Kaipuhan kan mga Karnero ni Jehova an Maboot na Pag-ataman
“Arama nindo na si Jehova Dios. . . . Kita an saiyang banwaan asin an mga karnero kan saiyang pasabsaban.”—SALMO 100:3.
1. Ano an pagtratar ni Jehova sa saiyang mga lingkod?
SI Jehova an Dakulang Pastor. Kun kita saiyang mga lingkod, minamansay nia kita bilang saiyang mga karnero asin maboot na inaataman kita. An satong langitnon na Ama rinaranga asin pinagiginhawa kita patin ginigiyahan kita sa “mga dalan nin katanosan huli sa saiyang ngaran.” (Salmo 23:1-4) An Marahay na Pastor, si Jesu-Cristo, namomotan na gayo kita kaya itinao nia an saiyang kalag para sa sato.—Juan 10:7-15.
2. Yaon sa anong kamugtakan an banwaan nin Dios?
2 Bilang mga nag-aako nin maboot na pag-ataman, makasasabi kita kaiba kan salmista: “Maglingkod kamo ki Jehova na may paggayagaya. Umatubang kamo sa saiya na may magayagayang kurahaw. Arama nindo na si Jehova Dios. Sia an naggibo sa sato, asin bakong kita mismo. Kita an saiyang banwaan asin an mga karnero kan saiyang pasabsaban.” (Salmo 100:2, 3) Iyo, kita magayagaya asin tiwasay. Garo man sana kita ligtas sa maraot na mga naniniba sa toril nin mga karnero na may pusog na mga lanob na gapo.—Bilang 32:16; 1 Samuel 24:3; Sofonias 2:6.
Boluntad na mga Pastor kan Aripompon
3. Ano an pagtratar kan nombradong Kristianong kamagurangan sa aripompon nin Dios?
3 Bakong makangangalas na kita magayagaya bilang mga karnero nin Dios! An nombradong kamagurangan nangengenot sa tahaw niato. Dai sinda ‘nagpapakangprinsipe,’ nagpapakanghade niato, o naghihingoang magin kagurangnan kan satong pagtubod. (Bilang 16:13; Mateo 20:25-28; 2 Corinto 1:24; Hebreo 13:7) Imbes, sinda mamomoton na mga pastor na nag-aaplikar kan hatol ni apostol Pedro: “Pastoran an aripompon nin Dios na nasa saindong pangataman, bakong sa kapiritan, kundi gikan sa boot; bakong huli sa pagkamoot sa madayang pakinabang, kundi may kaigotan; ni siring sa naghahade sa mga mana nin Dios, kundi magin mga halimbawa sa aripompon.” (1 Pedro 5:2, 3) Sinabihan ni apostol Pablo an mga kapwa kamagurangan: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” Asin kanigoan an pasasalamat kan mga karnero na an mga lalaking ini na ninombrahan kan banal na espiritu “maboot sa aripompon”!—Gibo 20:28-30.
4. Huli sa anong klaseng relasyon sa aripompon na si Charles T. Russell midbid na marhay?
4 An kongregasyon tinawan ni Jesus nin “balaog na mga lalaki,” na an nagkapira bilang “mga pastor,” na maboot sa aripompon ni Jehova. (Efeso 4:8, 11) Saro sa mga lalaking ini si Charles T. Russell, an enot na presidente kan Watch Tower Society. Inapod siang Pastor Russell huli sa saiyang mamomoton asin madinamayon na mga aktibidad sa pagpastor sa aripompon sa irarom kan Poon na Pastor, si Jesu-Cristo. Ngonyan, an Kristianong kamagurangan ninombrahan kan Namamahalang Grupo kan Mga Saksi ni Jehova, asin iniingatan na dai gamiton an mga termino na arog baga kan “pastor,” “magurang,” o “paratokdo” bilang mga titulo. (Mateo 23:8-12) Pero, an kamagurangan sa presenteng aldaw nagpapastor para sa kapakinabangan kan mga karnero sa pasabsaban ni Jehova.
5. Taano an mga bagohan ta maninigong makipagmidbidan sa nombradong kamagurangan sa Kristianong kongregasyon?
5 Bilang mga pastor, an kamagurangan igwa nin mahalagang kabtang sa espirituwal na pag-oswag nin mga bagohan. Huli kaini, an bagong librong Kaaraman na Minagiya Pasiring sa Buhay na Daing Katapusan nagsasabi sa pahina 168: “Makipagmidbidan sa nombradong kamagurangan sa kongregasyon. Dakol an saindang eksperyensia sa pag-aplikar kan kaaraman nin Dios, huli ta naabot ninda an mga kualipikasyon para sa mga paraataman na nasusurat sa Biblia. (1 Timoteo 3:1-7; Tito 1:5-9) Dai mag-alangan na dolokon an saro sa sainda kun nangangaipo kamo nin espirituwal na tabang sa paghale sa sarong bisyo o ugale na kontra sa mga kahagadan nin Dios. Manonompongan nindo na sinusunod kan kamagurangan an sadol ni Pablo: ‘Rangahon an mga kalag na nagmomondo, tabangan an maluya, magin matinios sa gabos.’—1 Tesalonica 2:7, 8; 5:14.”
Kun an mga Bagohan Boot na Maghulit
6. Anong paagi an sinusunod kun an sarong inaadalan sa Biblia boot na magin parahayag kan Kahadean?
6 Pakatapos na an inaadalan sa Biblia makakua nin kaaraman asin haloy-haloy nang nag-aatender sa mga pagtiripon, tibaad boot niang magin parahayag kan Kahadean, sarong parahulit kan maogmang bareta. (Marcos 13:10) Kun iyo, an Saksi na nagkokondukta sa saiya nin pag-adal sa Biblia maninigong makipag-olay sa nangengenot na paraataman, na maareglo na an saro sa kamagurangan na nasa Komite sa Paglilingkod kan Kongregasyon asin an saro pang magurang makipag-olay sa inaadalan sa Biblia asin sa nagtotokdo sa saiya. An pag-orolay basado sa librong Organized to Accomplish Our Ministry, pahina 98 asin 99. Kun maheling kan duwang magurang na ini na an bagohan nagtutubod sa pundamental na mga katokdoan sa Biblia asin namumuhay na oyon sa mga prinsipyo nin Dios, sia sasabihan na kualipikado na siang makikabtang sa ministeryo sa publiko.a Pagreport nia kan saiyang ministeryo paagi sa pagtao nin report sa paglilingkod sa langtad, isusurat iyan sa Congregation’s Publisher Record card na nasa saiyang ngaran. An bagohan puede na ngonyan na magreport kan saiyang aktibidad na pagpatotoo kaiba kan minilyon na iba pa na magayagayang ‘nagbabalangibog kan tataramon nin Dios.’ (Gibo 13:5) Ipapaisi sa kongregasyon na sia saro nang dai pa bautisadong parahayag.
7, 8. Sa anong mga paagi matatawan nin kinakaipuhan na tabang sa ministeryo an sarong dai pa bautisadong parahayag?
7 Kaipuhan kan dai pa bautisadong parahayag an tabang kan kamagurangan asin iba pang maygurang na Kristiano. Halimbawa, an konduktor sa Pag-adal sa Libro kan Kongregasyon na saiyang inaatenderan interesado sa saiyang espirituwal na pag-oswag. An bagong parahayag tibaad madepisilan na magtaram nin epektibo sa pagharongharong. (Gibo 20:20) Kaya posibleng maoogma siang mag-ako nin tabang, nangorogna kan nagkokondukta sa saiya nin pag-adal sa Biblia sa librong Kaaraman. Angay an siring na praktikal na tabang, ta inandam ni Jesu-Cristo an saiyang mga disipulo para sa ministeryo.—Marcos 6:7-13; Lucas 10:1-22.
8 Kun boot niatong magin epektibo an satong ministeryo, mahalaga an marahay na patienot na pag-andam. Kun siring, puedeng mag-olay nguna an duwang parahayag tanganing ensayohon an mga pag-atubang na isinusuherir sa bulanan na mga luwas kan An Satong Ministeryo sa Kahadean. Pagpoon ninda sa saindang paglilingkod sa langtad, an mas may kabatidan tibaad iyo nguna an makipag-olay sa enot asin ikaduwang harong. Pakapamidbid sa makikatood na paagi, an duwang parahayag puedeng magtabang sa pagpatotoo. An pag-ibahan sa ministeryo sa laog nin pirang semana puedeng magbunga nin marahay na mga pagdalaw liwat asin pag-adal pa ngani sa Biblia sa harong sa librong Kaaraman na Minagiya Pasiring sa Buhay na Daing Katapusan. An mas may kabatidan na parahayag puedeng iyo an magkondukta sa pag-adal sa kadikit na panahon dangan itao iyan sa bagong parabalangibog kan Kahadean. Kanigoan an magigin kaogmahan kan duwang parahayag kun an inaadalan sa Biblia magpahayag nin pagpahalaga sa kaaraman nin Dios!
9. Anong mga areglo an ginigibo kun an sarong parahayag nagmamawot na magpabautismo?
9 Mantang nag-ooswag sa espirituwal an dai pa bautisadong parahayag, tibaad gumibo sia nin pagdusay sa Dios sa pamibi asin magmawot na magpabautismo. (Ikomparar an Marcos 1:9-11.) Maninigo niang ipaaram sa nangengenot na paraataman sa kongregasyon an saiyang pagmawot na magpabautismo, na maareglo nin duwang magurang na repasohon sa parahayag an mga hapot sa pahina 175 sagkod 218 kan Organized to Accomplish Our Ministry. An apat na kabtang na pagkabaranga sa mga hapot puedeng kobrehan sa tolong sesyon nin tolong laen-laen na magurang kun posible. Kun minaoyon sinda na an dai pa bautisadong parahayag igwa na nin tama naman na pakasabot sa mga katokdoan kan Biblia asin kualipikado na sa ibang paagi, sasabihan sia ninda na puede na siang mabautismohan. Bilang resulta kan saiyang pagdusay asin bautismo, sia nagigin ‘tinandaan’ para sa kaligtasan.—Ezequiel 9:4-6.
Pagpanigo sa Espesyal na mga Pangangaipo
10. Pagkatapos kan saiyang pag-adal sa librong Kaaraman asin sia mabautismohan, paano dudugangan nin saro an saiyang kaaraman sa Kasuratan?
10 Kun an indibiduwal nakatapos na sa saiyang pag-adal sa Biblia sa librong Kaaraman asin nabautismohan na, tibaad dai na kaipuhan na magkondukta nin pormal na pag-adal sa saiya sa saro pang libro, arog baga kan Nagkakasararo sa Pagsamba sa Iyo Sanang Tunay na Dios.b Siempre, an bago pa sanang mabautismohan dakol pang manonodan mantang sia nag-aandam para sa Kristianong mga pagtiripon asin regular na nag-aatender dian. Makakukua man sia nin dugang pang kaaraman mantang pinahihiro sia kan saiyang pagkapaha sa katotoohan na basahon asin pag-adalan sa pribado an Kristianong mga publikasyon patin ipakipag-olay an Makakasuratan na mga bagay sa mga kapagtubod. Alagad kumusta kun may lumataw na espesyal na mga pangangaipo?
11. (a) Paano tinabangan ni Priscila asin Aquila si Apolos? (b) Ano an puedeng ikatabang sa sarong bago pa sanang mabautismohan na hoben na adulto na nag-iisip nang mag-agom?
11 Minsan si Apolos, na “eksperto sa Kasuratan” asin tinokdoan nin tama manongod ki Jesus, nakinabang kan an may kabatidan na mga Kristiano na si Priscila asin Aquila ‘ipinag-iba sia asin ipinaliwanag nin mas tama an dalan nin Dios sa saiya.’ (Gibo 18:24-26; ikomparar an Gibo 19:1-7.) Kun siring, ipamugtak na an bago pa sanang mabautismohan na hoben na adulto nag-iisip nang mangilusyon asin mag-agom. An sarong mas may kabatidan na Kristiano tibaad makatabang sa saiya na makakua nin impormasyon dapit sa temang ini sa mga publikasyon kan Watch Tower. Halimbawa, an nakatatabang na materyal dapit digdi maheheling sa librong Questions Young People Ask—Answers That Work, Seksion 7.c An materyal na ini puedeng ipakipag-olay sa bagohan kan parahayag na nagkondukta sa saiya kan pag-adal sa Biblia, minsan ngani bako ining regular na pag-adal.
12. Ano an puedeng ikatabang sa mag-agom na bagong mabautismohan na may mga problema?
12 Horophoropa an saro pang halimbawa. Tibaad an bagong mabautismohan na mag-agom problema an pag-aplikar kan diosnon na mga prinsipyo. Tibaad kumonsulta sinda sa sarong magurang, na sa pirang banggi puedeng ipakipag-olay sa sainda an Kasuratan asin darahon an saindang atension sa impormasyon na yaon sa mga publikasyon kan Watch Tower. Minsan siring, an magurang dai makondukta liwat nin regular na pag-adal sa Biblia sa mag-agom.
Kun Magkasala an Bagohan
13. Taano an kamagurangan sa kongregasyon ta maninigong magpaheling nin pagkaherak sa sarong bagong mabautismohan na nagkasala alagad nagsosolsol?
13 Inaarog kan kamagurangan an Dakulang Pastor, si Jehova, na nagsasabi: “Ako mismo an mapasabsab sa sakong mga karnero, . . . bubugkosan ko an nabarian asin pakokosogon ko an naghehelang.” (Ezequiel 34:15, 16; Efeso 5:1) Kaoyon sa espiritung iyan, an disipulong si Judas nagsadol na pahelingan nin pagkaherak an linahidan na mga Kristiano na nagkaigwa nin mga pagduda o naholog sa kasalan. (Judas 22, 23) Mantang tama na mas dakol kitang linalaoman sa may kabatidan na mga Kristiano, sierto na maninigong pahelingan nin pagkaherak an sarong bagong mabautismohan—na saro sanang kordero—na nagkasala alagad nagsosolsol. (Lucas 12:48; 15:1-7) Kun siring, an kamagurangan, na ‘naghohokom para ki Jehova,’ maboot na inaataman an siring na mga karnero asin pinapakarhay giraray sinda sa espiritu nin kahoyoan.—2 Cronica 19:6; Gibo 20:28, 29; Galacia 6:1.d
14. Ano an maninigong gibohon kun makakomitir nin magabat na kasalan an bago pa sanang mabautismohan na parahayag, asin paano sia matatabangan?
14 Kun siring, ipamugtak na an bago pa sanang mabautismohan na parahayag dating problema an pag-inom asin naotrong magpangana sa saro o duwang okasyon. O tibaad napangganahan nia an haloy nang bisyo sa tabako alagad saro o duwang beses na napadara sa sugot na magsigarilyo sa pribado. Minsan ngani an satong bagong tugang namibi para sa kapatawadan nin Dios, maninigo siang magpatabang sa sarong magurang sa kongregasyon tangani na an kasalan dai magin paorootro. (Salmo 32:1-5; Santiago 5:14, 15) Pagsabi nia kan saiyang kasalan sa saro kan kamagurangan, maninigong hingoahon kan magurang na iyan na pakarhayon giraray an bagohan sa maheherakon na paagi. (Salmo 130:3) Tibaad igo na an Makakasuratan na hatol na tabangan siang gumibo nin tanos na mga dana para sa saiyang mga bitis pakatapos kaiyan. (Hebreo 12:12, 13) Ipakikipag-olay kan magurang na ini an mga kamugtakan sa nangengenot na paraataman kan kongregasyon tanganing aramon kun ano pang tabang an maninigong itao.
15. Sa nagkapirang kaso, ano an tibaad kaipuhan kun magkasala an bago pa sanang mabautismohan?
15 Sa nagkapirang kaso tibaad bako sana iyan an kaipuhan. Kun dakol an nakaaaram, namemeligro an aripompon, o may iba pang magagabat na problema, an grupo nin kamagurangan maasignar nin duwang magurang tanganing imbestigaron an bagay. Kun manompongan kan mga magurang na ini na an bagay talagang magabat kaya kaipuhan an hudisyal na komite, maninigo ninda ining ireport sa grupo nin kamagurangan. Dangan an grupo nin kamagurangan manombra nin hudisyal na komite na matabang sa nagkasala. An hudisyal na komite maninigo siang trataron sa maboot na paagi. Maninigo nindang pagmaigotan na pakarhayon sia giraray paagi sa Kasuratan. Kun naghihimate sia sa maboot na paghihingoa kan hudisyal na komite, madedeterminaran ninda kun baga may karahayan na dai sia pagtawan nin mga kabtang sa plataporma sa mga pagtiripon sa Kingdom Hall o kun baga totogotan siang magkomento sa mga pagtiripon.
16. Ano an magigibo kan kamagurangan tanganing tabangan an sarong nagkasala?
16 Kun naghihimate an nagkasala, puedeng iareglo nin saro o duwang magurang na nasa hudisyal na komite na magsongko sa pagpastor na an katuyohan parigonon an saiyang pagtubod asin pakosogon an saiyang pagpahalaga sa matanos na mga pamantayan nin Dios. An kada saro sa sainda puedeng ibanan sia sa ministeryo sa langtad sa panapanahon. Puede sindang magkaigwa nin pirang pakipag-olay sa saiya sa Kasuratan, na posibleng ginagamit an angay na mga artikulo sa An Torrengbantayan asin Awake! alagad dai nagkokondukta nin regular na pag-adal sa Biblia. Paagi sa siring na maboot na pag-ataman, an nagkasala tibaad mapakosog na labanan an mga kaluyahan kan laman sa maabot pang mga aldaw.
17. Anong mga aksion an ginigibo kun an sarong bautisadong nagkasala habong magsolsol asin bayaan an saiyang pagkakasala?
17 Siempre, an pagigin bago pa sanang mabautismohan dai ikasasarahotan sa daing pagsolsol na pagkakasala. (Hebreo 10:26, 27; Judas 4) Kun an siisay man na bautisadong nagkasala habong magsolsol asin bayaan an saiyang pagkakasala, ititiwalag sia sa kongregasyon. (1 Corinto 5:6, 11-13; 2 Tesalonica 2:11, 12; 2 Juan 9-11) Kun an aksion na ini garo baga kaipuhan, an grupo nin kamagurangan mapili nin hudisyal na komite. Kun mangyari an pagtiwalag, gigibohon an halipot na paising ini: “Si . . . itiniwalag.”e
Tabangan Sinda na ‘Magpadagos sa Pagkamaygurang’
18. Taano ta makasisierto kita na an bagong mabautismohan na mga Kristiano asin iba pa perming dakol pa an dapat na manodan manongod ki Jehova asin sa saiyang kabotan?
18 An dakulang mayoriya kan mga lingkod nin Dios magdadanay sa aripompon. Nakaoogma, an kada saro sa sato orog man na makararani sa satong langitnon na Ama huli ta perming dakol pa an satong manonodan manongod sa saiya asin sa saiyang kabotan. (Eclesiastes 3:11; Santiago 4:8) An rinibong nabautismohan sa Pentecostes kan 33 C.E. siertong dakol pa an dapat na manodan. (Gibo 2:5, 37-41; 4:4) Iyo man an mga Hentil, na mayong aram sa Kasuratan. Halimbawa, totoo ini sa mga nabautismohan pakatapos kan pahayag ni Pablo sa Areopago sa Atenas. (Gibo 17:33, 34) Ngonyan, an mga bagong mabautismohan dakol pa man na dapat na manodan saka nangangaipo nin panahon asin tabang tanganing maparigon an saindang desisyon na magpadagos sa paggibo kan tama sa pagheling nin Dios.—Galacia 6:9; 2 Tesalonica 3:13.
19. Paano matatabangan an mga nagpapabautismo na ‘makapadagos sa pagkamaygurang’?
19 Kada taon rinibo an nagpapabautismo asin nangangaipo nin tabang tanganing sinda ‘magpadagos sa pagkamaygurang.’ (Hebreo 6:1-3) Paagi sa tataramon, halimbawa, asin praktikal na tabang sa ministeryo, tibaad makatabang kamo sa nagkapira na isolog an bagong pagkatawo asin ‘padagos na maglakaw sa katotoohan.’ (3 Juan 4; Colosas 3:9, 10) Kun kamo may kabatidan na parahayag, tibaad imbitaran kamo kan kamagurangan na tabangan an sarong bagong kapagtubod sa paglilingkod sa langtad o ipakipag-olay sa saiya an pirang Makakasuratan na punto sa laog nin pirang semana tanganing maparigon an saiyang pagtubod sa Dios, an saiyang pagpahalaga sa Kristianong mga pagtiripon, asin iba pa. An relasyon kan mga pastor sa aripompon kabaing kan sa sarong ama na nakadadagka asin kan sa sarong ina na may kabootan. (1 Tesalonica 2:7, 8, 11) Pero, dai kaya nin pipirang magurang asin ministeryal na lingkod na asikasohon an gabos na kaipuhan sa sarong kongregasyon. Kita gabos kabaing nin sarong pamilya na an mga miembro nagtitinarabangan. An lambang saro sa sato may magigibo tanganing tabangan an satong mga kapwa parasamba. Kamo mismo puedeng makaparigon sa boot, makaranga sa mga nagmomondo nin makuri, makasuportar sa mga maluya.—1 Tesalonica 5:14, 15.
20. Ano an magigibo nindo tanganing ikapalakop an kaaraman nin Dios asin makatao nin maboot na pag-ataman sa mga karnero sa pasabsaban ni Jehova?
20 An katawohan nangangaipo kan kaaraman nin Dios, asin bilang sarong Saksi ni Jehova, puede kamong magkaigwa nin magayagayang kabtang sa pagpalakop kaiyan. Kaipuhan kan mga karnero ni Jehova an maboot na pag-ataman, asin puede kamong magkaigwa nin mamomoton na kabtang sa pagtabang na ikatao ini. Bendisyonan logod ni Jehova an saindong ministeryo, asin balosan logod nia kamo huli sa saindong odok sa pusong mga paghihingoa na tabangan an mga karnero sa saiyang pasabsaban.
[Mga Nota sa Ibaba]
a Sa panahon na ini, an bagohan puede nang kumua nin kopya kan librong Organized to Accomplish Our Ministry.
b Ipinublikar kan Watchtower Bible and Tract Society of New York, Inc.
c Ipinublikar kan Watchtower Bible and Tract Society of New York, Inc.
d An siring na areglo para sa dai pa bautisadong mga parahayag sinumaryo sa artikulong “Pagtabang sa Iba na Sumamba sa Dios,” na nagluwas sa An Torrengbantayan na Disyembre 1, 1988, pahina 13-18 (w88-E 11/15 p. 15-20).
e Kun an desisyon pagtitiwalag asin igwa nin apelasyon, ididigson an paisi. Helingon an pahina 147-8 kan librong Organized to Accomplish Our Ministry.
Ano an Saindong Simbag?
◻ Ano an pagtratar ni Jehova sa saiyang mga karnero?
◻ Ano an ginigibo kun boot na maghulit kan mga bagohan?
◻ Paano matatabangan kan mga kapagtubod an mga bagohan na igwa nin espesyal na mga pangangaipo?
◻ Ano an ikatatabang kan kamagurangan sa mga nagkasala alagad nagsosolsol?
◻ Paano nindo matatabangan an sarong bagong mabautismohan na ‘makapadagos sa pagkamaygurang’?
[Retrato sa pahina 16]
Si Charles T. Russell midbid na marhay bilang sarong mamomoton na pastor kan aripompon
[Retrato sa pahina 18]
An madinamayon na mga pastor may kabootan an pagtratar sa aripompon nin Dios