Puede Nindong Kamtan an Nagdadanay na mga Pakikikatood
IGWA nin mga olang sa mga pakikikatood. Sa katunayan, ihinula kan Biblia na sa “huring mga aldaw” na ini magkakaigwa nin kadaihan nin pagkamoot, natural na kapadangatan, asin kaimbodan. (2 Timoteo 3:1-5; Mateo 24:12) An mga kamugtakan na ini nagcausa nin dai pang kaagid na damat nin kapungawan. An sarong tawo nagsabi: “Garo dahong ni Noe sa sakong pagtaraed. Kun ika daing agom, dai ka kabale.” Dai puedeng ibasol an gabos sa lambang napupungaw na indibiduwal. Sa nagkapirang lugar sa kinaban, kabale sa mga problema manongod sa nagdadanay na pakikikatood an mga bagay na siring sa mas parateng pagbalyo nin istaran nin mga tawo, pagburulag nin mga pamilya, daing pakiararaman asin peligrosong mga siudad, asin risang pag-ina kan panahon nin pahingalo.
An sarong nag-iistar sa siudad puedeng makanupar nin mas dakol na tawo sa sarong semana kisa sa naheling nin sarong nag-iistar sa baryo kan ika-18 siglo sa sarong taon o sa bilog pa ngani niang buhay! Pero, an relasyon ngonyan sa parate hababaw. An dakol nababangkag sa daing pondong pakikibarkada asin mga paghihingoang paogmahon an sadiri. Minsan siring, kaipuhan niatong akoon na an daing saysay na pag-oroorogma kaiba nin bakong marahay an pagkapiling kairiba garo paggamit nin mga tonok na pansongo. An Eclesiastes 7:5, 6 nagsasabi: “Marahay pa na maghinanyog sa pagsaway kan madonong kisa sa magin tawong naghihinanyog kan awit kan mga kablas. Huli ta siring sa linagatik nin mga tonok sa irarom kan koron, siring man an nginisi kan kablas; asin ini man daing kamanungdanan.” An mga tonok madaling magprodusir nin maliwanag asin maribok na kalayo, alagad iyan bakong igo tanganing padanayon kitang maimbong. Siring man, an maribok, nagngingirising kairiba puedeng papanlingawon kita nin halipot, alagad dai ninda mahahale an gabos na kapungawan asin mapaninigoan an satong pangangaipo para sa tunay na mga katood.
An pagsolosolo laen man sa kapungawan. An pagsolosolo kaipuhan tanganing makarepresko sa sato asin sa siring magkaigwa kita nin dakol na ikaaalok bilang sarong katood. Kun napaaatubang sa kapungawan, an dakol minakiling tolos sa elektronikong aling-alingan. Nadiskobre nin sarong pagsiyasat na an saro sa pinakakomon na reaksion sa kapungawan iyo an pagdalan nin telebisyon. Pero, an mga parasiyasat nagkonklusyon na an halawig na pagdalan nin telebisyon saro sa pinakasalang mga bagay na magigibo niato kun kita napupungaw. Sinusuportaran kaiyan an kadaihan nin gibo, pagkaumoy, asin pangangarap, na nagigin bakong marahay na pansalida sa personal na relasyon sa ibang tawo.
Sa katunayan, an pagsolosolo puedeng magin kapakipakinabang kun gagamiton niato an satong panahon na nagsosolo sa nakapaooswag na paagi. Puede niatong gibohon ini paagi sa pagbasa, paggibo nin mga surat, paghaman nin mga bagay, asin pagpahingalo. An nakapaooswag na pagsolosolo kaiba an pamimibi sa Dios, pag-adal kan Biblia, asin paghorophorop dian. (Salmo 63:6) Ini mga paagi tanganing magin dayupot ki Jehova Dios, an saro na magigin satong pinakadakulang Katood.
Mga Halimbawa sa Biblia nin mga Pakikikatood
Dawa ngani marahay na makikatood sa dakol na tawo, pinagigirumdom kita kan Biblia na “igwa nin katood na labi pa kadayupot sa tugang.” (Talinhaga 18:24) Kita gabos nangangaipo nin pirang dayupot na katood na tunay na nagmamakolog sa sato, na an pakikikatood nagtatao sa sato nin kagayagayahan, kosog, asin katoninongan. Mantang an siring na tunay na mga pakikikatood tibaad bihira ngonyan, an nagkapirang suanoy na halimbawa espesyalmenteng isinaysay sa Biblia. Halimbawa, yaon dian an ekselenteng pagkamagkatood ni David asin ni Jonatan. Ano an manonodan niato dian? Taano ta nagdanay an saindang pagkamagkatood?
Enot, si David asin si Jonatan magkapareho an importanteng mga interes. Orog sa gabos, sinda parehong may hararom na debosyon ki Jehova Dios. Kan mamansayan an pagtubod ni David sa Dios asin an saiyang mga ginibo sa pagdepensa kan banwaan ni Jehova, “an mismong kalag ni Jonatan nagin dayupot sa kalag ni David, asin namotan sia ni Jonatan na siring sa saiyang sadiring kalag.” (1 Samuel 18:1) Kun siring, an pagkamoot sa Dios kan mag-ibong na lado nagtatabang na mabogkos an mga magkatood.
Si Jonatan asin si David makosog na mga indibiduwal na namuhay kaoyon sa diosnon na mga prinsipyo. Kun siring puede nindang igalang an lambang saro. (1 Samuel 19:1-7; 20:9-14; 24:6) Tunay nanggad na kita binendisyonan kun kita igwa nin diosnon na mga katood na ginigiyahan nin Makakasuratan na mga prinsipyo.
May iba pang bagay na nakakontribwir sa pagkamagkatood ni David asin Jonatan. An saindang relasyon sadiosan asin prangka, asin may tiwala sinda sa lambang saro. Maimbod na inenot ni Jonatan an ikararahay ni David kisa sa saiyang sadiri. Sia dai nag-imon huli ta si David pinanugaan kan paghade; imbes, si Jonatan sinuportaran sia sa emosyonal asin sa espirituwal na paagi. Asin inako ni David an saiyang tabang. (1 Samuel 23:16-18) Sa mga paaging angay sono sa Kasuratan, ihinayag ni David asin ni Jonatan an saindang mga saboot para sa lambang saro. An saindang diosnon na pagkamagkatood basado sa tunay na apresasyon asin kapadangatan. (1 Samuel 20:41; 2 Samuel 1:26) Iyan dai kayang patodon huli ta an duwang lalaking ini nagdanay na fiel sa Dios. An pag-aplikar nin siring na mga prinsipyo makatatabang sa sato na ikatogdok asin papagdanayon an tunay na mga pakikikatood.
Kun Paano Kukultibaron an mga Pakikikatood
Naghahanap daw kamo nin tunay na mga katood? Tibaad dai na nindo kaipuhan pang maghanap sa harayo. An nagkapira sa saindong kaibaiba nin regular puede nindong magin mga katood, asin tibaad sinda nangangaipo kan saindong pakikikatood. Nangorogna sa kapwa mga Kristiano, madonong na iaplikar an hatol ni apostol Pablo na “humiwas.” (2 Corinto 6:11-13) Minsan siring, dai mauyam kun an kada pagprobar nindong makiamigo dai magbunga nin hararom sa boot na bogkos. Nangangaipo sa parate nin panahon tanganing pataluboon an sarong pakikikatood, asin bakong gabos na relasyon parareho an rarom. (Eclesiastes 11:1, 2, 6) Siempre, tanganing kamtan an tunay na mga pakikikatood, kita kaipuhan na bakong paslo, asin dapat niatong sunodon an hatol ni Jesus: “Kun siring, an gabos na boot nindong gibohon sa saindo nin mga tawo, gibohon man nindo sa sainda.”—Mateo 7:12.
Sairisay an nangangaipo kan saindong pakikikatood? Apuera sa mga kaedad nindo, kumusta an mga mas hoben o mas gurang na mga tawo? An mga pagkamagkatood ni David asin ni Jonatan, ni Rut asin ni Noemi, saka ni Pablo asin ni Timoteo gabos kalabot an lagwat nin edad. (Rut 1:16, 17; 1 Corinto 4:17) Puede daw nindong paaboton an saindong pakikikatood sa mga balo asin sa iba na daing agom? Isipon man idtong mga bago sa saindong pagtaraed. Tibaad binayaan na ninda an pakikiasosyar kan kadaklan o gabos nindang katood huli sa pagbalyo nin istaran o pagbago kan saindang paagi nin pamumuhay. Dai halaton na tuyohon pa kamo nin iba. Kun kamo sarong Kristiano, gumibo nin nagdadanay na mga pakikikatood paagi sa pag-aplikar kan hatol ni Pablo: “Sa pagkamoot nin sa magturugang magkaigwa kamo nin mamomoton na kapadangatan sa lambang saro. Sa pagpaheling nin onra sa lambang saro mangenot kamo.”—Roma 12:10.
Puede niatong isipon an mga pakikikatood bilang sarong paagi nin pagtatao. Sinabi ni Jesus na kun kita magin matinao, an mga tawo magtatao sa sato. Itinokdo nia man na igwang orog na kaogmahan sa pagtao kisa sa pag-ako. (Lucas 6:38; Gibo 20:35) Nakanupar na daw kamo nin mga tawong laen-laen an pinaghalean? An internasyonal na mga kombension kan Mga Saksi ni Jehova nagpatotoo na an mga tawong may manlaenlaen na kultura puedeng magkaigwa nin tunay asin nagdadanay na mga pagkamagkatood kun sinda parareho nagsasamba sa Dios.
Pagpadanay na Bilog an mga Pagkamagkatood
Makamomondo, idtong mga konsideradong magkatood kun minsan nagkikinologan nin boot. An nakararaot na tsismis, pagpasaloib sa kompiansa, kadaihan nin apresasyon—kabale an mga ini sa mga bagay na makolog na marhay kun an mga iyan ginibo nin saro na minidbid nindo bilang tunay na katood. Ano an magigibo sa siring na mga situwasyon?
Magtao nin marahay na halimbawa. Gibohon an gabos tanganing malikayan na magcausa nin dai kaipuhan na kolog. Sa nagkapirang lugar popular sa mga magkatood na gibohon na kasurubahan an mga sala nin lambang saro. Alagad an daing kabootan na pagtratar o pandadaya dai makapadadayupot sa mga magkatood, maski pa an mga iyan ipinamumugtak na ‘surubahan.’—Talinhaga 26:18, 19.
Maghingoang padanayon an mga pagkamagkatood. An mga dai pagkasinarabotan kun minsan minalataw kun an mga magkatood labi an linalaoman sa lambang saro. An sarong katood na may helang o sibot-sibot huli sa sarong magabat na problema posibleng dai makapaheling nin init na siring sa dati. Kun siring, sa mga panahon na arog kaiyan, pagmaigotan na magin mapagsabot asin madinamayon.
Resolberan an mga problema tolos-tolos asin sa maboot na paagi. Gibohon iyan sa pribado kun posible. (Mateo 5:23, 24; 18:15) Seguradohon na aram kan saindong katood na mawot nindong papagdanayon an sarong marahay na relasyon. An sinserong mga magkatood nagpapatinarawadtawadan. (Colosas 3:13) Kamo daw magigin an klase nin katood na siring kaiyan—saro na labi pa kadayupot sa tugang?
An pagbasa asin pag-isip manongod sa mga pakikikatood kapinonan sana. Kun kita napupungaw, gumibo kita nin angay na aksion, asin dai mahahaloy mawawara an satong kapungawan. Kun kita maghihingoa, kita puedeng magkaigwa nin tunay na mga katood. Sa nagkapira sa sainda, kita magkakaigwa nin espesyal na kadayupotan. Alagad mayo nin makakasalihid sa Dios, an pinakadakulang Katood. Si Jehova sana an puedeng makamidbid, makasabot, asin dumamay sa sato nin biyo. (Salmo 139:1-4, 23, 24) Saro pa, an saiyang Tataramon nag-aalok nin sarong makangangalas na paglaom para sa ngapit—sarong bagong kinaban kun saen magigin posible na magkaigwa nin tunay na mga katood sagkod lamang.—2 Pedro 3:13.
[Mga retrato sa pahina 5]
Si David asin si Jonatan nagkamit nin tunay na pagkamagkatood, asin kita puede man