“Dai Logod Manluya an Saimong mga Kamot”

“Dai logod manluya an saimong mga kamot. Si Jehova na saimong Dios nasa tahaw mo. Bilang makakamhan na Saro, sia magliligtas.”​—SOFONIAS 3:​16, 17.

1. Ano an ipinahayag nin sarong iskolar sa Biblia manongod sa hula ni Sofonias?

AN HULA ni Sofonias minalihis pa sa enot na kaotoban kaiyan kan ikapito asin ikaanom na siglo B.C.E. Sa saiyang komentaryo manongod sa Sofonias, si Propesor C. F. Keil nagsurat: “An hula ni Sofonias . . . bako sanang nagpopoon sa pagpahayag nin unibersal na paghokom sa bilog na kinaban, na hale dian minapoon an paghokom na mangyayari sa Juda huli sa mga kasalan kaiyan, asin sa kinaban kan mga nasyon huli sa pagkaongis kaiyan sa banwaan ni Jehova; kundi iyan sa kabilogan nagkokonsiderar sa dakula asin makatatakot na aldaw ni Jehova.”

2. Ano an mga pagkakaagid sa pag-oltanan kan mga kamugtakan kan aldaw ni Sofonias asin kan kamugtakan sa laog nin Kakristianohan ngonyan?

² Ngonyan, an hudisyal na desisyon ni Jehova iyo na tiponon an mga nasyon para sa kalaglagan na mas dakula kisa kan aldaw ni Sofonias. (Sofonias 3:8) An mga nasyon na naghihingakong Kristiano partikularmenteng kulpable sa pagheling nin Dios. Kun paanong an Jerusalem pinadusahan nin grabe huli sa pagigin bakong fiel kaiyan ki Jehova, an Kakristianohan kaipuhan man na manimbag sa Dios huli sa labi-labi kamapagpanganang mga dalan kaiyan. An mga paghokom nin Dios na ipinahayag tumang sa Juda asin Jerusalem kan aldaw ni Sofonias aplikado na mas mapuersa pa ngani sa mga iglesia asin sekta nin Kakristianohan. Inatian man ninda an dalisay na pagsamba paagi sa saindang mga doktrina na dai nagtatao nin onra sa Dios, na dakol an may paganong pinaghalean. Iinatang ninda an minilyon kan saindang marahay an salud na mga aking lalaki sa modernong altar na guerra. Dugang pa, an mga nag-eerok sa antitipikong Jerusalem isinalak an Kristianismo daa sa astrolohiya, espiritistikong mga gibo, asin makasosopog na seksuwal na inmoralidad, na nagpapagirumdom sa pagsamba ki Baal.​—Sofonias 1:​4, 5.

3. Ano an masasabi manongod sa dakol na sekular na namomoon asin politikal na mga gobyerno ngonyan, asin ano an ihinula ni Sofonias?

³ Dakol na politikal na namomoon kan Kakristianohan an gustong marhay na maheling sa simbahan. Alagad arog kan “mga prinsipe” nin Juda, an dakol sa sainda inaaprobetsaran an mga tawo na siring sa “nagngangarob na mga leon” asin gutom na “mga lobo.” (Sofonias 3:​1-3) An politikal na mga parasunodsunod kan mga iyan “pinapano an harong kan saindang mga kagurangnan nin kadahasan asin pandadaya.” (Sofonias 1:9) An pagsoborno asin karatan lakop. Kun manongod sa politikal na mga gobyerno sa laog asin luwas kan Kakristianohan, nagdadakol sa sainda an ‘nagpapaabaw-abaw’ tumang sa banwaan ni Jehova nin mga hukbo, an saiyang mga Saksi, na tinatratar sinda bilang sarong dinuhaging “sekta.” (Sofonias 2:8; Gibo 24:​5, 14) Manongod sa gabos na siring na politikal na namomoon asin sa saindang mga parasunod, si Sofonias naghula: “Minsan an saindang pirak o an saindang bulawan dai makapagliligtas sa sainda sa aldaw kan kabangisan ni Jehova; kundi paagi sa kalayo kan saiyang kaigotan an bilog na daga matototong, huli ta magibo sia nin pangubos, nin totoong gayong makangingirhat, sa gabos na nag-eerok sa daga.”​—Sofonias 1:18.

“Matago sa Aldaw kan Kaanggotan ni Jehova”

4. Ano an nagpapaheling na igwa nin mga makaliligtas sa dakulang aldaw ni Jehova, alagad ano an kaipuhan nindang gibohon?

⁴ Dai napoho an gabos na nag-eerok sa Juda kaidtong ikapitong siglo B.C.E. Sa kaagid na paagi, igwa nin mga makaliligtas sa dakulang aldaw ni Jehova. Sa mga siring si Jehova nagpahayag paagi sa saiyang propeta na si Sofonias: “Bago mangaki nin ano man an pagboot, bago mag-agi an aldaw na garo nasosolong dagami, bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”​—Sofonias 2:​2, 3.

5. Sa panahon na ini kan katapusan, sairisay an enot na naghimate sa patanid ni Sofonias, asin paano sinda ginamit ni Jehova?

⁵ Sa panahon kan katapusan kan kinaban na ini, an enot na naghimate kan makahulang imbitasyon iyo an natatada kan espirituwal na mga Israelita, an linahidan na mga Kristiano. (Roma 2:​28, 29; 9:6; Galacia 6:16) Huli ta hinanap ninda an katanosan asin kahoyoan patin ipinaheling an paggalang sa hudisyal na mga desisyon ni Jehova, sinda ilinigtas hale sa Dakulang Babilonya, an pankinaban na imperyo nin falsong relihion, asin ibinalik sa pag-oyon nin Dios kan 1919. Poon kaidto, asin partikularmente poon kan 1922, an fiel na natatadang ini mapusong ibinabalangibog an mga paghokom ni Jehova tumang sa mga iglesia asin sekta kan Kakristianohan patin tumang sa politikal na mga nasyon.

6. (a) Ano an ihinula ni Sofonias manongod sa fiel na natatada? (b) Paano naotob an hulang ini?

⁶ Manongod sa fiel na natatadang ini, si Sofonias naghula: “Wawalatan ko sa tahaw mo nin sarong banwaan na mapakumbaba asin mahoyo, asin sinda magpapaili nanggad sa ngaran ni Jehova. Kun manongod sa mga nawawalat kan Israel, dai sinda magibo nin karatan, ni magtataram nin kaputikan, ni may makukua man sa saindang ngoso na madayang dila; huli ta sinda mismo makarakan asin mahirigda, asin mayo nin siisay man na mapatakig sa sainda.” (Sofonias 3:​12, 13) An linahidan na mga Kristianong ini perming ginibong pinakamahalaga an ngaran ni Jehova, alagad espesyalmente poon 1931, kan akoon ninda an ngaran na Mga Saksi ni Jehova. (Isaias 43:​10-12) Paagi sa pagpalataw kan isyu manongod sa soberaniya ni Jehova, tinawan ninda nin onra an banal na ngaran, asin ini nagin sarong pailihan para sa sainda. (Talinhaga 18:10) Nagsosopay na pinakakan sinda ni Jehova sa espirituwal, asin sinda nag-eerok na daing takot sa sarong espirituwal na paraiso.​—Sofonias 3:​16, 17.

“Kabantogan Asin Kaomawan sa Tahaw kan Gabos na Banwaan”

7, 8. (a) Ano pang dugang na hula an naotob sa natatada kan espirituwal na Israel? (b) Ano an namidbid kan minilyon na tawo, asin ano an saindong saboot manongod kaini?

⁷ An hararom na pagkamoot kan natatada sa ngaran ni Jehova asin sa matanos na mga prinsipyo kan saiyang Tataramon bakong dai nariparo. An sinserong mga tawo naheling an kalaenan kan paggawe kan natatada sa karatan asin pagsaginsagin kan politikal asin relihiosong mga namomoon sa kinaban na ini. Binendisyonan ni Jehova an “mga nawawalat kan [espirituwal na] Israel.” Tinawan nia sinda nin onra paagi sa pribilehiong darahon an saiyang ngaran, asin pinapangyari niang magkaigwa sinda nin marahay na reputasyon sa tahaw kan mga banwaan kan daga. Siring ini sa pagkahula ni Sofonias: “‘Sa panahon na iyan dadarahon ko kamo banwaan sa laog, minsan sa panahon kan sakuyang pagtipon sa saindo. Huli ta gigibohon ko kamong mani kabantogan asin kaomawan sa tahaw kan gabos na banwaan sa daga, kun tiponon ko nang pabalik an mga bihag sa saindo sa atubangan kan saindong mga mata,’ an sabi ni Jehova.”​—Sofonias 3:20.

⁸ Poon kan 1935, literal na minilyon na tawo an nakamidbid na an bendisyon ni Jehova yaon sa natatada. Maogma nindang sinusunod an espirituwal na mga Judiong ini, o Israelita, na nagsasabi: “Maiba kami saindo, huli ta nabaretaan niamo na an Dios yaon dian sa saindo.” (Zacarias 8:23) An “ibang karnero” na ini minimidbid an linahidan na natatada bilang “an fiel asin madonong na oripon,” na ninombrahan ni Cristo na mag-asikaso “kan gabos niang [daganon na] rogaring.” Sinda may pagpasalamat na nag-aako kan espirituwal na pagkakan na inandam kan grupong oripon “sa igong panahon.”​—Juan 10:16; Mateo 24:​45, 47.

9. Anong “tataramon” an nanodan na gamiton nin minilyon na tawo, asin sa anong dakulang gibohon na “daramay” na naglilingkod an ibang karnero kaiba kan linahidan na natatada?

⁹ Kaiba kan natatada, an minilyon na ibang karnerong ini nakakanood na mamuhay asin magtaram kaoyon kan “dalisay na tataramon.”a Si Jehova naghula paagi ki Sofonias: “Sa panahon na iyan itatao ko sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) Iyo, an ibang karnero sararong naglilingkod ki Jehova nin “daramay” kaiba kan linahidan na mga miembro kan “sadangoton na aripompon” sa apuradong paghuhulit kan “maogmang baretang ini kan kahadean . . . para sa pagpatotoo sa gabos na nasyon.”​—Lucas 12:32; Mateo 24:14.

“An Aldaw ni Jehova Madatong”

10. Sa ano perming kombensido an linahidan na natatada, asin ano, bilang sarong grupo, an maheheling nindang mangyari?

¹⁰ Perming nasa isip kan linahidan na natatada an ipinasabong na pahayag ni apostol Pedro: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta habo nia na an siisay man malaglag kundi boot nia na an gabos makapagsolsol. Pero an aldaw ni Jehova madatong siring sa parahabon.” (2 Pedro 3:​9, 10) An mga miembro kan grupong fiel na oripon nungkang nagkaigwa nin pagduwaduwa manongod sa pagdatong kan aldaw ni Jehova sa satong panahon. An dakulang aldaw na iyan mapoon sa pagpaabot kan mga paghokom nin Dios tumang sa Kakristianohan, an antitipikong Jerusalem, asin sa natatada kan Dakulang Babilonya.​—Sofonias 1:​2-4; Kapahayagan 17:​1, 5; 19:​1, 2.

11, 12. (a) Ano pang ibang kabtang kan hula ni Sofonias an naotob sa natatada? (b) Paano naghimate an linahidan na natatada sa pagboot na, “Dai logod manluya an saimong mga kamot”?

¹¹ An fiel na natatada naggagayagaya na nakatalingkas na kan 1919 hale sa espirituwal na pagkabihag sa Dakulang Babilonya, an pankinaban na imperyo nin falsong relihion. Naeksperyensiahan ninda an kaotoban kan hula ni Sofonias: “Mag-awit ka, O aking babae kan Sion! Magkurahaw ka sa kaogmahan, O Israel! Maggayagaya ka asin magrukyaw sa bilog na puso, O aking babae kan Jerusalem! Hinale ni Jehova an mga paghokom sa saimo. Irinayo nia an saimong kaiwal. An hade nin Israel, si Jehova, nasa tahaw mo. Dai ka na matatakot sa kapahamakan sagkod pa man. Sa aldaw na iyan sasabihan an Jerusalem: ‘Dai ka matakot, O Sion. Dai logod manluya an saimong mga kamot. Si Jehova na saimong Dios nasa tahaw mo. Bilang makakamhan na Saro, sia magliligtas.’”​—Sofonias 3:​14-17.

¹² Igwa kan kombiksion asin dakol na prueba na si Jehova nasa tahaw ninda, an linahidan na natatada mapusong nag-abante sa pag-otob kan sugo sa sainda nin Dios. Ihinulit ninda an maogmang bareta kan Kahadean asin ihinayag an mga paghokom ni Jehova tumang sa Kakristianohan, sa natatada pa kan Dakulang Babilonya, asin sa bilog na maraot na palakaw nin mga bagay ni Satanas. Sa ibong kan gabos na kasakitan, sa laog kan mga dekada poon 1919, sinda nagkuyog kan pagboot nin Dios: “Dai ka matakot, O Sion. Dai logod manluya an saimong mga kamot.” Sinda nagin mahigos sa pagdistribwir nin binilyon na tract, magasin, libro, asin pulyeto na nagpapahayag kan Kahadean ni Jehova. Sinda nagin nakamomotibar sa pagtubod na halimbawa sa ibang karnero, na, poon kan 1935, natipon sa saindang kampi.

“Dai Logod Manluya an Saimong mga Kamot”

13, 14. (a) Taano an nagkapirang Judio ta puminondo sa paglilingkod ki Jehova, asin paano ini nahayag? (b) Ano an magigin bakong madonong na gibohon niato, asin sa anong gibohon maninigong dai manluya an satong mga kamot?

¹³ Mantang kita ‘padagos na naghahalat’ kan dakulang aldaw ni Jehova, paano kita makakukua nin praktikal na tabang sa hula ni Sofonias? Enot, kita maninigong mag-ingat na dai magin arog kan mga Judio kan aldaw ni Sofonias na puminondo sa pagsunod ki Jehova huli ta nagduwaduwa sinda sa kaharanihan kan aldaw ni Jehova. An siring na mga Judio dai man kinaipuhan na prangkang ipahayag an saindang pagduwaduwa, alagad an saindang gawe nagpaheling na sinda dai talaga nagtutubod na an dakulang aldaw ni Jehova harani na. Sinda nagkonsentrar sa pagtipon nin kayamanan imbes na padagos sindang maghalat ki Jehova.​—Sofonias 1:​12, 13; 3:8.

¹⁴ Bakong panahon ngonyan na togotan an pagduwaduwa na makagamot sa satong puso. Magigin bakong madonong nanggad na idigson sa satong isip o puso an pagdatong kan aldaw ni Jehova. (2 Pedro 3:​1-4, 10) Dapat niatong likayan na pumondo sa pagsunod ki Jehova o ‘manluya an satong mga kamot’ sa paglilingkod sa saiya. Kabale digdi an dai ‘pagtrabahong may hugakon na kamot’ sa paghuhulit niato kan “maogmang bareta.”​—Talinhaga 10:4; Marcos 13:10.

Paghihingoang Malabanan an Pagkaindiperente

15. Ano an puedeng magcausa sa sato na maghinugak an satong kamot sa paglilingkod ki Jehova, asin paano ihinula an problemang ini sa hula ni Sofonias?

¹⁵ Ikaduwa, kita maninigong mag-ingat tumang sa nakapanluluyang mga epekto nin pagkaindiperente. Sa dakol na nasyon sa Solnopan, an kadaihan nin interes manongod sa espirituwal na mga bagay puedeng magin causa nin pagkadisganar sa nagkapirang parahulit kan maogmang bareta. Igwa nin siring na pagkaindiperente kan aldaw ni Sofonias. Si Jehova nagpahayag paagi sa saiyang propeta: “Tatawan ko nin atension an mga tawong . . . nagsasarabi sa saindang puso, ‘Si Jehova dai maggigibo nin marahay, asin dai sia maggigibo nin maraot.’” (Sofonias 1:12) Sa pagsurat manongod sa tekstong ini sa Cambridge Bible for Schools and Colleges, si A. B. Davidson nagpahayag na iyan napapanongod sa mga tawo na “ruminuro na sa daing pakamate na pagkaindiperente o nin kadaihan pa ngani nin pagtubod manongod sa ano man na pangunlabot nin sarong mas makapangyarihan sa mga ginigibo nin tawo.”

16. Anong kaisipan an nasa dakol na miembro kan mga iglesia nin Kakristianohan, alagad anong pamparigon sa boot an itinatao ni Jehova sa sato?

¹⁶ An pagkaindiperente lakop na gawe ngonyan sa dakol na parte kan daga, partikularmente sa mas mayaman na mga nasyon. Minsan an mga miembro kan mga iglesia nin Kakristianohan dai nanggad nagtutubod na si Jehova Dios makikilabot sa mga ginigibo nin mga tawo sa satong aldaw. Sinasayumahan ninda an satong mga paghihingoa na paabotan sinda kan maogmang bareta kan Kahadean magsalang paagi sa nagduduwaduwang huyom o sa halipot na simbag na “Dai ako interesado!” Sa mga kamugtakan na ini, an pagmamaigot sa gibohon na pagpatotoo puedeng magin sarong angat nanggad. Binabalo kaiyan an satong pakatagal. Alagad paagi sa hula ni Sofonias, pinakokosog ni Jehova an saiyang fiel na banwaan, na sinasabi: “Dai logod manluya an saimong mga kamot. Si Jehova na saimong Dios nasa tahaw mo. Bilang makakamhan na Saro, sia magliligtas. Sia mag-oogma sa saimo na may paggayagaya. Sia magigin daing girong sa saiyang pagkamoot. Sia maggagayagaya sa saimo na may mga pag-awit.”​—Sofonias 3:​16, 17.

17. Anong marahay na halimbawa an maninigong sunodon nin mga bagohan sa tahaw kan ibang karnero, asin paano?

¹⁷ Sarong katunayan sa modernong aldaw na kasaysayan kan banwaan ni Jehova na an natatada, siring man an mga gururang na sa tahaw kan ibang karnero, nakahaman nin sarong dakulaon na pagtitipon sa huring mga aldaw na ini. An gabos na fiel na Kristianong ini nagpaheling nin pakatagal sa nakaaging mga dekada. Dai ninda tinogotan an pagkaindiperente kan mayoriya sa Kakristianohan na padisganaron sinda. Kaya logod an mga bagohan sa tahaw kan ibang karnero dai togotan an saindang sadiri na panluyahan nin boot huli kan pagkaindiperente sa espirituwal na mga bagay na lakop na marhay ngonyan sa dakol na kadagaan. Logod dai ninda togotan na ‘manluya an saindang mga kamot,’ o maghinugak. Logod gamiton ninda an lambang oportunidad na iatubang An Torrengbantayan, Awake!, asin iba pang marahay na publikasyon na espesyalmenteng dinisenyo tanganing tabangan an arog-karnerong mga tawo na manodan an katotoohan manongod sa aldaw ni Jehova asin an mga bendisyon na masunod.

Umabante Mantang Naghahalat kan Dakulang Aldaw!

18, 19. (a) Anong pamparigon sa boot na magtagal an makukua niato sa Mateo 24:13 asin Isaias 35:​3, 4? (b) Paano niato maaako an bendisyon kun sararo kitang nag-aabante sa paglilingkod ki Jehova?

¹⁸ Si Jesus nagpahayag: “An makatagal sagkod sa katapusan iyo an maliligtas.” (Mateo 24:13) Kaya, mayo nin “maluyang mga kamot” o “nagkokobogkobog na mga tuhod” mantang hinahalat ta an dakulang aldaw ni Jehova! (Isaias 35:​3, 4) An hula ni Sofonias nakapakokosog liwat sa boot na nagpapahayag manongod ki Jehova: “Bilang makakamhan na Saro, sia magliligtas.” (Sofonias 3:17) Iyo, ililigtas ni Jehova an “dakulang kadaklan” sagkod sa huring kabtang kan “dakulang kahorasaan,” kun mandahan na nia an saiyang Aki na ronoton an politikal na mga nasyon na padagos na ‘nagpapaabaw-abaw’ tumang sa saiyang banwaan.​—Kapahayagan 7:​9, 14; Sofonias 2:​10, 11; Salmo 2:​7-9.

¹⁹ Mantang an dakulang aldaw ni Jehova nagdadangadang, logod kita maigot na umabante, na naglilingkod sa saiya nin “daramay”! (Sofonias 3:9) Sa paggibo nin siring, kita mismo asin an dai mabilang na iba pa mapapalinya sa ‘matatago sa aldaw kan kaanggotan ni Jehova’ asin makaheheling mismo sa pagpakangbanal kan saiyang banal na ngaran.

[Nota sa ibaba]

Bilang Repaso

◻ Sa anong mga bagay na an relihiosong situwasyon sa laog kan Kakristianohan katimbang kaidtong aldaw ni Sofonias?

◻ Paano an dakol na politikal na namomoon ngonyan nakaaagid sa sekular na “mga prinsipe” kan panahon ni Sofonias?

◻ Anong mga panuga sa Sofonias an naotob sa natatada?

◻ Ano an namidbid kan minilyon na tawo?

◻ Taano ta dai niato maninigong togotan na manluya an satong mga kamot sa paglilingkod ki Jehova?

[Mga retrato sa pahina 15]

Arog ni Sofonias, an fiel na natatada kan linahidan na mga Kristiano mapusong ibinabalangibog an mga paghokom ni Jehova

[Mga retrato sa pahina 18]

An “ibang karnero” dai tinogotan an pagkaindiperente nin mga tawo na makapadisganar sa sainda