Selebraron an Memorial sa Angay na Paagi

BANGGI kaidto kan Nisan 14, 33 C.E., kan ponan ni Jesus an Memorial.a Katatapos pa sana niang selebraron an Paskua kaiba an saiyang 12 apostol, kaya kita makaseseguro sa petsa. Pakatapos na pahaleon an parapasaloib, si Judas, si Jesus “nagkua nin tinapay, namibi, binaraak iyan asin itinao iyan sa sainda, asin nagsabi: ‘Kua kamo, ini nangangahulogan kan sakong hawak.’ Asin sa pagkua nin sarong kopa, sia nagpasalamat asin itinao iyan sa sainda, asin sinda gabos nag-irinom dian. Asin sia nagsabi sa sainda: ‘Ini nangangahulogan kan sakong “dugo kan tipan,” na paboboloson para sa dakol.’”​—Marcos 14:​22-24.

Pinagbotan ni Jesus an saiyang mga disipulo na girumdomon an saiyang pagkagadan huli sa kahalagahan kaiyan. (Lucas 22:19; 1 Corinto 11:​23-26) An saiyang atang sana an puedeng bumalukat sa katawohan sa sumpa kan minanang kasalan asin kagadanan. (Roma 5:​12; 6:23) An tinapay asin an arak na ginamit nia mga simbolo kan saiyang sangkap na hawak asin kan saiyang dugo. Mantang aram an orihinal na petsa, puede niatong selebraron an okasyon sa katimbang na aldaw kada taon, siring sa ginigibo kaidto sa Judiong Paskua. Alagad kaipuhan niatong gibohon iyan sa angay na paagi. Taano?

Si apostol Pablo nagsabi na idtong mga nakikakabtang sa mga emblema na tinapay asin arak “ibinabalangibog . . . an pagkagadan kan Kagurangnan, sagkod na sia dumatong.” (1 Corinto 11:26) Sa siring an selebrasyon nakasentro sa pagkagadan ni Jesus asin sa kahulogan kaiyan para sa katawohan. An okasyon magigin seryoso, sarong panahon para sa paghorophorop sa karahayan nin Dios asin sa pag-apresyar na maninigong yaon sa sato para ki Jehova asin sa saiyang Aki. (Roma 5:8; Tito 2:14; 1 Juan 4:​9, 10) Kun siring, si Pablo nagpatanid: “Bilang resulta an siisay man na kumakan kan tinapay o uminom kan kopa kan Kagurangnan na bakong angay magkakasala mapadapit sa hawak asin sa dugo kan Kagurangnan.”​—1 Corinto 11:27.

Sa Angay na Paagi​—Paano?

Malinaw nanggad, an Dios dai maoogma kun lapastanganon niato an okasyon paagi sa kustionableng mga paggawe o paagi sa pag-adaptar nin paganong mga kostumbre. (Santiago 1:27; 4:​3, 4) Kaya dai puede an popular na mga aktibidad sa panahon nin Pasko. Sa pagsunod kan instruksion ni Jesus na “padagos nindong gibohon ini sa paggirumdom sa [saiya],” mamawoton niato na selebraron an Memorial siring sa pagkapoon nia kaiyan. (Lucas 22:19; 1 Corinto 11:​24, 25) Dai puede digdi an mga idinagdag kan mga iglesia nin Kakristianohan sa selebrasyon. An The New Catholic Encyclopedia nag-admitir na “an Misa ngonyan laen na marhay sa simpleng gayo na seremonyang sinunod ni Cristo asin kan Saiyang mga Apostol.” Asin paagi sa pagselebrar kan Misa nin parate, aroaldaw pa ngani, suminuhay an Kakristianohan sa katuyohan ni Jesus asin ginibo iyan na ordinaryo na sanang okasyon.

Sinuratan ni Pablo an mga Kristianong taga-Corinto manongod sa pakikakabtang na bakong angay huli ta may problemang luminataw sa kongregasyon may koneksion sa Pamanggihan kan Kagurangnan. Dai iginalang kan nagkapira an pagigin sagrado kaiyan. Dinara ninda an saindang pamanggihan asin kinarakan iyan antes o durante kan pagtiripon. Sa parate sinda nagkarakan asin nag-irinom nin labi-labi. Ini nakapatungka sa sainda asin nakapaluya sa saindang mga sentido. Huli ta bakong alisto sa mental asin espirituwal, “dai [ninda] namamansayan an hawak,” asin sa siring sinda ‘nagkasala mapadapit sa hawak asin sa dugo kan Kagurangnan.’ Mientras tanto, idtong mga mayong pamanggihan nagkagurutom asin nadisturbo man. Haros mayo sa sainda na nasa kamugtakan na makikabtang sa mga emblema na may pag-apresyar asin biyong pakarealisar kan kaseryosohan kan okasyon​—na an selebrasyon sarong paggirumdom sa pagkagadan kan Kagurangnan. Ini nagbunga nin paghokom tumang sa sainda, huli ta sinda daing galang, nagduduhagi pa ngani, dian.​—1 Corinto 11:​27-34.

Kaipuhan an Pakamansay

An nagkapira nakikabtang sa mga emblema kan Memorial minsan ngani, sa huri, narealisar ninda na sinda dai kutana maninigong guminibo kaiyan. Idtong mga tama sanang nakikakabtang sa mga emblema kan Memorial pinili nin Dios asin igwa kan patotoo kan espiritu nin Dios sa bagay na iyan. (Roma 8:​15-17; 2 Corinto 1:​21, 22) Bakong personal na desisyon o pagdeterminar ninda an nagpapangyari sa sainda na magin angay. Linimitaran nin Dios sa 144,000 an bilang kaidtong mga mamamahala kaiba ni Cristo sa kalangitan, na sadit na bilang kun ikokomparar sa gabos na nakikinabang sa pantubos ni Cristo. (Kapahayagan 14:​1, 3) An pagpili nagpoon kan aldaw ni Jesus, kaya bilang resulta ngonyan igwa na sana nin kadikit na nakikakabtang. Asin mantang an nagkapira sa sainda nagagadan, an bilang na iyan tama sanang mag-ina.

Taano an saro ta tibaad salang makikabtang sa mga emblema? Tibaad iyan huli sa dating relihiosong mga punto-de-vista​—na an gabos na fiel maduman sa langit. O tibaad iyan huli sa ambisyon o kapasloan​—an saboot na an saro mas angay kisa sa iba—​asin sa pagmawot nin kabantogan. Posibleng resulta iyan nin makosog na mga emosyon na bunga nin grabeng mga problema o sarong trahedya na nagpangyari sa saro na mawaran nin interes sa buhay digdi sa daga. Tibaad iyan huli man sa dayupot na pakikikatood sa sarong may langitnon na pag-apod. Kaipuhan niato gabos na girumdomon na an desisyon solamenteng sa Dios, bakong sato. (Roma 9:16) Kaya kun an sarong tawo, “pakalihis nin pagsiyasat,” nanompongan na sia dai man talaga maninigong makikabtang sa mga emblema, maninigo na pumondo na sia ngonyan.​—1 Corinto 11:28.

An paglaom na iinaalok nin Dios sa kadaklan kan katawohan buhay na daing sagkod sa sarong paraisong daga. Iyan sarong dakulang bendisyon na maaantisipar sa ngapit, asin saro na pasil niatong magustohan. (Genesis 1:28; Salmo 37:​9, 11) Digdi sa daga na an mga fiel makakaibahan liwat an saindang binuhay liwat na mga namomotan sa buhay asin makakanuparan an mga matanos kan suanoy, siring baga ki Abraham, Sara, Moises, Rahab, David, asin Juan Bautista​—na gabos nagkagaradan antes bukasan ni Jesus an dalan sa langitnon na buhay.​—Mateo 11:11; ikomparar an 1 Corinto 15:​20-23.

Idtong mga may daganon na paglaom sineselebrar an Pamanggihan kan Kagurangnan nin angay paagi sa saindang pag-atender asin magalang na atension, dawa dai sinda nakikakabtang sa tinapay asin sa arak. Sinda man nakikinabang paagi sa atang ni Cristo, na nagpapangyari sa sainda na magkaigwa nin paborableng kamugtakan sa atubangan nin Dios. (Kapahayagan 7:​14, 15) Mantang sinda naghihinanyog sa pahayag, an saindang apresasyon para sa sagradong mga bagay napakokosog, asin an saindang pagmawot na magdanay na kasaro kan banwaan nin Dios dawa saen nagtatalubo.

Ngonyan na taon, pagsolnop kan saldang sa Martes, Abril 2, an Memorial seselebraron sa gabos na labing 78,000 na kongregasyon kan Mga Saksi ni Jehova sa bilog na daga. Maatender daw kamo?

[Nota sa Ibaba]

[Retrato sa pahina 8]

An Mga Saksi ni Jehova sineselebrar an Memorial sarong beses kada taon