Mga Hapot Hale sa mga Parabasa

Ano an boot sabihon ni apostol Pablo kan sia magsabi na “linilingawan ko an mga bagay na nasa hudian asin pinipirit kong aboton an mga bagay na nasa enotan”? (Filipos 3:13) Puede daw na tuyong lingawan nin saro an sarong bagay?

Dai, sa kadaklan dai niato puedeng tuyong haleon sa satong isip an sarong memorya. An totoo, dakol kitang nalilingawan na gusto niatong girumdomon asin nagigirumdoman niato an dakol na mas gusto niatong malingawan. Kun siring, ano an boot sabihon ni Pablo kan isurat nia an mga tataramon sa Filipos 3:13? An konteksto nakatatabang sa sato sa pagsabot.

Sa Filipos kapitulo 3, ilinaladawan ni Pablo an saiyang “dahelan na manarig sa laman.” Sia nagtataram manongod sa saiyang ekselenteng Judiong pinaghalean asin sa kaigotan nia para sa Ley​—mga bagay na nakatao kutana sa saiya nin dakol na bentaha sa nasyon nin Israel. (Filipos 3:​4-6; Gibo 22:​3-5) Pero, tinalikdan nia an mga bentahang iyan, na ibinilang an mga iyan na garo kapierdihan. Taano? Huli ta may nanompongan siang bagay na mas marahay​—an “daing kaagid na halaga kan kaaraman manongod ki Cristo Jesus.”​—Filipos 3:​7, 8.

An pangenot na pasohan ni Pablo kamtan, bakong an sarong posisyon sa kinaban na ini, kundi “an mas amay na pagkabuhay liwat hale sa mga gadan.” (Filipos 3:​11, 12) Sa siring, sia nagsurat: “Linilingawan ko an mga bagay na nasa hudian asin pinipirit kong aboton an mga bagay na nasa enotan, pinupunta ko an pasohan para sa premyo na pag-apod sa itaas nin Dios paagi ki Cristo Jesus.” (Filipos 3:​13, 14) Kan sabihon ni Pablo na ‘linilingawan nia an mga bagay na nasa hudian,’ dai nia boot sabihon na napara nia sa saiyang isip “an mga bagay na nasa hudian.” Malinaw na an mga iyan nagigirumdoman pa nia, ta kalilista pa sana nia kan mga iyan. Apuera kaiyan, sa orihinal na Griego, ginagamit nia an sarong porma kan berbo na nagpaparisa nin sarong aksion na nagpapadagos, bakong tapos na. Sia nagsasabing “linilingawan,” bakong “nalingawan.”

An termino sa Griego na tinatradusir na “lingawan” (e·pi·lan·thaʹno·mai) may laen-laen na kahulogan, na an saro “dai na pag-intindihon,” o “pabayaan.” Sono sa Exegetical Dictionary of the New Testament (na an editor si Horst Balz asin Gerhard Schneider), ini an kahulogan kan “linilingawan” sa Filipos 3:13. Dai perming inisip-isip ni Pablo an mga bagay na tinalikdan nia. Nakanood siang ibilang an mga iyan na daing gayo dapat na intindihon. Sinda siring sa “tapok” kun ikokomparar sa langitnon na paglaom.​—Filipos 3:8.

Paano makaaaplikar ngonyan an mga tataramon ni Pablo? Bueno, tibaad an sarong Kristiano, kapareho ni Pablo, may ginibong mga pagsasakripisyo tanganing makapaglingkod sa Dios. Tibaad tinalikdan nia an sarong maganansiang karera para sa pambilog na panahon na paglilingkod. O tibaad sia miembro nin sarong mayaman na pamilya na dai na sia tinatawan nin kuarta huli ta habo ninda sa katotoohan. Marahay an siring na mga sakripisyo, alagad an mga iyan dai maninigong perming isip-isipon. An Kristiano “linilingawan,” dai na iniintindi, “an mga bagay na nasa hudian” huli sa mamuraway na ngapit na naghahalat sa saiya.​—Lucas 9:62.

Tibaad puede man na iaplikar sa ibang paagi an prinsipyo sa likod kan mga tataramon ni Pablo. Ano man an sarong Kristiano na sala an gibo bago nakanood manongod sa Dios? (Colosas 3:​5-7) O ipamugtak ta na kan magin Kristiano na, sia nakakomitir nin magabat na kasalan asin dinisiplina kan kongregasyon. (2 Corinto 7:​8-13; Santiago 5:​15-20) Bueno, kun sia talagang nagsolsol asin nagbakle sa saiyang mga dalan, sia “nahugasan na.” (1 Corinto 6:​9-11) An nangyari nakaagi na. Tibaad dai nia noarin man literal na malingawan an saiyang ginibo​—an totoo, madonong kun sia makanood nin leksion sa eksperyensia tanganing dai otrohon an kasalan. Pero, “linilingawan” nia iyan sa sentido na dai nia perming inaanggotan an saiyang sadiri. (Ikomparar an Isaias 65:17.) Mantang pinatawad na basado sa atang ni Jesus, hinihingoa niang dai na pag-intindihon an nakaagi.

Sa Filipos 3:​13, 14, ilinaladawan ni Pablo an saiyang sadiri na paradalagan sa paorumbasan, na “pinipirit” na maabot an pasohan. An paradalagan nagheheling sa enotan, bakong sa likod. Kaagid kaiyan, an Kristiano maninigong humeling sa mga bendisyon na nasa enotan, bakong sa mga bagay na nawalat sa hudian. Sinasabi man ni Pablo: “Kun sa ano man kamo may ibang kaisipan, ipahahayag nin Dios an kaisipan na iyan sa saindo.” (Filipos 3:15) Huli kaini, mamibi sa Dios na tabangan kamong makultibar an punto-de-vistang ini. Panoon an saindong isip kan mga kaisipan nin Dios na yaon sa Biblia. (Filipos 4:​6-9) Horophoropon an pagkamoot ni Jehova para sa saindo asin an mga bendisyon na nakakamtan nindo huli kaiyan. (1 Juan 4:​9, 10, 17-19) Dangan, paagi sa banal na espiritu tatabangan kamo ni Jehova na dai pag-intindihon an mga iwinalat nindo sa hudian. Imbes, arog ni Pablo, hehelingon nindo an mamuraway na ngapit sa enotan.​—Filipos 3:17.