Pasko o Memorial—Arin an Maninigo Nindong Selebraron?

MANTANG naglalakop an liwanag nin maagahon sa Abril 7, minilyon an masabat sa saindang pinakamahal na aldaw kan taon​—an Pasko. Kaidto an ngaran ipinanongod sa sarong 120-aldaw na peryodo nin mga kapiestahan asin pag-ayuno na minapoon sa sarong kapiestahan na inaapod Septuagesima asin natatapos sa inaapod na Aldaw nin Trinidad. Ngonyan an ngaran ipinanonongod sa sarong aldaw sa paggirumdom kan pagkabuhay liwat ni Jesus​—an Domingo de Paskua.

Minsan siring, sa sarong mas amay na banggi sa semana man sanang iyan, may ibang minilyon na matiripon tanganing selebraron an Memorial kan pagkagadan ni Cristo, na midbid man bilang an Pamanggihan kan Kagurangnan. Iyan sarong selebrasyon na pinonan mismo ni Jesus sa saiyang huring banggi sa daga. Sinabihan nia kaidto an saiyang mga disipulo: “Padagos na gibohon nindo ini sa paggirumdom sa sako.”​—Lucas 22:19.

Arin an maninigo nindong selebraron?

An Pinaghalean kan Pasko

An ngaran na Pasko (sa Ingles, Easter), na ginagamit sa dakol na kadagaan, mayo sa Biblia. An librong Medieval Holidays and Festivals nagsasabi sa sato na “an kapiestahan isinunod an ngaran sa paganong Diosa kan Maagahon asin kan Tigsoli, si Eostre.” Asin siisay an diosang ini? “Si Eostre iyo an, oyon sa eroestorya, nagbukas kan pinto kan namumugtakan kan kalag nin mga eroeng nagadan sa ralaban tanganing palaogon si Baldur, na inaapod na Puting Dios, huli sa saiyang kadalisayan asin siring man an Dios na Saldang, huli ta an saiyang angog nagtatao nin liwanag sa katawohan,” an simbag kan The American Book of Days. Idinugang pa kaiyan: “Daing duwa-duwa na an Iglesia sa pagpopoon kaiyan inadaptar an suanoy na paganong mga kostumbre asin tinawan an mga iyan nin Kristianong kahulogan. Mantang an kapiestahan nin Eostre pagselebrar kan pagpanibago nin buhay sa tigsoli pasil na gibohon iyan na sarong pagselebrar kan pagkabuhay liwat hale sa mga gadan ni Jesus, na an ebanghelyo saindang ihinulit.”

An pag-adaptar na ini nagpapaliwanag kun paanong sa nagkapirang kadagaan an mga kostumbre sa Pasko, siring sa mga sogok nin Pasko, koneyo nin Pasko, asin mainit na may krus na mga tinapay, nagpoon. Manongod sa kostumbre na paggibo nin mainit na may krus na mga tinapay, “na may makintab na tostadong ibabaw na markado nin sarong . . . krus,” an librong Easter and Its Customs nagsasabi: “An krus sarong paganong simbolo haloy pa antes na iyan magkaigwa nin permanenteng kahulogan gikan sa mga pangyayari kan enot na Biernes Santo, asin an mga tinapay asin keik kun minsan minamarkahan kaiyan kaidtong bago-Kristianong mga panahon.”

Nungkang nasambitan sa Kasuratan an mga bagay na ini, ni igwa man nin ano man na ebidensia na an enot na mga disipulo ni Jesus nagtubod sa mga iyan. Sa katunayan, sinasabihan kita ni apostol Pedro na “magkaigwa . . . nin pagmawot sa daing kasalak na gatas kan tataramon, tanganing paagi kaiyan magtalubo [kita] sa kaligtasan.” (1 Pedro 2:2) Kaya taano ta inadaptar kan mga iglesia nin Kakristianohan an siring na risang paganong mga simbolo sa saindang mga pagtubod asin gibo?

An librong Curiosities of Popular Customs nagsisimbag: “Daing pagliwatliwat na palakaw kan enot na Iglesia na tumao nin Kristianong kahulogan sa nag-eeksister na paganong mga seremonya na dai kayang haleon. Sa kaso kan Pasko an pagliwat nangorognang pasil. An kagayagayahan sa pagsirang kan pisikal na saldang, asin sa pagmata kan naturalesa sa pagkagadan kan tiglipot, nagin kagayagayahan sa pagsirang kan Saldang nin katanosan, sa pagkabuhay liwat ni Cristo hale sa lolobngan. An ibang paganong selebrasyon na ginibo sa enot na aldaw nin Mayo binago man tanganing magin katimbang kan selebrasyon kan Pasko.” Imbes na likayan an popular na paganong mga kostumbre asin mga rituwal sa mahika, an mga iyan kinonsinte asin tinawan nin “Kristianong kahulogan” kan relihiosong mga namomoon.

‘Alagad igwa daw nin peligro dian?’ tibaad ihapot nindo. An nagkapira naghohonang mayo. “Kun an sarong relihion na siring sa Kristianismo iinintrodusir hale sa ibang kultura, inaadaptar kaiyan asin ‘binabautismohan’ an pirang tradisyonal na kostumbre na hale sa mas enot na mga relihion,” an sabi ni Alan W. Watts, na sarong kapelyan na Episcopal, sa saiyang librong Easter​—Its Story and Meaning. “Pinipili asin iiniintrodusir kaiyan sa liturhiya an tradisyonal na mga selebrasyon na garo nagtataong kahulogan sa iyo man sanang daing sagkod na mga prinsipyo na itinotokdo kan Iglesia.” Para sa dakol, an bagay na itinogot kan saindang iglesia an mga selebrasyon na ini asin minidbid an mga iyan na banal igo nang dahelan na akoon an mga iyan. Alagad may mahalagang mga hapot na nalilihisan. Ano daw an saboot nin Dios manongod sa mga kostumbreng ini? Nagtao daw sia sa sato nin mga susundan sa bagay na ini?

Pag-aram sa Punto-de-Vista nin Dios

“An Aldaw nin Pasko, an Kapiestahan kan Pagkabuhay Liwat kan Satong Kagurangnan, iyo an pinakadakula sa gabos na kapiestahan kan Kristianong Iglesia,” an sabi ni Christina Hole sa saiyang librong Easter and Its Customs. An ibang parasurat minaoyon. “Mayo nin banal na aldaw o kapiestahan sa Kristianong taon na makaaagid sa Domingo de Paskua sa kahalagahan,” an sabi ni Robert J. Myers sa librong Celebrations. Minsan siring, iyan nagpapalataw nin mga hapot. Kun an pagselebrar nin Pasko mahalagang marhay, taano ta mayo nin espesipikong pagboot sa Biblia na gibohon iyan? May rekord daw na an enot na mga disipulo ni Jesus nagseselebrar nin Domingo de Paskua?

Bako na an Biblia dai nakatao nin mga susundan sa kun ano an maninigo o dai maninigong selebraron. An Dios espesipikong gayo sa bagay na ini sa suanoy na nasyon nin Israel, asin siring sa sinabi sa enotan, itinao an malinaw na mga instruksion sa mga Kristiano na ipadagos an pagselebrar kan Memorial kan pagkagadan ni Cristo. (1 Corinto 11:​23-26; Colosas 2:​16, 17) An enot na edisyon kan The Encyclopædia Britannica nagsasabi sa sato: “Mayo nin nagpaparisa kan pagselebrar kan kapiestahan nin Pasko sa Bagong Tipan, o sa mga isinurat kan apostolikong mga Ama. An pagigin sagrado nin espesyal na mga aldaw sarong ideya na mayo sa isip kan enot na mga Kristiano. . . . Ni an Kagurangnan o an saiyang mga apostol man nagboot na otobon ini o an arin man na iba pang kapiestahan.”

Nagsasaboot an nagkapira na an kagayagayahan kan siring na mga kapiestahan asin an kaogmahan na itinatao kan mga iyan igo nang sarahotan na an mga iyan selebraron. Minsan siring, kita may manonodan sa okasyon kan an mga Israelita inadaptar an sarong relihiosong kaugalean kan mga Egipcio asin tinawan iyan nin bagong ngaran na “sarong kapiestahan ki Jehova.” Sinda man “nagturukaw sa pagkakan asin pag-inom” asin “nagburuhat sa pag-oroogma.” Alagad an saindang mga aksion nakapaanggot na gayo ki Jehova Dios, asin pinadusahan nia sinda nin grabe.​—Exodo 32:​1-10, 25-28, 35.

Malinaw na marhay an Tataramon nin Dios. Dai puedeng pag-ibanon an “liwanag” kan tunay na mga pagtubod asin an “diklom” kan kinaban ni Satanas; dai puedeng magkaigwa nin “pagkakaoyon” sa pag-oltanan ni Cristo asin nin paganong pagsamba. Kita sinasabihan: “‘Kun siring humale kamo sa tanga ninda, asin sumiblag kamo,’ an sabi ni Jehova, ‘asin dai na kamo dumotdot sa maating bagay’; ‘asin aakoon ko kamo.’”​—2 Corinto 6:​14-18.

Mantang an selebrasyon nin Memorial sana​—bakong an Pasko—​an ipinagboot sa Biblia para sa mga Kristiano, iyan maninigong selebraron.