An Pamilya ni Jehova May Pagkasararong Mahal na Marhay
“Uya! Kanigoan karahay asin kanigoan kaogma na an magturugang mag-ontok na sararo!”—SALMO 133:1.
1. Ano an kamugtakan kan dakol na pamilya ngonyan?
AN PAMILYA nasa krisis ngonyan. Sa dakol na pamilya, an mga bogkos nin mag-agom madali nang mapatod. An diborsio orog na nauuso, asin an dakol na aki nin mga mag-agom na nagdiborsio nakamamate nin makuring kamondoan. Minilyon na pamilya an bakong maogma asin bakong sararo. Pero, igwa nin sarong pamilya na may tunay na kagayagayahan asin pagkasararo. Iyan an unibersal na pamilya ni Jehova Dios. Dian, an mga manampulong ribong anghel na dai naheheling inootob an mga trabahong itinao sa sainda kaoyon kan kabotan nin Dios. (Salmo 103:20, 21) Alagad igwa daw nin pamilya sa daga na igwa kan siring na pagkasararo?
2, 3. (a) Sairisay ngonyan an kabtang kan unibersal na pamilya nin Dios, asin sa ano niato ikababaing an gabos na Saksi ni Jehova ngonyan? (b) Anong mga hapot an pag-oolayan niato?
2 Si apostol Pablo nagsurat: “Ilinuluhod ko an sakong mga tuhod sa Ama, na pinagkakautangan nin ngaran kan lambang pamilya sa langit asin sa daga.” (Efeso 3:14, 15) An lambang linahe sa ibabaw nin daga utang an ngaran kaiyan sa Dios huli ta sia an Kaglalang. Minsan ngani mayo nin mga pamilya nin tawo sa langit, sa piguratibong pagtaram an Dios kasal sa saiyang langitnon na organisasyon, asin si Jesus magkakaigwa nin espirituwal na nobya na kasaro nia sa kalangitan. (Isaias 54:5; Lucas 20:34, 35; 1 Corinto 15:50; 2 Corinto 11:2) An fiel na mga linahidan digdi sa daga kabtang na ngonyan kan unibersal na pamilya nin Dios, asin an “ibang karnero” ni Jesus, na may daganon na paglaom, iyo an may paglaom na magin mga miembro kaiyan. (Juan 10:16; Roma 8:14-17; An Torrengbantayan, Enero 15, 1996, pahina 31) Minsan siring, an gabos na Saksi ni Jehova ngonyan ikababaing sa sararong pamilya na lakop sa kinaban.
3 Kabtang daw kamo kan makangangalas na internasyonal na pamilya kan mga lingkod nin Dios? Kun iyo, nakakamtan nindo an saro sa pinakadakulang bendisyon na puedeng kamtan nin saro. Minilyon an magpapatunay na an lakop sa globong pamilya ni Jehova—an saiyang naheheling na organisasyon—sarong matubig na lugar nin katoninongan asin pagkasararo sa sarong kinabanon na desierto nin iriwal asin dai pagkasararo. Paano ikalaladawan an pagkasararo kan lakop sa kinaban na pamilya ni Jehova? Asin anong mga bagay an nakapaooswag sa siring na pagkasararo?
Kanigoan Karahay Asin Kanigoan Kaogma!
4. Sa sadiri nindong pananaram, paano nindo ipahahayag an sinasabi kan Salmo 133 manongod sa pagkasararong sa magturugang?
4 Inapresyar na gayo kan salmistang si David an pagkasararong sa magturugang. Pinasabngan pa ngani sia na umawit manongod dian! Imahinara sia na kapot an saiyang arpa mantang sia nag-aawit: “Uya! Kanigoan karahay asin kanigoan kaogma na an magturugang mag-ontok na sararo! Iyan siring sa marahay na lana sa ibabaw nin payo, na minadalihig sa barabas, sa barabas ni Aaron, na minadalihig sa kuelyo kan saiyang mga gubing. Iyan siring sa ambon nin Hermon na minaibaba sa mga bolod nin Sion. Huli ta dian ipinagboot ni Jehova na mamugtak an bendisyon, pati an buhay sagkod sa panahon na daing katapusan.”—Salmo 133:1-3.
5. Basado sa Salmo 133:1, 2, ano an pagkakakomparar kan mga Israelita asin kan mga lingkod nin Dios sa presenteng aldaw?
5 An mga tataramon na idto aplikado sa pagkasararong sa magturugang kan suanoy na banwaan nin Dios, an mga Israelita. Kun yaon sa Jerusalem para sa saindang tolong taonan na kapiestahan, sinda tunay na nag-oontok na sararo. Minsan sinda hale sa laen-laen na tribo, sinda sarong pamilya. An pag-iribaiba may marahay na epekto sa sainda, na garo nakarerepreskong panlahid na lana na mahamot. Kan ibubo an siring na lana sa payo ni Aaron, iyan buminolos sa saiyang barabas asin duminalihig sa kuelyo kan saiyang gubing. Para sa mga Israelita, an pag-iribaiba may marahay na impluwensia na nakalalakop sa bilog na tiripon na banwaan bilang kabilogan. Rineresolberan an mga dai pagkasarabotan, asin pinaooswag an pagkasararo. Yaon man an kaagid na pagkasararo sa panglobong pamilya ni Jehova ngonyan. An dayaday na pakikiasosyar may nakararahay na espirituwal na epekto sa mga miembro kaiyan. Nahahale an ano man na dai pagkasarabotan o kasakitan mantang iinaaplikar an hatol kan Tataramon nin Dios. (Mateo 5:23, 24; 18:15-17) Inaapresyar na gayo kan banwaan ni Jehova an pagparinigonan nin boot na ibinubunga kan saindang pagkasararong sa magturugang.
6, 7. Paano kaagid kan ambon sa Bukid nin Hermon an pagkasararo nin Israel, asin saen manonompongan ngonyan an bendisyon nin Dios?
6 Paano na an pag-ontok nin sararo kan Israel arog man kan ambon kan Bukid nin Hermon? Bueno, mantang an alitoktok kan bukid na ini labing 2,800 metros na mas halangkaw sa kapatagan kan dagat, iyan may niebe sa alitoktok haros bilog na taon. An niebe sa alitoktok nin Hermon nagpapangyari sa pagin tubig kan mga alisngaw kun banggi asin sa siring ginigikanan kan abundang ambon na nakabubuhay sa mga pananom sa panahon kan halawig na dai pag-oran. An malipot na huyop nin doros hale sa kabukidan nin Hermon nadadara an mga alisngaw na iyan patimog sagkod sa lugar kan Jerusalem, na duman iyan nagigin ambon. Kaya tama an pagkasabi kan salmista manongod sa ‘ambon nin Hermon na minaibaba sa Bukid nin Sion.’ Kanigoan karahay na pagirumdom sa nakarerepreskong impluwensia na nakapaooswag sa pagkasararo kan pamilya ni Jehova nin mga parasamba!
7 Bago naestablisar an Kristianong kongregasyon, an Sion, o Jerusalem, iyo an sentro nin tunay na pagsamba. Huli kaini, duman ipinagboot nin Dios na mamugtak an bendisyon. Mantang an Gikanan nin gabos na bendisyon nag-eerok sa representadong paagi sa santuaryo sa Jerusalem, magikan duman an mga bendisyon. Minsan siring, huli ta an tunay na pagsamba bakong sa saro na sanang lugar, an bendisyon, pagkamoot, asin pagkasararo kan mga lingkod nin Dios manonompongan ngonyan sa bilog na daga. (Juan 13:34, 35) Ano an nagkapirang bagay na nakapaooswag sa pagkasararong ini?
Mga Bagay na Nakapaooswag sa Pagkasararo
8. Ano an nanonodan niato manongod sa pagkasararo sa Juan 17:20, 21?
8 An pagkasararo kan mga nagsasamba ki Jehova basado sa pagkuyog sa nasasabotan nin tama na Tataramon nin Dios, kabale na an mga katokdoan ni Jesu-Cristo. Paagi sa pagsugo ni Jehova sa saiyang Aki sa kinaban tanganing magpatotoo sa katotoohan asin magadan bilang atang, nabuksan an dalan para sa pagkaorganisar kan sararong Kristianong kongregasyon. (Juan 3:16; 18:37) Na magkakaigwa nin tunay na pagkasararo sa tahaw kan mga miembro kaiyan liniwanag kan si Jesus mamibi: “Ako nakikimaherak, bako sanang para sa sainda, kundi kaidto man na nagtutubod sa sako paagi sa saindang tataramon; tanganing sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niato, tanganing an kinaban magtubod na ako isinugo mo.” (Juan 17:20, 21) An mga parasunod ni Jesus tunay na nagkaigwa nin pagkasararo na kaagid kan sa pag-oltanan nin Dios asin kan saiyang Aki. Ini nangyari huli ta kinuyog ninda an Tataramon nin Dios asin an mga katokdoan ni Jesus. An kaparehong kaisipan mayor na bagay sa pagkasararo kan lakop sa kinaban na pamilya ni Jehova ngonyan.
9. Ano an kabtang kan banal na espiritu sa pagkasararo kan banwaan ni Jehova?
9 An saro pang bagay na nakapasasararo sa banwaan ni Jehova iyo na yaon sa sato an banal na espiritu, o puersa aktiba, nin Dios. Pinapangyayari kita kaiyan na masabotan an ihinayag na katotoohan kan Tataramon ni Jehova asin sa siring paglingkodan sia nin sararo. (Juan 16:12, 13) An espiritu tinatabangan kita na likayan an nakahahale sa pagkasararo na makalaman na mga gibo na arog kan iriwal, pangimon, mga pagputok nin kaanggotan, asin mga pasuruhay. Imbes, an espiritu nin Dios nagpapaluwas sa sato kan nakapasasarong bunga na pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri.—Galacia 5:19-23.
10. (a) Anong pagbabaing an magigibo sa pag-oltanan kan pagkamoot na yaon sa sararong pamilya nin tawo asin sa pagkamoot na risa sa tahaw kan mga debotado ki Jehova? (b) Paano ipinahayag kan sarong miembro kan Namamahalang Grupo an saiyang mga saboot manongod sa pakikitipon sa saiyang espirituwal na mga tugang?
10 An mga miembro nin sararong pamilya nagkakaminorootmootan asin naoogmang mag-iribaiba. Kaagid kaiyan, an mga kaiba sa sararong pamilya kan mga nagsasamba ki Jehova namomoot sa saiya, sa saiyang Aki, asin sa mga kapagtubod. (Marcos 12:30; Juan 21:15-17; 1 Juan 4:21) Kun paanong an mamomoton na pisikal na pamilya naoogmang magkakan nin iriba, an mga debotado sa Dios nawiwiling magin presente sa Kristianong mga pagtiripon, asamblea, asin kombension tanganing makinabang sa marahay na pag-oroiriba asin ekselenteng espirituwal na pagkakan. (Mateo 24:45-47; Hebreo 10:24, 25) An sarong miembro kan Namamahalang Grupo kan Mga Saksi ni Jehova sarong beses arog kaini an pagkasabi: “Para sa sako, an pakikitipon sa mga tugang saro sa pinakadakulang kaalingan sa buhay asin burabod nin pagparigon sa boot. Gustong-gusto ko na makaabot sa Kingdom Hall kaiba kan mga naeenot, asin humale kaiba kan mga nahuhuri, kun mapupuede. Nakamamate ako nin panlaog na kagayagayahan kun nakikipag-olay sa banwaan nin Dios. Kun ako nasa kaibanan ninda pamugtak an boot ko kaiba kan sakong pamilya.” Arog daw kaiyan an pagmate nindo?—Salmo 27:4.
11. Sa anong gibohon nangorognang nakanonompong nin kaogmahan an Mga Saksi ni Jehova, asin ano an ibinubunga kan paggibo sa paglilingkod sa Dios na pinakasentro kan satong buhay?
11 An sararong pamilya nakanonompong nin kaogmahan sa iribang pagtrabaho. Kaagid kaiyan, an mga nasa pamilya kan mga nagsasamba ki Jehova nakanonompong nin kagayagayahan sa sararong paggibo kan saindang paghuhulit kan Kahadean asin paggibo nin mga disipulo. (Mateo 24:14; 28:19, 20) An dayaday na pagpartisipar dian mas irinarani kita sa iba pang Saksi ni Jehova. An paggibo sa paglilingkod sa Dios na magin pinakasentro kan satong buhay asin an pagsuportar sa gabos na aktibidad kan saiyang banwaan nakapaooswag man sa pampamilyang espiritu sa tahaw niato.
Mahalagang Marhay an Teokratikong Areglo
12. Ano an mga karakteristiko nin maogma asin sararong pamilya, asin anong areglo an nakapaoswag sa pagkasararo sa Kristianong mga kongregasyon kan enot na siglo?
12 An pamilya na may marigon alagad mamomoton na pangengenot saka areglado posibleng sararo asin maogma. (Efeso 5:22, 33; 6:1) Si Jehova Dios nin matoninong na areglo, asin an gabos na yaon sa saiyang pamilya ibinibilang siang an “Kaharohalangkawe.” (Daniel 7:18, 22, 25, 27; 1 Corinto 14:33) Minimidbid man ninda na ninombrahan nia an saiyang Aki, si Jesu-Cristo, bilang an paramana sa gabos na bagay asin idinelegar sa saiya an gabos na autoridad sa langit asin sa daga. (Mateo 28:18; Hebreo 1:1, 2) Huling si Cristo an Payo, an Kristianong kongregasyon areglado, sararong organisasyon. (Efeso 5:23) Tanganing mapamahalaan an mga aktibidad kan mga kongregasyon kan enot na siglo, igwa kaidto nin namamahalang grupo na kompuesto kan mga apostol asin iba pang “kamagurangan na lalaki” na maygurang sa espirituwal. An indibiduwal na mga kongregasyon igwa nin nombradong mga paraataman, o kamagurangan, asin ministeryal na lingkod. (Gibo 15:6; Filipos 1:1) An pagkuyog sa mga nangengenot nakapaoswag sa pagkasararo.—Hebreo 13:17.
13. Paano dinadagka ni Jehova an mga tawo, asin ano an ibinubunga kaini?
13 Alagad an gabos daw na areglong ini nagsusuherir na an pagkasararo kan mga nagsasamba ki Jehova ikaaatribwir sa marigon, impersonal na pangengenot? Dai nanggad! An Dios asin an saiyang organisasyon bakong daing pagkamoot. Dinadagka ni Jehova an mga tawo paagi sa pagpaheling nin pagkamoot, asin kada taon ginatos na ribo an boluntad asin magayagayang nagigin kabtang kan organisasyon ni Jehova paagi sa pagpabautismo bilang simbolo kan saindang bilog na pusong pagdusay sa Dios. An kaisipan ninda kapareho kan ki Josue, na nagsadol sa mga kapwa Israelita: “Pumili kamo ngonyan kun siisay an saindong paglilingkodan . . . Alagad kun para sa sako asin sa sakong pamilya, kami maglilingkod ki Jehova.”—Josue 24:15.
14. Taano ta masasabi niato na teokratiko an organisasyon ni Jehova?
14 Bilang kabtang kan pamilya ni Jehova, kita bako sanang magayagaya kundi tiwasay man. Ini huli ta teokratiko an saiyang organisasyon. An Kahadean nin Dios sarong teokrasya (hale sa Griegong the·osʹ, dios, asin kraʹtos, pamamahala). Iyan pamamahala nin Dios, na iinorden asin inestablisar nia. An linahidan na “banal na nasyon” ni Jehova nagpapasakop sa saiyang pamamahala asin kun siring teokratiko man. (1 Pedro 2:9) Huli ta an Dakulang Teokrata, si Jehova, an satuyang Hokom, Paraboot, asin Hade, nasa sato an gabos na dahelan na matiwasay. (Isaias 33:22) Pero, ano kun may diskutiran na lumataw asin isapeligro an satong kagayagayahan, katiwasayan, asin pagkasararo?
Huminiro an Namamahalang Grupo
15, 16. Anong diskutiran an naglataw kan enot na siglo, asin taano?
15 Tanganing mapagdanay an pagkasararo nin sarong pamilya, kun beses kaipuhan na areglaron an sarong diskutiran. Kun siring, ipamugtak na kaipuhan na resolberan an sarong espirituwal na problema tanganing mapagdanay an pagkasararo kan pamilya nin Dios nin mga parasamba kan enot na siglo C.E. Ano na? Huminiro an namamahalang grupo, na naggigibo nin mga desisyon dapit sa espirituwal na mga bagay. Igwa kita nin tala sa Kasuratan kan siring na paghiro.
16 Kaidtong mga 49 C.E., an namamahalang grupo nagtiripon sa Jerusalem tanganing resolberan an sarong magabat na problema asin sa siring mapagdanay an pagkasararo kan “pamilya nin Dios.” (Efeso 2:19) Mga 13 taon bago kaini, si apostol Pedro naghulit ki Cornelio, asin an enot na mga Hentil, o mga tawo kan mga nasyon, nagin bautisadong mga nagtutubod. (Gibo, kapitulo 10) Kaidtong enot na biahe ni Pablo sa pagmimisyonero, dakol na Hentil an nag-ako sa Kristianismo. (Gibo 13:1–14:28) An totoo, may kongregasyon nin Hentil na mga Kristiano na naestablisar sa Antioquia, Siria. An ibang Kristianong Judio naghona na an nakombertir na mga Hentil maninigong paturi asin mag-otob sa Ley ni Moises, alagad an iba dai nag-oyon. (Gibo 15:1-5) An diskutiran na ini puede kutanang nagbunga nin biyong dai pagkasararo, pati kan pag-organisar nin separadong mga kongregasyon na Judio asin Hentil. Kun siring huminiro tolos an namamahalang grupo tanganing mapagdanay an Kristianong pagkasararo.
17. Anong may pagkaoroyon na teokratikong paagi an ilinaladawan sa Gibo kapitulo 15?
17 Sono sa Gibo 15:6-22, “an mga apostol asin an kamagurangan na lalaki nagtiripon sa pag-orolay dapit sa bagay na ini.” Igwa man nin ibang presente, kaiba na an sarong delegasyon hale sa Antioquia. Si Pedro enot na nagpaliwanag na ‘paagi sa saiyang ngoso an mga tawo kan mga nasyon nakadangog kan maogmang bareta asin tuminubod.’ Dangan “an bilog na kadaklan” naghinanyog mantang si Bernabe asin Pablo nagsasaysay “kan dakol na tanda asin ngangalasan na ginibo nin Dios paagi sa sainda sa tahaw kan mga nasyon,” o mga Hentil. Si Santiago sunod na nagsuherir kun paano reresolberan an hapot. Pakapagdesisyon kan namamahalang grupo, sinasabi sa sato: “Pinagmarahay kan mga apostol asin kan kamagurangan na lalaki kaibanan kan bilog na kongregasyon na magpadara nin mga lalaking pinili sa tahaw ninda pasiring sa Antioquia kaibanan ni Pablo asin Bernabe.” An “mga lalaking pinili” na idto—si Judas asin Silas—nagdara nin nakaparirigon sa boot na surat sa mga kapagtubod.
18. An namamahalang grupo guminibo nin anong desisyon may labot sa Ley ni Moises, asin paano ini nakaapektar sa mga Kristianong Judio asin Hentil?
18 An surat na nagpapaisi kan desisyon kan namamahalang grupo nagpoon sa mga tataramon na: “An mga apostol asin an kamagurangan na lalaki, mga tugang, sa mga tugang sa Antioquia asin Siria patin Cilicia na hale sa mga nasyon: Kumusta!” May iba pang nag-atender sa makasaysayan na pagtiripon na ini, alagad minalataw na an namamahalang grupo kompuesto kan “mga apostol asin [kan] kamagurangan na lalaki.” Giniyahan sinda kan espiritu nin Dios, ta an surat nagsasabi: “Pinagmarahay kan banal na espiritu asin niamo mismo na dai na kamo dugangan nin pasan, puera sana sa kinakaipuhan na mga bagay na ini, na kamo lumikay sa mga bagay na iinatang sa mga idolo asin sa dugo asin sa mga bagay na tinook patin sa pakikisaro.” (Gibo 15:23-29) Dai hinagad sa mga Kristiano na paturi asin otobon an Ley ni Moises. An desisyon na ini nakatabang sa mga Kristianong Judio asin Hentil na gumawe asin magtaram na sararo. Naggayagaya an mga kongregasyon, asin nagpadagos an mahal na marhay na pagkasararo, kun paanong iyan nagpapadagos sa lakop sa daga na pamilya nin Dios ngonyan sa irarom kan espirituwal na paggiya kan Namamahalang Grupo kan Mga Saksi ni Jehova.—Gibo 15:30-35.
Maglingkod na May Teokratikong Pagkasararo
19. Taano ta nag-oswag an pagkasararo sa pamilya kan mga nagsasamba ki Jehova?
19 Minaoswag an pagkasararo kun nakikokooperar sa lambang saro an mga miembro nin sarong pamilya. Totoo man iyan sa pamilya kan mga nagsasamba ki Jehova. Huling teokratiko, an kamagurangan asin iba pa sa kongregasyon kan enot na siglo naglingkod sa Dios na lubos an kooperasyon sa namamahalang grupo asin inako an mga desisyon kaiyan. Sa tabang kan namamahalang grupo, an kamagurangan ‘naghulit kan tataramon’ asin an mga miembro kan mga kongregasyon sa pankagabsan ‘nagtaram na may pagkaoroyon.’ (2 Timoteo 4:1, 2; 1 Corinto 1:10) Kaya pararehong katotoohan kan Kasuratan an iinatubang sa ministeryo asin sa Kristianong mga pagtiripon, baga man sa Jerusalem, Antioquia, Roma, Corinto, o saen pa man. Nag-eeksister ngonyan an siring na teokratikong pagkasararo.
20. Tanganing mapagdanay an satong Kristianong pagkasararo, ano an dapat niatong gibohon?
20 Tanganing mapagdanay an satong pagkasararo, kita gabos na kabtang kan lakop sa globong pamilya ni Jehova maninigong maghingoa na ipaheling an teokratikong pagkamoot. (1 Juan 4:16) Kaipuhan kitang pumasakop sa kabotan nin Dios asin ipaheling an hararom na paggalang sa ‘fiel na oripon’ asin sa Namamahalang Grupo. Kapareho kan satong pagdusay sa Dios, siempre an satong pagkuyog boluntad asin magayagaya. (1 Juan 5:3) Marahayon an pagkakonektar kan salmista sa kagayagayahan asin pagkuyog! Sia nag-awit: “Omawon nindo si Jah, banwaan! Maogma an tawo na natatakot ki Jehova, na sa saiyang mga togon nawiwili sia nin labi-labi.”—Salmo 112:1.
21. Paano niato mapatutunayan na kita teokratiko?
21 Si Jesus, an Payo kan kongregasyon, biyong teokratiko asin perming ginigibo an kabotan kan saiyang Ama. (Juan 5:30) Kun siring, arogon niato an satong Arogan paagi sa teokratiko asin sararong paggibo kan kabotan ni Jehova na lubos an kooperasyon sa Saiyang organisasyon. Dangan may odok sa pusong kagayagayahan asin pagpasalamat, maootro niato an awit kan salmista: “Uya! Kanigoan karahay asin kanigoan kaogma na an magturugang mag-ontok na sararo!”
Ano an Isisimbag Nindo?
◻ Paano ikakokonektar sa Salmo 133 an satong Kristianong pagkasararo?
◻ Ano an nagkapirang bagay na nakapaooswag sa pagkasararo?
◻ Taano ta mahalagang marhay an teokratikong areglo sa pagkasararo kan banwaan nin Dios?
◻ Paano huminiro an namamahalang grupo kan enot na siglo tanganing mapagdanay an pagkasararo?
◻ Ano an kahulogan sa saindo kan paglilingkod na may teokratikong pagkasararo?
[Retrato sa pahina 13]
Huminiro an namamahalang grupo tanganing mapagdanay an pagkasararo