan an dusay na mga Kristiano danay na iniimpluwensiahan na umarog sa mga uso asin estilo nin pamumuhay kan kinaban. Si apostol Juan nagsurat dapit sa ‘horot nin laman asin horot nin mga mata asin pagpaabaw-abaw kan kaya sa buhay.’ (1 Juan 2:16) An mga ini mapuersang impluwensia na madaling makaapektar sa sato. Sinasabi na an iba andam na magkautang nin dakula tanganing orog pang makamit an kinabanon na mga kasingawan o makapadanay nin sarong estilo nin pamumuhay. Dangan nadidiskobre ninda na dapat sindang gumamit nin kadakol na panahon sa trabaho, o magkaigwa nin nagkapirang trabaho, tanganing makua an kuarta na pambayad sa saindang mga utang.
17. Anong situwasyon an tibaad orog pang magpadepisil sa pagpasan, asin paano ini puedeng maremedyohan?
17 Minsan ngani an saro tibaad magrason na bako man na maraot na magkaigwa kan o gibohon an nagkapirang bagay na yaon sa o ginigibo nin iba, mahalagang isip-isipon kun baga dinadagdagan nia nin dai man kinakaipuhan an saiyang pasan. (1 Corinto 10:23) Mantang may sagkodan an kayang pasanon nin saro, igwa nin dapat na haleon tanganing makapasan nin saro pa. Sa parate, mga bagay na mahalaga sa satong espirituwal na kapakanan—personal na pag-adal sa Biblia, pag-atender sa mga pagtiripon, asin ministeryo sa langtad—an enot na hinahale. An resulta pagkawara nin espirituwal na kosog, na orog man na nagpapadepisil sa pagpasan. Si Jesu-Cristo nagpatanid tumang sa siring na peligro kan sia magsabi: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod.” (Lucas 21:34, 35; Hebreo 12:1) Depisil mamidbid an sarong siod asin makalikay dian kun an saro nagagabatan asin napapagal.
Tabang Asin Kaginhawahan
18. Ano an iinopresir ni Jesus sa mga minadolok sa saiya?
18 Kun siring, mamomoton na iinopresir ni Jesus an remedyo: “Madia kamo sa sako, . . . asin pagiginhawahon ko kamo.” (Mateo 11:28) An mga termino digdi na “pagiginhawahon” asin “kaginhawahan” sa bersikulo 29 hale sa mga termino sa Griego na katimbang kan termino na ginagamit kan bersion na Septuagint sa pagtradusir kan termino sa Hebreo para sa “sabbath” o “pag-otob sa sabbath.” (Exodo 16:23) Sa siring, si Jesus dai nanuga na an mga madolok sa saiya mayo nang gigibohon, kundi nanuga sia na pagiginhawahon nia sinda tangani na sinda magin andam para sa trabaho na dapat nindang gibohon kaoyon sa katuyohan nin Dios.
19. Paano an saro ‘minadolok ki Jesus’?
19 Minsan siring, paano an saro ‘minadolok ki Jesus’? Sa saiyang mga disipulo, si Jesus nagsabi: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na magsunod sa sako.” (Mateo 16:24) Huli kaini, an pagdolok ki Jesus nangangahulogan nin pagpasakop kan sadiring kabotan nin saro sa kabotan nin Dios asin ni Cristo, pag-ako nin pasan na paninimbagan, na ginigibo iyan nin padagos. Kadakol daw kan hinahagad kaini gabos? Kadakol daw kan isasakripisyo? Pag-olayan niato an sinabi ni Jesus pakatao nia kan mamomoton na pangagda sa mga napapagal.
Nagigirumdoman daw Nindo?
◻ Sa anong mga paagi nagagabatan an mga tawo kan kaaldawan ni Jesus?
◻ Ano an tunay na dahelan kan pagsakit kan mga tawo?
◻ Paano niato maninigong siyasaton an satong sadiri kun nagagabatan na kita?
◻ Anong mga pagabat an tibaad daing kadonongan na itao niato sa satong sadiri?
◻ Paano kita makaaako kan kaginhawahan na ipinanuga ni Jesus?
[Retrato sa pahina 15]
Ano an nagkapirang pagabat na tibaad itao niato sa satong sadiri?
[Pasasalamat para sa pinagkuanan kan retrato sa pahina 15]
Sa karahayan nin boot kan Bahamas Ministry of Tourism