‘Kaipuhan Kamong Magin Banal Huli ta Ako Banal’

“Maninigo kamong magin banal, huli ta akong si Jehova na saindong Dios banal.”​—LEVITICO 19:2.

1. Sairisay an nagkapirang tawo na ibinibilang kan kinaban na banal?

AN KADAKLAN na mayor na relihion kan kinaban may mga ibinibilang nindang banal. Si Madre Teresa na bantog sa India parateng ibinibilang na banal huli sa saiyang mapagsakripisyong debosyon sa mga dukha. An papa inaapod na “Santo Papa.” An kagpundar kan modernong mobimientong Katoliko na Opus Dei, si José María Escrivá, ibinibilang nin nagkapirang Katoliko na “modelo para sa kabanalan.” An Hinduismo may mga swami, o banal na mga lalaki. Si Gandhi tinawan nin onra bilang banal na lalaki. An Budismo igwa nin banal na mga monghe, asin an Islam nin banal na propeta. Alagad ano an eksaktong kahulogan kan pagigin banal?

2, 3. (a) Ano an kahulogan kan mga terminong “banal” asin “kabanalan”? (b) Ano an nagkapirang hapot na kaipuhan na masimbag?

² An terminong “banal” tinawan nin kahulogan na “1. . . . asosyado sa kapangyarihan nin sarong dios; sagrado. 2. Pinagheheling na may o angay sa pagsamba o odok na paggalang . . . 3. Namumuhay sono sa estrikto o moral na marhay na relihioso o espirituwal na palakaw . . . 4. Isabi nin malinaw o isiblag para sa sarong relihiosong katuyohan.” Sa kontekstong Biblikal, an kabanalan nangangahulogan nin “relihiosong kalinigan o kadalisayan; pagigin sagrado.” Sono sa reperensia sa Biblia na Insight on the Scriptures, “an orihinal na [termino sa] Hebreo na qoʹdhesh nagtatao kan ideya nin pagigin separado, pagigin esklusibo, o santipikasyon sa Dios, . . . kamugtakan nin pagigin itinagama sa paglilingkod sa Dios.”a

³ An nasyon nin Israel pinagbotan na magin banal. An Ley nin Dios nagsabi: “Ako si Jehova na saindong Dios; asin kaipuhan na santipikaron nindo an saindong sadiri asin kaipuhan na magpakabanal kamo, huli ta ako banal.” Siisay an Burabod nin kabanalan? Paano magigin banal an bakong sangkap na mga Israelita? Asin anong mga leksion an makukua niato para sa sato ngonyan sa pangapodan ni Jehova sa kabanalan?​—Levitico 11:44.

Kun Paano Konektado an Israel sa Burabod nin Kabanalan

4. Paano ipinag-ilustrar sa Israel an kabanalan ni Jehova?

⁴ An gabos na konektado sa pagsamba nin Israel ki Jehova Dios ibibilang na banal asin tatrataron na siring. Taano daw? Huli ta si Jehova mismo an ginikanan asin burabod nin kabanalan. An pagsaysay ni Moises sa pag-andam kan banal na tabernakulo asin kan mga sulot patin samno tinatapos sa mga tataramon na: “Sa katapustapusi ginibo ninda an makinang na plaka, an banal na tanda nin pagdusay, na gibo sa anas na bulawan asin sinuratan iyan nin mga tataramon paagi sa mga ukit nin sarong pantatak: ‘An kabanalan ki Jehova.’” An makinang na plakang ini na anas na bulawan nakatakod sa turbante kan halangkaw na saserdote, asin iyan tanda na sia isiniblag para sa sarong paglilingkod na may espesyal na kabanalan. Mantang naheheling ninda na nagkikinang sa liwanag kan saldang an may surat na tandang ini, an mga Israelita danay na napapagirumdom kan kabanalan ni Jehova.​—Exodo 28:36; 29:6; 39:30.

5. Paano ikabibilang na banal an mga Israelitang bakong sangkap?

⁵ Alagad paano magigin banal an mga Israelita? Solamente paagi sa saindang dayupot na relasyon ki Jehova asin sa saindang dalisay na pagsamba sa saiya. Kaipuhan ninda an tamang kaaraman manongod sa “Kabanalbanaleng Saro” tanganing masamba sia sa kabanalan, sa pisikal asin espirituwal na kalinigan. (Talinhaga 2:​1-6; 9:​10) Kun siring kaipuhan na an Dios sambahon kan mga Israelita na may dalisay na motibo asin dalisay na puso. An ano man na mapagsaginsagin na klase nin pagsamba ikababalde ni Jehova.​—Talinhaga 21:27.

Kun Taano an Israel ta Pinagdenunsiar ni Jehova

6. Ano an pagtratar kan mga Judio kaidtong kaaldawan ni Malaquias sa lamesa ni Jehova?

⁶ Ini malinaw na ikinailustrar kan an mga Israelita paramas sanang nagdadara nin maluyang klase, may depektong mga pan-atang sa templo. Paagi ki propeta Malaquias, pinagdenunsiar ni Jehova an saindang mga dolot na maluyang klase: “‘Dai ko kamo nawiwilihan,’ an sabi ni Jehova nin mga hukbo, ‘asin dai ko ikinaoogma an balaog na dolot hale sa saindong kamot.’ . . . ‘Alagad linalanghadan nindo ako sa pagsabi nindo, “An lamesa ni Jehova maati, asin an bunga kaiyan dapat na ikaongis, an kakanon dian.” Asin kamo nagsabi, “Uya! Nakapapagal!” asin pinapangyari nindo na iyan kusmodan,’ sabi ni Jehova nin mga hukbo. ‘Asin nagdara kamo nin bagay na inagaw, asin kan pilay, asin kan may helang; iyo, dinara nindo iyan bilang dolot. Ikaoogma ko daw iyan sa saindong kamot?’ an sabi ni Jehova.”​—Malaquias 1:​10, 12, 13.

7. Ano an mga gibong bakong banal kan mga Judio kaidtong ikalimang siglo B.C.E.?

⁷ Si Malaquias ginamit nin Dios sa pagdenunsiar sa falsong mga gibo kan mga Judio, posibleng kaidtong ikalimang siglo B.C.E. An mga saserdote nagtatao nin maluyang halimbawa, asin bako nanggad na banal an saindang gawe. An banwaan, sa pagsunod sa arogan na iyan, pabaya sa saindang mga prinsipyo, sagkod na idinidiborsio an saindang agom na babae, na posibleng tangani na sinda makapangagom nin mas hoben na mga pagano. Nagsurat si Malaquias: “‘Si Jehova mismo nagpatotoo sa pag-oltanan mo asin kan agom na babae nin saimong pagkabarobata, na saimo mismong pinasaloiban,b minsan ngani sia an saimong kapadis asin an agom na babae kan saimong tipan. . . . Asin kaipuhan na ingatan nindo an saindong sadiri mapadapit sa saindong espiritu, asin mayo logod nin siisay man na magpasaloib sa agom na babae kan saimong pagkabarobata. Huli ta saiyang ikinaongis an pagdidiborsio,’ an sabi ni Jehova na Dios nin Israel.”​—Malaquias 2:​14-16.

8. Paano naapektaran an nagkapira sa Kristianong kongregasyon kan modernong punto-de-vista manongod sa diborsio?

⁸ Sa modernong mga panahon, sa dakol na nasyon na madaling makakua nin diborsio, luminangkaw nin bigla an bilang nin mga diborsio. Pati an Kristianong kongregasyon naapektaran. Imbes na patabang sa mga magurang sa kongregasyon na mapangganahan an mga kaolangan asin pagmaigotan na magin mapanggana an saindang pag-agoman, an nagkapira listong isinikwal iyan. Parate na an mga aki an nagsasakit na marhay an boot bilang karibay.​—Mateo 19:​8, 9.

9, 10. Paano niato maninigong horophoropon an satong pagsamba ki Jehova?

⁹ Arog kan naheling niato sa enotan, huli sa makamomondong espirituwal na kamugtakan kan kaaldawan ni Malaquias, prangkang kinondenar ni Jehova an hababaw na pagsamba kan Juda asin ipinaheling na solamente dalisay na pagsamba an aakoon nia. Bako daw na ini maninigong magpahorophorop sa sato manongod sa kualidad kan satong pagsamba ki Jehova Dios, an Soberanong Kagurangnan kan uniberso, an Burabod nin tunay na kabanalan? Talaga daw na nagdodolot kita sa Dios nin banal na paglilingkod? Pinapagdadanay daw niato an satong sadiri sa kamugtakan na malinig sa espirituwal?

¹⁰ Ini dai nangangahulogan na kaipuhan kitang magin sangkap, na imposible, o na maninigo niatong ikomparar an satong sadiri sa iba. Alagad iyan nangangahulogan na an lambang Kristiano maninigong magtao sa Dios nin pagsamba na pinakamakakaya nia sono sa mga kamugtakan kan indibiduwal. Ini nanonongod sa kualidad kan satong pagsamba. An satong sagradong paglilingkod maninigo na an pinakamakakaya niato​—banal na paglilingkod. Paano daw magigibo iyan?​—Lucas 16:​10; Galacia 6:​3, 4.

An Dalisay na Puso Minagiya Pasiring sa Dalisay na Pagsamba

11, 12. Saen minagikan an gaweng bakong banal?

¹¹ Malinaw na itinokdo ni Jesus na an nasa puso mahahayag sa sinasabi asin ginigibo nin sarong tawo. Sinabihan ni Jesus an nagpapakangmatanos, pero bakong banal, na mga Fariseo: “Kamong kapag-arakian nin mga rimoranon, paano kamo makapagtataram nin marahay, mantang kamo maraot? Huli ta gikan sa kapanoan kan puso nagtataram an ngoso.” Kan huri ipinaheling nia na an maraot na mga hiro-hiro minagikan sa maraot na mga kaisipan sa puso, o panlaog na persona. Sia nagsabi: “An mga bagay na minaluwas sa ngoso gikan sa puso, asin an mga iyan an nakapararamog sa tawo. Halimbawa, gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad. Ini an mga bagay na nakapararamog sa tawo.”​—Mateo 12:34; 15:18-​20.

¹² Tinatabangan kita kaini na masabotan na an mga hiro-hirong bakong banal bako sanang basta na sana minaluwas o mayo nin naenot na basihan. Iyan bunga nin nakapararamog na mga kaisipan na nagtatago sa puso​—sekretong mga kamawotan asin tibaad mga pangarap. Iyan an dahelan na nasabi ni Jesus: “Nadangog nindo na sinabi, ‘Dai ka magsambay.’ Alagad ako nagsasabi sa saindo na an lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” Sa ibang pagtaram, an pakikisaro asin pagsambay nakagamot na sa puso bago mangyari an ano man na hiro. Dangan, kun magkaigwa nin tamang mga kamugtakan, an mga kaisipan na bakong banal nagigin gaweng bakong banal. An pakikisaro, pagsambay, sodomiya, paghabon, mga paglanghad, asin apostasiya nagigin nagkapira sa hayag na mga resulta.​—Mateo 5:​27, 28; Galacia 5:​19-​21.

13. Ano an nagkapirang halimbawa sa kun paano an mga kaisipan na bakong banal puedeng magdara sa mga hiro-hirong bakong banal?

¹³ Ini ikaiilustrar sa manlaenlaen na paagi. Sa nagkapirang nasyon, nagraralataw na garo kurakding an mga sugalan, sa siring pinadadakol an oportunidad na maghuego. An saro tibaad masugotan na probaran an solusyon daang ini sa paghihingoang resolberan an saiyang pinansial na mga problema. An mapandayang mga pangangatanosan tibaad makadara sa sarong tugang na isikwal o salakan an saiyang mga prinsipyo sa Biblia.c Sa saro pang kaso, an madalion na pakaheling nin pornograpiya, baga man paagi sa TV, mga video, komputer, o libro, puedeng magdara sa sarong Kristiano sa gaweng bakong banal. Basta pabayaan sana nia an saiyang espirituwal na pangalasag, asin bago nia iyan marisa, naholog na sia sa inmoralidad. Alagad sa kadaklan na kaso an pagkaholog sa kasalan minapoon sa isip. Iyo, sa mga situwasyon na arog kaini, naootob an mga tataramon ni Santiago: “An lambang saro nasusugotan kun sia nabobotong asin nadadara kan saiyang sadiring horot. Dangan an horot, kun iyan nangingidam, nangangaki nin kasalan.”​—Santiago 1:​14, 15; Efeso 6:​11-​18.

14. Paano naulian an dakol sa saindang gaweng bakong banal?

¹⁴ Makaoogma, an dakol na Kristiano na nagkakasala huli sa kaluyahan nagpapaheling nin tunay na pagsolsol, asin an mga siring ikinababalik kan kamagurangan sa espirituwal na paagi. Minsan an dakol na natitiwalag huli sa dai pagsolsol sa huri nakakapag-isip-isip asin nakababalik sa kongregasyon. Narerealisar ninda kun gurano kapasil sindang nadaog ni Satanas kan togotan nindang makagamot sa puso an mga kaisipan na bakong banal.​—Galacia 6:1; 2 Timoteo 2:​24-​26; 1 Pedro 5:​8, 9.

An Angat​—Atubangon an Satong mga Kaluyahan

15. (a) Taano ta kaipuhan na atubangon niato an satong mga kaluyahan? (b) Ano an makatatabang sa sato na midbidon an satong mga kaluyahan?

¹⁵ Kaipuhan na maghingoa kita na mamidbid an satong puso basado sa mga katunayan. Andam daw kitang atubangon an satong mga kaluyahan, midbidon iyan, dangan maghingoa na daogon iyan? Andam daw kitang hapoton an sarong sadiosan na katood kun paano kita puedeng umoswag, dangan hinanyogon an hatol? Tanganing magdanay na banal kaipuhan na mapaglabanan niato an satong mga pagkukulang. Taano? Huli ta aram ni Satanas an satong mga kaluyahan. Gagamiton nia an saiyang pairarom na mga pakana tanganing sutsutan kita sa pagkakasala asin sa gaweng bakong banal. Paagi sa saiyang tusong mga gibo, hinihingoa nia na isiblag kita sa pagkamoot nin Dios tangani na bako na kitang banal asin kapakipakinabang sa pagsamba ki Jehova.​—Jeremias 17:​9; Efeso 6:​11; Santiago 1:19.

16. Anong labanan an namatean ni Pablo?

¹⁶ Si apostol Pablo nagkaigwa man nin mga kasakitan asin pagbalo, arog kan pinatutunayan nia sa saiyang surat sa mga taga-Roma: “Aram ko na sa sako, an boot sabihon, sa sakong laman, mayo nin marahay na nag-eerok; huli ta an kakayahan na magmawot nasa sako, alagad an kakayahan na gumibo kan marahay mayo. Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko. . . . Tunay na ako naoogma sa ley nin Dios oyon sa sakong pagkatawo sa laog, alagad nakaheheling ako nin laen na ley sa mga kabtang kan sakong hawak na minatumang sa ley kan sakong isip asin dinadara ako sa pagkabihag sa ley nin kasalan na yaon sa mga kabtang kan sakong hawak.”​—Roma 7:​18-23.

17. Paano nanggana si Pablo sa saiyang pakikilaban sa mga kaluyahan?

¹⁷ Ngonyan an mahalagang marhay na punto sa kaso ni Pablo iyo na minidbid nia an saiyang mga kaluyahan. Apisar kan mga iyan, sia nakasabi: “Tunay na ako naoogma sa ley nin Dios oyon sa sakong [espirituwal na] pagkatawo sa laog.” Si Pablo namomoot sa marahay asin ikinaoongis an maraot. Alagad nakipaglaban pa man giraray sia, arog kan pakikilaban niato gabos​—tumang ki Satanas, sa kinaban, asin sa laman. Kaya paano niato gaganahon an pakikilaban na magdanay na banal, siblag sa kinaban na ini asin sa kaisipan kaiyan?​—2 Corinto 4:​4; Efeso 6:12.

Paano Kita Makapagdadanay na Banal?

18. Paano kita makapagdadanay na banal?

¹⁸ An kabanalan dai naaabot paagi sa paggibo kan pinakapasil o paagi sa pagigin mapagpanigo sa sadiri. An siring na tawo perming mananarahotan para sa saiyang gawe asin maghihingoa na itao sa iba an kabasolan. Tibaad kaipuhan kitang makanood na magin responsable sa satong mga hiro-hiro asin dai umarog sa iba na nagsasabing nakatalaga na an saindang magigin mga hiro-hiro huli sa ginikanan na pamilya o minanang mga ugale. An pinakagamot kan bagay nasa puso kan indibiduwal. Sia daw namomoot sa katanosan? hinihimuyawot an kabanalan? nagmamawot kan bendisyon nin Dios? Liniwanag kan salmista an pangangaipo nin kabanalan kan sia magsabi: “Humarayo ka sa maraot, asin gumibo ka kan marahay; hanapa an katoninongan, asin sundon iyan.” Si apostol Pablo nagsurat: “An saindo logod na pagkamoot mayo nin pagsaginsagin. Ikabalde an maraot, mangapot sa marahay.”​—Salmo 34:14; 97:​10; Roma 12:9.

19, 20. (a) Paano niato mapakokosog an satong isip? (b) Ano an kaipuhan sa epektibong personal na pag-adal?

¹⁹ Kita ‘makapangangapot sa marahay’ kun mamansayon niato an mga bagay sa punto-de-vista ni Jehova asin kun nasa sato an kaisipan ni Cristo. (1 Corinto 2:16) Paano ini magigibo? Paagi sa dayaday na pag-adal asin paghorophorop sa Tataramon nin Dios. Gurano kaparateng itinatao an sadol na ini! Alagad iyan daw isinasaboot nanggad niato? Halimbawa, talaga daw na pinag-aadalan nindo an magasin na ini, na binabasa an mga teksto sa Biblia, bago kamo dumuman sa pagtiripon? Sa pag-adal dai niato boot sabihon kuritan sana sa irarom an nagkapirang frase sa kada parapo. An artikulong pag-aadalan puedeng salimbadan asin kuritan sa irarom sa laog nin mga 15 minutos. Iyan daw nangangahulogan na pinag-adalan niato an artikulo? An totoo, tibaad kaipuhan an saro o duwang oras tanganing adalan asin isaboot an espirituwal na pakinabang na itinatao kan kada artikulo.

²⁰ Tibaad kaipuhan na disiplinahon niato an satong sadiri na talikdan an TV sa laog nin nagkapirang oras kada semana asin magkonsentrar talaga sa satong personal na kabanalan. An satong dayaday na pag-adal nagpapakosog sa sato sa espirituwal, na pinahihiro an isip na gumibo nin tamang mga desisyon​—mga desisyon na minagiya pasiring sa “banal na mga gawe.”​—2 Pedro 3:​11; Efeso 4:​23; 5:​15, 16.

21. Anong hapot an sisimbagon pa?

²¹ An hapot ngonyan, Sa ano pang ibang aktibidad asin gawe na kita bilang mga Kristiano puedeng magin banal, kun paanong si Jehova banal? An minasunod na artikulo magpapaheling nin mga hohorophoropon.

[Mga Nota sa Ibaba]

Nagigirumdoman daw Nindo?

◻ Paano ipinamidbid sa Israel an Burabod nin kabanalan?

◻ Sa anong mga paagi na an pagsamba kan mga Israelita bakong banal kan kaaldawan ni Malaquias?

◻ Saen minapoon an gaweng bakong banal?

◻ Tanganing magin banal, ano an kaipuhan na midbidon niato?

◻ Paano kita makapagdadanay na banal?