“An Sakong Sakal Maboot Asin an Sakong Pasan Magian”
“Pasana nindo an sakong sakal asin makanood kamo sa sako.”—MATEO 11:29.
1, 2. (a) Ano an naeksperyensiahan nindo sa buhay na nagtatao sa saindo nin kaginhawahan? (b) Ano an dapat na gibohon nin saro tanganing mag-ako kan kaginhawahan na ipinanuga ni Jesus?
PRESKONG karigos pakatapos nin mainit asin maharasahas na aldaw, o nanok na torog sa banggi pakatapos nin halawig asin mapagal na biahe—a, nakagiginhawa nanggad! Siring man kun ibinababa an dakulang pagabat o kun pinatatawad an mga kasalan asin kalapasan. (Talinhaga 25:25; Gibo 3:19) An kaginhawahan na bunga kan siring na nakaoogmang mga eksperyensia nakapababagsik sa sato, asin napakokosog kitang gumibo nin orog pa.
2 An gabos na nakamamateng nagagabatan asin napapagal puedeng dumolok ki Jesus, huling iyan mismo an ipinanuga nia sa sainda—kaginhawahan. Minsan siring, tanganing makua an kaginhawahan na kawiliwiling marhay, igwa nin dapat na andam na gibohon an saro. “Pasana nindo an sakong sakal asin makanood kamo sa sako,” sabi ni Jesus, “asin makakukua kamo nin kaginhawahan para sa saindong kalag.” (Mateo 11:29) Ano an sakal na ini? Paano iyan nagtatao nin kaginhawahan?
Sarong Maboot na Sakal
3. (a) Anong klase nin mga sakal an ginagamit kaidtong mga panahon kan Biblia? (b) Anong piguratibong kahulogan an konektado sa sakal?
3 Huling nag-iistar sa sarong agrikultural na sosyedad, si Jesus asin an mga nagdadangog sa saiya pamilyar na marhay sa sakal. Sa pundamental, an sakal sarong halabang pidaso nin kahoy na may duwang lukab sa irarom tanganing magkahusto sa mga loong nin sarong padis nin panguyod na hayop, na sa parate mga baka, tanganing magkatakod an duwa sa pagguyod nin arado, kareta, o iba pang karga. (1 Samuel 6:7) May ginamit man na mga sakal para sa tawo. Idto simpleng mga pidaso nin kahoy o tukon na pinapasan pabalagbag sa abaga na may nakatakod na pasan sa mag-ibong na poro. Paagi kaiyan, an mga trabahador nakapapasan nin magabat na mga pasan. (Jeremias 27:2; 28:10, 13) Huli sa pagigin konektado kaiyan sa mga pagabat asin trabaho, an sakal parateng ginagamit sa Biblia sa piguratibong paagi na magsimbolo sa pagsakop asin kontrol.—Deuteronomio 28:48; 1 Hade 12:4; Gibo 15:10.
4. Ano an isinisimbolo kan sakal na iinoopresir ni Jesus sa mga minadolok sa saiya?
4 Ano, kun siring, an sakal na ipinangagda ni Jesus na pasanon kan mga minadolok sa saiya para sa kaginhawahan? Girumdoma na sia nagsabi: “Pasana nindo an sakong sakal asin makanood kamo sa sako.” (Mateo 11:29) An saro na nag-aadal disipulo. Huli kaini, an pagpasan kan sakal ni Jesus nangangahulogan sana na magin saiyang disipulo. (Filipos 4:3) Minsan siring, bako sanang pakaaram sa saiyang mga katokdoan an hinahagad kaini. Naghahagad ini nin mga aksion kaoyon kaiyan—na ginigibo an gibohon na ginibo nia asin namumuhay nin arog sa saiya. (1 Corinto 11:1; 1 Pedro 2:21) Naghahagad iyan nin gikan sa boot na pagpasakop sa saiyang autoridad asin duman sa mga dinedelegaran nia nin autoridad. (Efeso 5:21; Hebreo 13:17) Nangangahulogan iyan nin pagigin dusay, bautisadong Kristiano, na inaako an gabos na pribilehio asin paninimbagan na kadungan kan pagdusay na iyan. Iyan an sakal na iinoopresir ni Jesus sa gabos na minadolok sa saiya para sa karangahan asin kaginhawahan. Kamo daw andam na akoon iyan?—Juan 8:31, 32.
5. Taano ta bakong makolog na eksperyensia na pasanon an sakal ni Jesus?
5 Pakakua nin kaginhawahan paagi sa pagpasan nin sakal—bako daw iyan na magkasarongat? An totoo bako, huling sinabi ni Jesus na an saiyang sakal “maboot.” An terminong ini igwa kan kahulogan na mahoyo, marahay, naooyonan. (Mateo 11:30; Lucas 5:39; Roma 2:4; 1 Pedro 2:3) Bilang sarong propesyonal na panday, si Jesus posibleng gayo na naggibo nin mga arado asin sakal, asin aram nia kun paano kokortehan an sarong sakal na magkahusto tanganing dakol an mahaman na trabaho sa pinakamagian na mahihimo. Tibaad hinapinan nia nin tela o anit an mga sakal. Dakol an arog kaiyan an pagkagibo tanganing dai iyan makagasgas, o makanusnus, na marhay sa loong. Sa kaparehong paagi, an piguratibong sakal na iinoopresir sa sato ni Jesus “maboot.” Minsan ngani kalabot sa pagigin saiyang disipulo an nagkapirang obligasyon asin paninimbagan, bako iyan na makolog o mapan-aping eksperyensia kundi nakagiginhawa. An mga togon kan saiyang Langitnon na Ama, si Jehova, bako man na magabat.—Deuteronomio 30:11; 1 Juan 5:3.
6. Ano an puedeng boot sabihon ni Jesus kan sia magsabi: “Pasana nindo an sakong sakal”?
6 May saro pa na minahimo sa sakal ni Jesus na “maboot,” o pasil pasanon. Kan sia magsabi: “Pasana nindo an sakong sakal,” saro sa duwang bagay an puedeng boot niang sabihon. Kun an nasa isip nia iyo an dobleng sakal, an boot sabihon, an klase na pinagtatakod an duwang panguyod na hayop sa pagkarga sa pasan, kun siring inaagda nia kita na pumairarom sa sarong sakal kaiba nia. Kanigoan na bendisyon iyan—na makatuwang si Jesus sa pagkarga sa satong pasan! Sa ibong na kampi, kun an nasa isip ni Jesus iyo an pasanan na sakal na ginagamit kan ordinaryong trabahador, kun siring iinoopresir nia sa sato an gamit na paagi kaiyan magigibo niatong mas magian o mas pasil an pagpasan sa ano man na pasan na dapat niatong pasanon. Arin man kaiyan, an saiyang sakal sarong gikanan nin tunay na kaginhawahan huli ta inaasegurar nia kita: “Huli ta ako mahoyo asin mapakumbaba sa puso.”
7, 8. Anong sala an nagigibo nin iba kun sinda nakamamate nin tension?
7 Ano, kun siring, an maninigo niatong gibohon kun namamatean niato na an satong pasan na mga problema sa buhay dai na niato makaya asin labi-labi na an satong tension? An iba tibaad mapasala sa paghona na depisilon o kadakol na hinahagad kan sakal na pagigin disipulo ni Jesus-Cristo, minsan ngani mga kahaditan sa aroaldaw na buhay an nakapagagabat sa sainda. An ibang mga indibiduwal na nasa situwasyon na iyan minapondo sa pag-atender sa Kristianong mga pagtiripon, o habo na sindang makikabtang sa ministeryo, na tibaad naghohona na sinda makagiginhawa. Minsan siring, iyan sarong seryosong sala.
8 Nasasabotan niato na an sakal na iinoopresir ni Jesus “maboot.” Kun bakong tama an pagkasulog niato kaiyan, iyan makagagasgas. Sa kasong iyan maninigo niatong siyasaton an sakal na nasa satong abaga. Kun, huli sa sarong dahelan, an sakal raot o bakong tama an pagkasulog, an paggamit kaiyan bako sanang mangangaipo nin dagdag na paghihingoa niato kundi makakokolog man. Sa ibang pagtaram, kun an teokratikong mga aktibidad magpoon nang magin garo pagabat para sa sato, dapat kitang magsiyasat tanganing helingon kun tama an pag-asikaso niato kaiyan. Ano an satong motibo sa paggibo kan satong ginigibo? Igo daw kitang andam kun kita minaduman sa mga pagtiripon? Andam daw an satong hawak asin isip kun kita nakikakabtang sa ministeryo sa langtad? Igwa daw kita nin dayupot asin marahay na relasyon sa iba sa kongregasyon? Asin, orog sa gabos, kumusta an satong personal na relasyon ki Jehova Dios asin sa saiyang Aki, si Jesu-Cristo?
9. Taano an Kristianong sakal ta dai noarin man maninigong magin dai na makakayang pagabat?
9 Kun bilog na puso niatong inaako an sakal na iinoopresir ni Jesus asin makanood kitang pasanon iyan nin tama, daing dahelan na iyan magin garo dai na makakayang pagabat. Sa katunayan, kun maiimahinar niato an situwasyon—na si Jesus kaiba niato sa irarom nin sarong sakal—dai kita madedepisilan na maheling kun siisay talaga an nagpapasan kan mas dakulang kabtang kan pagabat. Arog iyan kan sadit pang aki na nagsasandig sa kapotan kan saiyang tukawan na busol-busol, na naghohona na sia an nagbubusol kaiyan, alagad an totoo, siempre, an magurang an nagbubusol kaiyan. Bilang mamomoton na Ama, aram na marhay ni Jehova Dios an satong mga limitasyon asin kaluyahan, asin itinatao nia an satong mga pangangaipo paagi ki Jesu-Cristo. “[An] Dios mahipno kan gabos nindong pangangaipo sono sa saiyang mga kayamanan sa kamurawayan paagi ki Cristo Jesus,” an sabi ni Pablo.—Filipos 4:19; ikomparar an Isaias 65:24.
10. Ano an naeeksperyensiahan nin saro na isinasaboot an pagigin disipulo?
10 Dakol na dusay na Kristiano an nakasabot kaini paagi sa personal na eksperyensia. Yaon, halimbawa, si Jenny, na nakanompong na an paglilingkod bilang auxiliary payunir kada bulan asin pagtrabaho nin bilog na panahon sa sarong nakauubos nin oras na sekular na trabaho nagtatao sa saiya nin grabeng tension. Minsan siring, sa pagmate nia an pagpapayunir sa totoo nakatatabang sa saiya na magdanay na timbang sa emosyonal. An pagtabang sa mga tawo na makanood kan katotoohan sa Biblia asin pakaheling sa sainda na nagbabakle tanganing magkamit kan pag-oyon nin Dios—ini an nagtatao sa saiya kan pinakadakulang kagayagayahan sa saiyang masibot na buhay. Bilog na puso siang minaoyon sa mga tataramon kan talinhaga na nagsasabi: “An bendisyon ni Jehova—iyan an nakapayayaman, asin dai nia iyan dinadagdagan nin kakologan.”—Talinhaga 10:22.
Sarong Magian na Pasan
11, 12. Ano an boot sabihon ni Jesus kan sia magsabi: “An sakong pasan magian”?
11 Apuera sa panunuga sa sato nin “maboot” na sakal, inaasegurar kita ni Jesus: “An sakong pasan magian.” An “maboot” na sakal nakakapapasil na sa trabaho; kun pinagian man an pasan, an trabaho tunay na kawiliwili. Minsan siring, ano an nasa isip ni Jesus sa mga tataramon na iyan?
12 Horophoropa kun ano an gigibohon nin sarong paraoma kun boot niang liwaton an mga trabaho kan saiyang mga hayop, halimbawa imbes na pag-arado sa oma pagguyod nin kareta. Hahaleon nguna nia an arado dangan itatakod an kareta. Makangingisi kun pareho nia itatakod sa mga hayop an arado asin kareta. Kaagid kaiyan, si Jesus dai nagsasabi sa mga tawo na iluknong an saiyang pasan sa dati na nindang pinapasan. Sinabi nia sa saiyang mga disipulo: “Mayong surogoon sa harong na puwedeng magpaoripon sa duwang kagurangnan.” (Lucas 16:13) Sa siring, pinapipili ni Jesus an mga tawo. Mas gusto pa daw nindang padagos na pasanon an magabat na pasan ninda, o ibababa ninda iyan asin aakoon an iinoopresir nia? Tinawan sinda ni Jesus nin mamomoton na panmotibar: “An sakong pasan magian.”
13. Ano an pinapasan kan mga tawo kan kaaldawan ni Jesus, asin may anong resulta?
13 Kan kaaldawan ni Jesus, an mga tawo nasasakitan sa magabat na pasan na itinao sa sainda kan mapan-aping mga namamahala sa Roma asin kan pormalistiko, mapagsaginsagin na mga namomoon sa relihion. (Mateo 23:23) Sa pagprobar na makahale sa pamamahala kan Roma, may mga tawong naghingoa na sinda na mismo an gumibo nin paagi na bagohon an situwasyon. Napalabot sinda sa politikal na mga pakikilaban, na napahamak sana. (Gibo 5:36, 37) An iba desididong paoswagon an saindang kamugtakan sa buhay paagi sa pagkabangkag sa materyalistikong mga paghihingoa. (Mateo 19:21, 22; Lucas 14:18-20) Kan iopresir sa sainda ni Jesus an paagi na makaginhawa paagi sa pag-agda sa sainda na magin saiyang mga disipulo, bakong gabos andam na umako. Nagduwaduwa sinda na ibaba an pasan na dara ninda, minsan ngani magabat iyan, asin pasanon an saiyang pasan. (Lucas 9:59-62) Kapahapahamak nanggad na sala!
14. Paano nakapagagabat sa sato an mga kahaditan sa buhay asin materyal na mga kamawotan?
14 Kun bako kitang maingat, puedeng magibo niato an kaparehong sala ngonyan. An pagigin disipulo ni Jesus minakalda sa sato sa pag-aabot sa mga pasohan asin pamantayan na arog kan pinag-aaabot kan mga tawo sa kinaban. Minsan ngani kaipuhan pa man giraray niatong magmahigos tanganing makua an pan-aroaldaw na mga pangangaipo, an mga bagay na ini dai niato ginigibong sentro kan satong buhay. Pero, an mga kahaditan sa buhay asin an pan-akit nin materyal na mga kagianan puedeng magin makosog na impluwensia sa sato. Kun totogotan niato iyan, an siring na mga kamawotan puede nganing makalamos sa katotoohan na galaga niatong inako. (Mateo 13:22) Puede kitang magin okupadong marhay sa pag-otob sa siring na mga kamawotan kaya an satong Kristianong mga paninimbagan nagigin mapagal na mga obligasyon na boot niatong basta na sana hamanon asin taposon tolos. Sierto nanggad na dai kita makalalaom na makakua nin ano man na kaginhawahan sa satong paglilingkod sa Dios kun iyan ginigibo sa siring na kaisipan.
15. Anong patanid an itinao ni Jesus mapadapit sa materyal na mga kamawotan?
15 Idinoon ni Jesus na an buhay na may pagkakontento nakakamtan, bakong paagi sa pagmamaigot na maotob an gabos niatong gusto, kundi paagi sa pagsierto kan orog na mahalagang mga bagay sa buhay. “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon,” an sadol nia. “Bako daw na an kalag orog sa kakanon asin an hawak orog sa gubing?” Dangan pinamasdan nia an mga gamgam sa langit asin nagsabi: “Sinda dai nagsasabwag nin banhi o nag-aani o nagtitipon sa mga tambobong; pero pinakakakan sinda kan saindong langitnon na Ama.” Sa pagsambit sa mga liryo sa oma, sia nagsabi: “Dai iyan nagpapagal, ni naghahabol; alagad ako nagsasabi saindo na minsan si Salomon sa bilog niang kamurawayan dai nagubingan nin siring sa saro kaini.”—Mateo 6:25-29.
16. Ano an ipinaheheling nin eksperyensia dapit sa mga epekto nin materyal na mga pinag-aaabot?
16 May manonodan daw kita sa simpleng mga halimbawa na ini? Naeeksperyensiahan nin kadaklan na mientras na orog na nagmamaigot an saro na paoswagon an saiyang kamugtakan sa pagbuhay, orog man siang nagagapos sa kinabanon na mga aktibidad asin orog man na nagigin dakula an pagabat sa saiyang abaga. Kadakol kan negosyante sa kinaban na sa saindang materyal na mga pag-asenso nag-ani nin laglag na pamilya, naraot na pag-agoman, nagluyang salud, asin dakol pa. (Lucas 9:25; 1 Timoteo 6:9, 10) An nanggana nin premyong Nobel na si Albert Einstein sarong beses nagsabi: “Mga rogaring, panluwas na pag-asenso, kabantogan, luho—para sa sako an mga ini daing halaga poon pa kaidto. Naniniwala ako na an simple asin bakong maabhaw na pamumuhay pinakamarahay sa gabos.” Inootro sana kaini an simpleng hatol ni apostol Pablo: “Iyan may dakulang pakinabang, ining diosnon na debosyon kaiba an pagigin naninigoan sa sadiri.”—1 Timoteo 6:6.
17. Anong pamumuhay an irinerekomendar kan Biblia?
17 Igwa nin sarong mahalagang kabtang na dai niato maninigong lingawan. Minsan ngani dakol an bentaha nin “simple asin bakong maabhaw na pamumuhay,” bako iyan mismo an nagtatao nin pagkakontento. Dakol an tawo na simple an pamumuhay huli sa mga sirkumstansia, pero bako nanggad sindang kontento o maogma. Dai kita sinasadol kan Biblia na sayumahan an materyal na kaogmahan asin mamuhay nin siring sa ermitanyo. An idinodoon diosnon na debosyon, bakong pagigin naninigoan sa sadiri. Solamente kun pinagdudungan niato an duwa na kita igwa kan “dakulang pakinabang.” Anong pakinabang? Sa eroenotan kan surat man sanang iyan, idinoon ni Pablo na an mga ‘nagbubugtak kan saindang paglaom, bakong sa kayamanan na bakong segurado, kundi sa Dios magririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.’—1 Timoteo 6:17-19.
18. (a) Paano an saro makakukua nin tunay na kaginhawahan? (b) Paano niato maninigong mansayon an mga pagliliwat na tibaad kaipuhan niatong gibohon?
18 Kakamtan niato an kaginhawahan kun makakanood kitang ibaba an satong personal na magabat na pasan asin pasanon an magian na pasan na iinoopresir ni Jesus. An dakol na pinakarhay an saindang buhay tanganing mas lubos sindang makapakikabtang sa paglilingkod sa Kahadean nakanompong kan dalan pasiring sa buhay na maogma asin kontento. Siempre, kaipuhan an pagtubod asin kapusoan tanganing magibo nin saro an siring na aksion, asin puedeng may umabot na mga olang. Alagad pinagigirumdom kita kan Biblia: “An nagbabantay sa doros dai magsasabwag nin banhi; asin an nagheheling sa mga panganoron dai mag-aani.” (Eclesiastes 11:4) An dakol na bagay bako man talagang depisilon oras na makapagdesisyon kitang gibohon iyan. Minalataw na an pinakadepisil na kabtang iyo an pagdesisyon. Tibaad manluya kita sa pakikilaban o pagtumang sa kaisipan na akoon an trabaho. Kun pasasarigon niato an satong isip asin aakoon an angat, tibaad mabigla kita na madiskobre na iyan nagin dakulang bendisyon. An salmista nagsadol: “Namitan nindo asin helingon nindo na si Jehova marahay, O banwaan.”—Salmo 34:8; 1 Pedro 1:13.
“Kaginhawahan Para sa Saindong Kalag”
19. (a) Ano an malalaoman niato mantang padagos na nagraraot an mga kamugtakan sa kinaban? (b) Mantang nasa irarom kan sakal ni Jesus, sa ano kita nakaseseguro?
19 Pinagirumdom ni apostol Pablo an mga disipulo kan enot na siglo: “Kita kaipuhan na lumaog sa kahadean nin Dios paagi sa dakol na kasakitan.” (Gibo 14:22) Totoo pa iyan sagkod ngonyan. Mantang padagos na nagraraot an mga kamugtakan sa kinaban, maorog man an mga pangigipit na minaabot sa gabos na desididong mamuhay na may katanosan asin diosnon na debosyon. (2 Timoteo 3:12; Kapahayagan 13:16, 17) Pero, an saboot niato arog kan ki Pablo kan sia magsabi: “Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinababayaan; kami ilinalampog, alagad dai nalalaglag.” An dahelan iyo na makapananarig kita ki Jesu-Cristo na tawan kita kan kosog na lihis sa ordinaryo. (2 Corinto 4:7-9) Paagi sa bilog na pusong pag-ako kan sakal na pagigin disipulo, kakamtan niato an kaotoban kan panuga ni Jesus: “Makakukua kamo nin kaginhawahan para sa saindong kalag.”—Mateo 11:29.
Ikapaliliwanag daw Nindo?
◻ Ano an maboot na sakal na iinopresir ni Jesus?
◻ Ano an maninigo niatong gibohon kun namamatean niato na an satong sakal nagigin pagabat?
◻ Ano an boot sabihon ni Jesus kan sia magsabi: “An sakong pasan magian”?
◻ Paano kita makaseseguro na an satong pasan nagdadanay na magian?