Mga Hapot Hale sa mga Parabasa
Kun beses nadadangog niato an mga tugang na nagtataram o ipinamimibi na an Kahadean nin Dios dumatong logod digdi sa daga. Ini daw tamang ekspresyon?
Sa estriktong pagtaram, iyan bakong sono sa Kasuratan na paagi nin pagpahayag. An Kahadean nin Dios langitnon. Sa siring, si apostol Pablo nakasurat: “An Kagurangnan ililikay ako sa gabos na maraot na gibo asin ililigtas ako para sa saiyang langitnon na kahadean. Mapasaiya logod an kamurawayan sagkod lamang. Amen.”—2 Timoteo 4:18; Mateo 13:44; 1 Corinto 15:50.
An Kahadean tinindog sa langit kan 1914, asin iyan dai noarin man ibabalyo sa ibinalik na daganon na Paraiso o sa iba pang lugar. Si Jesu-Cristo an Hade sa Kahadean. Bilang Hade, si Jesus may autoridad sa mga anghel. Huli kaini, an saiyang tamang lugar nin pamamahala nasa too nin Dios sa kalangitan. An linahidan na mga Kristiano kaiba nia bilang mga hade asin saserdote sa langit.—Efeso 1:19-21; Kapahayagan 5:9, 10; 20:6.
Kun siring, nangangahulogan daw ini na maninigong dai na niato ipahayag sa Dios an mga kahagadan na yaon sa sarong kabtang kan Pamibi kan Kagurangnan na nagsasabi: “Dumatong logod an kahadean mo. Gibohon logod an boot mo, kun paano sa langit, siring man sa daga”? (Mateo 6:10) Sa kabaliktaran, an pamibing iyan tama asin makahulogan pa sagkod ngonyan.
An Kahadean nin Dios mahiro pa sa dai mapagdududahan na paagi para sa dagang ini, asin ini an nasa isip niato kun kita namimibi asin naggagamit nin mga ekspresyon na kaagid kan mga tataramon sa Pamibi kan Kagurangnan. Halimbawa, ihinuhula kan Daniel 2:44 na an Kahadean ‘madatong’ sa paglaglag sa gabos na nasyon asin mamamahala digdi sa daga. An Kapahayagan 21:2 nagtataram dapit sa Bagong Jerusalem na naghihilig hale sa langit. An Bagong Jerusalem binibilog kan 144,000 na linahidan na Kristiano na iyo an magigin nobya ni Cristo. Sinda kairiba man na paramana ni Jesus sa Kahadean. Kaya an Kapahayagan 21:2 naglaladawan sa saindang pagtao nin atension sa daga, na an resulta dakulang mga bendisyon sa fiel na katawohan.—Kapahayagan 21:3, 4.
Sagkod na maotob ini asin an iba pang makangangalas na mga hula, magpapadagos na tama na mamibi ki Jehova Dios kaoyon sa mga tataramon ni Jesus, “Dumatong logod an kahadean mo.” Alagad maninigo niatong girumdomon na an Kahadean dai madatong digdi sa planetang Daga sa literal na sentido. An gobyerno kan Kahadean namumugtak sa langit, bakong digdi sa daga.
[Pasasalamat para sa pinagkuanan kan retrato sa pahina 31]
Daga: Basado sa retrato kan NASA