Mga Magurang Asin Aki: Enoton an Dios!
“Matakot ka sa tunay na Dios asin otobon mo an saiyang mga togon.”—ECLESIASTES 12:13.2
1. Anong pagkatakot an kaipuhan na pataluboon nin mga magurang asin aki, asin ano an itatao kaiyan sa sainda?
AN SARONG hula mapadapit ki Jesu-Cristo nagsabi na “maoogma sia sa pagkatakot ki Jehova.” (Isaias 11:3) An saiyang pagkatakot sa pundamental sarong odok na pagsamba asin paghanga sa Dios, pagkatakot na mapamondo an Dios huli ta namomotan nia sia. Kaipuhan na pataluboon nin mga magurang asin aki an siring na arog-Cristong pagkatakot sa Dios, na magtatao sa sainda nin kaogmahan siring kan nangyari ki Jesus. Kaipuhan na enoton ninda an Dios sa saindang buhay paagi sa pagkuyog sa saiyang mga togon. Sono sa sarong kagsurat sa Biblia, “ini iyo an bilog na katongdan nin tawo.”—Eclesiastes 12:13.
2. Ano an pinakamahalagang togon sa Pagboot, asin kiisay iyan pangenot na itinao?
2 An pinakamahalagang togon sa Pagboot, arin na baga, na maninigo niatong ‘mamotan si Jehova sa bilog niatong puso, kalag, patin kosog,’ sa pangenot itinao sa mga magurang. Ipinaheheling ini kan dugang pang mga tataramon sa Pagboot: “Dapat na idoon mo [an mga tataramon na ini manongod sa pagkamoot ki Jehova] sa saimong aki asin sabihon iyan kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deuteronomio 6:4-7; Marcos 12:28-30) Sa siring pinagbotan an mga magurang na enoton an Dios paagi sa pagkamoot ninda mismo sa saiya asin paagi sa pagtotokdo sa saindang mga aki na gibohon man iyan.
Sarong Kristianong Paninimbagan
3. Paano ipinaheling ni Jesus an halaga nin pagtao nin atension sa mga aki?
3 Ipinaheling ni Jesus an halaga nin pagtao nin atension minsan sa saradit na aki. Sa sarong pangyayari sa paghinanapos kan ministeryo ni Jesus digdi sa daga, nagpoon na darahon sa saiya kan mga tawo an saindang mga omboy. Malinaw na naniniwala na si Jesus sibot-sibot tanganing istorbohon, hiningoa kan mga disipulo na pogolan an mga tawo. Alagad sinagwe ni Jesus an saiyang mga disipulo: “Pabayae nindo na dumolok sa sako an saradit na aki, asin dai nindo sinda pagpogolan.” ‘Kinugos pa ngani ni Jesus an mga aki,’ sa siring ipinaheheling sa paaging nakapahihiro sa boot an halaga nin pagtao nin atension sa mga aki.—Lucas 18:15-17; Marcos 10:13-16.
4. Sairisay an pinagbotan na ‘gumibo nin mga disipulo sa mga tawo kan gabos na nasyon,’ asin ano an hinagad kaini na gibohon ninda?
4 Lininaw man ni Jesus na an saiyang mga parasunod may paninimbagan na magtokdo sa iba apuera sa saindang sadiring mga aki. Pagkagadan asin pagkabuhay nia liwat, si Jesus “nagpaheling sa labing limang gatos na tugang sa saro sanang beses”—kabale an nagkapirang magurang. (1 Corinto 15:6) Minalataw na ini nangyari sa sarong bukid sa Galilea kun saen nagkatiripon man an saiyang 11 apostol. Duman sinadol sinda gabos ni Jesus: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:16-20) Mayong Kristiano na tamang makapababaya sa pagboot na ini! Tanganing magibo ini nin mga ama asin ina nangangaipo na atamanon ninda an saindang mga aki saka makikabtang sa paghuhulit sa publiko asin sa pagtotokdo.
5. (a) Ano an nagpapaheling na an kadaklan, kun bakong gabos, na apostol may agom asin kaya posibleng may mga aki? (b) Anong hatol an kinaipuhan na isaboot nin mga payo nin pamilya?
5 Makahulogan nanggad, maski an mga apostol nangaipong pagtimbangon an saindang mga paninimbagan sa pamilya asin an obligasyon na maghulit saka magpastor sa aripompon nin Dios. (Juan 21:1-3, 15-17; Gibo 1:8) Ini huli ta an kadaklan sa sainda, kun bakong sinda gabos, may agom. Sa siring nagpaliwanag si apostol Pablo: “Igwa kita nin autoridad na iiba an sarong tugang na babae bilang agom na babae, arog kan ibang mga apostol asin kan mga tugang kan Kagurangnan patin ni Cefas, bako daw?” (1 Corinto 9:5; Mateo 8:14) An ibang apostol tibaad igwa man nin mga aki. An suanoy na mga historyador, arog baga ki Eusebio, nagsasabi na si Pedro may aki. Kinaipuhan na himateon kan gabos na Kristianong magurang kan suanoy an Makakasuratan na sadol: “Tunay na kun an siisay man dai nagsusustento sa mga sadiri nia, asin orog na sa mga miembro kan saiyang harong, sia nagpainda kan pagtubod asin orog pa karaot sa tawong dai nin pagtubod.”—1 Timoteo 5:8.
An Pangenot na Paninimbagan
6. (a) Anong angat an yaon sa Kristianong mga magurang sa kongregasyon na may mga pamilya? (b) Ano an pangenot na paninimbagan nin sarong magurang sa kongregasyon?
6 An Kristianong mga magurang sa kongregasyon na may mga pamilya ngonyan nasa situwasyon na kapareho kan mga apostol. Kaipuhan na pagtimbangon ninda an saindang paninimbagan na asikasohon an espirituwal asin pisikal na mga pangangaipo kan saindang pamilya asin an saindang obligasyon na maghulit sa publiko asin magpastor sa aripompon nin Dios. Arin na aktibidad an maninigong ipaorog? An The Watchtower na Marso 15, 1964, nagkomento: “An enot na obligasyon [kan ama] sa saiyang pamilya, asin an totoo, dai sia tamang makapaglilingkod kun dai nia inaasikaso an obligasyon na ini.”
7. Paano ineenot nin Kristianong mga ama an Dios?
7 Kaya an Dios dapat na enoton nin mga ama paagi sa paghimate sa pagboot na ‘padagos na padakulaon an saindang mga aki sa disiplina asin pagtatanos nin isip ni Jehova.’ (Efeso 6:4) An paninimbagan na iyan dai puedeng ipasa sa iba, minsan pa kun an ama igwa man nin asignasyon na mangataman sa mga aktibidad sa Kristianong kongregasyon. Paano maaasikaso nin siring na mga ama an saindang mga paninimbagan—na sinusustentohan an mga miembro nin pamilya sa pisikal, espirituwal, asin emosyonal—asin kadungan kaiyan, mangenot asin mangataman sa kongregasyon?
Pagtao nin Kinakaipuhan na Pagsuportar
8. Paano an agom nin sarong magurang sa kongregasyon makasusuportar sa saiya?
8 Malinaw nanggad, an mga magurang sa kongregasyon na may mga paninimbagan sa pamilya puedeng makinabang sa pagsuportar. An kinotar sa enotan na Watchtower nagkomento na an sarong Kristianang agom puedeng sumuportar sa saiyang agom. Iyan nagsabi: “Mapapangyari nia na kombenyente para sa lalaki sagkod sa mapupuede an pag-adam kan saiyang manlaenlaen na asignasyon, asin makatatabang sia na makaekonomiya sa mahalagang panahon para sa sainda mag-agom paagi sa pagkaigwa nin marahay na iskedyul sa harong, pakagpagluto sa tamang oras, pakapag-andam nin amay paduman sa mga pagtiripon sa kongregasyon. . . . Sa paggiya kan saiyang agom, dakula an magigibo kan Kristianang agom na patoodon an mga aki sa dalan na maninigo nindang lakawan tanganing mapaoyonan si Jehova.” (Talinhaga 22:6) Iyo, an agom na babae linalang na magin “katabang,” asin may kadonongan na aakoon kan lalaki an saiyang tabang. (Genesis 2:18) An saiyang pagsuportar makapapangyari sa lalaki na maasikaso nin mas epektibo kapwa an saiyang mga paninimbagan sa pamilya asin sa kongregasyon.
9. Sairisay sa kongregasyon nin Tesalonica an pinakosog na tabangan an ibang miembro nin kongregasyon?
9 Minsan siring, bako sanang an agom nin Kristianong mga magurang sa kongregasyon an puedeng makikabtang sa aktibidad na nagsusuportar sa sarong paraataman na kapwa kaipuhan na ‘magpastor sa aripompon nin Dios’ asin mag-asikaso sa saiyang sadiring pamilya. (1 Pedro 5:2) Sairisay pa an puede? Sinadol ni apostol Pablo an mga tugang sa Tesalonica na igalang an mga “namamayo” sa sainda. Pero, sa pagpadagos asin pagkaolay sa mga tugang man sanang ini—sa espisipiko idtong mga dai namamayo—si Pablo nagsurat: “Kami nagsasadol sa saindo, mga tugang, hatolan nindo an mga masinuhay, magtaram na may pagranga sa mga kalag na nagmomondo nin makuri, suportaran an maluya, magin matinios sa gabos.”—1 Tesalonica 5:12-14.
10. Ano an marahay na epekto sa kongregasyon kan mamomoton na tabang kan gabos na tugang?
10 Kanigoan karahay kun an mga tugang sa kongregasyon igwa kan pagkamoot na nagpapahiro sa sainda na rangahon an mga nagmomondo nin makuri, suportaran an maluya, hatolan an masinuhay, asin magin matinios sa gabos! Iinaplikar kan mga tugang sa Tesalonica, na nag-ako pa sana kan katotoohan sa Biblia sa ibong kan pag-agi sa dakulang kasakitan, an hatol ni Pablo na gibohon ini. (Gibo 17:1-9; 1 Tesalonica 1:6; 2:14; 5:11) Isip-isipa an marahay na epekto kan saindang mamomoton na pagkooperar sa pagpakosog asin pagsararo sa bilog na kongregasyon! Kaagid kaiyan, kun an mga tugang ngonyan nagririnangahan, nagsisinuportaran, asin nagpapaharatolhatol, orog na pinapapasil kaiyan an pag-asikaso sa mga paninimbagan na pagpastor kan mga magurang sa kongregasyon, na sa parate igwa nin mga pamilyang dapat na atamanon.
11. (a) Taano ta rasonableng magkonklusyon na kaiba an mga babae sa terminong “mga tugang”? (b) Anong tabang an ikatatao nin maygurang na Kristiana sa mga hoben na babae ngonyan?
11 Kabale daw an mga babae sa “mga tugang” na kinakaolay ni apostol Pablo? Iyo, kabale sinda, huling dakol na babae an nagturubod. (Gibo 17:1, 4; 1 Pedro 2:17; 5:9) Anong klaseng tabang an ikatatao kan siring na mga babae? Bueno, igwa nin mga hoben na babae sa mga kongregasyon na problema an pagpogol sa saindang “horot sa sekso” o nagin “mga kalag na nagmomondo nin makuri.” (1 Timoteo 5:11-13) An ibang babae ngonyan kapareho kaiyan an mga problema. An tibaad pinakakaipuhan ninda saro na maghihinanyog o magsisimpatiya. Sa parate sarong maygurang na Kristiana an pinakamarahay na makatatao nin siring na tabang. Halimbawa, puede niang ipakipag-olay sa saro pang babae an personal na mga problema na bakong angay na asikasohon nin nagsosolong Kristianong lalaki. Itinatampok an halaga nin pagtao nin siring na tabang, si Pablo nagsurat: “An mga gurang na babae logod magin . . . mga paratokdo nin karahayan; tanganing mapabalik ninda sa toltol na isip an hoben na mga babae na mamoot sa saindang agom na lalaki, mamoot sa saindang mga aki, magin marahay an kaisipan, mabini, mga paratrabaho sa harong, marahay, nagpapasakop sa agom nindang lalaki, tanganing an tataramon nin Dios dai mapaglanghadan.”—Tito 2:3-5.
12. Kiisay na pagdirehir an mahalagang sunodon kan gabos sa kongregasyon?
12 Bendisyon nanggad sa kongregasyon an mapakumbabang mga tugang na babae kun sinda may kooperasyon na nagtatabang kapwa sa saindang agom asin sa mga magurang sa kongregasyon! (1 Timoteo 2:11, 12; Hebreo 13:17) Espesyalmenteng nakikinabang an mga magurang sa kongregasyon na may mga paninimbagan sa pamilya kun an gabos nakikokooperar na magtinarabangan sa espiritu nin pagkamoot asin kun an gabos nagpapasakop sa pagdirehir kan nombradong mga pastor.—1 Pedro 5:1, 2.
Mga Magurang, Ano an Ineenot Nindo?
13. Paano an dakol na ama nagkukulang sa saindang pamilya?
13 Kaidtong dakol nang taon an nakaagi sarong prominenteng enterteyner an nagkomento: “Nakaheheling ako nin asensadong mga lalaki na nagpapadalagan nin mga kompaniya na ginatos an tawohan; tatao sinda kun paano resolberan an lambang situwasyon, kun paano magdisiplina asin magtao nin balos sa langtad nin negosyo. Alagad an pinakadakulang negosyo na pinadadalagan ninda iyo an saindang pamilya asin nagkukulang sinda dian.” Taano? Bako daw na huli ta ineenot ninda an negosyo asin iba pang intereses asin pinababayaan an hatol nin Dios? An saiyang Tataramon nagsasabi: “An mga tataramon na ini na ipinagboboot ko . . . , dapat na idoon mo . . . sa saimong aki.” Asin ini kinaipuhan na gibohon aroaldaw. An mga magurang kaipuhan na daing kakuripotan na magtao kan saindang panahon—asin nangorogna kan saindang pagkamoot asin odok na pagmakolog.—Deuteronomio 6:6-9.
14. (a) Paano maninigong asikasohon nin mga magurang an saindang mga aki? (b) Ano an kabale sa tamang pagpatood sa mga aki?
14 Ipinagigirumdom sa sato kan Biblia na an mga aki mana hale ki Jehova. (Salmo 127:3) Inaasikaso daw nindo an saindong mga aki bilang rogaring nin Dios, sarong regalo na ipinaniwala nia sa saindo? Posibleng magugusto an saindong mga aki kun kukugoson nindo sinda, sa siring ipinaheheling an saindong mamomoton na pag-asikaso asin atension. (Marcos 10:16) Alagad bako sanang mga pagkugos asin paghadok an hinahagad sa ‘pagpatood sa aki oyon sa dalan para sa saiya.’ Tanganing masangkapan kan kadonongan na malikayan an mga siod sa buhay, an aki nangangaipo man nin mamomoton na disiplina. An sarong magurang nagpapaheling nin tunay na pagkamoot paagi sa ‘pagsiyasat sa saiyang aki na may pagdisiplina.’—Talinhaga 13:1, 24; 22:6.
15. Ano an nagpapaheling kan pangangaipo sa disiplina nin mga magurang?
15 An pangangaipo sa disiplina nin mga magurang maheheling sa paglaladawan nin sarong parakonseho sa eskuelahan sa mga aki na nagduduman sa saiyang opisina: “Sinda makaheherak, mamondoon, asin daing kasarigan an boot. Naghihibi sinda mantang isinasabi ninda an tunay na situwasyon. Dakol—dakol kisa sa tibaad pinaghohona nin saro—an nagprobar na maghugot, bakong huli sa labi-labing kaogmahan; iyan huli ta an pagmate ninda sinda labi-labi kamondo, dai pinagmamakolgan, asin natetension huli ta sa hoben pang marhay na edad sinda na ‘an namamahala’ asin iyan dai ninda kaya.” Idinugang nia: “Makatatakot para sa sarong hoben na makamate na sia an namamahala sa mga bagay.” Totoo, tibaad sayumahan nin mga aki an disiplina, alagad an totoo inaapresyar ninda an mga paggiya asin restriksion nin mga magurang. Naoogma sinda na an saindang mga magurang may igong pagmakolog na magbugtak nin mga limitasyon para sa sainda. “Naginhawahan akong marhay,” an sabi nin sarong tin-edyer na an mga magurang nagbugtak nin mga limitasyon.
16. (a) Ano an nangyayari sa ibang mga aki na nagdakula sa Kristianong mga harong? (b) Taano an sumbikalan na dalan nin sarong aki ta dai man nangangahulogan na bakong marahay an pagpatood na itinao kan mga magurang?
16 Pero, sa ibong kan pagkaigwa nin mga magurang na namomoot sa sainda asin nagtatao nin marahay na pagpatood, an nagkapirang hoben, arog kan gastador na aki sa ilustrasyon ni Jesus, isinisikwal an paggiya nin mga magurang asin nalalagalag. (Lucas 15:11-16) Minsan siring, iyan mismo tibaad dai nangangahulogan na dai inotob kan mga magurang an saindang paninimbagan na patoodon nin tama an saindang aki, siring sa ipinagboboot kan Talinhaga 22:6. An pananaram manongod sa ‘pagpatood sa aki oyon sa dalan para sa saiya asin dai sia masiko dian’ itinao bilang pankagabsan na situwasyon. Makamomondo, arog kan gastador na aki, may mga aki na ‘babasangbasangon an pagkuyog sa magurang.’—Talinhaga 30:17.
17. Saen puedeng makakua nin karangahan an mga magurang nin sumbikalan na mga aki?
17 An ama nin sarong sumbikalan na aki nanambitan: “Danay akong naghingoa na aboton an saiyang puso. Dai ko aram an gigibohon ko huli ta dakol na akong prinobaran. Mayong nag-aser.” Logod, an siring na sumbikalan na mga aki, pag-abot nin panahon, makagirumdom sa mamomoton na pagpatood na inako ninda asin magbalik arog kan gastador na aki. Minsan siring, nagdadanay an katunayan na an ibang mga aki nagrerebelde asin naggigibo nin inmoral na mga bagay na ikinakokolog na marhay nin boot kan saindang mga magurang. An mga magurang puedeng makakua nin karangahan gikan sa pakaaram na maski an pinakadakulang paratokdo na nabuhay digdi sa daga naheling an saiyang haloy nang estudyanteng si Judas Iscariote na pasaloiban sia. Asin daing duwa-duwa na si Jehova mismo namondo kan an dakol sa saiyang sadiring espiritung aki isikwal an saiyang hatol asin nagin rebelde na mayo man nin sala sa Saiyang kabtang.—Lucas 22:47, 48; Kapahayagan 12:9.
Mga Aki—Siisay an Paooyonan Nindo?
18. Paano ikapaheheling nin mga aki na ineenot ninda an Dios?
18 Si Jehova nagsasadol sa saindo mga hoben: “Magin makinuyog sa saindong mga magurang na nasa Kagurangnan.” (Efeso 6:1) An Dios ineenot nin mga hoben paagi sa paggibo kaini. Dai kamo magin mangmang! “An siisay man na mangmang nagbabasangbasang sa disiplina kan saiyang ama,” an sabi kan Tataramon nin Dios. Ni maninigo na may pagkaarogante nindong isipon na kaya nindo minsan mayo nin disiplina. An katunayan iyo na “may kapag-arakian na malinig sa saindang sadiring mga mata, pero dai nahugasan sa saindang karigsokan.” (Talinhaga 15:5; 30:12, American Standard Version) Kaya himateon nindo an instruksion nin Dios—‘hinanyogon,’ “pahalagahan,” ‘dai paglingawan,’ ‘tawan nin atension,’ ‘kuyogon,’ asin ‘dai pagpabayaan’ an mga togon asin disiplina nin mga magurang.—Talinhaga 1:8; 2:1; 3:1; 4:1; 6:20.
19. (a) Anong mapuersang mga rason an yaon sa mga aki na kuyogon si Jehova? (b) Paano ikapaheheling nin mga hoben na sinda nagpapasalamat sa Dios?
19 May mapuersang mga rason kamo na kuyogon si Jehova. Namomotan nia kamo, asin itinao nia an saiyang mga pagboot, kabale an pagboot na kuyogon nin mga aki an saindang mga magurang, tanganing ingatan kamo asin tabangan kamo na magkamit nin maogmang buhay. (Isaias 48:17) Itinao man nia an saiyang Aki na magadan para sa saindo tanganing kamo makaligtas sa kasalan asin kagadanan asin magkamit nin buhay na daing katapusan. (Juan 3:16) Nagpapasalamat daw kamo? An Dios nagmamasid gikan sa kalangitan, na sinisiyasat an saindong puso tanganing helingon kun kamo tunay na namomoot sa saiya asin nagpapahalaga sa saiyang mga probisyon. (Salmo 14:2) Si Satanas nagmamasid man, asin tinutuya nia an Dios, na nagsasabing dai kamo makuyog sa Saiya. Saindong pinaoogma si Satanas asin “kinokologan” si Jehova kun nagmamasumbikal kamo sa Dios. (Salmo 78:40, 41) Si Jehova nakikiolay sa saindo: “Magpakadonong ka, aki ko, asin pagayagayaha an sakong puso [paagi sa pagkuyog sako], tanganing makasimbag ako sa saiya na nagduduhagi sa sako.” (Talinhaga 27:11) Iyo, an hapot, Siisay an paooyonan nindo, si Satanas o si Jehova?
20. Paano napagdanay nin sarong hoben an kapusoan na maglingkod ki Jehova dawa kun sia natatakot?
20 Bakong pasil na gibohon an kabotan nin Dios sa atubangan nin mga pangigipit sa saindo ni Satanas asin kan saiyang kinaban. Iyan puedeng magin makatatakot. Sarong hoben an nagsabi: “An pagkatakot garo ka nalilipot. May magigibo ka manongod dian.” Sia nagpaliwanag: “Kun nalilipot ka, nagsusulog ka nin sueter. Kun nalilipot ka pa, masulog ka nin saro pa. Asin padagos ka sa pagsulog sagkod na mawara an lipot asin dai ka na nalilipot. Kaya an pamimibi ki Jehova kun ika natatakot garo pagsulog nin sueter kun ika nalilipot. Kun pakapamibi nin sarong beses natatakot pa ako, paorootro akong namimibi, sagkod na dai na ako natatakot. Asin epektibo iyan. Ilinilikay ako kaiyan sa problema!”
21. Paano kita susuportaran ni Jehova kun talagang hinihingoa niato na enoton sia sa satong buhay?
21 Kun talagang hinihingoa niato na enoton an Dios sa satong buhay, susuportaran kita ni Jehova. Paririgonon nia kita, na itinatao an tabang nin mga anghel kun kaipuhan, arog kan ginibo nia para sa saiyang Aki. (Mateo 18:10; Lucas 22:43) Magmapuso kamo gabos na magurang asin aki. Magkaigwa kan arog-Cristong pagkatakot, asin iyan matao saindo nin kaogmahan. (Isaias 11:3) Iyo, “matakot ka sa tunay na Dios asin otobon mo an saiyang mga togon, huli ta ini iyo an bilog na katongdan nin tawo.”—Eclesiastes 12:13.
Masisimbag daw Nindo?
◻ Anong mga paninimbagan an kinaipuhan na pagtimbangon kan enot na mga parasunod ni Jesus?
◻ Anong paninimbagan an dapat na otobon nin Kristianong mga magurang?
◻ Anong tabang an makukua kan Kristianong mga magurang sa kongregasyon na may mga pamilya?
◻ Anong mahalagang paglilingkod an magigibo nin mga tugang na babae sa kongregasyon?
◻ Anong hatol asin paggiya an mahalagang himateon nin mga aki?
[Retrato sa pahina 15]
Sa parate an sarong maygurang na Kristiana puedeng magtao sa sarong hoben na babae kan kinakaipuhan na tabang
[Retrato sa pahina 17]
Anong karangahan an makukua sa Kasuratan nin mga magurang na may sumbikalan na mga aki?