Karangahan Asin Pagparigon sa Boot—Mga Tampok na Dakol an Kabtang
KADAKLAN sa sato nakaeksperyensia na nin mga panahon na an pagmate ta kita pobrehon na marhay—bako man na kakadikit an kuarta kundi namomondo. Kita nawaran na nin paglaom, labi-labi pa ngani an pagmondo. Pero, sa siring na mga panahon tibaad may makukua kitang sarong mahalagang bagay na puedeng makatao sa sato nin dakulang karahayan. An “tampok” na iyan iyo an pagparigon sa boot.
Sa Biblia an iyo man sanang Griegong tataramon ginagamit para sa “parigonon an boot” asin “rangahon.” An duwang tataramon na iyan nagpapaabot kan ideya nin pagtao nin kapusoan, kosog, o paglaom. Kun siring, malinaw na kun kita nanluluya o mamondo, karangahan asin pagparigon sa boot an talagang kaipuhan ta. Saen daw iyan manonompongan?
Inaasegurar kita kan Biblia na si Jehova “an Dios nin gabos na karangahan.” (2 Corinto 1:3) Sinasabi man kaiyan sa sato na “sia bakong harayo sa lambang saro sa sato.” (Gibo 17:27) Kaya an karangahan asin pagparigon sa boot makukua. Konsideraron niato an apat na pankagabsan na lugar na paagi kaiyan si Jehova nagtatao nin karangahan.
Paagi sa Personal na Relasyon sa Dios
An pinakadakulang gikanan nin karangahan iyo an personal na relasyon ki Jehova Dios. Nakaparirigon na sa boot minsan an bagay pa sana na an siring na relasyon posible. Total, siisay na namamahala sa kinaban an maako kan satong mga apod sa telepono o mapaheling nin personal na interes sa satong mga problema? Si Jehova mas makapangyarihan na marhay kisa sa siring na mga tawo. Pero, sia mapakumbaba—andam na gayong intindihon an hababa, bakong sangkap na mga tawo. (Salmo 18:35) Si Jehova pa ngani an naenot na nagpaheling nin pagkamoot sa sato. An 1 Juan 4:10 nagsasabi: “An pagkamoot sa bagay na ini, bakong huli ta kita namoot sa Dios, kundi na sia namoot sato asin isinugo an saiyang Aki bilang pantubos na atang para sa satong mga kasalan.” Dugang pa, mamomoton kitang dinadagka ni Jehova pasiring sa saiyang Aki.—Juan 6:44.
Kamo daw naghimate asin naghanap nin karangahan sa pakikikatood sa Dios? (Ikomparar an Santiago 2:23.) Halimbawa, kun kamo igwa nin namomotan, dayupot na amigo, bako daw na naoogma kamo na makaiba nin solo an sarong iyan, na nakikipag-olay nin suelto manongod sa saindong mga kahaditan asin iniisip, sa saindong mga paglaom asin kagayagayahan? Iniimbitaran kamo ni Jehova na gibohon sa saiya an siring. Sia dai nagbubugtak nin limitasyon sa lawig kan saindong pakipag-olay sa saiya sa pamibi—asin sia talagang naghihinanyog. (Salmo 65:2; 1 Tesalonica 5:17) Si Jesus namibi nin regular asin odok. Sa katunayan, antes niang pilion an saiyang 12 apostol, sia namibi sa bilog na banggi.—Lucas 6:12-16; Hebreo 5:7.
Sa panapanahon, an lambang saro sa sato puedeng makaibahan si Jehova nin solo. An pagtukaw sana nin toninong sa may bintana o paglakawlakaw nin matoninong puedeng makatao nin marahay na oportunidad na buksan an satong puso ki Jehova sa pamibi. An paggibo nin siring puedeng magin gikanan nin dakulaon na kaginhawahan asin karangahan. Kun igwa nin sarong aspekto kan paglalang ni Jehova na mapagmamasdan niato mantang naghohorophorop—dawa saro sanang parte kan langit, nagkapirang kahoy o gamgam—kita puedeng makakua dian nin nakararangang pagirumdom sa pagkamoot asin pagmalasakit ni Jehova para sa sato.—Roma 1:20.
Paagi sa Personal na Pag-adal kan Tataramon nin Dios
Pero, paagi sa personal na pag-adal kan Biblia na talagang mabubukasan sa sato an mga kualidad ni Jehova. An Biblia paorootrong ihinahayag si Jehova na “Dios na maheherakon asin maugayon, maluway sa pagkaanggot asin mayaman sa mamomoton na kabootan.” (Exodo 34:6; Nehemias 9:17; Salmo 86:15) An kamawotan na rangahon an saiyang daganon na mga lingkod pundamental na kabtang kan personalidad ni Jehova.
Halimbawa, horophoropa an mga tataramon ni Jehova sa Isaias 66:13: “Siring sa sarong tawo na padagos na rinaranga kan saiya mismong ina, siring man sana na ako mismo padagos na magraranga saindo.” Dinisenyo ni Jehova an pagkamoot kan ina sa saiyang mga aki na magin mapagsakripisyo sa sadiri asin maimbod. Kun nakaheling na kamo nin sarong mamomoton na ina na rinaranga an saiyang nakolgan na aki, aram nindo kun ano an boot ipakahulogan ni Jehova kan sia magsabi na rarangahon nia an saiyang banwaan.
Dakol na tala sa Biblia an nagpapaheling kan siring na pagrangang ginigibo. Kan an propetang si Elias hinumang gadanon kan maraot na si Reyna Jezabel, sia natakot asin nagdulag tanganing iligtas an saiyang buhay. Sia dai nang kaparapaglaom kaya sia naglakaw sa kaawagan sa rayong bilog na aldaw na pagbaklay, na malinaw na daing darang tubig o pagkakan. Huli sa kasakitan sinabi ni Elias ki Jehova na gusto na niang magadan. (1 Hade 19:1-4) Ano an ginibo ni Jehova tanganing rangahon asin parigonon an boot kan saiyang propeta?
Dai sinaway ni Jehova si Elias huli kan saboot na sia nagsosolo, daing halaga, asin natatakot. Sa kabaliktaran, an propeta nakadangog nin “sarong kalmado, hababang tingog.” (1 Hade 19:12) Kun babasahon nindo an 1 Hade kapitulo 19, maririparo nindo kun paano rinanga ni Jehova si Elias, pinakalma sia, asin pinarigon an saiyang pagtubod. An karangahan na ini bakong hababaw. Iyan nakataros sa nariribok na puso ni Elias, na pinaririgon an boot kan propeta na magpadagos. (Ikomparar an Isaias 40:1, 2.) Dai nahaloy, ipinadagos nia an saiyang asignasyon.
Si Jesu-Cristo rinaranga man asin pinaririgon an boot kan saiyang maimbod na mga parasunod. Sa katunayan, si Isaias naghula manongod sa Mesiyas: “An Soberanong Kagurangnan na Jehova isinugo . . . ako sa pagpaomay sa mga nasasakitan an puso, . . . sa pagranga kan gabos na nagtatangis.” (Isaias 61:1-3) Durante kan saiyang bilog na buhay, lininaw ni Jesus na an mga tataramon na ini aplikado sa saiya. (Lucas 4:17-21) Kun namamatean nindo an pangangaipo nin pagranga, horophoropon an maboot, mamomoton na pagtratar ni Jesus sa mga tawo na nakolgan asin nangangaipo. Tunay nanggad, an maingat na pag-adal kan Biblia dakulang gikanan nin karangahan asin pagparigon sa boot.
Paagi sa Kongregasyon
Sa Kristianong kongregasyon, an mga tampok na karangahan asin pagparigon sa boot nagkikilyab sa dakol na kabtang kaiyan. Si apostol Pablo pinasabngan na sumurat: “Padagos kamong magparangaranga asin magpakinosogkosogan.” (1 Tesalonica 5:11) Paano puedeng manompongan an karangahan asin pagparigon sa boot sa mga pagtiripon sa kongregasyon?
Siempre, sa pangenot, minaatender kita sa Kristianong mga pagtiripon tanganing ‘matokdoan ni Jehova,’ na mag-ako nin instruksion manongod sa saiya asin sa saiyang mga dalan. (Juan 6:45) An siring na mga instruksion may katuyohan na magin nakaparirigon sa boot asin nakararanga. Sa Gibo 15:32, mababasa ta: “Si Judas asin Silas . . . nagparigon sa boot kan mga tugang sa balakid na tataramon asin nagpakosog sa sainda.”
Naeksperyensiahan na daw nindong umatender sa Kristianong pagtiripon na kamo mayo na nin paglaom asin nagpuli sa harong na mas marahay na an pagmate? Tibaad igwang nasambitan sa sarong pahayag, komento, o pamibi na nakataros sa saindong puso asin nakatao nin kaipuhan na karangahan asin pagparigon sa boot. Kaya dai magpalta sa Kristianong mga pagtiripon.—Hebreo 10:24, 25.
An pakiaasosyar sa satong mga tugang na lalaki asin babae sa ministeryo asin sa ibang okasyon puedeng magkaigwa nin kaagid na epekto. Sa Hebreo an nagkapirang berbo na nangangahulogan “bogkoson” nagpanongod man sa “kosog” o “pakosogon”—an risang ideya iyo na an mga bagay nagigin mas makosog kun nabobogkos. An prinsipyong ini totoo sa kongregasyon. Kita nararanga, naparirigon an boot, iyo, napakokosog, paagi sa pag-iribaiba. Asin kita nabobogkos nin pagkamoot, an pinakamakosog na bogkos.—Colosas 3:14.
Kun minsan an kaimbodan kan satong espirituwal na mga tugang na lalaki o babae an nagpaparigon sa satong boot. (1 Tesalonica 3:7, 8) Kun minsan an pagkamoot na ipinaheheling ninda. (Filemon 7) Asin kun minsan an paggibo sana nin iriba, na nagtatarabangan, mantang sinasabi sa iba an manongod sa Kahadean nin Dios. Kun kamo nanluluya asin nangangaipo nin pagparigon sa boot kun dapit sa ministeryo, taano ta dai makiareglong umiba sa sarong mas maedad o mas eksperyensiadong parahayag kan Kahadean? Posibleng makakua kamo nin dakulang karangahan sa paggibo kaiyan.—Eclesiastes 4:9-12; Filipos 1:27.
Paagi sa “Maimbod Asin Madonong na Oripon”
Siisay an nag-oorganisar kan nakararangang mga kabtang kan satong pagsamba? Si Jesus nagnombra nin sarong grupo na designado nia bilang “an maimbod asin madonong na oripon” tanganing magwaras nin espirituwal na “kakanon sa igong panahon.” (Mateo 24:45) Kan enot na siglo C.E., an grupong ini nin pinaniaki sa espiritung mga Kristiano nagpupunsionar na. An namamahalang grupo nin kamagurangan sa Jerusalem nagpapadara nin mga surat nin instruksion asin giya sa mga kongregasyon. Ano an resulta? An Biblia irinekord kun ano an reaksion kan mga kongregasyon sa saro sa siring na mga surat: “Kan mabasa ninda idto, ipinaggayagaya ninda an pagparigon sa boot.”—Gibo 15:23-31.
Siring man, sa delikadong huring mga aldaw na ini, an maimbod asin madonong na oripon nagwawaras nin espirituwal na kakanon na nagtatao nin karangahan asin pagparigon sa boot sa banwaan ni Jehova. Nakikakabtang daw kamo sa pagkakan na iyan? Iyan madaling makua sa inimprentang literatura na iwinawaras sa bilog na kinaban kan grupong oripon. An mga magasin na An Torrengbantayan asin Awake! patin mga libro, brochure, asin mga tract na ipinupublikar kan Watch Tower Society nagdara nin karangahan sa dai mabilang na parabasa.
An sarong nagbibiaheng paraataman nagsurat: “An kadaklan sa satong mga tugang na lalaki asin babae mawot na magibo an tama, alagad sinda sa parate nakikilaban sa mga pagkasudya kan mawot, takot, asin pakamate na sinda daing kosog na tabangan an saindang sadiri. An mga artikulo sa satong mga babasahon nakatatabang sa dakol na makontrol liwat an saindang buhay asin emosyon. An mga artikulo nagtatao man sa kamagurangan nin ikaaalok na mas marahay kisa sa hababaw na pagparigon sa boot.”
Gamiton na marhay an mga literatura hale sa grupong maimbod na oripon. An napapanahon na mga magasin, libro, asin iba pang publikasyon makatatabang sa sato na makanompong nin karangahan sa panahon nin kasakitan. Sa ibong na lado, kun kamo nasa posisyon na parigonon an boot nin sarong nagmomondo, gamiton an Makakasuratan na impormasyon sa mga babasahon na ini. An mga artikulo isinurat nin maingat na marhay, na sa parate pakatapos nin dakol na semana o bulan nin maigot na pagsiyasat, pag-adal, asin pamibi. An hatol basado sa Biblia, napatunayan asin totoo. Nanompongan kan nagkapira na nakatatabang na marhay na basahon an angay na saro o duwang artikulo sa sarong namomondo. Ini puedeng magbunga nin dakulang karangahan asin pagparigon sa boot.
Kun kamo makakua nin mahalagang mga tampok, sasarayon daw nindo iyan, o buka an palad na manhihiras kamo kan kayamanan sa iba? Gibohon nindong pasohan na magin gikanan nin karangahan asin pagparigon sa boot sa saindong mga tugang na lalaki asin babae sa kongregasyon. Kun kamo nagtotogdok imbes na manlaglag, nagtatao nin komendasyon imbes na mantuyaw, nagtataram sa “dila kan mga tinokdoan” imbes na sa ‘dai iniisip na mga bono nin espada,’ kamo puedeng makatabang sa buhay nin iba. (Isaias 50:4; Talinhaga 12:18) Tunay nanggad, kamo mamansayon bilang tampok mismo—gikanan nin tunay na karangahan asin pagparigon sa boot!
[Kahon sa pahina 20]
Karangahan Para sa mga Nangangaipo
DAKOL an nagkomento sa kun paanong an nagkapirang artikulo sa Torrengbantayan o Awake! nakapararom kan saindang personal na relasyon ki Jehova. An saro nagsabi: “Pakatapos na mabasa an artikulong ini, namatean ko na si Jehova sa saiyang bilog na pagkamakakamhan asin kamurawayan nasa kataed ko mismo. Namatean ko na sia sarong tunay na persona.” An saro pang surat nagsabi: “An samong puso asin isip makangangalas na marhay na nabago sa pagmansay niamo ki Jehova kaya kami bako na an dating mga tawo. Garo man sana igwang saro na lumininig kan samong salming sa mata, asin ngonyan naheheling mi nin malinaw na marhay an gabos na bagay.”
An nagkapira nagsurat tanganing sabihon kun paano sinda natabangan kan mga magasin na atubangon an espesipikong mga problema o angat, sa siring sinda inaasegurar kan personal na interes ni Jehova sa sainda. An sarong parabasa nagsabi kaini: “Salamat na marhay sa pagpaheling liwat sa samo kun gurano kadakula kan pagmalasakit asin pagkamoot ni Jehova sa saiyang banwaan.” Sarong babae sa Hapon na nagadanan nin aki an nagsabi kaini manongod sa mga artikulo sa Awake! dapit sa temang iyan: “An rarom kan pagkaherak nin Dios nagbolos hale sa mga pahina, asin ako huminibi nang huminibi nang huminibi. Ilinaag ko an mga artikulong ini sa sarong lugar na madali kong mababasa iyan kun ako nakamamate nin pagkamiserable asin kamondoan.” An saro pang nagmomondong babae nagsurat: “An mga artikulo sa Torrengbantayan asin Awake! asin an brochure na “Kun Magadan an Sarong Namomotan” nagtao sa sako kan kosog na kaipuhan ko tanganing tagalan an mga panahon kan sakong kamondoan.”
An Banal na Kasuratan an pangenot na gikanan nin karangahan. (Roma 15:4) An Torrengbantayan nangangapot sa Biblia bilang an autoridad kaiyan, asin siring man an kaibang magasin kaiyan, an Awake! Huli kaini, an mga babasahon na ini nagin karangahan asin pagparigon sa boot sa mga parabasa kaiyan.
[Retrato sa pahina 23]
An Dios nin gabos na karangahan iyo man an Paradangog nin pamibi