Ipinanuga an Sarong Mas Marahay na Buhay
GUSTO daw nindong mawaran kan mga problema na nagpapasakit sa buhay? Boot daw nindong mabuhay sa sarong kinaban na an buhay arog kaogma kan nasa tanawon na ilinaladawan sa atubangan asin likod na tutob kan magasin na ini? Helingang marhay an retratong iyan. Kadakol na pagkakan an mga tawo. Sinda talagang maoogma sa masisiram na kakanon na iyan. An gabos maogma. An mga tawo na manlaenlaen an rasa matoninong an pag-ibaiba. Matoninong pati mga hayop! Mayong nag-iiwal. Mayong dukha. Mayong naghehelang. May kaakit-akit na mga palibot, magagayon na kahoy, asin dalisay, malinig na tubig. Abaa kagayon na kamugtakan!
An daga daw na ini magigin pang arog kaiyan? Iyo, iyan magigin paraiso. (Lucas 23:43) An Dios, na naglalang kan daga, may katuyohan na an mga tawo magkamit nin mas marahay na buhay sa sarong paraisong daga. Asin puede kamong mabuhay dian!
Arin na Buhay an Mas Gusto Nindo?
Paano mapapalaen sa kinaban na nabubuhayan niato ngonyan an daganon na Paraiso sa ngapit? Sa presente, labing sarong bilyon katawo an nagugutom kada aldaw. Alagad sa Paraiso na katuyohan nin Dios para sa daga, an gabos magkakaigwa nin kadakol na pagkakan. An Biblia nanunuga: “Si Jehova kan mga hukbo magibo nanggad para sa gabos na banwaan . . . nin bangkete nin matatabang putahe, bangkete nin arak na laon.” (Isaias 25:6) Dai na magkukulang nin kakanon, ta an Biblia nagsasabi: “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.”—Salmo 72:16.
Ngonyan, dakol an nag-iistar sa mga payag-payag asin barong-barong, o sinda nasasakitan na bayadan an saindang arkila. An iba daing harong asin natotorog sa kalye. Sono sa World Health Organization, sagkod sa 100 milyones sa mga aki sa kinaban an daing harong. Alagad sa maabot na Paraiso, an gabos magkakaigwa nin harong na sadiri nia. An Tataramon nin Dios nagsasabi: “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan.”—Isaias 65:21.
Dakol an nagpapagal sa mga trabahong dai ninda gusto. Sa parate naglalapigot sinda nin dakol na oras alagad kakadikit an nakukuang entrada. Mga 1 sa kada 5 katawo sa kinaban an nabubuhay sa entrada na mayo pang $500 kada taon. Minsan siring, sa maabot na Paraiso an mga tawo maoogma sa saindang trabaho asin makaheheling nin marahay na mga resulta gikan dian. An Dios nanunuga: “An ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan.”—Isaias 65:22, 23.
Ngonyan yaon sa gabos na lugar an helang asin kamatean. Dakol an buta. An iba bongog. An iba dai nakalalakaw. Alagad sa Paraiso, an mga tawo mayo na nin helang asin kamatean. Si Jehova nagsasabi: “Mayo nin nag-eerok na masabi: ‘Naghehelang ako.’” (Isaias 33:24) Kun dapit sa mga dati nang may kabyadian, an nakaoogma sa pusong panuga iyo ini: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo lalaking usa, asin an dila kan pula magkukurahaw sa kaogmahan.”—Isaias 35:5, 6.
Sa presenteng panahon, may pagsakit asin kolog, kamondoan asin kagadanan. Alagad sa Paraiso digdi sa daga, an gabos na ini mayo na. Iyo, pati an kagadanan mawawara na! An Biblia nagsasabi: “An Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.
Malinaw, kun siring, an daganon na Paraiso na ipinanuga ni Jehova mangangahulogan nin mas marahay na buhay para sa katawohan. Alagad paano kita makasisierto na maabot iyan? Noarin iyan maabot, asin paano? Ano an dapat nindong gibohon tanganing mabuhay dian?